Cyanocitta cristata

Les especies d'aves con nome común en llingua asturiana márquense como ^NOA. En casu contrariu, conséñase'l nome científicu.

Cyanocitta cristata
Estáu de caltenimientu
Esmolición menor (IUCN 3.1)
Clasificación científica
Reinu:	Animalia
Filu:	Chordata
Subfilu:	Vertebrata
Clas:	Aves
Orde:	Passeriformes
Familia:	Corvidae
Xéneru:	Cyanocitta
Especie:	C. cristata Linnaeus, 1758
Distribución
Mariellu: Zona de cría Verde: Tol añu Azul: Zona d'ivernada.
Consultes
[editar datos en Wikidata]

Cyanocitta cristata o Glayu azul, ye un córvidu norteamericanu.

Descripción

La so plumaxe ye predominantemente azul de mediu cuerpu pa enriba, de la cabeza a lo cabero. Tien una cresta pronunciada. El color camuda a negru, celeste y con llistes blanques nes rémige y los caudales. Per debaxo ye blancu, con un collar negru alredor del pescuezu y los llaos de la cabeza, y cola cara blanca.

Como n'otres aves azulaes, la coloración del glayu azul nun deriva de pigmentos, sinón que ye la resultancia de la refraición de la lluz debío a la estructura interna de les plumes; si entartalla una de les plumes la coloración azul sume, pos la estructura foi destruyida. Esto llámase coloración estructural.

El cantar paecer al d'otros córvidos en que ye bien variáu, pero'l soníu más común ye la voz d'alarma, que ye un berru ruidosu, cuasi como'l d'una gavilueta. Tamién emiten un agudu yaie-yaie, que la so frecuencia aumenta a midida que l'ave escítase.

Distribución

Ocupa gran parte del este d'América del Norte, dende Terranova hasta Florida, llegando pol suroeste de la so distribución hasta Texas, y a Colorado pel noroeste. Al oeste de los Predreses ye reemplazáu pol glayu de Steller. Tamién hai exemplares nel estáu mexicanu de Tamaulipas que se destribuyen na Reserva de la Biosfera El Cielu.

Anque'l glayu azul polo xeneral permanez tol añu nel so área de distribución, delles poblaciones nortices migren a la parte sur de la distribución pel hibiernu (migren de día).

Hábitat

Alcuéntrase sobremanera en montes mistos (qu'inclúin l'haya americana y delles especies de carbayu), pero tamién ye visible en parques y xardinos de delles ciudaes.

Comportamientu

Alimentación

Busca la so comida tantu nel suelu como nos árboles, y consume práuticamente tou tipu d'alimentos vexetales y animales, tales como abiyotes, fayucos, granes d'herbales, granos, frutos, bayes, cacagüeses, pan, carne, güevos y pitucos d'otres aves, munchos tipos d'invertebraos, basura de los parques y alimentu pa páxaros.

El so comportamientu agresivu nos cebadorios de páxaros, según la so mala reputación como destructor de niales y güevos d'otros páxaros fixeron que de cutiu el glayu azul nun seya bienveníu en munchos comederos por quien los instalen. La so mala fama pasó a la lliteratura, como na novela de Harper Lee Matar un ruiseñor.

Reproducción

Glayu azul nel parque provincial Algonquin (Canadá).

Cualquier árbol o arbustu grande disponible sírvelos p'añerar. Fema y machu collaboren en construyir el nial y alimentar a la niarada, anque solo la fema guara. La puesta suel ser de 4 o 5 güevos y ye guariada mientres 16 a 18 díes. Xeneralmente los pitucos vuelen ente los 17 y 21 díes.

Típicamente formen pareyes monógames pa tola vida.

Miscelánea

El glayu azul ye l'ave de la provincia canadiense de la Islla del Príncipe Dubardu y dio nome al equipu de béisbol Toronto Blue Jays.

Da nome a los equipos deportivos de les universidaes Creighton y Johns Hopkins.

Blue Jay (glayu azul n'inglés) ye'l nome d'una cai de Los Angeles, conocida por dar nome al cantar «Blue Jay Way», de George Harrison.

Coincidentemente, el glayu azul ye'l logotipu de la rede social Twitter.

La serie animada Regular Show tien un personaxe llamáu Mordecai, que ye un glayu azul.

Enllaces esternos

• Wikimedia Commons acueye conteníu multimedia sobre Cyanocitta cristata .

• Datos: Q199758
• Multimedia: Cyanocitta cristata
• Especies: Cyanocitta cristata