Colonia (Uruguái)
Colonia ye un departamentu uruguayu allugáu nel suroeste del país, sobre'l llitoral onde desagüen los ríos Paraná y Uruguái. Llenda al norte con Soriano, al noreste con Flores, al este con San José, y al sur y al oeste cola capital d'Arxentina, Buenos Aires, de la que lo separta l'estuariu del Ríu de la Plata. La so superficie ye de 6.106 qum², y tien una población estimada de 123 203 habitantes según el censu de 2011, lo que lu convierte nunu de los departamentos más poblaos del Uruguái.[1]
| Colonia | |||||
|---|---|---|---|---|---|
 | |||||
| |||||
| Alministración | |||||
| País |  Uruguái | ||||
| ISO 3166-2 | UY-CO | ||||
| Tipu d'entidá | departamentu d'Uruguái | ||||
| Capital | Colonia del Sacramento | ||||
| División |
ver
| ||||
| Xeografía | |||||
| Coordenaes | 34°S 58°W / 34°S 58°O | ||||
 | |||||
| Superficie | 6106 km² | ||||
| Llenda con | Flores, San José, Soriano, Entre Ríos y Provincia de Buenos Aires | ||||
| Altitú media | 71 m | ||||
| Demografía | |||||
| Población | 132 204 hab. (2011) | ||||
| Densidá | 21,65 hab/km² | ||||
| Más información | |||||
| Estaya horaria | UTC−03:00 | ||||
| Fundación | 27 xineru 1816 | ||||
 | |||||
La capital departamental ye la ciudá de Colonia del Sacramento, asitiada a 177 km de Montevidéu.
Aspectos históricos
editarEtimoloxía
editarEl nome de "Colonia" remanez de Colonia del Sacramento, ciudá que dio orixe a la denomación actual pola que se conoz a esti departamentu. Ésta, al empar, fai referencia a la multitú d'imperios qu'exercieron el so poder sobre ella en tiempos coloniales, esto ye, cuando formaba parte de la Banda Oriental. La metrópolis foi colonia y centru d'importantes conflictos armaos que pretendríen facese con ella, violando dafechu importantes trataos diplomáticos.
La dómina colonial
editar Colonia del Sacramento, güei considerada Patrimoniu de la Humanidá, fundóse en 1680 poles tropes portugueses que s'asentaren sobre les costes rioplatenses. Pa entóncenes, los reinos d'España y Portugal alcontrábense nuna guerra constante y insaciable, ya que dambos países procuraben ampliar el so poderíu pasando perenriba d'acuerdos billaterales.
En resultes, tanto la ciudá propiamente dicha como'l departamentu foron dende los sos entamos, testigos del enfrentamientu bélicu a nivel xeopolíticu más relevante del Ríu de la Plata.
Esti enclave foi tomáu en delles ocasiones polos españoles, pasando de mano en mano hasta cayer otra vuelta baxo dominiu lusitanu y d'ésti al brasilanu. Pondríase fin a la dixuntiva al proclamase la Declaración d'Independencia de la que fora nesi intre la Provincia Cisplatina, que pasaría a ser conocida como la República Oriental del Uruguái, n'agostu de 1825.
Estos fechos fixeron de la capital coloniense, un mecigayu d'estilos arquiteutónicos, edificaciones al estilu colonial típicamente portugués qu'incluyíen cases de piedra macizo con teyaos de dos a cuatro agües, nun claru contraste con aquelles viviendes de porte español que preferíen l'emplegu d'otros materiales y téuniques de construcción como'l lladriyu y los yechos d'azotea.
Colonia del Sacramento emplazóse sobre la península de San Gabriel, y el so cascu vieyu abarca namái 12 hectaries del so postreru occidental, y anguaño funciona como un "Parque Históricu Nacional" nel que s'ufren visites guiaes percorriendo museos, fortificaciones y viviendes primitives.
El planu de la ciudá ye tamién de calter portugués, y contrasta col estándar que llexislaba na llei española sobre les Indies, peculiarizándose asinamesmo poles sos caleyes de piedra, que resalten la so tradición militar.
Xeografía
editar
Colonia forma parte de la llamada "llanera platense", carauterizada poles sos tierres baxes, la campa territorial y les eríes pampianes bañaes de ríos y regueros que desemboquen nel Ríu de la Plata y los sos afluentes.
Orografía
editarEl suelu coloniense compónse de xerrascos que dan llugar a mares de piedra, como ye'l casu de la Sierra del Mal Abrigo. El restu del departamentu constitúenlo arenes y xacimientos de magries. La cuchiella de San Salvador na llende con Soriano ye la más importante en cuantes a relieve d'altura.
Hidrografía
editarDispón d'un reducíu, magar que non menos importante, caudal de ríos y ñores que muerren, na so mayoría, nel Ríu de la Plata. Éstos son: los ríos Rosario y San Juan, y les ñores de las Vacas, las Víboras, Cufré y Miguelete.
Clima
editarEl clima ye abeyosu y templáu, con unes temperatures añales que s'averen a los 17 y 18 ᵘC, y un índiz de precipitaciones que s'asitien en tornu a 1.000 mm de permediu añal. Esti allugamientu favoratible, xunto cola composición natural de los sos suelos, abre pasu al usu de les eríes graminies con destín a la industria ganadera ovina y bovina.
Flora y fauna
editarLa vexetación ye meramente pampiana: pastures verdes y xugoses, arbustos, árboles d'altor medianu (ocalitu, algarrobu, ficus, desmayos, ombú, pinu, etc). La fauna compónese de ganáu (vacún, ovín, caballar, porcín), aves de corral, teros, colibríes, venteveos, cotorres de campu, rapiegos, llebres, coneyos y ratos xabaces.
Sobre'l llitoral rioplatense bsérvese distintes especies de pexes, y la famosa tolina del Plata.
Comunicaciones
editarAsitiao enfrente de la capital arxentina, Colonia presenta una situación xeográfica privilexada, y de la que munchos quixeron aprovechase a lo llargo de la historia. Ye davezu un llugar de pasu, recibiendo un volume curiosu de turistes nes fines de selmana, éspoca estival o en selmana santa. El mediu de tresporte usáu por escelencia ye'l buquebus, un barcu que zarpa dende'l Puertu de Buenos Aires y percuerre bona parte del ríu de la Plata hasta anclar en Colonia del Sacramento o, con menos intensidá, nel Puertu de Montevidéu, qu'en cualquier casu treviesa tamién l'agua coloniense.
D'esta miente, los que provienen d'otres partes del país suelen embarcar en Colonia con destín a l'Arxentina, siguiendo'l mesmu trayeutu y arribando en plena capital federal, nun tramu que varía dende una hora a trés hores de viaxe (tiempu estimáu en cruciar l'estuariu del Plata de llau a llau, y dependiendo de les condiciones climátiques).
Otres rutes d'accesu (per vía terrestre) son: la nacional nᵘ 1 (tamién conocida como Brigadier Manuel Oribe), que ñaz en Montevidéu en sen oeste y abarca al departamentu de San José; la nᵘ 2 (o del Grito de Asencio) que sal de Fray Bentos y muerre en Rosario; o la nᵘ 11 (José Batlle y Ordoñez) que procede dende Canelones y entesecta cola nᵘ 1 na llocalidá maragata d'Ecilda Paullier, a unos pocos quilómetros enantes d'aportar a Nueva Helvecia.
Finalmente, la capital departamental dispón d'un pequeñu aeropuertu nacional y rexonal que suelen utilizar les compañíes privaes de vuelu.
La llinia férrea que dende San José aportaba a Montevidéu alcuéntrase trancada dende 1991, anque hai proyeutos pa la so reapertura.
Nos caberos años plantegóse ente dambos gobiernos, l'arxentín y l'uruguayu, la construcción d'una ponte internacional qu'axunte les dos orielles del Ríu de la Plata, siendo la más llarga del mundu. Sicasí, y a pesar de los intentos por concretar el proyeutu, nun se recaldaron los fondos pa dar empiezu a les obres.
Economía
editar
El departamentu ye'l primer a nivel nacional en cuantes a la producción de lácteos. Espórtense tolos sos derivaos, seya yá quesu (en distintes variedaes), mantega, yogur, dulce de lleche y crema doble (o ñata), ente otros. Por esti motivu, munches empreses multinacionales decidieren instalar les sos sucursales na rexón.
L'apicultura ye una tradición dende qu'aportara un fueru escomanáu d'inmigrantes europeos provenientes d'Italia y Suiza, principalmente. Ciudaes como Nueva Helvecia, na que habitantes son en gran midida descendientes de suizos, poseye quiciás la producción de miel más grande del país. Nella y n'otres estayes de Colonia ye común alcontrar granxes artesanales onde los turistes y los naturales son brindaos a prebar les mermelaes, el dulce de lleche casero, el quesu colonia y una gran variedá de vinos.
Amás, criase ganáu ovín, vacún y porcín.
L'agricultura compriende la plantación y collecha de maíz, xirasol, llinu, cebada, vide, frutos, aceitunes y dellos ballicos. Tamién hai canteres de talcu, piedra caliar y piedres pa la construcción. L'actividá principal portuaria concéntrase en Juan Lacaze, Colonia del Sacramento, Nueva Palmira y Carmelo. La estracción de piedres, les plantes industriales productores de papel, fibres sintétiques y texíos, asina como los molinos de refinamientu de fariña, l'astilleru y los artículos d'aluminiu, suponen otru ingresu importante de capital.
Cultura
editar
Xunto a Canelones y Montevidéu, Colonia ye'l tercer departamentu con mayor índiz de población d'orixe italo-helvéticu. Sicasí, a diferencia de los primeros, la cantidá de población ye abondo inferior y afáyense dispersos en dellos emplazamientos urbanos de menor consideración. Polo tanto, esto favoreció la evolución de pequeñes comunidaes diferentes nel estilu vida y nes costumes d'otros requexos del Uruguái.
Esti procesu tien llugar a finales del sieglu XIX y a principios del XX, cuando la situación económica d'Europa yera complicada y numberoses families buscaben un meyor porvenir n'América. Colonia, dada la so condición de puertu, acoyera a una considerable masa d'inmigrantes d'oríxenes variaos, ente ellos, de Suiza, Italia, Polonia, España, y de Francia y Alemaña en menor midida. Col pasu del tiempu fadríase notar la influyencia estranxera sobre l'autóctona, fundándose nuevos pueblos y esplotaciones rurales y faciendo cuenta a nuevos vezos.
Anque la so llingua materna perdiérase colos años en detrimientu del castellanu, el llegáu que dexaron ye invaluable, al puntu de que ye imposible falar de Colonia ensin facer referencia a los sos quesos suizos (semiduro, el típicu "colonia", artesanal, rocquefor, etc), a les sos pizzes, a les sos mermelaes caseres, a la so gastronomía a base de pexe, salses italianes (como la carusso), pastes (añolotis, ñoquis, sorrentinos), y a la so viticultura.
Al igual que nel restu del país, el 29 de cada mes estableciérase como'l "día del ñoqui", un momentu afayadizu nel que tola familia aconceya nuna mesa p'almorzar y/o cenar esa pasta fecho a base de pataca. Acompáñase con diferentes tipos de salsa y colócase una moneda embaxo del platu de caún de los presentes pa dar bona suerte y bienestar económicu.
Aquelles ciudaes fundaes polos inmigrantes son: Nueva Helvecia (antes llamada Colonia Suiza), Colonia Valdense, y Colonia Piamontesa (creada por ciudadanos d'El Piamonte, rexón del norte d'Italia).
Gobiernu
editarD'acuerdu col artículu 262 de la Constitución de la República, en materia d'alministración departamental "el Gobiernu y Alministración de los Departamentos, con esceición de los servicios de seguridá pública, sedrán exercíos por una Xunta Departamental y un Intendente. Tendrán la so sede na capital de cada departamentu y aniciarán les sos funciones sesenta díes dempués de la so eleición." Amás, "l'Intendente, con acuerdu de la Xunta Departamental, podrá delegar nes autoridaes llocales l'exerciciu de determinaos cometíos nes sos respeutives circuscripciones territoriales"(...).
Demografía
editarConforme al censu de 2004, había un total de 119.266 persones y 40.243 viviendes nel departamentu. El llar permediu yera d'un 3,2, y ca 100 muyeres había 96,7 homes. Asina mesmo, según estimaciones riealizaes pol Institutu Nacional d'Estadística (INE) del Uruguái, Colonia, al igual que'l restu del país, esperimenta una medría nula y cuasi negativa, polo que les cifres suponen que pa principios de 2025, habrán 120.196 persones nel so territoriu.[2]
- Tasa de crecimientu poblacional: 0,448% (2004)
- Tasa de natalidá: 15,05 nacimientos/1.000 habitantes (2004)
- Tasa de mortalidá: 9,97 baxes/1.000 habitantes
- Edá permediu: 33,5 (32,5 homes, 34,6 muyeres)
- Esperancia de vida al nacer (2004):
| Xeneral: | 76,54 años |
| homes: | 72,68 años |
| muyeres: | 80,61 años |
- Permediu de fíos por familia: 2,19 fíos/muyer
- Ingresu urbanu per cápita (en ciudaes de 5.000 o más habitantes): 4.385,6 pesos uruguayos/mes
Crecimientu de la población (n'habitantes):[3]
- 1852: 7.971
- 1860: 13.349
- 1908: 54.644
- 1963: 105.276
- 1975: 111.832
- 1985: 112.717
- 1996: 120.241
- 2004: 119.266
Principales llocalidaes del departamentu
editar
Colonia del Sacramento ye'l puertu activu más importante del departamentu, y ún de los más influyentes nel estuariu del Plata. Otres llocalidaes que lu secunden son: Juan Lacaze (puertu industrial), Carmelo (poseye astilleros sobre la ñora de Las Vacas), Nueva Helvecia o Colonia Suiza, Rosario, Nueva Palmira y Colonia Valdense.
Darréu úfrese una esbilla con aquelles ciudaes o pueblos con una población superior a los 1.000 habitantes según el censu de 2004, a menos que s'especifique otra data:
| Ciudá/Pueblu | Población |
|---|---|
| Carmelo | 16.628 |
| Colonia del Sacramento | 21.744 |
| Colonia Valdense | 2.876 (1996) |
| Florencio Sánchez | 3.038 (1996) |
| Juan Lacaze | 13.015 |
| Nueva Helvecia | 9.607 |
| Nueva Palmira | 8.410 |
| Ombúes de Lavalle | 3.189 (1996) |
| Rosario | 9.403 |
| Tarariras | 6.174 (1996) |
| Conchillas | 756 |
Otros nucleos
editar- Barker: sureste, sobre la nᵘ 54, próximu a Rosario.
- Campana: allugáu sobre la ruta nᵘ 55, alcuéntrase a unos kilómteros al sur d'Ombúes de Lavalle.
- Cerro de las Armas: centro-norte, a pocos quilómetros de Miguelete.
- Conchillas: fundóse a fines del sieglu XIX pola empresa inglesa Walker & Co. al envís d'estrayer arena y granitu pa la construcción del puertu de Buenos Aires. La zona vivió un auxe al abrise en 1911 la Casa Evans, d'esportación y importación, que tuvo zona franca y barcu: La flor del Uruguái. Pero tres la crisis del imperiu británicu, foi vendío en 1951 a estancieros uruguayos, que vendieron al empar les viviendes a los sos arrendatarios y estos siguen siendo mayoría ente los 700 habitantes del pobláu (2007).
- Cufré: allugáu al este del departamentu, sobre la ruta nᵘ 51.
- El Cerro: allúgase al oeste Colonia, próximu a Carmelo.
- El Cuadro: centro-oeste, sobre la ruta nᵘ 106 con destín a Miguelete y Soriano.
- El General: continuación de Colonia del Sacramento.
- Florencio Sánchez: noreste de Colonia, na llende con Soriano. Accédese a elli pela ruta nᵘ 12.
- Islla Sola: contra les costes de Carmelo, ente les llendes d'Arxentina y Uruguái.
- La Estanzuela - Artilleros: so la ruta nᵘ 50, al norte de Riachuelo y Colonia del Sacramento.
- La Paz (CP): sureste de Colonia, sobre la ruta nᵘ 52, próximu a Rosario y Colonia Valdense. (CP) = Colonia Piamontesa.
- Los Pinos, sobre la costa del Río de la Plata, a 10 km de Colonia Valdense.
- Manantiales: zona central, nel desvíu de la ruta nᵘ 54.
- Martín Chico: llitoral occidental, contra les islles d'Martín García y Timoteo Domínguez.
- Miguelete: norte departamental, sobre la ruta nᵘ 106.
- Minas de Narancio: oeste coloniense, sobre la ruta nᵘ 22, xunto al bustiellu de San Juan.
- Ombúes de Lavalle: importante centru urbanu asitiáu sobre la marxe setentrional, sobre la ruta nᵘ 55 con destín a Soriano.
- Riachuelo: sur de Colonia, so la nᵘ 50 y Punta Angostura. A unos km. respectu a la capital.
- San Gabriel: pequeña islla asitiada sobre la marxe de la península del mesmo nome, contra la costa de Colonia del Sacramento.
- San Luis: zona central, nel desvíu de la ruta nᵘ 54, allugáu sobre la pista de trenes y a unos cuantos metros de la so vecina Manantiales.
- Terminal: centro-este, xunto a la nᵘ 54.
- Santa Ana, Artilleros, Punta Artilleros, Britópolis, Fomento, Santa Regina y Brisas del Plata.[4]
Referencies
editar- ↑ Institutu Xeográficu Militar y Institutu Nacional d'Estadística
- ↑ Proyeiciones de población pal departamentu de Colonia-Estudiu realizáu pol Institutu Nacional d'Estadística del Uruguái.
- ↑ Censos de población por departamentu: Colonia de 1852 a 2004
- ↑ Mapa de la República Oriental del Uruguái. Silveira ediciones (2004)
Enllaces esternos
editar
Wikimedia Commons tien conteníu multimedia tocante a Colonia.- Colonia en la Enciclopedia Geográfica del Uruguay
- Breve reseñu xeográficu'l departamentu Colonia na Rede Uruguaya Archiváu 2007-09-28 en Wayback Machine-Inclúi mapes ilustraos
- Intendencia Municipal de Colonia
- Guía de Colonia: turismu y empresariales
- Páxina Turística de la Ciudá de Carmelo
Datos: Q16580- Multimedia: Colonia Department
