Manolo Quirós

Manuel Rodríguez Osorio (1 de marzu de 1949, Quirós – 3 de marzu de 2001, Uviéu), más conocíu como Manolo Quirós, foi un gaiteru asturianu.

Manolo Quirós
Vida
Nacimientu	Quirós, 1 de marzu de 1949
Nacionalidá	España
Muerte	Uviéu, 3 de marzu de 2001 (52 años)
Estudios
Llingües falaes	castellanu
Oficiu	músicu
Instrumentu musical	gaita asturiana

Biografía

Manuel Rodríguez Osorio, nació'l 1 de marzu de 1949 en Ricao, pueblu del conceyu de Quirós, d'onde va garrar el so nomatu artísticu: Manolo Quirós. Dende neñu amuesa abonda afición pola música tradicional, afición cultivada pol so pa, Milio Rodríguez, que con gran estilu y teúnica cantaba tonaes y mises de gaita. Asina, apoyáu y afaláu pol so pa, entama de bien neñu a tocar l'armónica, llueu l'acordión y más tarde deprende pianu y cantu colos mayestros Ortega y Bullón, demientres los sos estudios na Universidá Llaboral de Xixón. En 1967 instálase en Madrid pa estudiar Telecomunicaciones, y ye nesta ciudá, quiciabes movíu pola señaldá que-y xeneraba tar lloñe d'Asturies, onde descubre, de la mano de Rogelio y Graciano Lafuente (mayestros gaiteros del Centru Asturianu de Madrid), l'instrumentu que diba marcar la so vida: la gaita. Tornáu a Asturies, nel añu 1974 entra en contáutu cola escena de la tonada al traviés d'El Presi, que naquella dómina cantaba les mises que se celebraben los domingos na Panerona del Pueblu d'Asturies de Xixón. Hasta 1977 participa en festivales con estremaes agrupaciones de la rexón y como gaiteru acompañante de dellos y delles intérpretes de tonada. Ente 1977 y 1982 forma parte del grupu Nuberu, impulsando una esperiencia fundamental pa la hestoria de la gaita asturiana, al popularizar el soníu de la gaita n'axuntanza con instrumentos modernos como guitarres y baxos llétricos. Ye en 1982 cuando decide entamar la so carrera en solitariu, percorriendo Asturies y celebrando conciertos n'estremaos llugares de tol Estáu español, amás d'en países d'Europa y América llatina. Manolo Quirós trabayó hasta la so muerte, el 3 de marzu de 2001, pola dignificación de la gaita y la cultura asturianes. En 2009 recibe, a títulu póstumu, el premiu honoríficu AMAS (Anuariu de la Música Asturiana) a toa una trayeutoria.

Docencia

Como docente Manolo Quirós punxó clas de gaita y música tradicional n'estremaes llocalidaes asturianes como Avilés, Piedrasblancas, Uviéu, Xixón y L’Entregu, asina como nel so Quirós natal. Magar l'añu 1995 pon clas en L’Entregu, onde fundó la Escuela Municipal de Gaita y Música Popular, de la que foi direutor hasta 1998. Nel añu 1996 crea colos neños y neñes del Colexu Públicu de Quirós qu'asistíen a les sos clases extraescolares de gaita y música tradicional el Grupu “Teixo”, qu'anguaño lleva nel so recuerdu la denomación “Teixo – Manolo Quirós”. Arriendes d'ello, dio alderiques sobre hestoria y espardimientu de la gaita en colexos, asociaciones vecinales, cases de cultura, etc. Dirixó cursos sobre gaita y música tradicional en Madrid, Barcelona, Bruxeles (Bélxica), Berna (Suiza) y L'Habana (Cuba).

Luthier

No cabero de los años 80 entama a construyir gaites y flautes traveseres de madera y a restaurar instrumentos antiguos. Trabayó incansablemente na investigación y perfeicionamientu de la gaita asturiana, construyéndola en varies tonalidaes y ameyorando la so afinación, tanto nes notes naturales como nes alteraes.

Investigación

En 1993 asoleya “El libro de la Gaita”, onde trata en fondura la hestoria, espardimientu, deprendizaxe, construcción y caltenimientu d'esti instrumentu, dedicándo-y un ampliu capítulu a la gaita asturiana ya incluyendo 100 partitures de canciones populares d'Asturies. En 1998 l'Ayuntamientu de Quirós y Cajastur espublicen un estudiu sobre la música y los músicos populares del conceyu de Quirós: “Quirós 100 años de música popular”. Nos caberos años alcontrábase somorguiáu na investigación de la rellación de Torner con Quirós, fraguando la idea d'espublizar un cancioneru de Quirós colos cantares y pieces tradicionales del conceyu que recoyera y trescribiera a lo llargo de la so carrera.

Carrera Musical

Na so discografía atópase música tradicional y tamién de creación propia. Collaboró con cantantes de tonada como El Che de Cabaños, Mari Luz Cristóbal Caunedo y Vicente Díaz ente otros, colos que grabó cerca d'una veintena de discos. Grabó 3 discos col grupu de folk-pop Nuberu, otru col grupu pop Modas Clandestinas, 2 discos col cantante llíricu Joaquín Pixán, col que compartió escenariu en dellos conciertos, siendo ún de los postreros en xunetu de 1999, nel Monesteriu de Courias (Cangas), xunto cola sopranu Montserrat Caballé. Tien grabaos 8 discos propios, nun de los cuales, “Vaqueiros”, probó la música vocal, cantando tonada y vaqueiraes. Nel añu 1989 el Centru Asturianu de Madrid da-y l'Urogallo de Bronce pol so llabor d'espardimientu de la música asturiana. En 1992 crea un precedente históricu pa la gaita asturiana: graba cola orquesta sinfónica de cuerda Virtuosos de Moscú. En xunu de 1993 graba cola Orquesta Sinfónica del Principáu d'Asturies y el Coru de la Fundación Príncipe d'Asturies baxo la direición del mayestru Jesse Levine una obra adautada y orquestada pol mayestru Benito Lauret y pol propiu Manolo Quirós y que foi incluyida nel discu “Atardecer” del tenor asturianu Joaquín Pixán. Ye la primer obra sinfónica pa orquesta y gaita asturiana de la que se tien constancia. En 1995 graba cola Orquesta Sinfónica y Coros de RTVE xunto a Alfredo Kraus, Lola Casariego y Joaquín Pixán baxo la batuta de los mayestros Pablo Myar, Benito Lauret y Rafael Ibarbia.

Discografía Propia

• Alborá (1982)
• Manolo Quirós 2 (1984)
• En un país del Norte (1986)
• Viento de ciudad (1988)
• Un hombre y una gaita (1989)
• Cantos, Danzas y Lamentos (1993)
• Vaqueiros (1996)
• Latidos de la tierra (2000)

Enllaces esternos

• Datos: Q5991710