Partido Galeguista (históricu)
El Partido Galeguista (Partíu Galleguista n'asturianu) foi un partíu fundáu n'avientu de 1931 de calter nacionalista gallegu y con relevancia na política de la Segunda República. El so muérganu de prensa foi A Nosa Terra y la seición moza, la Federación de Mocedades Galeguistas (Federación de Mocedaes Galleguistes), fundada en xineru de 1934, que cuntaba con 1.000 afiliaos.
| Partido Galeguista (históricu) | |
|---|---|
| Partido Galeguista | |
| Acrónimu | PG |
| Presidente | Alfonso Daniel Rodríguez Castelao |
| Fundación | 1931 |
| Disolución | 1936 |
| Precedíu por |
Grupo Autonomista Galego (es)  , Irmandades da Fala (es) y Partido Nazonalista Republicano de Ourense (es) |
| Estáu |
 España |
| Ideoloxía política | galleguismu, republicanismu, autonomismu rexonal, antifascismu y Nacionalismu gallegu |
 | |
Formación
editarEl 5 y 6 d'avientu de 1931 el Partido Galeguista de Pontevedra convoca la VII Asamblea Nacionalista col propósitu de crear un partíu nacionalista. A la convocatoria alleguen 32 grupos y hermandaes, ente los que destaquen el Grupo Autonomista Galego de Vigo, Labor Galeguista y el Partido Nazonalista Republicán d'Ourense. Tamién participen representantes de la Federación de Sociedaes Gallegues de l'Arxentina y de la seición arxentina de la ORGA.
Nesta Asamblea decide la disolución de les Hermandaes de la fala, integrándose los sos miembros nel Partido Galeguista que ñaz nesi momentu. L'alcuerdu de constitución reclama, per primer vegada na hestoria de Galicia, el drechu d'autodeterminación y manifiestu, como primer oxetivu políticu, la redaición d'un Estatutu d'Autonomía. Alfonso Daniel Rodríguez Castelao y Ramón Otero Pedrayo formen parte del Conseyu Executivu.
Consolidación
editarEn 1932 participó xunto cola ORGA y Aición Republicana nel Comité de Propaganda del Estatutu, de la que se preparaba pa participar en solitariu, o en candidatures conxuntes colos agraristes, nes eleiciones municipales d'abril de 1933, nes que namái llogró un conceyal n'Ourense y la mayoría, aliáu colos agrarios, en Tui, estes males resultancies llevaron al sector progresista del PG a favorecer pactos colos partíos republicanos, a lo que s'oponía'l sector conservador lideráu por Vicente Risco.
Na Asamblea Estraordinaria d'ochobre de 1933 impunxéronse les tesis de Vicente Risco y el PG allegó a les eleiciones xenerales de 1933 en solitariu, los 106.000 votos que llogró nun-y sirvieron pa consiguir representación, y el nuevu gobiernu de dreches paralizó la tramitación del Estatutu d'Autonomía.
Dempués de la fuelga xeneral revolucionaria de 1934, na que'l PG nun participó, el gobiernu, suspendió Nosa Terra y desterró a Castelao y Bóveda, descabezando al PG y provocando un descensu momentaneu de la militancia, pero al tiempu favoreció la formación d'una alianza colos republicanos d'izquierdes que fixera posible l'aprobación del Estatutu.
Na III Asamblea del PG, celebrada n'Ourense'l 13 y 14 de xineru de 1934 aprueba cola oposición de Risco l'alianza estratéxica colos republicanos y socialistes, ratificada na IV Asamblea del PG, celebrada en Santiago de Compostela el 20 y 21 d'abril de 1935, cola oposición de Ramón Otero Pedrayo, lo que provoca la dixebra d'un sector de la drecha del PG, encabezada por Vicente Risco que formó la Dereita Galeguista.
Frente Popular
editarEn xunu de 1935 el PG entamó a axustar con Esquierda Republicana, y na Asamblea Estraordinaria del 25 de xineru de 1936 celebrada en Santiago de Compostela aprobóse l'ingresu del PG nel Frente Popular p'allegar a les eleiciones xenerales de 1936 con cinco candidatos galleguistes, Castelao, Bóveda, Xerardo Álvarez Gallego, Ramón Suárez Picallo y Antón Villar Ponte.
Salieron escoyíos Castelao con 104.436 votos en Pontevedra y Suárez Picallo y Vilar Puente n'A Coruña con alredor de 150.000 votos caunu, en total los candidatos galleguistes llogren 287.000 votos.
En xunu de 1936 se cumple los compromisos espresaos pol FP y manifiéstase a favor del Estatutu pa Galicia.
Guerra Civil
editarTres la sublevación del 18 de xunetu de 1936 que punxo fin a l'actividá del PG en Galicia, entamó la represión de los militantes galleguistes, dellos dirixentes cómo Johán Carballeira, Ánxel Casal, Manuel Lustres Rivas, Camilo Díaz Baliño, Víctor Casas o Alexandre Bóveda foron fusilaos, otros colaron al exiliu.
En 1937 el PG abrió una delegación en Barcelona, y publicó'l voceru Nova Galicia ente abril de 1937 y xunetu de 1938 empobináu por Castelao y Suárez Picallo. La prioridá foi la unidá de les fuercies democrátiques pa salvar la República.
Tres la cayida de Cataluña los galleguistes pasaron a Francia y dende ellí dirixiéronse a dellos países d'América.
N'América
editarEn 1932 fundóse la Organización Nacionalista Repubricana Gallega, filial del PG en Buenos Aires, cuntaba con 150 afiliaos empobinaos por Rodolfo Prada, en 1936 col entamu de la guerra civil camuda'l nome a Grupo Galeguista de Buenos Aires, nesi momentu tenía 103 afiliaos. En 1941 toma'l nome d'Irmandade Galega y en 1942 remanez Nosa Terra, coincidiendo cola llegada masiva d'exiliaos galleguistes a Buenos Aires, ente los que destaca Castelao.
N'ochobre de 1944 constitúyese'l Consello de Galiza baxo l'impulsu de la Irmandade Galega y Castelao.
La Irmandade Galeguista do Uruguai (Hermandá Galleguista d'Uruguái) ye'l nome de la seición del PG n'Uruguai, dirixida por Manuel Meilán.
En 1949 el PG namái cuntaba con 200 afiliaos distribuyíos en Buenos Aires y otres ciudaes arxentines, Montevidéu, Méxicu y L'Habana.
Clandestinidá
editarDende'l fin de la guerra civil entamaron los contactos ente galleguistes pa tratar la conveniencia de refacer les estructures nel partíu nel interior. L'actividá del PG nel interior entamó'l 22 de xunetu de 1945[1] con una xunta en Coruxo, a la qu'asistieron 19 galleguistes y que decidieron formar un Comité executivu provisorioñu integráu por Manuel Gómez Román, Otero Pedrayo y Plácido Capo, pero foron Francisco Fernández del Riego y Ramón Piñeiro los que tuvieron un papel más activu. Una de les sos grandes prioridaes foi establecer contautu col restu de la oposición gallega y colos nacionalistes vascos y catalanes, y asina en 1944 el PG s'integra na Xunta Gallega d'Alianza Democrática cola CNT, PSOE, UXT y los agrarios. Tres la detención de Ramón Piñeiro en 1946 foi Fermín Penzol el que caltuvo'l contautu col restu de les fuercies de la oposición. A partir 1949 dempués de la salida de la cárcel de Piñeiro y delantre l'afandu de los militantes de base que nun víen que l'aición clandestina llograra resultaos[2] el PG empuestu por Piñeiro apostó por una estratexa culturalista, aprovechando les escases posibilidaes qu'ufiertaba'l franquismu, n'abierta contradicción colos galleguistes del exiliu.
La fundación de Galaxia'l 25 de xunetu de 1950 supunxo la autodisolución del PG en Galicia, vencellándose los sos antiguos militantes al nuevu proyeutu editorial.
Organización
editarEl Partido Galeguista tenía na Asamblea'l so máximu muérganu d'espresión y yera'l muérganu encargáu d'afitar la so llinia política, tamién tenía la competencia pa escoyer el Conseyu Executivu, el muérganu que tenía que llevar a la práctica les decisiones tomaes pola Asamblea, d'últimes a Secretaría Executiva yera'l muérganu de gobiernu del partíu[3].
Programa
editarEl programa políticu del Partido Galeguista yera nes sos llinies xenerales continuador del formuláu pola Irmandades de la Fala nes sos diverses asamblees,[4] Galicia como unión cultural, proclamaba l'autodeterminación política de Galicia que se traducía como aspiración mínima na constitución d'un Parllamentu y un Gobiernu gallegu dientro de la Constitución de la República. La eliminación del caciquismu, l'antimperialismu, la igualdá política de la muyer, la supresión de les diputaciones provinciales, la reconocencia de la parroquia cómo entidá política-alministrativa básica, la oficialidá de la llingua gallega y la reforma agraria yeren otros de los elementos del so programa.
Referencies
editar- ↑ La fecha exacta de la xunta esta agora documentada: Garrido Couceiro, Xoan Carlos. Sémelos Galicia (ed.): páxs. 4.
- ↑ Francisco Fernández del Riego. El ríu del tiempu. una hestoria vivida. Ediciós del Castru, Sada, 1990, páx 190.
- ↑ Arximiro Roxo, Les Mocedaes Galleguistes, Vigo, 1987, pág. 29-30
- ↑ Xustu G. Beramendi, Xosé Manoel Núñez Seixas, El nacionalismu gallego, 2ª ed., Vigo, 1996 pág. 148
Enllaces esternos
editar
Wikimedia Commons acueye conteníu multimedia sobre Partido Galeguista.
Datos: Q538566- Multimedia: Partido Galeguista (1931)
