Thayer David
Thayer David (4 de marzu de 1927, Medford (es) 
– 17 de xunetu de 1978, Nueva York) foi un actor teatral, cinematográficu y televisivu d'Estaos Xuníos, conocíu pol so trabayu na serie de cultu de la cadena ABC Solombres tenebroses (1966–1971) y pol so papel del promotor George Jergens na película Rocky (1976). Tamién foi'l Conde Arne Saknussemm en Viaxe al centru de la tierra en 1959. La so voz aspra y personal pudo escuchase en numberosos comerciales y en cintes de calter educativu.
Thayer David | |
|---|---|
| Vida | |
| Nacimientu |
Medford (es) , 4 de marzu de 1927[1] |
| Nacionalidá |
 Estaos Xuníos |
| Llingua materna | inglés |
| Muerte | Nueva York, 17 de xunetu de 1978[1] (51 años) |
| Causa de la muerte | infartu de miocardiu |
| Familia | |
| Casáu con | Valerie French (1970 – 1975) |
| Estudios | |
| Estudios | Universidá de Harvard |
| Llingües falaes | inglés[2] |
| Oficiu | actor, actor de teatru, actor de televisión, actor de cine |
| IMDb | nm0203076 |
 | |
Primeros años
editarEl so verdaderu nombrre yera David Thayer Hersey, y nació en Medford (Massachusetts). El so padre, Thayer Frye Hersey, yera executivu d'una empresa dedicada a la industria del papel. David estudió na Universidá de Harvard na década de 1940 pero nun llegó a graduase, concentrándose en cuenta de ello n'empecipiar una carrera como actor teatral. Cola ayuda económica del so padre, foi cofundador de la compañía del Teatru Brattle (1948–1952), en Cambridge (Massachusetts), dedicándose de manera profesional a les tables.[3][4]
Carrera teatral
editarEnte les sos actuaciones teatrales figuren The Relapse (1950, como Sir Tunbelly Clumsey); La fierecilla domada (1951, como Grumio); The Way of the World (1954, Petulant); The Carefree Tree (1955, The Sixth Son); El rei Lear (1956, Duque de Cornualles); Mister Johnson (1956, Gollup); Saint Joan (1956, l'inquisidor); Protective Custody (1956, Dr. Steidl); Oscar Wilde (1957, Oscar Wilde); The Golden Six (1958, Tiberio); A Man for All Seasons (1961, Cardenal Wolsey); Andorra (1963, dueñu de pub); La gavilueta (1964, Sorin); Les bruxes de Salem (1964, Danforth); Baker Street (1965, Moriarty); The Royal Hunt of the Sun (1965, Miguel Estete); Ring Round the Moon (1966, Messerchann); Those That Play the Clowns (1966, Henning); Breakfast at Tiffany's (1966, Rusty Trawler); The Sorrows of Frederick (1967); The Bench (1968, Phillipi); Tíu Vania (1971, Serebryakov); The Jockey Club Stakes (1973, Sir Dymock Blackburn); The Dogs of Pavlov (1974).
Cine y televisión
editarEnte 1966 y 1971, David interpretó a dellos personaxes nel show de la ABC Solombres tenebroses. Los sos papeles fueron los de Matthew Morgan, Ben Stokes, Profesor T. Elliot Stokes, Sandor Rakoski, Conde Petofi, Timothy Stokes PT, Mordecai Grimes, y Ben Stokes PT. Tamién foi'l Reverendu Silas Pendrake n Pequeñu gran home (1970), l'incendiariu en Salvái al tigre (1973), Dragon en The Eiger Sanction (1975, con Clint Eastwood), y el promotor George Jurgens en "Rocky" (1976). Tamién actuó en numberoses series televisives, ente elles The Wild Wild West, The Rockford Files, Columbo, Ellery Queen, Kojak, Petrocelli y Hawaii Five-O. Asina mesmu, David trabayó en diversos programes pilotos, destacando d'ente ellos el so papel de malváu en The Amazing Spider-Man (1977).
En 1977 Thayer David fixo'l papel del títulu en Nero Wolfe, una producción de Paramount Television basada na novela de Rex Stout The Doorbell Rang. David interpretaba al trabáu detective Nero Wolfe. El filme nun dio pasu a una serie, y emitióse el 18 d'avientu de 1979, 17 meses dempués de finar David.
Personal
editarResidente en Manhattan, Thayer David yera coleicionista de cayaos, paisaxes europeos del sieglu XVIII y moblame victoriano.[5] Según el direutor Frank D. Gilroy, David yera unu de los actores más cultos del so tiempu,[6] y los sos compañeros de repartu en Solombres tenebroses consideráben-y una "enciclopedia andante".
Thayer David casóse y divorcióse de l'actriz cinematográfica y televisiva Valerie French.[7] Nel momentu del fallecimientu del actor, la pareya taba entamando volver casase.[8]David finó en 1978 por causa de un infartu agudu de miocardiu na ciudá de Nueva York. Tenía 51 años d'edá.[9] Los sos restos fueron encenraos, y les cenices apurríes a los sos allegaos.
Referencies
editar- ↑ 1,0 1,1 Afirmao en: Internet Broadway Database. Identificador de persona d'Internet Broadway Database: 37392. Apaez como: Thayer David. Data de consulta: 9 ochobre 2017. Llingua de la obra o nome: inglés.
- ↑ Identificador CONOR.SI: 133828707. Afirmao en: CONOR.SI.
- ↑ Pace, Eric, "Thayer David Dead; A Character Actor"; The New York Times, 20 de xunetu de 1978
- ↑ Brattle Theatre, The First Hundred Years Archiváu 2011-10-07 en Wayback Machine' retrieved 4 d'ochobre de 2011
- ↑ Pace, Eric, "Thayer David Dead: A Character Actor"; The New York Times, 20 de xunetu de 1978
- ↑ Gilroy, Frank D., I Wake Up Screening. Carbondale, Illinois: Southern Illinois University Press, 1993, ISBN 0-8093-1856-3 page 147
- ↑ Collins, Glenn, "Valerie French, 59, Actress Who Played English Characters"; The New York Times, 6 de payares de 1990
- ↑ Collins, Glenn, "Valerie French, 59, Actress Who Played English Characters"; The New York Times, 6 de payares de 1990
- ↑ Pace, Eric, "Thayer David Dead; A Character Actor"; The New York Times, 20 de xunetu de 1978
- Hamrick, Craig & Jamison, R. J. Barnabas & Company: The Cast of the TV Classic Dark Shadows Revised (2012) iUniverse 2012 pgs 93-107. ISBN 978147591034
Enllaces esternos
editar- Thayer David na Internet Movie Database (n'inglés)
- Thayer David na Internet Broadway Database (n'inglés)
- Thayer David n'Internet Off-Broadway Database (inglés)
Datos: Q738838
