Triloxía cinematográfica de The Lord of the Rings

La triloxía cinematográfica de The Lord of the Rings, basada na novela homónima del escritor británicu J.R.R. Tolkien, supón trés películes épiques de pantasía, aición y aventures: The Lord of the Rings: The fellowship of the Ring (2001), The Lord of the Rings: The Two Towers (2002) y The Lord of the Rings: The Return of the King (2003).

Triloxía cinematográfica de The Lord of the Rings
Datos
Títulu orixinal	The Lord of the Rings (en)
Xéneru	cine fantásticu, cine d'aventures, cine d'aición y adautación cinematográfica
País d'orixe	Nueva Zelanda y Estaos Xuníos
Estrenu	2001
Idioma orixinal	inglés
Ficha téunica
Direición	Peter Jackson
Producción	Peter Jackson
Guión	Fran Walsh
Música	Howard Shore
Fotografía	Andrew Lesnie
Repartu	Elijah Wood, Viggo Mortensen, Ian McKellen, Orlando Bloom, Sean Astin, Hugo Weaving, Cate Blanchett, Liv Tyler, Sean Bean, Andy Serkis, Christopher Lee y John Rhys-Davies
Compañíes
Productora	New Line Cinema y WingNut Films (en)
Distribuidora	New Line Cinema
Costu	281 000 000 $
Recaldación	2 964 357 476 $
Triloxía cinematográfica de The Lord of the Rings El hobbit (es)
Enllaces esternos
Web oficial

Les trés películes foron escrites, producíes y dirixíes por Peter Jackson, coescrites por Fran Walsh y Philippa Boyens y distribuyíes por New Line Cinema. Camentáu como ún de los meyores proyeutos cinematográficos xamás acometíos, con una recaudación xeneral de más de 2900 millones USD, el proyeutu completu avagó ocho años, cola filmación simultánea de les trés películes y rodaes dafechu na tierra natal de Jackson, Nueva Zelanda.

Magar dalgunes variaciones, la triloxía sigue en xeneral la trama cimera de la novela na que se basa. Ambientada nel ficticiu mundu de la Tierra Media, sigue les aventures del hobbit Frodo Fardel y sos collacios na misión de desaniciar l'aniellu únicu y segurar asina l'aniquilación del Señor Oscuru Sauron. Sicasí, la comunidá se france y Frodo continúa la so aventura xunta'l so fiel collaciu Sam y el traicioniegu Gollum. Otramiente, el magu Gandalf y Aragorn, herederu nel exiliu del tronu de Gondor, amécense y lideren a los pueblos llibres de la Tierra Media en delles batalles escontra les fuercies del mal.

La triloxía tuvo bién d'éxitu de taquiya, algamando les trés películes los puestos 26u, 19u y 6u de les más taquiyeres de la hestoria. Tamién foron clamaes pola crítica, algamando un total de diecisiete premios Óscar, diez premios BAFTA y cuatro premios Globu d'Oru, asina como bien d'allabancies hacia'l repartu y les innovaciones no tocante a efeutos especiales dixitales. Cada película de la triloxía tuvo una «edición especial estendida», asoleyada un añu dempués del asoleyu en DVD de la versión proyeutada nes sales de cine.

Entamu del proyeutu

La primer vez que'l neozelandés Peter Jackson tuvo conocencia del llibru The Lord of the Rings asocedió dempués de ver la película homónima de 1978, dirixida por Ralph Bakshi, que «esfrutó polo que quixo saber más al respective]]. Más sero, cuando tenía 17 años d'edá, lleó una edición basada nel llibru nun viaxe en tren qu'avagó venti hores dende Wellington hasta Auckland.

En 1995, na producción de The Frighteners, Jackson cuntó dirixir una adautación de The Lord of the Rings, al entrugase «por qué naide abultaba facer nada sobre ello». De magar los nuevos fitos na estaya de los efeutos por ordenador tres l'éxitu de Jurassic Park (1993), principió a aniciar una película de pantasía que fora rellativamente seria y que se sintiera «real». Xunto cola so ñera Fran Walsh, entamó un proyeutu p'adaptar El Hobbit y The Lord of the Rings al cine. La so axente, Ken Kamins, informo-yos de que Saul Zaentz tenía los derechos de les obres dende l'entamu de los años 70, poro, punxéronse en contautu col presidente de Miramax Films, Harvey Winstein, que tuvo interés pol proyeutu. El plan al entamu yera facer la película d'El Hobbit y, si tenía éxitu, continuar con The Lord of the Rings, dixebrada en dos partes, pero les negociaciones con Zaentz s'allargaron y amás solo tenía los derechos de producción de la primer novela, non los de distribución, que taben en propiedá d'United Artists. N'abril de 1996, per aciu de que la cuestión llegal sobre los derechos siguía ensin desenguedeyase, Jackson recibió una ufierta pa dirixir la nueva versión de la novela La planète des singes, de 20th Century Fox, y otra pa King Kong, d'Universal Studios; esti postrer proyeutu entusiasmábalu tanto como The Lord of the Rings y decidió aceptalu, provocando asina l'enoyu de Weinstein. El direutor propunxo un alcuerdu ente dambes compañíes cola fin d'iguar la situación y repartiéronse lso derechos de les películes n'Estaos Xuníos y l'estranxeru, añadiendo Shakespeare in Love a la robla. Sicasí remanecieron problemas d'itinerariu pola escoyeta de llugares pa King Kong, poro, decidió finalmente por empobinase hacia The Lord of the Rings. Entós, Universal canceló'l proyeutu de King Kong y, el 22 de xineru de 1997, Weinstein consiguió a la fin los derechos de The Lord of the Rings.

Preproducción

Guión

Arreyu con Miramax

Tres consiguir los derechos de la novela, principió una etapa na que se iguó l'alcuerdu final de los derechos. Mentanto, Jackson y Walsh pidieron a Costa Botes qu'escribiera una sinopsis del llibru, al tiemu qu'ellos lu lleíen de nuevu. Aproximadamente trés meses dempués, remataron el primer bocetu. La primer película abarcaría les futures trames de The Fellowship of the Ring, The Two Towers y l'entamu de 'The Return of the King, rematando cola muerte de Saruman, y con Gandalf y Pippin aguantando a llegar a Minas Tirith. Nesi tratamientu, Gwaihir y Gandalf visiten Edoras cuando fuxen de Saruman, Gollum ataca a Frodo cuando la Comunidá tovía nun se frayó, y los personaxes de Maggot, Glorfindel, Radagest, Elladan y Elrohir tán presentes na hestoria. Bilbo va al Conceyu d'Elrond, Sam ve al traviés del espeyu de Galadriel, Saruman redímese enantes de morrer y los Nazgûl simplemente redímense nel Orodruin enantes de cayer. Presentaron el guión a Harvey y a Bob Weinstein, esti postrero amosándose ablucáu cola so redaición, considerando que nun lleera'l llibru enantes. Destamiente decidieron dar el preste a la producción de dos cintes con un presupuestu total de 75 millones USD.

A mediaos de 1997 Jackson y Walsh principiaron a reescribir el guión con Stephen Sinclair. La ñera de Sinclair, Philippa Boyens, yera una gran siguidora de la novela y amecióse al equipu de redaición en cuantas lleó'l so llibrín orixinal. Supunxo 14 meses aproximadamente escribir los guiones de les dos películes, que teníen 147 y 144 páxines respeutivamente. Sinclair abandonó'l proyeutu poco dempués, per aciu d'otros compromisos cinematográficos. Ente los anovamientos nos nuevos guiones afayábase la escena onde Sam ye atrapao mientres achisba a Gandalf y Frodo, polo que ye obligao a dir con ésti, en cuenta de que Sam, Merry y Pippin se decaten pola so cuenta del Aniellu Únicu y voluntariamente decidan dir, como asocede na novela. Asinamesmu, Denethor I diba al Conceyu acompañáu de so fíu boromir, Arwen rescataba a Frodo y mataba al Señor de los Nazgûl, mientres la escena d'aición onde apruz un troll nuna cavierna yera estremada.

Los problemas presentáronse cuando'l productor Marty Katz foi unviao a Nueva Zelanda; tres pasar cuatro meses ehí, Katz dixo a Miramax tendríen un costu de 150 millones USD, polo que Miramax nun sería quien a financiales, y con 15 millones USD yá gastaos na preproducción, decidieron producir una sola película en vez cuenta de les dos que se teníen camentaes. El 17 de xunu de 1998, Bob Winstein presentó'l llibrín d'una versión cinematográfica de dos hores de 'The Lord of the Rings. Encamentó eliminar Bree, la batalla del Abismu de Helm y a Saruman, amestar Rohan y Gondor, amernorgar Rivendel y Moria, incorporar Ents na secuencia onde Merry y Pippin son secuestraos por Uruk-Hai pa prevenir esto postrero y cambios nes rellaciones ente los personaxes, encalcando Éowyn como hermana de Boromir. Jackson opúnxose a la ideya de «encortiar la metá de les coses bones del guión», a lo que Miramax declarió que cualesquier guión o trabayu completáu por Weta Workshop yera de la so propiedá. Jackson percorrió entós los estudios de Hollywood a la gueta d'una nueva productora durante cuatro selmanes, amosando un videu de 35minutos del so llabor, hasta atopar a Mark Ordesky, un vieyu amigu que trabayaba en New Line Cinema y que-y consiguió un caleyu col so presidente, Robert Shaye. Shaye amiró'l videu y entrugó-y a Jackson porqué proponíen dos películes cuando la novela fora asoleyada en tres partes, la so ideya yera aniciar una triloxía. De magar entós, Jackson, Walsh y boyens principiaron a escribir trés nuevos llibrinos pa la triloxía.

New Line Cinema y la triloxía

La concepción d'una triloxía cinematográfica garantizó a los guionistes mayor llibertá creativa, anque Jackson, Walsh y Boyens tuvieron que reestructurar el guión. A la fin, les trés adautaciones nun correspondíen esautamente colos trés volúmenes de la triloxía, y suponíen, sicasí, una adautación de trés partes del material orixinal. Jackson tomó un enfoque más cronolóxicu de la hestoria comparáu col de Tolkien: la búsqueda de Frodo pasó a ser la tema centrla de la triloxía de filmes, mientres qu'Aragorn serviría como exe secundariu, y delles escenes que nun contribuyíen direutamente a esos dos filos argumentales suprimiéronse. Nel procesu púnxose procuru en que'l guión guardara conclusiones satisfactories, segurándose de que la revelación de la historia de los personaxes y los asocedíos nun alteriaran el ritmu de la cinta. Tres inxerir nueves secuencies, el tríu espurrió elementos que Tolkien caltuviera ambiguos na so novela, como les batalles y les criatures. Tovía en rodaxe, los guiones continuaron anovándose de miente constante, en parte per aciu de les contribuciones del repartu, que buscaba esplorar más los personaxes. Ún de los cambios más bultables nel llibrín orixinal foi'l personaxe d'Arwen, que nun entamu se planeó qu'actuara como una princesa guerrera. A la fin tornó a la descripción orixinal de Tolkien, asitiando inactiva físicamente na hestoria (anque unvia sofitu moral y militar a los protagonistes).

Enantes de que s'incluyera un prólogu pa esplicar la hestoria del Aniellu Únicu, The Fellowship of the Ring abría con una escena na que Bilbo entama a escribir el so llibru, Hestoria d'una dida y una vuelta, y describe a los hobbits nel capítulu del entamu, igual que J.R.R. Tolkien fai en The Lord of the Rings. Sicasí, cuando s'añedió el prólogu sobre l'Aniellu al guión, esta escena foi suprimida y más sero añadida na versión estendida de la película. L'ausencia de dellos personaxes, como Tom Bombadil y el Vieyu Home-Salgueru debióse al so poco o nulu aporte a la trama cimera de les películes: el viaxe de Frodo a Mordor pa desaniciar l'Aniellu. Tamién el papel que dalgunos personaxes menores tienen na novela foi aportao a otros más relevantes na triloxía. Ye'l casu de la Compañía Gris, formada por Elladan, Elrohir, Halbarad y trenta montesinos, que na novela tresmiten a Aragorn un mensaxe d'Elrond nel acantonamientu de Rohan y na triloxía ye él mesmu quien-y lo mienta. Jackson, Walsh y Boyens aprovecharon amás la presencia del elfu xunta Aragorn pa que-y apurriera a Narsil, reforxada en 'The Return of the King pa dar a la escena más importancia. Cola fin d'enantar la presencia d'Arwen y asina caltener la conexón amorosa ente ella y Aragorn, los guionistes decidieron que se camudar apor Glorfindel y incluyéronla notres escenes, como Lothlórien o la Batalla del Abismu de Helm. Sicasí, pel rodaxe filtróse información n'Internet sobre estos cambios y los acérrimes alzáronse escontra ellos, lo que obligó a los guioniestes a anovar el llibrín y a suprimir les apaiciones del personaxe en Lothlórien y Cuernavilla. Entós decidieron dir a los apéndices de 'The Lord of the Rings, onde J.R.R. Tolkien incluyó un cachu de la hestoria d'amor ente Aragorn y Arwen, pa inxerir nueves escenes de la pareya. Otramiente aniciaron el personaxe de Lurtz esclusivamente pa The Fellowship of the Ring per aciu de l'ausencia de villanos móviles y pa dar mas fuercia a la escena onde Boromir muerre, pasando a ser él el so asesinu y non un Uruk-Hai anónimu.

El llibrín de la segunda película camentóse polos guinistes como'l más difícil d'aniciar, pola mor de que sigue tres llinies argumentales estremaes. New Line quería un prólogu que remembrara lo asocedíu en The Fellowship of the Ring, pero Jackson, Walsh y Boyens se negaron pa evitar un escesu d'información y decidieron incluyir la llucha ente Gandalf y el Balrog en Moria, que taba camentada dende los guiones del entamu como una escena muncho más estensa y que fora refugada por altu presupuestu que suponíen los sos efecutos especiales. La inclusión d'Ella-Laraña en The Two Towers foi descartada dende l'entamu pa evitar la so coincidencia en pantaya col clímax del Abismu de Helm. Con ello la hestoria de Frodo, Sam y Gollum perdió fuercia y los guionistes alteriaron la trama pa incluyilos nel ataque a Osgiliath, tamién col determín de reforciar la maldá del Aniellu y la tentación qu'espierta, nesti casu al personaxe de Faramir, que na novela apurre gabitu de baldre a los hobbits. Por deseyu de Jackson, la Batalla del Abismu de Helm siguió'l mesmu patrón que la Batalla de Rorke's Drift na película Zulú (1964), de Cy Endfield.

La escena del entamu de The Return of the King yera un suañu d'Aragorn, onde vía los Senderos de los Muertos, pero a la fin camudóse por otra refugada en The Two Towers: un flashback enantáu namás por Walsh qu'amuesa l'afayu del Aniellu por parte de Sméagol y el so posterior deterioru hasta tornase en Gollum. L'apaición del Saniamientu de la Comarca foi descartada ceu y la muerte de Saruman, que na novela asocede durantes esti pasaxe, foi treslladada a lo alto de Orthanc. Nun entamu tenía llugar a la fin de The Two Towers, pero'l guión foi anovao otra vez pa nun frayar el clímax final del Abismu de Helm y la escena foi treslladada al entamu de 'The Return of the King. Nun entamu los guionistes escribieron escenas finales pa tolos miembros de la Compaña del Aniellu y inclusive foron rodaes, pero a la fin namas s'incluyeron la d'Aragorn y centráronse nel deterioru de Frodo pola mor del del viaxe.

Producción

Diseñu de producción y vestuariu

Jackson entamó'l guión gráficu de la triloxía xunto con Christian Rivers n'agostu de 1997, asignándo-y al tiempu al so equipu de trabayu los llabores de diseñu de la Tierra Media. El resultáu foi una versión 2D en blancu y negru de la película, qu'incorporaba guiones animaos grabaos con imáxenes, voces y pieces musicales temporales pa tener una visión más nidia del xeitu que tendría la triloxía. Pa los efeutos visuales, Jackson usó una pequeña cámara de videu pa grabar los modelos de los sets (una téunica que deprendió d'Industrial Light & Magic), planiando nel procesu les secuencies de batalla qu'incorporaría llueu nes cintes. La grabación de los sets miniatura permitiría-y tamién improvisar les secuencies d'aición, como'l colapsu de la escalinata de Moria (que xamás se contempló en dengún guión). Amás, emplegó 40.000 soldaos de xuguete pal guión animáu. Esti procesu repetiríase en plena producción p'añader escenes como la de los Ents atacando Isengard y el sitiu de Minas Tirith en febreru de 2003.

Poco dempués, contrató a Richard Taylor pa que dirixera a Weta Workshop nel diseñu de cinco elementos: les armadures, l'armamentu, les prótesis/maquillaxe, les criatures y les miniatures. Cuando l'equipu de diseñadores de Weta Workshop principió a esbozar les primeres armadures pa les películes, nun teníen conecencias abondo sobre la tema y nun carecíen d'un espertu que-yos pudiera empobinar. Poro, los primeros diseños yeren poco reales, anque ya principiaran a apaecer aspeutos que se caltendríen nes armadures definitives. Cola incorporación al equipu d'Alan Lee y John Howe -espertu n'armadures- en payares de 1997, los diseños entamaron a coyer forma. La mayor parte de les imáxenes nos filmes ta basada nes sos munches ilustraciones. Grant Major, diseñador de producción, tuvo al so cargu'l llabor de tornar los diseños de Lee y Howe en modelos arquiteutónicos pa lo que principió a aniciar los sets, demientres que Dan Hennah acomuñó como direutor artísticu restolando llugares y organizando l'aniciu de los sets.

La visión de la Tierra Media que tenía Jackson yera descrita por Randy Cook como "Ray Harryhausen conoz a David Lean". Jackson quería un realismu descarnáu y un arreyu históricu pa la pantasía, asina qu'intentó facer que'l mundu de la Tierra Media paeciera razonable y creyible. Por exemplu, l'exércitu de Nueva Zelanda aidó a anicar Hobbiton meses enantes de que la filmación principiara pa que la vexetación pudiera medrar hasta entós. Demientres, les criatures diseñáronse pa ser biolóxicamente creyibles, como les enormes ales de les "besties cayíes" que-yos aidan a esñalar. En total, Weta Workshop anició 48.000 pieces d'armadura, 500 arcos y 10.000 fleches. Asinamesmu fizo delles prótesis, como 1.800 pares de pies Hobbit pa los protagonistes, igual que munches oreyes, narices y tiestes pal repartu. Ngila Dickson foi contratada'l 1 d'abril de 1999 pa dirixir l'aniciu de los estremaos vestuarios. Dickson y otres 40 costureres más trabayaron en más de 19.000 atuendos basaos na dómina. Por aciu del calendariu de rodaxe, teníen que facese diez versiones de cada vistimienta, y dempués 30 más pa maniobres, persones a escala y tros dobles, poro, tolos diseños trendríen 40 versiones. Cada oxetu foi diseñáu especialmente pol departamentu d'arte de Weta.

El departamentu d'arte tuvo muncho cuidáu en no tocante a la natura, -tomando en cuenta la importancia hacia Tolkien- tal como treslladar les plantes del llugar d'Edoras nun viveru. Dalgunes vegaes moldeábense figures de magar roques reales y corteyes d'árboles, igual qu'allugar rames nuna estructura d'aceru con poliestirenu p'aniciar árboles más creyibles. Brian Massey dirixó'l departamentu d'ecoloxía, y inclusive escribió un cartafueyu sobre'l medru de los árboles cuando se quexó de los elementos útiles, al describilos como "cónicos abondo" pa Lothlórien cuando se llegó a la viesca de Fangorn. Los numberosos elementos útiles que s'alcuentren na triloxía foron, dafechu, diseñaos orixinalmente a estremaes escales, poro, munchos artesanos foron contrataos; encalca Jens Hansen tres tener aniciao 15 répliques del Aniellu Únicu. Les estatues foron esculpíes en poliestirenu, anque dalgunos modelos de tronos vistos na triloxía se fixeron en mármol, piedra y madera como debíen ser per aciu de les descripciones de la novela. Contratóse amás a Daniel Reeve pa escribir y aniciar llibros, documentos, mapes, diagrames y inclusive grafitos d'Orcos que pueden vese nes películes.

Repartu

La siguiente tabla tien una rellación de los personaxes ficticios qu'intervienen d'una manera más o menos activa na trama de la triloxía colos actores que los interpretaron o que-yos emprestaron la so voz, incluyendo les sos apaiciones nes versiones estendíes de les películes.

Personaxe	Película
	The Fellowship of the Ring	The Two Towers	The Return of the King
Aragorn	Viggo Mortensen
Arwen	Liv Tyler
Bárbol		John Rhys-Davies (voz)
Bilbo Fardel	Ian Holm		Ian Holm
Frodo Fardel	Elijah Wood
Boromir	Sean Bean
Meriadoc «Merry» Brandigamo	Dominic Monaghan
Celeborn	Marton Csokas		Marton Csokas
Denethor		John Noble
Elrond	Hugo Weaving
Éomer		Karl Urban
Éowyn		Miranda Otto
Faramir		David Wenham
Galadriel	Cate Blanchett
Gamelin		Bruce Hopkins
Samsagaz «Sam» Gamyi	Sean Astin
Gandalf	Ian McKellen
Gimli	John Rhys-Davies
Gríma		Brad Dourif
Haldir	Craig Parker
Legolas	Orlando Bloom
Lurtz	Lawrence Makoare
Rei Bruxu	Shane Rangi Brent McIntyre Andy Serkis (voz)		Lawrence Makoare Andy Serkis (voz)
Saruman	Christopher Lee
Sméagol/Gollum	Andy Serkis
Théoden		Bernard Hill
Peregrin «Pippin» Tuk	Billy Boyd

Rodaxe

El rodaxe cimeru de les trés películes fízose al tiempu en Nueva Zelanda de magar l'11 d'ochobre de 1999 hasta'l 22 d'avientu de 2000, nun periodu de 438 díes. Fixéronse rodaxes menores adicionales añalmente dende 2001 a 2004. La triloxía rodóse en más de 150 llugares, con siete unidaes estremaes rodando, amás de rodaxe de soníu na redolada de Wellington y Queenstown. Amás de Peter Jackson como direutor de tola producción, ente los direutores de les estremaes unidaes inclúinse John Mahaffie, Geoff Murphy, Fran Walsh, Barrie Osbourne, Rick Porras y dalgún otru asistente del direutor, productor o guionista disponible. Jackson, quien controlaba toles unidaes vía satélite y cola presión añadida de constantes reescritures del guión y el visionáu del resultáu de les interpretaciones rodaes poles estremaes unidaes, namás podía dormir pola nueche malpenes cuatro hores. Por aciu de les distancies de dalgunos de los llugares de la filmación, l'equipu téunicu llevaba consigo kits de sobrevivencia en casu de que los helicópteros nun pudieran llegar al llugar pa trayelos a casa a tiempu. El Departamentu de Conservación de Nueva Zelanda foi xulgao por aprobar la filmación en parques nacionales ensin la consideración afayadiza de los efeutos ambientales adversos y ensin notificación pública. Los efeutos desfavoratibles de la filmación de les secuencies de batalla nel Parque Nacional de Tongariro provocaron la igua del trabayu fechu.

D'estamiente, a fines de 1999, la secuencia hacia Bree na que los hobbits Frodo, Sam, Marry y Pippin s'escuenden embaxo d'un árbol d'un Espeutru del Aniellu foi la primer escena que se rodó. Durante estos primeros periodos de filamción, l'empobine cimeru xiraba en tornu a The Fellowship of the Ring, más concretamente cuando los mentaos hobbits procuran llegar a Rivendel, como una sola nueche nos esteriores de Bree; esto cola sida de que los cuatro actores s'acoplaren más como personaxes ñeros. Unidaes secundaries rodaron tamién pa la persecución del ríu de Bruinen y la deforestación d'Isengard. Polo xeneral, Liv Tyler namás diba a Nueva Zelanda por escenes que requeríen de peligrosos movimientos y pasaron cinco díes pa que rodara la escena hacia Bruinen demientres la so doble Jane Abbott montaba a caballu. Sicasí, nel primer mes de rodaxe, Viggo Mortensen amecióse al repartu poco dempués de que se concluyera que'l actor Stuart Townsend abultaba mui mozu pa interpretar a Aragorn. Mortensen principió grabando la escena de la so llucha escontra los Espeutros del Aniellu na Cima de los Vientos ensin tener recibío dengún adiestramientu especial en conceptu de manexu de la espada. Asina y too, abondu tiempu pa dar un cursu d'esgrima col mayestru Bob Anderson, ablucando al equipu de la película pola so habilidá pa metese rápido nel so papel y la so participación en tolos detalles de la so personificación.

Sean Bean entamó a facer les sos respeutives tomes en payares de 1999 pa cuasi tolas escenes de so. Nesti mes el rodaxe empobinó'l so llabor na batalla de'Amon Hen. Magar se filamba más pa The Fellowship of the Ring, les inundaciones en Queenstown obligaron a la producción a grabar los interiores de montañes de The Return of the King nos que participaron Elijah Wood y Sean Astin. Pola so parte, tres un descansu en Navidá, Ian McKellen amecióse al rodaxe'l 17 de xineru de 2000, xusto cuando venía de rematar el so llabor en X-Men. McKellen nun fizo amistá colos actores de los hobbits hasta que l'actor Cristopher Lee principió a filmar en febreru, ya que xeneralmente trabayaba col so doble a escala. Rodar la secuencia de la batalla nos interiores d'Orthanc, cola ausencia d'aire acondicionao (pola atmósfera) y l'engarru tanto de les peluques como de los atuendos, foi descrita por dambos intérpretes como "fatal". La escena de los Puertos Grises, que tien llugar en The Return of the King, grabose en tres ocasiones polos malos enfoques de la cámara.

Nel momentu en que se grababa nos esteriores de Hobbiton y Rivendel nel Parque Kaitoke tres la llegada d'Ian Holm, nos llanos de Rohan facíen les escenes Mortensen, Orlando Bloom y John Rhys-Davies pa la persecución de los Uruks, eventu que na novela se describía sobre grandes praos. Sicasí, per aciu de qu'en Nueva Zelanda nun hai praos, l'equipu eventualmente foi a la reserva de Poolburn, n'otago. Durante'l rodaxe, los tres actores cimeros mancáronse: Viggo Mortensen franció la dea del pie al dar una patada a un cascu d'Uruk, Orlando Bloom estornicó una costiella al cayer del so caballu y Brett Beattie, doble de Gimli mancóse na rodiella. Más sero dedicaron un mes de rodaxe durante'l día nel Abismu de Helm y otros trés meses durante la nueche baxo la direición de Mahaffie, na cantera de Dry Creek, fuera de Wellington. Foi entós cuando la producción se vio na necesidad d'agrandase, demientres Wood y Astin rodaben escenes nel Cuetu Ruapehu pa Emyn Muil y Orodruin. Asinamesmu'l 13 d'abril de 2000 Andy Serkis formó parte de la producción, momentu nel que se grabaron les escenes del prólogu de la primer película, asina como la batalla de la puerta negra], asitiándose'l so rodaxe nun campu de mines nel Ermu de Rangipo y nel que dellos soldaos sirvieron d'estres. La mentada escena del prólogu supunxo conflictos nel momentu de preproducción, pos nun entamu s'atalantó col propósitu de que nel primer flime Gandalf nun dedicara más tiempu en cuntar la hestoria que'l prólogu presentaría. Tres el regresu de Sean Bean, el repartu de la comunidá púnxose al rodaxe de la etapa desenrollada en Moria. En xunu del mesmu añu grabóse lo asocedíu nos Senderos de los Muertos, ente otros munchos llugares. Dempués de delles escenes, los mesos d'agostu y setiempre foron aprovechaos no tocante a tolo venceyáu con Isengard, amás de que n'ochobre se montaron los esteriores d'Edoras. La escena que remató'l procesu de filmación ye la reacción de los cuatro hobbits na población de Minas Tirith, inclinándose ante ésta.

Postproducción

Cada una de les trés películes tuvo un añu dafechu de postproducción enantes de los sos respeutivos estrenos n'avientu de 2001, 2002 y 2003, rematando n'ochobre o payares del añu correspondiente. Tres d'ello, l'equipu poníase a trabayar aína na siguiente película. Nos caberos meses de cada ún d'eses dómines, Jackson diba pa Londres pa supervisar la grabación de la banda sonora y continuar el montaxe, demientres siguíen los alderiques con The Dorchester Hotel pol ordenador y los efeutos dixitales por una conexón a Internet de banda ancha dende los estudios Pinewood. Disponía d'un enllace de Polycom de videu con soníu 5.1 pa organizar caleyos y davezu escuchaba la nueva música y efeutos de soníu en cualesquier llugar que tuviera. Les trés versiones estendíes tamién tuvieron una apertada axenda de postproducción pa completar los efeutos especiales y la música al entamu de cada añu.

Efeutos especiales

Pa la triloxía emplegáronse innovadores téuniques y efeutos visuales dixitales. La primer película tien sobre 540 efeutos, la segunda 799 y la tercera 1488 (2730 en total). El total enantó hasta 3420 nes versiones estendíes. 260 artistes d'efeutos visuales trabayaron na triloxía, y el númberu duplicóse pa The Two Towers. L'equipu téunicu, lideráu por Jim Rygiel y Randy Cook, trabayó muncho faciendo hores peles nueches, obligáu a aniciar efeutos especiales nun curtiu espaciu de tiempu pola imaxinación hiperautiva de Jackson. Por exemplu, delles de les secuencies cimeres de la Batalla del Abismu de Helm foron aniciaes nes caberers seyes selmanes de The Return of the King. Magar Weta Workshop foi la cimera responsable de la mayor parte de los efeutos visuales de les películes, la escena onde Arwen confronta a los Xinetes negros en The Fellowship of the Ring foi fecha dafechu por Digital Domain.

La producción tuvo enguedeyos tres l'emplegu de dobles a escala, igual que cola perspeutiva forciada a un nivel xamás visto enantes na industria del cine. Asina, usáronse grandes y pequeños dobles a escala en ciertes escenes, demientres que s'aniciaron duplicaos de dalgunos escenarios (incluyendo Corneyal de Fardel en Hobbiton) en dos escales estremaes, col envís de que los cerníos personaxes s'afayaren nel so respeutivu tamañu. Igualmente emplegóse la perspeutiva forciada pa que se notara que los hobbits (con un tamañu relativamente pequeñu) taben interactuando colos homes y los elfos, que tienen una altura superior. Weta acuñó'l términu "masitura" pa les 72 miniatures producíes na cinta, en referencia al so enorme tamañu. Diches miniatures tienen la escala 1:4 del Abismu de Helm. La mayoría de los sets edificáronse pa dar llugar al aniciu de modelos y pintures mate.

Bien de les criatures de la Tierra Media, como los trolls, los Balrogs, los Ents, los Huargos, los Olifantes y Ella-Laraña, ente otros, foron xeneraos por ordenador dafefchu. Los creadores dedicaron meses al aniciu y anovamientu de les criatures, nel instante nel que los diseños de los bocetos foron previamente apolizaos en maquetes y escaniaos por ordenador. Yera entós cuando los animadores axustaben les cadarmes y músculos de cada cuerpu ensin animar. Weta principió a animar a Gollum a la fin de 1998, usando un sistema de músculu humanu xenéricu, cola fin de convencer a New Line de que'l resultáu podía llograse. El personaxe xeneráu por ordenador axeitóse de magar les carauterístiques faciales d'Andy Serkis, asina como de la so voz y actuación. Serkis basó la so voz en soníos que davezu emite'l so mixu. Nun entamu l'equipu d'animación cuntó usar dos téuniques p'aniciar el personaxe de Gollum: la camptura de movimientu y la manipulación de marionetes (keyframe). L'equipu de rodaxe grabara dos tomes de cada escena na qu'aprucía Gollum, una con Serkis como referencia pal restu d'actores y otra ensin él pa que los animadores pudieren inxerir más sero al Gollum dixital. Sicasí, cuando l'equipu de Weta vio les tomes, cuidaron que los actores interpretaben meyor naquelles nes qu'aprucía Serkis, poro, decidieron usar la téunica del rotoscopiu pa Gollum, que permiete aniciar un personaxe dixital siguiendo una referencia grabada en vivu.

Enllaces esternos

• Wikimedia Commons tien conteníu multimedia tocante a Triloxía cinematográfica de The Lord of the Rings.

• Datos: Q190214
• Multimedia: The Lord of the Rings film trilogy