Baltasar Fernández Cue

Baltasar Fernández Cue (26 de setiembre de 1878, La Pola – 1966, Venice ^(es) ) foi un escritor asturianu.

Baltasar Fernández Cue
Vida
Nacimientu	La Pola, 26 de setiembre de 1878
Nacionalidá	España
Muerte	Venice (es) , 1966 (87/88 años)
Estudios
Llingües falaes	castellanu
Oficiu	escritor

Biografía

Yera fiu del procurador de tribunales Benigno Fernández Varela, más conocíu por Benigno Pola por ser nacíu en La Pola (conceyu de Ḷḷena), y d'Ana Cue Fernández. Ye por ello que Baltasar ye tamién conocíu como "Baltasar Pola". Los primeros estudios failos en delles escueles de Llanes y el bachilleratu nel colexu de la Encarnación de la mesma villa. En Bayonne (Francia) estudia francés y amplía los estudios de bachilleratu durante dos años, internu nun colexu de los hermanos de la Doctrina Cristiana. De siguío marcha pa Londres onde fai la carrera d'inxenieru de caminos, canales y puertos, estudios que fina en 1901. Esti mesmu añu emigra a Méxicu y entama a trabayar pal indianu de Ribedeva Íñigo Noriega. Ente 1904 y 1913 trabaya pal gobiernu mexicanu como inxenieru inspeutor de "Ríos y Concesiones". Cola llegada al poder de Victoriano Huerta dexa de collaborar na alministración y entama una empresa d'inxeniería con Manuel Pardo y Eduardo Hay, tamién inxenieros como elli. Esti rechazu al nuevu gobiernu y l'axuntanza col opositor Hay lleva a Fernández Cue a tener qu'escapase en 1914 pa España. Pero al pocu reclámalu el so sociu Eduardo Hay, qu'hubiere algamáu el cargu d'oficial mayor col triunfu de Venustiano Carranza, pa percorrer tola América Llatina, los EEXX, España y Portugal en llabores d'axente confidencial. En 1916 regresa a Méxicu y vuelve a trabayar en dellos puestos pal gobiernu de Carranza. Finando l'añu 1920, comu consecuencia del sofitu al asesináu presidente, el llaniscu ye secuestráu pola policía política y en febreru de 1921 tien qu'abandonar el país azteca. Establecíu en San Antonio (Texas) da clases d'español nuna academia hasta 1922 que marcha pa El Paso (Texas) a trabayar nuna papelería-llibrería d'unos collacios. En 1924 marcha pa Los Angeles (California) como profesor d'español, trabayu que nun cuayó polo que decide facese cronista cinematográficu. L'esitu algamáu nesti llabor facilíta-y, hacia 1929, un contratu p'adautar películes del inglés al castellán, pero, al pocu, camuda otra vegada y entama a trabayar como xefe de publicidá estranxera pa tolos países nos famosos estudios de la R. K. O. Pero la so verdadera vocación lliteraría llévalu a dexar esti trabayu pa dedicase, pola so cuenta, a l'adaptación d'obres pa películes n'español. De toes formes, el llaniscu nun yera p'aposentar y en 1931 dexa Hollywood y entama otru percorríu per América, finando nel añu 1933 cola so llegada a Madrid. N'España collabora en "El Socialista" y cuando la Guerra Civil, polos sos conocimientos d'idiomes, trabaya nel SIM (Serviciu d'Información Militar) como traductor. Al finar la guerra ye deteníu y condenáu a muerte por un tribunal militar. Pena que-y conmuten pola perpetua. Depués de pasar peles cárceles de Toreno, Yeserías, Ocaña, Islla de San Simón y Vigo, equí yá con permisos temporales, aprovecha pa escapar a Lisboa y depués a Nueva York en 1945. Instaláu en California vivirá nos EEXX hasta la so muerte en 1966. Durante esti tiempu nun dexará de collaborar n'abondes revistes y periódicos de les dos orielles del Atlánticu con crítica cinematográfica, ensayu, cuentos, poesía, etc. tantu n'inglés, como en francés, castellanu o asturianu.

Vida lliteraria

Aparte de les creaciones escolares, la verdadera vocación lliteraria de Baltasar Fernández Cue apaez yá nel branu de 1899 cuando asoleya na so villa natal el periodiquín humorísticu "La Tijera" que, pol ruxerrux que llevantó, duró un númberu. Hacia 1908 faese cargu de la direición de "El Rivero", editáu en Méxicu pa defender los intereses de los llaniscos. Hacia 1916 ye direutor-xerente de "El Heraldo de Méxicu", al serviciu de la política de Carranza frente a la d'Obregón. Esti cargu nel periódicu será'l caberu de Fernández Cue nos sos 20 años d'estancia en Méxicu. Al par d'esti llabor, Cue dedicóse tamién a escribir poesía y prosa publicando la so obra nos más importantes periódicos mexicanos: "El Correo Español", "El Demócrata", "Excelsior", "Revista de Revistas", "La Vanguardia", "El Universal Gráfico", "El Nacional" y "La Opinión". Tamién na so etapa de cronista cinematográficu asoleyó los sos artículos n'abondos periódicos americanos y españoles como "El Sol" y la revista "La Pantalla", de Madrid; "Excelsior", "Jueves de Excelsior" y "Revista de Revistas", de Méxicu; "Cine Mundial", de Nueva York; "Mercurio", de Santiago de Chile y "Excelsior", de Manila. Fernández Cue escribió y estrenó una obra de teatru basada na vida del bandíu conocíu como El Rayo de Sinaloa a la que-y puso de títulu "El amigo de los pobres" y firmó col alcuñu de Gabriel Argüelles, col que tamién firmó dos películes de consumu: Parlez vous? y Marie, Marie. Fue'l direutor ente 1930 y 1931 de "The Hollywood Bulletin", periódicu dedicáu a publicitar los artistes de fala española. La so presencia n'España nos años 30 aprovechóla pa collaborar con dellos medios: "El Oriente de Asturias" y "El Pueblo", de Llanes; "Informaciones" y les revistes "Blanco y Negro" y "Mundo Nuevo", de Madrid. Pero, según Constantino Suárez (1936), los meyores trabayos son los escritos n'inglés nel selmanariu "The Kinematograph Weekly", de Londres. Tamién ente 1933 y 1934 resucitó "La Tijera", qu'unviaba a los llaniscos y firmaba los artículos con dellos de los sos alcuños. Estos fueron abondos: Juan Zumbón, J. del Garuñu, Gabriel Argüelles, BFC, Ermitaño Epicúreo, Don Q, Peneque... En 1981 la antoloxía "Cuentos y leyendas", editada por "El Oriente de Asturias" de Llanes, incluye dos rellatos de Fernández Cue: "Una diosa llanisca" y "Cuando la francesada...". Estes obres tamién apaecen en “Baltasar Pola, un llanisco en Hollywood”, tamién editáu por El Oriente de Asturias en 2008, con prólogu d'Ana Vázquez Honrubia y edición de Manuel Maya Conde. Esta ye la publicación más completa d'esti autor con cuentos como "El ánima de la Cuevona", "Pelayín"; artículos como "La colonia española y el medio ambiente"; "El Absolutismo en España"; epistolarios a Primo López y a Manuel Albar; la conferencia "Los españoles y el nacionalismo mexicano"; artículos referíos al cine: "Cómo llegué a cronista en Hollywood", "En el camerino de Norma Talmadge", "La destrucción de Hollywood", "Xochimilco en California", "La falsedad de Hollywood"; y el poemariu "En el umbral de la muerte", escritu nes cárceles franquistes.

Obra

• Los españoles y el nacionalismo mejicano (1917). Méjico.
• Baltasar Pola, un llanisco en Hollywood (2008). Llanes: El Oriente de Asturias.

Esbilla d'artículos, conferencies y collaboraciones

• "Prólogu" a La mio tierrina (1919), de C. Martínez Riestra. El Paso (Texas).
• "Oración fúnebre en el entierro de Venustiano Carranza" (1920). Asoleyáu n'abondos diarios de la dómina.
• "El verdadero Rodolfo Valentino" (1930). Diez artículos asoleyaos en Cine Mundial, Nueva York.
• "Hacia otra reconquista: Asturias, nunca a la zaga" (1932). Conferencia nel Centru Asturianu, en Humanitas, Méxicu.
• "Lo español en California. Cómo llegué a cronista en Hollywood" (1933), en Blanco y Negro. Madrid.

Bibliografía

• Avecilla, Ceferino R. "Un estudio". La Libertad, marzu 1934. Madrid.
• Fidalgo, Ángel. "Baltasar Pola, una vida de cine". La Nueva España, 27-08-2009[1]. Uviéu.
• Morán, Próspero (1995). "Baltasar Fernández Cue". Lliteratura nᵘ9. Academia de la Llingua Asturiana. Uviéu.
• Pertierra, Tino. "Del llanisco que adaptó con brillantez «Drácula» al avilesino que trabajó junto al Gordo y el Flaco". La Nueva España, 29-02-2012[2]. Uviéu.
• Sánchez Collantes, Sergio. "Baltasar Fernández Cué (1878-1966), un asturiano en Hollywood". El Comercio, 31-12-2008[3]. Xixón.
• Suárez, Constantino (1936). Escritores y artistas asturianos. T. III, p. 232-238. Madrid.
• Valdes, José C. "La deportación de Fernández Cue". La Opinión, 23-12-1934. Los Angeles, California.
• VVAA (1982). Gran Enciclopedia Asturiana.Tomo VI, p. 265. Vitoria.

Enllaces esternos

• Fundación Pablo Iglesias

• Datos: Q25580583