Catwoman

Catwoman (Muyer-Gata n'asturianu) ye un personaxe ficticiu de DC Comics, de nome Selina Kyle y rellacionada a Batman. Creáronla Bill Finger y Bob Kane, y fizo la primer apaición en Batman # 1 (primavera de 1940). Suel gastar como preseos un llátigu y guantes con garres aguzaes.

Catwoman
Personaxe de Batman (es)
Universu	Universu DC
Creador/a/es	Bob Kane y Bill Finger
Información
Sexu	femenín
Nacimientu	Gotham City (es) ,
Ocupación	lladrón, superhéroe, prostituta, artista marcial y vixilante
Padres	Carmine Falcone (es) valor desconocíu
Fíos	Helena Wayne (es)
Familiares	Mario Falcone (en) , Ahorcado (es) y Alberto Falcone (es)
Nacionalidá	Estaos Xuníos
[editar datos en Wikidata]

Orixinalmente, Catwoman yera una lladrona d'alfayes esperta n'amarutase y conocíenla solo pol nome The Cat, pero col pasar de los años camudó hasta convertise nun personaxe muncho más complexu. Anque creada como rival de Batman, hai una fuerte atraición ente dambos dos que col tiempu convirtióse nun amoríu enguedeyáu, fondu y imposible, anque en delles versiones termina bien.

El títulu d'héroe o villanu pa Catwoman ye bien ambiguu, yá que tien un códigu moral propiu.

Historia ficticia

A lo llargo de los años camudaron delles vegaes la continuidá del Universu DC, y con ella la hestoria del personaxe.

La Catwoman orixinal (Tierra-Dos)

Selina Kyle naz en 1920. Con solo dieciocho años alcuéntrase atrapada nun matrimoniu abusivu con un home que pon penriba de la familia la bayura y posición social. Selina decide abandonalu y conviértese na lladrona d'alfayes "The Cat". Nel primer alcuentru con Batman y Robin nun usaba como vistimienta nada que paeciera traza distintiva de los felinos, yá que s'amarutara d'una vieya pa robar alfayes. Llogra fuxir y llueu torna como Cat-Woman. Al tercer alcuentru con Batman entama de poner una mázcara de gatu, y trabaya pa una organización criminal nomada "el Sindicatu del Diamante". Batman priéndela siempre, pero ella nunca nun tarda en fuxir.

A la siguiente amarútase de la pudiente Margarite Tone y organiza una busca'l tesoru falsa pa robar a los ricayos. Batman píllala y esta da-y un besu. Paradóxicamente, tamién conoz l'alter ego de Batman, Bruce Wayne, y namórase d'él. Batman albidra que Catwoman pue reformase, pero esta torna al crime una y otra vuelta. De fechu, nun tarda en secuestrar al mayordomu de Bruce pa pone-y una trampa.

Al fuxir de la cárcel de nueves, reaxunta la banda y pon un nuevu vistíu moráu, con una mázcara asemeyada a la de Batman y garres aguzaes nos deos. Tamién gasta un coche similar al Batmobile pero cola cara d'un gatu, el Kitty Car. Amás, entama de tener los gatos como temática de los robos.

Cuando un lladriyu-y da na tiesta reaparecen alcordances escaecíes, polo que descubre que llevaba una década con amnesia parcial. Cola memoria restaurada, Catwoman ayuda al Dúu Dinámicu, abandona la vida criminal y desvela a Batman quien ye. Tres pagar polos crímenes cola cárcel abre una tienda animales. Dacuando usa de nueves el vistíu de Catwoman, pero como xusticiera, y llogra que so hermanu, King of the Cats tamién abandone'l crime.

Selina Kyle y Bruce Wayne casen, ella retírase y tienen una fía, Helena. Por ello, Batman dexa'l llabor de xusticieru, masque pa convertise en comisariu de policía. En 1977, un antiguu miembru de la banda a la que pertenecía Catwoman, "Silky" Cernak, entama de xantaxala cola só identidá y nicios falsos d'asesinatu, empobinándola a tornar al crime. Magar de tener lo que siempre suañó, nun pue evitar recayer. Al enterase Bruce intervién pa salvala, pero ella muerre por cuenta d'un accidente. Cuando la verdá-y ye desvelada a Helena, esta xura venganza ante la güesa de so ma, y asina naz la superheroína Huntress.

La Catwoman clásica (Tierra-Ún)

Selina Kyle entama la carrera criminal como la lladrona d'alfayes comicida como The Cat, a la que Batman y Robin detienen, pero fuxe. Tres d'una serie de robos abandona'l crime, pero dempués de lleer sobre los casos de Batman decide tornar con un vistíu moráu, una mázcara asemeyada a la de Batman y el nome de Catwoman. Amás, munchos de los robos que cometer tienen los gatos como tema.

Tiempu dempués y tres dellos delitos y cambeos de vistimienta y oxetivos, ye temporalmente tresportada a otra dimensión en compaña de Wonder Woman. Al tornar vuelve al vistíu clásicu, a reagrupar la banda y a los crímenes temáticos. Cuando trata de acabar con una imitadora, Catgirl, Batman vuelve a prendela.

N'otres ocasiones faise embaxadora del país de Sudaria pa robar unos planos, o afirma que va matar a Batman pa tratar de demostrar al mundu'l crime que ye quien a matar. Pero un día decide abandonar el crime, refórmase y invierte dineru y trabaya n'Industries Wayne. Cuando descubre que Bruce Wayne anda vixilándola porque nun s'enfota nella fadia abondo, pero llueu faen les paces y Selina ayuda a detener a Joker cuando esti secuestra a Alfred Pennyworth, el mayordomu de Batman.

Cuando diagnostiquen a Selina que carez d'una enfermedá rara que solo pue curase con una planta rala, y una muestra d'esta ye robada del muséu, Batman sospecha d'ella y atrápala, pero en realidá foi Cat-Man. Nunca nun recuperen la planta, pero'l traxe místicu de Cat-Man sánala.

Catwoman collabora delles vegaes más con Batman y Robin, pero acaba decidiendo romper la rellación y exercer de xusticiera por cuenta propia. Cuando vuelve, tiempu dempués, célase pola rellación de Bruce con Vicki Vale y fiérela de gravedá. Batman y ella engárriense, y Catwoman acaba pescanciando que la rotura ye pa bien. Asina, vuelve a ayudar davezu a Batman y los sos aliaos, anque siempres ente poses y cayendo de nueves n'amoríu con Batman.

La Catwoman de la Edá Escura (Tierra Nueva enantes de Zero Hour)

El nuevu orixe de Catwoman surde en 1987, a partir de Batman: Year One. Selina ye una prostituta y dominatrix, amante de los gatos, qu'aparentemente foi víctima d'abusu sexual por so pá tres del suicidiu de so ma, y dempués separada de so hermana.

Tres una cuera que-y da'l proxeneta, un policía ponla en contautu con Wild Cat pa que-y enseñe a engarriase. La única amiga que tien ye una collacia menor d'edá llamada Holly, que ye violada pol proxeneta. Selina, acabante de ver a Batman n'aición, llibera l'amiga del xugu del esplotador que la sometía a esa vida y entama d'imitar a Batman, magar que con un envís distintu: convertise nuna lladrona d'alfayes. Asina, fai un disfraz inspiráu nel héroe y usa métodos asemeyaos. Una de les primeres víctimes ye la mafiosa Carmine Falcone, y ye entós cuando Batman la conoz.

Pa vengase, el proxeneta secuestra a la hermana. Na engarriada, con Batman pel mediu, el proxeneta esbarátase y muerre, y a la hermana sálvala l'héroe.

Pa ganar unes perres estra, Catwoman merca un chigre nomáu Tim Roof Club. Nes navidaes roba un broche percaru pa regala-ylu a Holly, qu'agora vive en New Jersey col maríu. Pero cuando se ve obligada a pidí-ylu de vuelta, el maríu de Holly mata a esta pa impidilo. Catwoman, con ayuda d'un amigu policía, llogra que vaiga a la cárcel polo que fizo.

El villanu alloriáu Mister Handsome secuéstrala y enzárrala con un monstruu como si foren la Bella y la Bestia, pero Catwoman llogra vencelu. Dempués d'eso, el criminal Bracuda toma'l so barriu y ella consigue echalu.

Bane, tres rompe-y l'espinazu a Batman, trata de contratala, pero ella niégase, lo que fai que Bane vaiga tres d'ella. Un amigu viéndela y un asesín vuela-y el pisu. Catwoman escuérrelu hasta un país del Caribe, Santa Prisca, y ehí enterase de qu'un nuevu Batman (Azrael) venció a Bane. Catwoman mata l'asesín y en volviendo a Gotham mata l'amigu que la vendió.

Trabayando con unos activistes pa evitar un ataque terrorista, Catwoman roba una sustancia tóxico, lo que la fai enfrentase al Batman nuevu. Un tiempu dempués tenta de robar teunoloxía a un empresariu corruptu pa salvar un amigu ingresáu n'hespital. Pero nel cursu del robu apaecen los dos Batmen (primeru Azrael, llueu l'otru) y hai una engarriada. L'empresariu trata de fuxir, pero Catwoman priéndelu, entrégalu a la policía y garra l'aparatu que necesitaba.

En 1994 Catwoman allúgase en Metropolis col envís de robar un collar de cuarenta millones de dólares. Pero, al empar, unos criminales traten de secuestrar a la dueña del collar y Catwoman impídilo en cuenta de robalu. Mentanto, Green Lantern alloria y desanicia l'universu pa crear unu nuevu, pero Brainiac rescata la ciudad de Metropolis, y ponla salva n'otru planeta con otres cincuenta y ún ciudaes de cincuenta y ún mundos. Un añu enteru ta la ciudá cubierta por una cúpula, y mentanto los poderes de los superhomes d'esta desactivaos. Nesa, Catwoman refalfia de robar y entama una carrera como xusticiera, guardando'l barriu probe conocíu como "Distritu Suicida".

Tres del añu, la cúpula desapaez y el planeta, que ta vivu, manda a les ciudaes batallar unes con otres pola sobrevivencia. Darréu, Batman de Tierra-22 llega a Metropolis y, tres d'una pequeña engarriada ente dambos, enfréntense a la banda Intergang y falen de buscar una solución que nun seya matase unos a otros. Pero un paisanu del Distritu Suicida, queriendo que la so ciudá seya la vencedora del tornéu, piega un tiru al Batman d'otru mundu. Catwoman ponse en mediu y ye ella la que muerre. Batman, con Catwoman en brazos, xúra-y atopar una solución.

La Catwoman de la Edá Moderna (Tierra Nueva enantes de Flashpoint)

La hestoria d'esta Catwoman ye mui asemeyada a la de l'anterior, pero nunca nun foi prostituta, sinón lladrona caleyera. Amás, la so amiga Holly nun morrió.

Tres de la torna de Bruce Wayne como Batman quitando a Azrael, apuerta un andanciu qu'afara Gotham y Penguin contrata a Catwoman pa buscar un sobreviviente en particular, colo que rique collaborar con Robin y Azrael. Sicasí, a esti asesináronlu, pero Catwoman ayuda a los héroes hasta atopar una cura. Darréu, un gran terremotu esbarrumba tola ciudá y Catwoman tamién ayuda a salvar a tolos que puean.

Tiempu dempués Catwoman plania un gran atracu, pero sal mal y muerren-y tolos socios. Sam Bradley intentó que nun colara con toles perres, pero nun foi quien. Refalfiada de la vida aburrida de señoritinga, torna a la casa u vivió de neña, nel East End, pa curiar de los marxinaos, y elli recluta a Holly pa qu'escuque lo que pasa pel barriu. Pero a Holly piéguen-y un tiru cuando ye testigu del asesinatu d'un policía, y Catwoman contrata a Sam Bradley pa que descubra que ye lo que pasó. Asina, xuntos, esmantelen una banda de policíes corruptos que trabayaben pa Black Mask.

Nesa, Selina tira de perres pa construyir un centru comunitariu en barriu, tratando de torgar la medra de bandes. Sigue a ún de los rapazos a la so escondita, y ehí descubre que la xefa ye Sylvia Sinclair, una amiga so de la infancia, cola qu'alzolaba y a la qu'abandonó pa evitar que la pillaren. Esta y Black Mask planien vengase de Catwoman y secuestren a la hermana y a Holly. Catwoman sálvales, pero tres de la tortura a la que someten a la hermana, esta acaba en coma. Catwoman decide llevar a Holly a Wildcat pa que deprienda artes marciales como ella siendo moza.

Posion Ivy controla mentalmente a Selina pa que vuelva a robar, y cuando Batman ta escorriéndola ella bésalu, siendo correspondida. Xuntos engárriense con Posion Ivy, y impiden qu'esta controle tamién a Superman.

Cuando Bruce y Selina van a la ópera, Harley Quinn interrumpe l'actuación, y dambos dos engárriense con ella. Catwoman recibe un tiru y Batman ta a puntu de matar a Joker por ello. Llueu él desvela-y la so identidá y entamen una rellación, anque de mano nun-y paez nada bien a Robin. Sicasí, Batman nun acaba de confiar en Catwoman y ruempen.

Tres d'ayudar a la Justice League a lluchar escontra la Secret Society fiérenla y, mentanto alica na bat-cueva, Despero llava'l celebru a Batman y ye Catwoman la qu'ha alvertir a los miembros de la Justice League non afeutaos. Llueu, Catwoman entra na Secret Society, pero col cometíu d'arreventala dende dientro. Simula morrer pa esmantelar la estructura criminal del East End, mata a Black Mask y retírase.

Tien un fíu (del que Sam Bradley ye'l pá), y la so amiga conviértese na nueva Catwoman. Unos villanos deducen quien ye y secuestren al fíu, polo que tres de recuperalu pide a Zatanna que-yos borre les mentes. Tres d'ayudar de nueves a Batman escontra unes amazones malvaes, esti convídala a ser miembru de los Outsiders.

Pa mancar a Batman, el villanu Hush saca-y el corazón, dexándola con un sistema de vida artificial. Cuando Batman lu recupera, Doctor Mid-nite y Mister Terrific vuelven a poné-ylu. N'alicando, Catwoman desendolca un plan col qu'arruina a Hush pa vengase. Dempués escuérrelu hasta Vietnam, u lu tortura dellos díes enantes de entregá-ylu a Nightwing y Robin.

Tres l'aparente muerte de Batman, Catwoman sigue col llabor de xusticiera y axúntase a Poison Ivy y Harley Quinn pa ello (nel grupu nomáu Gotham City Sirens).

Cuando los Black Lanterns lleguen, Black Mask ye ún de los villanos que resuciten, y ceo va vengase atacando l'hespital u Catwoman tien la hermana, y, anque les Sirens lu vencen, esta espierta, culpa a Catwoman d'amola-y la vida y cola alloriada. Conviértese nuna villana nomada Sister Zero, y llueu tenta de matar a Catwoman.

Un día, en tornando a casa, Selina atopa una rapaza restolando. Ye una Falcone que quier localizar la escondita de Black Mask pa grapalu y cobrar la recompensa. Catwoman amárrala y trata de consiguir ella la recompensa, pero la otra ye a lliberase. Esto dexa ablucada a Catwoman, y tres d'engarriase con Black Mask tómala como discípula col nome de Catgirl.

Tres la torna de la muerte de Batman, esti funda Batman Inc., un equipu internacional de Batmen, y Catwoman ayúdalu dacuando nes misiones. Eso sí, dexa fuxir a Poison Ivy y Harley Quinn anque yá nun se lleven.

Enantes de que la llinia temporal seya camudada, Brainiac rescata la ciudá de Gotham y ponla salva n'otru planeta con otres cincuenta y ún ciudaes de cincuenta y ún mundos. Un añu enteru ta la ciudá cubierta por una cúpula, mentanto los poderes de los superhomes d'esta desactivaos. Cuando les cúpules desapaecen y el planeta viviente ordena a les ciudaes lluchar pola sobrevivencia, Catwoman, Poison Ivy y Harley Quinn xúntense de nueves pa vivir aventures. Poco dempués los mundos son refechos, y Gotham devuelta al so llugar.

Apaiciones n'otros medios

Televisión

Julie Newmar como Catwoman na serie de televisión de 1966 Batman.

Eartha Kitt como Catwoman na serie de televisión Batman nel añu 1968.

Batman (1966-1968)

Na serie de los años sesenta interpretóla Julie Newmar nes temporaes 1966 y 1967, y Eartha Kitt en solo trés capítulos antes de finar la serie en 1968. Na serie, Catwoman yera una de los villanos principales, inestremable de los otros, pos anque mostrara atraición escontra Batman ello nun facía que nun tentara de matalu, al igual que los demás.

Batman la serie animada (1992-1995)

Na aclamada serie animada de los noventa, influyida n'abondo pola película de Tim Burton, Selina Kyle asume un rol similar de lladrona y antagonista al empar qu'interés románticu, ensin incurrir nunca en delitos violentos. Selina ye roxa, al igual que Michelle Pfeiffer, anque'l traxe ye llixeramente distintu. La actriz de voz foi Andriene Barbeau.

The New Batman Adventures (1997)

Selina tenía'l pelo curtio y moreno (a diferencia del pelo roxo y llargo, probablemente rabetada y tiñida porque asocede na mesma continuidá que la serie anterior). Nesta serie, al igual que na otra, nun queda nidio si ye heroína o villana, yá que nun ayuda a Batman nunca pero tampoco paez tolerar qu'esti sufra dañu dalu. Sicasí, caltiénse esa rellación amor-odio de la serie orixinal, masque perdiendo parte del erotismu de la versión anterior.

Batman Beyond (1999)

Magar que nun fai apaición de nengún tipu en Batman Beyond y desconozse qué foi d'ella, Catwoman tien una fuerte presencia na serie. Méntenla de mano nel episodiu "La mano del home muertu", nel que Terry McGinnis (el Batman del futuru) conoz a una moza llamada Melanie Walker, con quien empieza una rellación que podría comparase a la que Selina Kyle tuvo col Batman orixinal. Inclusive, el mesmu Terry pregúnta a Bruce a la fin del episodiu si-y asocedió daqué similar, a lo que Bruce sonrí y respuénde-y "Voi falate d'una muyer llamada Selina Kyle...".

Al rematar la producción de Batman Beyond: Return of the Joker, Bruce Timm realizó un guión pa una película nueva de Batman onde Catwoman apaecería avieyada. La película enxamás se realizó, y el guión reescribióse y salió al aire como l'últimu capítulu de la segunda temporada de Justice League Unlimited. En dalgún puntu ente Justice League Unlimited y Batman Beyond, Selina reformóse y convirtióse n'aliada de Batman, pasando a ser otra de los ayudantes. Tou esto ye mentao por Terry y tamién por Bruce nel episodiu "Epílogu".

Gotham (2014)

Selina Kyle apaez na serie de televisión de Gotham, interpretada por Camren Bicondova. Selina Kyle ye presentada como una lladrona de catorce años d'edá col nomatu "Cat", que vive nes cais de la ciudá de Gotham. Nel primer episodiu de la serie ye testigu del asesinatu de Thomas y Martha Wayne, y tres de los asesinatos avérase al perímetru de la Casona Wayne. Gordon fai un esfuerciu por que se quede na Casona Wayne, onde se fai amiga de Bruce. Dempués dambos escapen a la ciudá cuando una banda d'asesinos a sueldu llega a la casona coles mires de matala por ser testigu de la muerte de los padres de Bruce. Anque'l detective Jim Gordon y el mayordomu Alfred Pennyworth llogren rescatar a Bruce, Selina vuelve a les cais a escondese. Más tarde torna a la Casona Wayne pa devolve-y delles coses robaes, y metanes la despidida da-y el primer besu. Na segunda temporada, dempués de superar una rivalidá con Silver St. Cloud, un interés amorosu nuevu de Bruce, vuélvense pareya formal. Esta rellación termina na tercer temporada, cuando la madre de Selina vuelve a Gotham desesperada y pide a so fía dineru pa escapar d'un home que la persigue. Selina descubre que la madre en realidá tar engañifándola y que Bruce ta atalantando si da-y el dineru ensin dici-y nada. Ente llárimes y roxura, la moza ruempe con él. Más tarde, rapten a Bruce y reemplázalu un doblu. Cuando Selina se decata amenaza con delatalu a Alfred, polo qu'él la tira pela ventana d'un edificiu. Na cuarta temporada entama d'actuar Catwoman.

Lee Meriwether, Catwoman en Batman: La película (1966).

Cine

Batman (1966)

Pa esta película, basada na serie televisiva, esperábase contar con Julie Newmar (la principal Catwoman de la serie). Pero ella alcontrábase rodando otra película, polo que tuvo de ser reemplazada pola actriz Lee Meriwether. Na película Catwoman conforma un equipu de villanos xunto a Joker, Riddler y Penguin pa conquistar el mundu per aciu del secuestru de les máximes autoridaes mundiales.

Batman Returns (1992)

Michelle Pfeiffer interpreta a Selina Kyle en Batman Returns.

Na película Batman Returns, Selina Kyle (Michelle Pfeiffer) ye una solitaria y sumisa oficinista que trabaya pal millonariu Max Schreck, quien plania robar tola enerxía llétrico de Gotham City con un condensador, que fai pasar por un gran xenerador. Al descubrilu ella mientres esaminaba archivos protexíos, el xefe asesínala tirándola pela ventana de la oficina. En cayendo del edificiu dende un gran altor, la muyer muerre, pero ye arrodiada por gatos caleyeros que la devuelven a la vida por medios desconocíos. Selina torna al apartamentu, como si nada, pero al escuchar les grabaciones del contestador telefónicu, que-y recuerden la vida que lleva, da-y ataque de roxura reprimida. Selina destruye'l llar y desfaise de too aquello que representa la vida d'enantes, atopa nel guardarropa una gabardina de vinilu negru, estrózala y cues un traxe de gata colos farrapos.

Catwoman cortexa a Batman y a Bruce Wayne, como Catwoman y como Selina. A la fin de la película vese fráxil, perdida, y mesmamente que perdió parte'l xacíu. Asesina al xefe y paez suicidase, pero nun caleyón asoma la so solombra, colo que s'infier que volvió a la vida de nueves.

Nel crossover de les series de superhéroes DC de la canal CW, Crisis on Infinite Earths vese qu'estes versiones de Batman y Catwoman tán casaes.

En Batman Forever ye indireutamente mentada pola doctora Chase Meridian, interpretada por Nicole Kidman, cuando en trabayando como psiquiatra de Batman, confiésa-y el so interés amorosu y pregúnta-y si quixera que vistiera un traxe de vinilu y llevara un llátigu.

Catwoman (2004)

Hale Berry, Catwoman en Catwoman.

En 2004, Halle Berry interpretó a un personaxe llamáu Catwoman na película de mesmu nome, pero'l personaxe nun tien nenguna rellación col universu de Batman nin con Selina Kyle. Nesta película, Catwoman llámase Patience Phillips, y ye una diseñadora gráfica que trabaya nuna empresa cosmética. Viéndose metanes una enorme combalechadura, Patience muerre, ye resucitada por un gatu mau exipciu y adquier poderes sobrenaturales rellacionaos con habilidaes felines. Nesta película amiésten-y una esplicación mística al orixe del personaxe, a diferencia de la Catwoman del Universu DC que nun tien poderes sobrenaturales pero talamente como na película de Tim Burton. La ropa espón-y el banduyu, que tamién ye'l so puntu débil.

Anne Hathaway, Selina Kyle en The Dark Knight Rises.

The Dark Knight Rises (2012)

Anne Hathaway interpreta a Selina Kyle na película The Dark Knight Rises, continuación de Batman Begins y The Dark Knight. Nesta versión, Selina Kyle ye una lladrona de'alfayes hábil col nomatu "The Cat" (La Gata) y buscada en munchos llugares pola mor de los robos. Una de les sos motivaciones principales ye consiguir un programa pa borrar la so identidá y entamar una vida nueva.

Catwoman muestra tener grandes habilidaes en delles ocasiones; amarutándose d'emplegada doméstica pa entrar nos cuartos de la Casona Wayne y robar buelgues dactilares (por encargu) y el famosu collar de perlles de la madre de Bruce. Dempués vese robando alfayes y corriendo pelos teyaos de los edificios de Gotham hasta enfrentase escontra los soldaos de Bane.

Destaca la so moral ambigua y, al igual que nos comics, ye una de les dos muyeres principales con interés amorosu escontra Bruce Wayne/Batman. Finalmente, Bruce consigue borrar el so pasáu criminal y dambos dos van empezar una vida fuera de Gotham, xuntos.

El diseñu de vestuariu básase na Catwoman de Julie Newmar de 1966, la esencia del personaxe sacáronla de los primeros cómics de 1940, les escenes n'esteriores y la amiga Jen tán basaos n'escenes de cómics modernos y la amiga prostituta preadolescente Holly del clásicu comic Batman: Year One. Na película incluyóse amás una escena na que Selina y Bruce tán nun baille de mázcares, talamente como en Batman Returns.

Ver tamién

• Catsuit

Referencies

• Datos: Q158952
• Multimedia: Catwoman