Estadiu Hermanos Antuña
L'Estadiu Hermanos Antuña ye un estadiu de fútbol asitiáu na villa de Mieres, n'Asturies, España. Inauguráu'l 16 de setiembre de 1951 col nome de Nuevu Estadiu del Batán, nel añu 1964 camudó'l so nome pol d'Hermanos Antuña, n'homenaxe a los hermanos Joaquín y Ramón Antuña, qu'exercieron una destacada llabor impulsora nos primeros años del club, siendo Ramón Antuña presidente de la entidá deportiva durante ventinueve años.[1] L'estadiu ye de propiedá municipal, el terrén de xuegu ye de yerba artificial y les graes tienen capacidá p'allugar a 2.940 espectadores.
| Estadiu Hermanos Antuña | |
|---|---|
| estadiu | |
 | |
| Llocalización | |
| País |  España |
| Autonomía |  Principáu d'Asturies |
| Provincia | provincia d'Asturies |
| Conceyu |  Mieres |
| Coordenaes | 43°15′24″N 5°46′49″W / 43.256572°N 5.780242°O |
  Estadiu Hermanos Antuña Estadiu Hermanos Antuña (Asturies) | |
| Historia y usu | |
| Apertura | 16 setiembre 1951 |
| Dueñu | Mieres |
| Deporte | fútbol |
| Usuariu | Caudal Deportivo |
| Aforu | 4000 |
 | |
Historia
editarNel añu 1919 créase'l primer campu del Batán. Esti recintu duraría hasta dempués de la Guerra Civil, desaniciáu pola espansión de la Fábrica de Mieres. Col ascensu a Segunda División del Caudal Deportivo constrúyese el Nuevu Campu del Batán, inaugurándose'l 16 de setiembre de 1951 nun partíu de lliga escontra la SD Huesca. Cinco años dempués, el 5 de febreru de 1956, rexístrase la que quiciabes ye la mayor asistencia de xente a esti terrén. Foi nun partíu escontra'l Real Uviéu, nel que dalgunos aficionaos tuvieren que ver el partíu dende la pista d'atletismu. Dempués, nel añu 1964 ye cuando se camuda'l nome, tres proponélo el conceyal Xesús Suárez Valgrande nel plenu conceyeru. Tres la muerte de Ramón Antuña en 1971, púnxose un bustu, fechu por Joaquín Rubio Camín nun de los fondos del campu que entavía pue vése ellí. Naquel añu'l Real Madrid vieno a Mieres n'homenaxe al fináu. Na temporada 1972-73 púnxose l'allumáu al campu, col oxetivu de xugar partíos los sábados pela nueche y asina atrayer más públicu. Ún de los partíos más importantes que se xugó nesti estadiu fue'l 9 de xunu de 1982, cuando la seleición de Chile, que taba n'Asturies pa participar nel Mundial 82, enfréntase al Caudal nun partíu amistosu. Otru foi a finales de los noventa, tres munches lliguines d'ascensu perdíes, el 29 de xunu de 1997, l'Hermanos Antuña llénase pa ver l'encuentru ente'l Caudal y'l Palencia, que finaría col ascensu del conxuntu mierense a Segunda División B. El 6 d'avientu del añu 1995, tres la traxedia del Pozu Nicolasa onde morrieron 14 mineros, inaugúrase un monolitu, fechu pol escultor mierense Félix Magdalena, n'homenaxe a los fináos. Esti recuerdu entavía pue vése na entrada del campu.
Nel añu 2007 fáise una reforma na que se camuda la yerba natural pela artificial que tien agora. Constrúyese tamién una nueva grada de xeneral, pónse tartán na pista d'atletismu y dáse-y un llaváu de cara a la fachada[2]. En 2020 inauguráronse unos vestuarios nuevos embaxo la tribuna.
Finales
editarL'Hermanos Antuña foi escenariu de cuatro finales de la Copa Federación na so Fas Rexonal:
| Añu | Campu | Campeón | Socampeón | Resultáu |
|---|---|---|---|---|
| 2005 | Hermanos Antuña | Caudal Deportivo | Oviedo ACF | 2–0 |
| 2015 | Hermanos Antuña | Club Marino de Luanco | CD Tuilla | 1–0 |
| 2018 | Hermanos Antuña | CD Lealtad | Real Sporting B | 1–1 (pen.4-3) |
| 2020 | Hermanos Antuña | Caudal Deportivo | Club Marino de Luanco | 1–0 |
Referencies
editar- ↑ La Futbolteca (ed.): «Historia del Caudal Deportivo». Consultáu'l 6 de mayu de 2013.
- ↑ Conceyu de Mieres (ed.): «Estadiu Hermanos Antuña». Consultáu'l 28 de xineru de 2020.
Datos: Q8842805
