Muséu del Ferrocarril d'Asturies

El Muséu del Ferrocarril d'Asturies ye un gran complexu museísticu allugáu na ciudá asturiana de Xixón, nel barriu del Natahoyo, xunto a la sablera de Poniente, consideráu ún de los museos más importantes d'Europa nel so xéneru.^{[ensin referencies]}

Muséu del Ferrocarril d'Asturies
museo del ferrocarril (es)
Llocalización
País	España
Autonomía	Principáu d'Asturies
Provincia	provincia d'Asturies
Conceyu	Xixón
Parroquia	Xixón
Coordenaes	43°32′27″N 5°40′22″W
Muséu del Ferrocarril d'Asturies Muséu del Ferrocarril d'Asturies (Asturies)
Web oficial

El Muséu cunta con Sales d'Esposiciones Temporales, Centru de Documentación propiu (con biblioteca, hemeroteca, archivu documental y archivu d'imáxenes), sales d'actividades, talleres pa escolares, tienda y facilidaes pa persones con movilidá amenorgada. Delles vegaes al añu, prénden pa la so exhibición les llocomotores de vapor que caltién n'estáu operativu, nes nomaes Xornaes del Vapor.

Nes sos enanchaes instalaciones de más de 14.000 metros cuadraos, formaes pola antigua estación de Renfe, la llamada sablera de víes y dos edificios de nueva planta, guarda una de les mayores y meyor conservaes coleiciones de máquines y vagones de ferrocarril del continente européu.

Figura un ampliu conxuntu de llocomotores de vapor d'estremaos ferrocarriles, como'l Ferrocarril de Llangréu, tercer llinia ferroviaria construyida n'España (tres el Barcelona a Mataró y Madrid a Aranjuez) que xunía los conceyos asturianos de Llangréu y Xixón. La coleición tamién posee llocomotores de los Ferrocarriles del Norte, Vascu Asturianu y de munches llinies mineres ya industries. Arriendes, caltién coches de viaxeros, vagones, tranvíes y otros oxetos y útiles arreyaos a los trenes y les víes ferroviaries.

Nun entamu estos ferrocarriles ñacieron p'atender los intereses mineros y les llinies aniciáronse nuna simple espansión de les creaes internamente p'atender les necesidaes de fábriques y mines.

Ésto esplica que s'emplegaren estremaos anchos de vía asina como la falta de conexón ente les desemeyaes llinies, namái algamada con la creación de FEVE ya integración en RENFE de los trazaos d'anchu ibéricu.

Una muestra de les compañíes ferroviaries qu'operaren n'Asturies y que s'afayen representaes nel muséu son les siguientes:

• Anchu de Vía Internacional.
  • Ferrocarril de Llangréu.

• Compañíes de Vía Ancha.
  • Compañía del Ferrocarril del Noroeste Llión-Xixón.
  • Compañía del Ferrocarril d'Asturies, Galicia, Llión.
  • Compañía de los Caminos de Fierro del Norte d'España.
  • Rede Nacional de los Ferrocarriles Españoles (RENFE).

• Compañíes de Vía Métrica.
  • Compañía de los Ferrocarriles Económicos d'Asturies (Uviéu-Oriente).
  • Sociedá Xeneral de Ferrocarriles Vasco-Asturiana.
  • Compañía del Ferrocarril de Carreño (Aboño).
  • Ferrocarril Estratéxicu Ferrol-Xixón.
  • Ferrocarriles Españoles de Vía Estrecha [FEVE].

Enllaces esternos

• Páxina web del Muséu
• Artículu sobro'l Muséu del Ferrocarril y entamu d'accesu a información d'antigües llinies Archiváu 2007-12-03 en Wayback Machine

• Datos: Q5196030
• Multimedia: Museo del Ferrocarril de Asturias