Agustín Argüelles Cuesta

Agustín Argüelles Cuesta (1943, Llimanes – 16 d'ochobre de 2007, Tiñana) foi un cantante de tonada asturianu.

Agustín Argüelles Cuesta
Vida
Nacimientu	Llimanes, 1943
Nacionalidá	España
Muerte	Tiñana, 16 d'ochobre de 2007 (63/64 años)
Estudios
Llingües falaes	castellanu
Oficiu	cantante de tonada

Recibió formación como cantante de parte del xastre Silvino Antuña, dientro de la llamada Academia de Canción Asturiana promovida pola Diputación. Acompañó a Diamantina Rodríguez na grabación d'unu de los discos más importantes de la música asturiana, el LP El cancionaro de Torner en la voz de Diamantina Rodríguez. Nel añu 1967 formó parte de l'agrupación Así Canta Asturias, compuesta, ente otros, por Tarín de Sotrondio, El Tordín de Frieres, Manolo Ponteo, Ataúlfo Lada Camblor, Diamantina,... Igualmente participó na revista Horizontes xunto a Diagmina Noval, Alfredo Canga, El Che de Cebaños, Josefina Argüelles y el Dúu San Juanín.

Nel añu 1972 proclámase Campeón d'Asturies de Profesionales. Igualmente algama premios ente los años 1965 y 1970 nos concursos de L'Entregu, Candás, Ciañu, Xixón, Mieres, Llanes, Sama y La Villa. Tamién formó parte como xuráu d'una buena riestra de concursos de tonada. Foi premiáu col Urogallo de la canción asturiana dau pol Centru Asturianu de Madrid, y recibió la medaya d'oru del de Barcelona.

Grabó discos acompañáu por El Gaiteru de Veriña. Ente los cantares grabaos por Agustín Argüelles y qu'algamaron mayor sonadía, atopamos Baxaben cuatro alleranos, Les Cuatro Poles, Non puedo subir al puertu, La Pipiona, Arrimadín a aquel roble, Nun garapiellu, Esta noche atapeciendo, ...

La so voz conoció los escenarios de 18 países, llegando a actuar delantre del presidente d'Arxentina, Raúl Alfonsín.

Enllaces esternos

• Datos: Q13146688