Avientu (grupu)

Avientu (grupu)
Datos
Tipu	grupu musical
Xéneru	rock
Sellu discográficu	Discos L'Aguañaz
País	España
Orixinarios de	Riosa
Llingua	asturianu
Fecha fundación	1994
Fecha disolución	2000

Pa ver otros usos d'esti términu, Avientu (dixebra).

Avientu foi un grupu de rock de Riosa (Asturies).

Historia

El grupu entama la so andadura en xunu de 1994, cuando tres rapazos de L'Ará (Riosa) y ún de La Foz (Morcín) deciden xuntase col envís de facer un grupu de rock, dellos díes depués axuntaríase otru mozu d'El Pumar (Morcín) cola gaita completándose asina la formación.

Sacante ún d'ellos. nun teníen esperiencia musical nenguna y yeren autodiáutes, depués d'asistir a un cursu d'asturianu qu'AYDA ufiertó nel so pueblu, l'enfotu por facer rock n'asturianu encontóse entá más y andaos quince díes del so primer ensayu ficieron el so primer conciertu na 1er Nueche Celta de Riosa, onde compartíen escenariu con Dixebra y Felpeyu. Dende esti intre ye cuando empiecen a asocedese los conciertos per tola xeografía asturiana, como na Nueche de San Xuan de Tresona (Corvera), el Conciertu pola oficialidá (Xixón) o na Romería de Valdecuna (Mieres) y inclusive un conciertu en Pontevedra. Rescamplaben pola so mestura de música tradicional col rock (rock astur).

En vista del bon recibimientu por parte del públicu nes sos apariciones en direuto, Avientu decide, en 1995, aventuráse a grabar el so primer trabayu discográficu, editáu en formatu de cassete. Ye la discográfica asturiana L'Aguañaz la encargada de producir el trabayu, que foi grabáu nos estudios ODDS de Xixón. Cola cinta entitulada "Tírate Abaxo", qu'incluyía diez cantares, el grupu algama'l premiu "Superventolín 1995" de Radio Nacional d'España, na categoría de "meyor discu con raíces del añu n'Asturies".

Demientres l'añu 1995 son munchos los conciertos ufiertaos pol grupu per tola xeografía asturiana, lo cual se traduz nun importante reconocimientu por parte del públicu, lo que anima a Avientu a llanzase a la grabación d'un segundu discu, "¿Y agora qué...?" nel que se pudi ver una evolución hacia un Rock Astur más contundente. El discu edítase esta vez en formatu CD y casete y cuenta coles collaboraciones de Xune Elipe (Dixebra) y el guitarrista Joaquín Prieto. Nuevamente ye la discográfica avilesina L'Aguañaz la encargada de sacar el discu al mercáu y los estudios ODDS los responsables de la parte teúnica. El so primer "llarga duración" asoleyaríase nel añu 1996.

En 1997 camuda la formación del grupu cola incorporación de David Farinas "Fari" que s'encargará de la gaita y d'Oscar Álvarez a la batería. En mayu d'esti mesmu añu sal a la lluz el cantar "Estrelles ensin nome" enxertáu nel discu recopilatoriu "L'Asturianu Muévese" en compañía de grupos como Siniestro Total, La Polla Records, Los Enemigos, Dixebra, Jesus Cifuentes etc. Dichu cantar cuenta cola collaboración al acordión de Fonsu Mielgo( Llan de Cubel).

N'ochobre de 1998, la banda graba'l so primer y únicu videoclip, correspondiente al tema "Estrelles ensin nome" producíu pola Chalga Pro y Luis Rivaya.

El tercer y últimu discu d'Avientu, Glayíos dende'l fondu llegaría n'avientu de 1999, y una vegada más con L'Aguañaz. Nél, Avientu afíta'l soníu más potente y rockeru con dellos temes, ensin dexar de llau'l so estilu carauteristicu.

Poco dempués de la publicación d'esi discu, el grupu entama a dixebrase dempués de munchu tiempu d'inactividá por motivos de trabayu de dalgunos componentes, dándose por desapaecíu pal públicu asturianu. Güei, años dempués de la so retirada, Avientu son consideraos ensin duldes como ún de los grupos de "rock astur" más importante d'Asturies, y inda más, como un importante referente con nome y estilu propiu na música asturiana moderna.

Miembros del grupu

Manu Sariego: Batería.
David González: Gaita.
"Chuchi" Vázquez: Baxu llétricu y gaita.
Xose Lluis Alvarez: Guitarra llétrica y voces.
David Suárez: Guitarra llétrica y voces.
Óscar Álvarez: Batería.
David Farina "Fari": Gaita, zanfona, flautes, bodhram.

Discografía

Tírate abaxo - L'Aguañaz, 1995
- 1. Tírate abaxo
- 2. ¿Qué foi del aire?
- 3. El rapiegu gayoleru
- 4. Triste nuecheriega
- 5. Agua prieta, cielu gris
- 6. Picu la pena
- 7. El mio país
- 8. Un recuerdu qu'escaecer
- 9. Nueche riosana
- 10. Cristales rotos
- 11.Culo mollao

¿Y agora qué...? - L'Aguañaz, 1996
- 1. ¿Y agora qué...?
- 2. Un camín equivocáu
- 3. A la gueta l'ayalga
- 4. Dama de la nuechi
- 5. Fastera urbana
- 6. Instrumental
- 7. Diosa blanca
- 8. ¡Nun vos cortéis!
- 9. El llave
- 10. La bestia amiya de nuechi
- 11. Poltrona nacionaliega
- 12. Basta yá

Glayíos dende'l fondu - L'Aguañaz, 1999
- 1. Llicenciáu en barricaes
- 2. Contigo nun baillo
- 3. El pexe de fierro
- 4. Estrelles ensin nome
- 5. La semeya
- 6. Un suañu pa Ruanda
- 7. Qué bien vivimos
- 8. La ciudá del rock
- 9. El corredor de la muerte
- 10. Cais solitaries

Referencies

Enllaces esternos

Sitiu web oficial d'Avientu Archiváu 2006-05-04 en Wayback Machine