L'Asturianu Muévese

L'asturianu muévese ye un discu editáu pol sellu Discos L'Aguañaz en 1997. El principal oxetivu de so publicación foi contribuyir a la continua reivindicación llingüística n'Asturies, a favor de la declaración del asturianu como llingua oficial, per aciu la música rock.

L'Asturianu Muévese
Datos
Tipu	discu
Intérprete	varios artistas (es)
Idioma	asturianu
Xéneru	música popular (es) y rock
Sellu discográficu	Discos L'Aguañaz
Fecha publicación	1997

Historia

Pa contribuyir dende les sos posibilidaes a amosar en toa España, como'l título del álbum indica, que'l gran coleutivu en defensa de la reconocencia del asturianu muévese, el vocalista del grupu Dixebra Xune Elipe tuvo la idea d'axuntar nun discu a un bon númberu de grupos de tol Estáu, principalmente de música rock, cantando los sos propios temes en llingua asturiana.

L'Aguañaz, sellu discográficu del que ye responsable y que cumple un llustru de vida, cuerre cola producción. Xune viaxa miles de quilómetros en coche y n'avión, a contrarreló per tola xeografía española pa grabar con toles bandes que vaigan a apaecer nel álbum.

Boikot ye'l primer grupu al que Xune fai la propuesta, que la banda vallecana aceuta ensin más. Sacante Def con Dos, que se ñega a collaborar, la bona disponibilidá ye la constante en tolos grupos a los que se dirixe L'Aguañaz. Dellos de los casos más reseñables son el de los gallegos Siniestro Total, que preparen pa la ocasión un tema inéditu, Collaciu (versión de Junco Partner de The Clash) o'l del cantante vallisoletano Jesús Cifuentes, vocalista de Celtas Cortos, quien negocia personalmente cola so discográfica pa lliberar los derechos del tema que graba.

Hasta venti grupos son reclutaos p'apaecer nel álbum, ente ellos dellos de los más representativos de la música asturiana del momentu, incluyendo a los propios Dixebra.

Xune fai d'home orquesta del proyeutu. Ponse en contautu colos grupos y busca estudios de grabación, prepara les tornes y adautaciones de les lletres al asturianu (la que más-y cuesta ye la de Su ta Gar y reconoz que la lletra final pocu tien que ver cola original n'eusquera), mandales per fax a los cantantes y darréu ensaya con ellos la pronunciación enantes de metese a grabar, en dellos casos collaborando tamién colos sos coros.

Les fines de selmana (porque demientres la selmana tien qu'atender les sos obligaciones llaborales), Elipe va d'una ciudá a otra en cuestión d'horas pa grabar nuna docena d'estudios de Xixón, Avilés, Vigo, Santiago de Compostela, Zaragoza, Madrid, Valladolid, Barcelona, Bilbao, Azcárate y Berritz.

L'esfuerciu vese recompensáu y finalmente'l discu, conformáu por un mecíu d'estilos que van del funk al punk, sal al mercáu coincidiendo col Día de les Lletres Asturianes, en cassette y CD. Tien una tirada de 3.000 copies y bona salida non sólo n'Asturies, sinón tamién nos llugares de procedencia de tolos grupos que participen, onde non pocos medios de comunicación interesense pol trabayu.

Mientres el grupu Brams graba la so collaboración en Barcelona, apaez nel estudiu un equipu de la televisión TV3 que fai una entrevista al cantante de Dixebra, a quien la Televisió de Catalunya pidi espresamente que s'esprese n'asturianu, daqué que nun pue facer nos más de los medios de comunicación d'Asturies.

Los medios asturianos son los que menos atención-y dediquen al discu, dende les radiofórmules, por exemplu. Esa actitú yá nun sorprende a naide y Xune denuncia, con motivu de la presentación del discu en Sama de Llangréu (onde Dixebra actúa con Koma, Anarquía Positiva y Os Diplomáticos de Monte-Alto), que «anque nun se da como una prohibición espresa del so usu, hai un apartheid cultural escontra los qu'emplegamos l'asturianu na lliteratura, na música y nos medios de comunicación».

Llista d'intérpretes y temes del discu

Nᵘ	Intérprete	Títulu	Cantar orixinal	Procedencia
1	Os Diplomáticos de Monte-Alto	Yo quiero ser gaiteru	Gaiteiro	Galicia
2	Jesús Cifuentes	El caimán verde	El caimán verde sigue vivo	Castiella
3	Dixebra	Nun llores	(tema inéditu)	Asturies
4	Avientu	Estrelles ensin nome	(tema inéditu)	Asturies
5	Ixo Rai!	María	María	Aragón
6	Joxe Ripiau	Margarita	Margarita	País Vascu
7	Siniestro Total	Collaciu	Junco Partner (The Clash)	Galicia
8	Brams	Fieles a la utopía	Fidels a l'utopía	Cataluña
9	Rastreros	La de la vaca	A da vaca	Galicia
10	La Polla Records	Ensin salida	Sin salida	País Vascu
11	Boikot	Dopaxe	Dopaxe	Madrid
12	Heredeiros da Crus	Frenazu nel calzonciellu	Frenaso no calsonsillo	Galicia
13	Los Enemigos	Señor Correutu	Sr. Correcto	Madrid
14	Koma	Equí güel comu que fumaron	Aquí huele como que han fumao	Navarra
15	Su ta Gar	Dioses del terror	Beldurraren jainkoak	País Vascu
16	Π L.T.	Diós yá morrió	Hil da jainkoa	País Vascu
17	Anarquía Positiva	Si España qu'españe	(orixinal n'asturianu)	Asturies
18	Nación Reixa	Gripe	Gripe	Galicia / País Vascu
19	Matamala	Nueche na ciudá	City Night Life	Cataluña
20	Toli Morilla	Vas matame	Tú me matas	Asturies

Referencies

• Datos: Q3204930