Alfonsu XIII, La crisis de la Restauración

Historia d'España

Prehistoria y Edá Antigua

Edá Media

Edá Moderna

Edá Contemporánea

Rexeneracionismu y revisionismu políticu

El periodu, qu'entama en 1902, cola xuba al tronu d'Alfonsu XIII, y acábase en 1923, col establecimientu del réxime de Primo de Rivera, llamó l'atención por una permanente crisis política. Estremaos factores despliquen esti allugamientu:

Intervencionismu políticu d'Alfonsu XIII ensin respetar el papel d'árbitru que teóricamente debía xugar. El so enfotu a les estayes más conservadores del exércitu encumó col enfotu a la dictadura de Primo de Rivera. Elementu clave nel desprestixu de la monarquía.
Dixebra de los partíos de la "breda", provocada pola desapaición de los cabezaleros históricos y disensiones internes.
Feblamintu del caciquismu, paralelu al desenrollu urbanu nel país.
Desenrollu de la oposición política y social al réxime de la Restauración: republicanos, nacionalistes, socialistes y anarquistes.

Asina, dende 1917 asocediéronse los gobiernos de coalición, suxetos a alliancies y cambeos de cutio. Nin lliberales nin conservadores algamaron mayoríes abondes pa encadarmar gabinetes sólidos. Nesti contestu d'inestabilidá política, el país tevo qu'enfrentase a graves problemes sociales:

Agudización de les lluches sociales. Les posiciones de patrones y trabayadores fueron enfrentandose cada vegada más.
La "cuestión relixosa" reavivose coles medrantes protestes escontra'l poder de la Ilesia, especialmente na enseñanza. L'anticlericalismu enanchóse per bona parte la población urbana y les clases populares.
La "cuestión militar" tornó a resurdir ante'l desconciertu d'un exércitu humildáu en 1898 que recibía medrantes crítiques de les estayes opositores (republicanos, socialistes, nacionaliegos).
Consolidación del movimientu nacionalista en Cataluña y nes País Vascu, ensin nengún calce de negociación per parte los partíos de breda.
El "problema de Marruecos". Na Conferencia d'Algeciras (1906) alcordóse'l repartu ente Francia y España del territoriu marroquín. A España correspondió-y la estaya norte. De magar 1909 aniciose un enfrentamientu bélicu, la guerra de Marruecos, mui impopular nel país, qu'ensanchó'l fosu que separtaba al Exércitu y el camientu público, esencialmente les clases populares.

En 1905 españó una grave crisis en Cataluña. La vitoria de la Lliga Regionalista de Cambó y Prat de la Riba nes eleiciones llariegues de 1906 alarmó al exércitu que vía en peligru la xunidá del país. Los comentarios satíricos anticastrenses en dalguna publicación barcelonesa, aportaron a que trescientos oficiales asaltaren y prendieren les imprentes. La reaición del gobiernu foi ceder ante l'Exércitu: en 1906 aprobóse la Llei de Xurisdicciones qu'identificaba les crítiques al Exércitu como crítiques a la Patria y pasaben a ser xulgaes pola xurisdición militar. La reaición pública foi de secute. Una nueva coalición, Solidaritat Catalana, algamó una nidia victoria eleutoral en 1907, amenorgado la representación de los conservadores y lliberales en Cataluña. Antonio Maura, cabezaleru del Partíu Conservador, aportó al poder en 1907 con un programa reformista: modificó la llei eleutoral, estableció l'Instituto Nacional de Previsión ya intentó ensin ésitu aprobar una autonomía pa Cataluña. El so proyeutu reformista argayó en 1909.

Les crisis de 1909 y 1917

La Selmana Tráxica de Barcelona (1909)

Barcelona, coral n'aquella dómina de la industrialización española, viviera dende entamos de sieglu un gran auxe de les movilizaciones obreres qu'encuminare en 1907 cola creación de Solidaritat Obrera, organización anarquista que nació como rempuesta a la burguesa y nacionaliega Solidaritat Catalana. Alejandro Lerroux y el so Partido Republicano Radical tamién desenrollárense na Ciudá Condal con un programa demagóxicu y anticlerical. La Llei de Xurisdiciones de 1906 trexo un refuerzamientu del anticlericalismu y antimilitarismu na ciudá. La política autoritaria del gobiernu de Maura nun arimó a aselar los ánimos. Sicasí, foi la guerra de Marruecos la que determinó l'españíu de la Selmana Tráxica: Los ataques de los habitantes del Rif escontra los trabayadores españoles d'una compañía minera aportó a la movilización de reservistes. Les protestes obreres pronto aprucieron en Barcelona y Madrid. Los primeros choques militares saldáronse col Llaceria del Fortacán del Llobu con más de mil doscientes baxes españolas. El día 26 de xunetu españó la fuelga xeneral en Barcelona, convocada por Solidaridad Obrera y la UGT. Aniciáronse tres díes de protestes, buriaes de conventos, enfrentamientos col exércitu. La Selmana Tráxica tevo un brutal coste humanu: un centenar de muertos, firíos, destruiciones... La refrontada foi muy dura y encumó col xuiciu ensin garantíes y la execución de Francisco Ferrer y Guardia, pedagogu anarquista y fundador de la Escuela Moderna. La Selmana Tráxica llevóse per delantre'l programa reformista de Maura. Mientres el PSOE conseguía que Pablo Iglesias fuera escoyío diputáu en 1910, el lliberal José Canalejas llevó a cabu'l caberu intentu rexeneracionista dientro del sistema de la Restauración. La so aición reformista (serviciu militar obligatoriu en tiempos de guerra, llei del "candáu", Llei de Mancomunidaes que viose finalmente frustrada nel Senáu) finó brutalmente col so asesinatu por un anarquista en 1912. N'alantre, podemos falar d'una crisis permanente de los partíos de la breda. La Primer Guerra Mundial dixebró al país ente aliadófilos (lliberales y izquierda) y xermanófilos (dreches conservadores), pero trexo una estada de prosperidá económica. España, neutral, foi a convertise n'abastidora de munchos productos pa los países contendientes.

La crisis de 1917

El mal repartu social de los beneficios del boom económicu y la medrante inflación llevaron al españíu social y una profunda y enguedeyada crisis en 1917. N'ella podemos distinguir estremaos aspeutos:

Crisis militar.

El descontentu ente los oficiales "peninsulares" ante los celerinos y, a vegaes inmerecíos, ascensos de los "africanistes" encumó cola creación de les Xuntes de Defensa. El gabinete conservador d'Eduardo Dato abangóse a la imposición de los militares y aceutó unes xuntes que diben escontra la disciplina militar y la subordinación del exércitu al poder civil.

Crisis parllamentaria.

Setenta diputados y senadores de la Lliga Regionalista, republicanos, socialistes ya inclusive dalgún miembru del partíu lliberal constituyeron en Barcelona una Asamblea Nacional de Parllamentarios que demandó un cambéu de gobiernu y la convocatoria de Cortes Constituyentes.

Crisis social: la fuelga xeneral de 1917

Convocada n'agostu por CNT y UGT tevo un aducíu siguimientu nes ciudaes y saldose con un centenar de muertos y miles de deteníos. La fuelga xeneral, sicasí, trexo consecuencies de secute. Ante l'amenaza de revolución obrera, les Xuntes de Defensa abandonaron los sos pidimientos y afitaron la refrontada escontra los fuelguistes. Per otru llau, la dimisión d'Eduardo Dato y la formación d'un gobiernu de coalición cola participación de la Lliga Regionalista trexo la inmediata desactivación de l'Asamblea de Parllamentarios. La llucha social de clases tornárase nel gran problema del país.

La crisis social y la llucha de clases en Barcelona

El fin de la I Guerra Mundial trexo una profunda crisis económica y social que desencadenó darréu un gran enfrentamientu social en Barcelona (1919-1921); les fuelgues y protestes alentaes polos anarquistes alcontráronse con una dura refrontada del nuevu gobiernu de Maura, que cuntaba col dafechu enfotu de la burguesía catalana. Pa contrarrestar la "aición direuta" de los anarquistes, la estaya más dura de la patronal creó'l nomáu Sindicato Libre, grupu de pistoleros qu'actuó col enfotu policial. L'aplicación de la "Ley de Fugas", pura y simple execución ensin xuiciu de los deteníos exacerbó inda más l'enfrentamientu. La rempuesta anarquista llegó en 1921 col asesinatu d'Eduardo Dato, presidente del gobiernu. Dos años dempués, el cabezaleru anarquista Salvador Seguí morrió asesináu.

La guerra colonial en Marruecos.

La llaceria d'Annual.

La llaceria del 98 punxo fin al imperialismu español nel intre nel que'l modernu imperialismu de les potencies capitalistes industriales taba nel so apoxéu. Tres el repartu de la mayor parte d'África, el territoriu de lo que güei ye Marruecos yera una de les poques rexones por repartir nel continente. Esti fechu provocó importantes tensiones entenacionales que tán nel orixe del camín au'aportó a la primer guerra mundial. Les potencies axuntáronse na Conferencia d'Algeciras en 1906 y ellí alcrdóse'l repartu de Marruecos ente Francia, que fincóse la mayor parti'l territoriu, y España qu'apoderóse la montesina estaya norte del país. Muy ceo aprucieron los enterrios colos llariegos. Les cábiles del Rif axunciáronse baxo el mandu d'Abd-el-Krim. L'exércitu español, mal encadarmáu y dirixíu, sufrió importantes reveses dende un aniciu. La llaceria del carcavón del Llobu, prieto Melilla, foi un llaceriosu exemplu.

En 1912, Francia y España pautaron un nuevu repartu de Marruecos pa meyor facer frente a la resistencia de les cábiles rifeñes. Al finar la I Guerra Mundial, reaniciáronse les operaciones escontra los rebeldes dirixíos por Abd-el-Krim. El xeneral Berenguer al frente d'un exércitu mal acaldiáu y equipáu. N'esti exércitu destacaben los Regulares, algares indíxenes, y la Llexón, fundada por Franco y Millán Astray a cuspidancia de la Llexón foriata francesa. Nel branu de 1921, los algares españoles embarcáronse nuna aición mal planificada dirixida pol xeneral Fernández Silvestre. Los choques que les cábiles rifeñes concluyeron con una retirada desordenada y la masacre de los algares españoles. Tratábase de la Llaceria d'Annual, que costó más de trece mil muertos, entéllos el xeneral Fernández Silvestre. La llaceria d'Annual provocó una terrible impresión nuna opinión pública contraria a la guerra. Hebo grandes protestes nel país y los republicanos y socialistes entaináronse a reclamar l'abandonu de Marruecos. La presión del camientu públicu llevó a la formación d'una comisión militar qu'investigara sobro los asocedimientos. So resultáu foi l'Espediente Picasso, informe redatáu pol Xeneral de División Juan Picasso. Pese a les torgues que punxéron-y les compañíes mineres interesaes nel dominiu de Marruecos y altos cargos del gobiernu y l'exércitu, l'espediente ponía n'evidencia enormes irregularidaes, corrución ya ineficacia nel exércitu español destináu n'África. L'espediente nun llegó a suponer responsabilidaes polítiques nin criminales. Denantes de que la comisión del Congresu encargada del so estudiu fuera a emitir so ditamen el 1 d'ochobre de 1923, el 13 de setiembre el xeneral Miguel Primo de Rivera dio un güelpe d'estáu y estableció una dictadura militar.

La dictadura de Primo de Rivera.

Les sides del güelpe d'Estáu

Estremaos factores despliquen que la dictadura militar entamara a apaniguase como una solución a la crisi del país ente l'alta burguesía, gran parte de les clases medies y l'Exércitu: • Descontentu del exércitu tres la llacería d'Annual y l'afoguín d'evitar les consecuencies del espediente Picasso pa dellos importantes xenerales, entéllos el xeneral Berenguer. • Auxe de los nacionalismos periféricos y ascensu de republicanos y del movimientu obreru. • El trunfu del fascismu n'Italia tres la Marcha so Roma en 1922 y l'ascensu al poder de Mussolini.

El güelpe de 1923

Miguel Primo de Rivera, Capitán General de Cataluña, soblevóse'l 13 de setiembre de 1923. El gülpe cuntó darréu cola comprensión y l'enfotu'l rei Alfonsu XIII. Los soblevaos declararon l'estáu de guerra, la suspensión de les garantíes constitucionales y la disolución de les Cortes. El réxime de la Constitución de 1876 yera sustituyío en metá de la indeferencia popular y ensin malpenes resistencia por una dictadura militar.

Direutoriu Militar (1923-1925)

Tres el güelpe, el dictador Primo de Rivera constituyóse en ministru únicu, pasando a ser asesoráu por un Direutoriu Militar. Tres el nuevu gobiernu taba el mesmu bloque de poder que dominare'l país demientres la Restauración, la oligarquía de terratenientes ya industriales. El Direutoriu Militar tomó medíes aína: • Prohibición de la bandera y l'himnu catalán y restrición de la llingua catalana al tarrén priváu. • Política de "mán dura" en tolo referente al orden público. • Formación de la Xunión Patriótica, partíu únicu baxo la direición d'un militar. Tratábase de siguir el modelu fascista impuestu por Mussolini n'Italia. El gran ésitu del Direutoriu tevo llugar n'África. El Desembarcu d'Alhucemas en 1925 punxo fin de la resistencia de les cábiles del Rif. So cabezaleru Abd-el-Krim entregóse a les autoridaes del Marruecos francés. El fin de la guerra en Marruecos dio-yos gran popularidá al ditador.

Direutoriu Civil (1925-1930)

A caberos de 1925, un gobierno civil, presidío por Primo de Rivera, sustituyó al Direutoriu Militar. Tratábase d'istitucionalizar la Dictadura. En 1927, constituyóse una Asambleya Nacional Consultiva, formada na so mayoría por miembros de Xunión Patriótica escoyíos por sufraxu restrinxíu. Primo de Rivera de vuelta siguíae'l modelu italianu, nesti casu'l Conseyu Fascista. Esta Asambleya fracasó aína nel so intentu de redautar una llei fundamental que fixera'l papel de Constitución de la dictadura. Tamién imitóse'l modelu social del fascismu italianu, estableciéndose la Organización Corporativa del Trabayu, especie de sindicatu que trataba d'arbitrar ente patrones y obreros. De nuevu l'intentu d'institucionalización del réxime de Primo de Rivera fracasó. La oposición a la dictadura y la cayía de Primo de Rivera

La oposición a la dictadura abargana un enancháu espeutru políticu: dellos lliberales y conservadores; republicanos, socialistes, anarquistes, inteleutuales, movimientu estudiantil... Un elementu clave foi'l medrante descontento nes files del Exércitu ante les arbitrariedaes de Primo de Rivera. Tres del crash de la bolsa de Nueva York, en 1929, los problemes enancháronse con gran celerín pel mundiu. El descontentu social, cola torna de los movimientos fuelguiegos, vieno a aducir la oposición a la dictadura. (devaluación peseta). Ancián, enfermu y ensin apoyos sociales, el 27 xineru 1930, Primo de Rivera presentó la so dimisión al monarca, quién entainóse a aceutarla. Dos meses depués, el ditador finaba nel exiliu en París.

De la monarquía alfonsina a la II República.

Tres de la dimisión de Primo de Rivera, Alfonsu XIII nomó xefe de Gobiernu al xeneral Berenguer. Aniciábase asina una estada conocida humorísticamente como la "Ditablanda", nel qu'intentóse infrutuosamente tornar al allugamientu previu a 1923. Los partíos tradicionales, lliberales y conservadores, yeren incapaces d'articular un sistema de partíos aceutable pola sociedá española. Arriendes, namái xentes mui desprestixaes como Romanones o De La Cierva, apurriéronse a collaborar con Berenguer. La piana torna a les llibertaes constitucionales, foi aprovechada por una oposición que ca vegada algamaba más enfotu. N'agostu de 1930 republicanos, socialistes y otros grupos d'oposición firmaron el nomáu Pautu de San Sebastián, pol que comprometíense a derrocar la monarquía ya istaurar un réxime democráticu. Pa coordinar el llabor d'oposición crearon un Comité Revolucionariu presidíu por Niceto Alcalá Zamora, republicanu abondo conservador. Alfonsu XIII viose ca vegada más aislláu. Munchos militares entamen a ver con bonos güeyos la posibilidá republicana. Inclusive la CNT afitó a la cospiración pa traer la República.

El 15 d'avientu de 1930, fracasó una soblevación militar republicana en Xaca. Los sos cabezaleros, Galán y García Hernández, foron xulgaos y executaos. La mayor parti'l Comité Revolucionariu foi deteníu, en mediu dun creciente descontentu antimonárquicu.

Berenguer dimitió'l 14 de febreru de 1931 dando paso a un nuevu gobiernu presidíu pol almirante Aznar. El nuevu gabinete convocó eleiciones municipales pal 12 d'abril, tratábase de dir tornando d'a poco a la legalidá constitucional. Sicasí, les eleiciones llocales tornáronse nún plebiscitu sobro la monarquía. El trunfu estrapallante nes zones urbanes de les candidatures republicanes y socialistes precipitaron l'abdicación del rei y la proclamación de la República el 14 d'abril de 1931.