La España del Barrocu

Historia d'España

Prehistoria y Edá Antigua

Edá Media

Edá Moderna

Edá Contemporánea

La España los Austries Menores: Los valíos

Nel sieglu XVII socédense tres reis: Felipe III, Felipe IV y Carlos II. Denómaselos Austries Menores porque representen la decadencia de la hexemonía n'Europa. Arriendes, y a diferencia de Carlos I y Felipe II, estos reis dexaron les xeres de gobiernu en manes de los valíos. Estos valíos yeren nobles que teníen la confiancia del rei o inclusive yeren familiares d'ésti. Non tolos valíos foron iguales como gobernantes, y mangar que la so figura representa la decadencia del poder real nun tienen por qué ser malos gobernantes.

El valíu de Felipe III foi'l Duque de Lerma. Llevó a cabu una política esterior intelixente, dada la situación económica de la corona (bacarrotes). Finó cola Tregua de los Doce Años coles Provincies Rebeldes d'Holanda. Esto aidólu a estabilizar les finances. Sicasí, al cabo'l reináu de Felipe II, la corona viose enguedeyada nuna nueva guerra europea al acudir n'arimu d'Austria (Guerra los Trenta Años, 1618-1648).

Demientres el reináu de Felipe IV el valíu foi'l Conde Duque d'Olivares, que prauticó una política militarista, col envís de vencer na Guerra de los Tentra Años y someter a los Países Baxos. Pa esti fin intentó poner en práutica la Xunión d'Armes. Al traviés d'esta política, Olivares pretendía que tolos reinos de la corona contibuyeren por igual a la guerra europea (con dineru y homes). La Xunión d'Armes foi'l desencadenante de les rebeliones de Portugal y Cataluña en 1640 (crisis de 1640).

Demientres el reináu de Carlos II socediéronse dellos valíos, la corona taba yá dafechamente arruinada tanto económica como demográficamente. La presencia n'Europa cuntábase por derrotes y la hexemonía finara abenayá. Amás, Carlos II “el fechizáu” nun algamó haber descendencia, lo qu'abrió les puertes a la cabera crisis de los Austries españoles (Guerra de Socesión Española).

La España los Austries Menores: Conflictos internos

El sieglu XVII ye un sieglu d'enclín de cutio en tolos aspeutos; no militar significó la crisis de la hexemonía n'Europa (batalla de Rocroi); A nivel políticu l'autoritarismu de los Austries mayores ye sustituyío pol gobiernu de los valíos, a nivel demográficu, l'allugamientu ye abondo críticu, les bancarrotes asocédense de magar 1608 y les arrivaes d'América entamen a declinar. A nivel demográficu la población de la corona de Castiella taba frayada por mor de les guerres de cutio y la emigraciaón al nuevu mundu. Nesti contestu, la corona acude n'arimu d'Austria na guerra los Trenta años, lo qu'agrabó de cutio los problemes. La corona intentó iguar esti allugamientu con xubíes d'impuestos y devaluaciones monetaries. En 1627 la corona taba práuticamente ensin fondos. Arriendes les posibilidaes demográfiques aportaren a la so llende demientres el sieglu XVII. Castiella pasó d'ocho a siete millones d'habitantes. A esto añádise que demientres el reináu de Felipe II resurdió'l problema de la población musulmana convertida (moriscos).

En 1609 Felipe III ordena la so espulsión. Más de 300.000 persones salieren de delles rexones, sobremanera Murcia y Valencia. Pola so parte, la guerra civil qu'españó cola crisis de 1640 tamién supuso una pérdida de población mui importante.

El sieglu XVII col so allugamientu de crisis xeneralizada vivió un importante auxe del bandolerismu (tanto popular como ñobiliariu)

La crisis de 1640

En 1640 prodúzse una grave crisis política que na práutica manifiéstase nuna auténtica guerra civil ente Castiella y Cataluña-Portugal. La causa inmediata desta crisis ye'l proyeutu políticu del Conde Duque d'Olivares, valíu de Felipe IV. Según esti proyeutu, conocíu como la Xunión d'Armes, tolos territorios de la corona debíen contribuyir por igual a la política hexemónica n'Europa, tantu en númberu d'homes como en dineru. El Conde Duque d'Olivares intentara con esta política degolar la crisis financiera, demográfica y militar de Castiella, xenerada pola cuasi xingadura de los recursos desti reinu nel contestu la guerra de los Trenta años (1618-1648). El problema de la Xunión d'Armes yera que pedía contribuciones humanes y económiques ensin cavilgar la capacidá demográfica y económica de cada territoriu. Esto xeneró una rixa faterna a la qu'hai que sumar la espaciencia de les algares castiellanes acampaes en Cataluña (pa la guerra escontra Francia).

Los catalanes solévense (Revuelta d'Els Segadors), orguen al virréi, conde de Barcelona y proclamen conde desta ciudá a Luis XIII, rei de Francia, al que piden el so abeyu. Los portugueses pola so parte proclamen rei de Portugal al duque de Bragança. L'allugamientu de la revuelta en Cataluña y Portugal dura 10 años, hasta que finalmente Felipe IV algama a someter a los catalanes, pero viose obligáu a reconocer la dixebra de Portugal (1640).

El significáu del fracasu la Xunión d'Armes nun ye otru que'l fracasu de la monarquía pa intentar abangar hacia l'absolutismu y la centralización política de los sos territorios, lo que sí prodúcese nesos mesmos años na vecina Francia col gobiernu del cardenal Richelieu.

La política esterior. L'ocasu la hexemonía de los Habsburgu

El sieglu XVII ye'l sieglu de la decadencia de la hexemonía española n'Europa. La corona entama'l sieglu agotada económica y militarmente. El reináu de Felipe II cola Tregua de los Doce Años señada colos Países Baxos ya Inglaterra ye un intentu de salir desti allugamientu de crisis (Duque de Lerma). Sicasí Felipe II finó entrando de nuevo en guerra al tener d'acudir n'arimu de los Habsburgu austriacos, enfrentaos de vuelta a los protestantes alemanes, qu'esta vegada cuntaben col sofitu de les potencies reformaes (Suecia). España combatió escontra los protestantes alemanes y flamencos. Arriendes, mui ceo Francia intervino na guerra del llau protestante , colo que s'abría un nuevu frente pa España. Magar que la guerra anicióse con dellos importantes ésitos (rendición de la ciudá de Breda en 1620). Por mor a los numberosos frentes y enemigos y a la mina demográfica y económica darréu aportaren les derrotes (batalla de Rocroi en 1643). Finalmente España viose obligada a señar la Paz de Westfalia en 1648 que ponía fin a la Guerra los Trenta Años, y n'onde por fin reconocíase la independencia de los protestantes rebeldes en Flandes. Sicasí a pesar de señar la paz, el Conde Duque d'Olivares continuó la guerra escontra Francia demientres diez años más hasta señar la Paz de los Pirineos en 1659, pola qu'España, derrotada, cedió a Francia los territorios de Cerdaña, Artois y Rosellón. Demientres la segunda parte'l sieglu XVII España caltuvo un papel de segundu orde na política interior europea. La hexemonía española arrivara al so final. Namái restaba repartise la entá importante Imperiu Español. Esti repartu xestóse demientres el reináu de Carlos II. Y produciráse cola guerra de Socesión Española a la muerte de Carlos II ensin herederu.

Evolución económica y social nel sieglu XVII

El sieglu XVII pue definise en base a dos grandes llinies maestres. Arrume económicu y crisis social. Amás de les guerres de cutio de los sieglos XVI-XVII arrivaron tamién a una crisis demográfica (pasóse d'ocho a siete millones d'habitantes) y toó ello nún contestu internu de crisis xeneralizada: la crisis del sieglu XVII (amiyu de la producción agrícola, ganadera, industrial, aprucida de les mortalidaes catastrófiques…). Too ello xuníu nel casu d'España a un cambéu respeutu al sieglu XVI y l'amenorga de l'arrivada de metales preciosos d'América. Los intentos de sopiar la penuria económica agravaron l'allugamientu: bancarrotes, xubía d'impuestos ya inflación (acuñación de monedes del vellón, de menor proporción d'oru y plata).

La crisi social manifestase na fuerte polarización social ente privilexaos y non privilexaos. Esto tórnase nún exhaustivu poder ya influyencia de los principales grupos sociales productivos (campesinos, artesanos y comerciantes) ca vegada han menos poder ya influyencia y, amás, son ellos so los que recaen les midíes de la corona pa iguar la crisis (xubíes de los impuestos y encarecimientu de los productos básicos pola inflación).

Esti allugamientu de crisis xeneralizada tórnase en toda una riestra comportamientos y planes mui propios del sieglu XVII: el vivir de les rentes por parte los nobles, el vivir ensin llaborar y defender la honra de los fidalgos, la picaresca. Nel sielu XVII tamién apréciase un repunte del bandolerismu social, munches vegaes protagonizaos pola pequeña nobleza emprobecida.

Mentalidá y cultura nel Sieglu d'Oru (s.XVII)

El sieglu XVII (Sieglu del Barrocu) ye'l sieglu d'Oru de la cultura española (lliteratura, filosofía, arte). Dase la circunstancia de que'l sieglu d'esplendor cultural coincice cola decadencia política y económica; esta contradición manifiéstase en tola cultura barroca. Arriendes los manifestamientos principales del arte español del sieglu XVII enmárquense dafechu dientro de la ideoloxía de la Contrarreforma católica, d'esti xeitu la Península fincó al marxe de delles de les principales corrientes de camientu innovador europeos (Galileo, Kepler, Descartes…). Nesti sieglu prodúzse la dafecha llantación del castellanu como llingua dominante na Península. En llitereatura figura Cervantes, creador de la novela moderna col Quixote, el teatru tórnase nún arte popular a traviés de les representaciones nos corrales de comedies (Lope de Vega, Calderón, Tirso de Molina). Na gueta dun llinguax más cultu, acorde colos valires propios de l'allugamientu de crisis del sieglu XVII; aprucen les temátiques de la vida de cutio, entellos figura sobremanera la novela picaresca. En filosofía produzse un importante desenrollu del camientu y de les idees arreyaes a la Contrarreforma. Ye un camientu cuásique continuador de la escolástica medieval, mas con innovaciones figuratibles como la obra del Padre Victoria nel so espoxigue de la Teoría del Drechu Internacional.

Referencies

Enllaces esternos

Wikimedia Commons tien conteníu multimedia tocante a La España del Barrocu.