El Bierzu

El Bierzu o El Bierciu (El Bierzo en castellanu), ye una comarca de la provincia de Llión, qu'ocupa una superficie de 2.828 km², dividida en 38 conceyos. Ye la única comarca reconocida por llei en Castiella y Llión, creada el 21 de marzu de 1991 poles sos peculiaridaes xeográfiques, históriques, sociales y económiques que la diferencien del restu de la comunidá.

El Bierzu
Alministración
País	España
Autonomía	Castiella y Llión
Provincia	Provincia de Llión
Tipu d'entidá	comarca d'España
Capital	Ponferrada
División	ver Bierzo Alto (es)
Xeografía
Coordenaes	42°39′19″N 6°36′53″W
Superficie	2328 km²
Demografía
Población	131 302 hab. (2016)
Densidá	56,4 hab/km²
Más información
ccbierzo.com

La so capital ye Ponferrada.

Entamu

El Bierzu ye xunto a L'Alfoz la comarca más dinámica de Llión, poseyendo cierta autonomía al traviés del Conseyu Comarcal del Bierzu. Hai que sorrayar que'amás de la fastera d'El Bierzu nesta división alministrativa hai conceyos d'otres comarques que, por decisión propia y democrática, decidieron facer parte d'ésta; ensin perder conciencia de ser culturalmente parte d'otra, como nos casos de Benuza (La Cabreira), Páramu de Sil (Altu Sil) o Peranzanes (Furnieḷḷa).

Na so bandera recuéyese la Cruz de San Andrés encarnada sobre fondu blancu derivada de la cruz de San Andrés del históricu pendón de la milicia ponferradina na Guerra Peninsular. La bandera amiesta tamién l'azul y el blancu atendiendo a los colores del bercianismu políticu na presente etada democrática, y que representen al ríu Sil.

Formó parte de la Provincia del Vierzo, na división territorial de 1822, mentes el Trieniu Lliberal. Dempués en 1833, tres la dixebra territorial de 1833 la provincia del Vierzo foi dixebrada en dos partes: El Bierzu actual, na Provincia de Llión y Valdeorras na Provincia d'Ourense, tres numberosos intentos de recuperar la provincia, intentos que continuaron produciéndose posteriormente.

Amás d'un turismu rural basáu na guapura de los sos paisaxes naturales; como ye'l casu d'Ancares, o creaos pol home como As Médulas, una esplotación d'oru realizada polos ástures baxo mandatu romanu y agora declarada Patrimoniu de la Humanidá; asina como'l camín de Santiagu. N'El Bierzu puen atopase delles de los más importantes muestres del arte mozárabe, como la ilesia de Santiagu de Peñalba y la de Santu Tomás de las Ollas. Tamién podemos alcontrar ente'l so ricu patrimoniu históricu exemplos importantes de tolos periodos artísticos; románicu, góticu, barrocu...

Xeográficamente trátase d'un fuexu ente los Montes Aquilianos y los Montes de Llión, que fai qu'esfrute d'un microclima mediterraneu, resultáu de la combinación del clima atlánticu y del mediterraneu continental. Destaca la so producción agrícola con delles denominaciones d'orixe de gran calidá, como nes peres, manzanes, castañes, cereces o uva. Por esta forma pecuñar munchos vieron nel nome d'El Bierzu una reminiscencia col so significáu de trubiecu; anque la so procedencia venga del términu Bergidum, qu'apaez pela primer vegada nos importantes escritos lleoneses del monesteriu de San Pedru de Montes en 1243 na forma que güei conocemos.

La Virxe de La Encina es la Patrona d'El Bierzu (coronada como tala en 1908). La so imaxe reverénciase na Basílica de la Nuesa Señora de La Encina, na ciudá de Ponferrada.

El ríu principal de la fastera ye'l Sil, afluente del Miño. Un dichu popular diz «el Sil lleva l'agua y el Miño, la fama».

Historia

Dende cuantayá esta zona individualizárase poles sos carauterístiques propies y va poseyer siempre una consideración señorial y alministrativa cincada nel so desllinde xeográficu y la so importancia estratéxica como llugar de pasu (Tomás Mañanes)

Paleolíticu y Neolíticu

Fendedor afayáu n'El Bierzu

Cabeza de bronce afayada en Castru Bergidum

Castru Bergidum. Muria oeste

Esiste un gran desconocimientu de la prehistoria y protohistoria n'El Bierzu únicamente sopiada, en parte, gracies a puntuales xeres arqueolóxiques y la epigrafía. Hasta aportar a la dómina prerromana, de la que poseyemos un conocimientu más precisu, les afayadures correspondientes a la Edá del Bronce o anteriores fueron casuales y non frutu d'investigaciones o escavaciones arqueolóxiques. Esa ausencia de prospeiciones arqueolóxiques motivó que dellos autores afirmaren qu'El Bierzu tuvo despobláu nel Paleolíticu y nel Neolíticu, afirmación desmentida, anguaño, con afayadures que permiten certificar un doblamientu prehistóricu d'El Bierzu. Alcontrárense numberoses pieces nes terraces del ríu Cúa catalogaes ente'l 300.000 y el 100.000 e.C. (la orografía accidentada debió dificultar la comunicación y el comerciu que n'otres zones, el casu de la Meseta, foi más habitual, dificultando la datación cronolóxica de les pieces). Esisten delles afayadures correspondientes al neolíticu, sobremanera brueses pulimentaes en distintos llugares de la comarca (Ancares, Ponferrada, Corbón del Sil).

Calcolíticu y Edá del Bronce

Esisten restos d'esta dómina, cerámica precampaniforme, na Cueva de las Trés Ventanas (Toural dos Vaos) y destacar les pintures rupestres afayaes na redolada de Sésamu y Llibrán, posiblemente pertenecientes a esta dómina.

Esisten dalgunes afayadures correspondientes a la Edá del Bronce (puntes de llanza, ferramientes, cerámica...), correspondientes a toles sos estaes intermedies. Nesta tamién dátense tamién, mayoritariamente, los ídolos de Ñuceda y Vilafranca, manque hai duldes sobre esta datación.

Les carauterístiques siguen siendo les d'una economía de subsistencia que pali que pali reciben influyencies esternes, que va desenrollándose na dómina siguiente.

Edá del Fierro

N'El Bierzu, como nel restu del Norte peninsular desenvolvióse la cultura castreña. L'aperturismu incipiente nes sos rellaciones comerciales, avistáu na anterior estada, vese torgáu tres la conquista romana de la Meseta nel sieglu II e. C.

Son munches les xacees y les afayadures correspondientes a esta dómina. Exemplos de castros son, Castru Bergidum (prieto de Cacabelos) y el Castru del Chanu (Chanu, Furnieļļa) ente otros munchos y ente los afayadures estremaos utensilios pétreos y metálicos destinaos a distintes funciones y ayalguines como la del Castru de Chanu.

Dómina romana

Peñe de güesu de la dómina sueva, probable entecambéu comercial. Perteneciente a la cultura Tchernjahov-Sîntana Mures afayáu en Castru Bergidum

L'inxertu d'El Bierzu nel mundiu romanu fíxose rápido y de manera xabaz, resultando de les riqueces auríferes de la rexón berciana (As Médulas ente otres esplotaciones auríferes) grandes cambeos tanto na organización social como na económica y na xeográfica, desplazándose nucleos de población y creándose nueves ciudaes (Interamnium Flavium).

Esti procesu nun foi continuu sinón que se desenrollaron en delles etapes, volviéndose El Bierzu nuna cantera abierta, coles consiguientes infraestructures empobinaes a esti fin ensin que la cultura romana llegare a ser más qu'un barniz que desapaecería al cayer l'Imperiu Romanu.

Son numberoses les xacees arqueolóxiques correspondientes a ta dómina, destacar les xacees auríferes d'As Médulas (patrimoniu de la humanidá), Castropodame, y Paradaseca, ente otros, la romanización de numberosos castros como'l Castrelín de San Xoán de Palozas y ciudaes como Bergidum (zona d'A Hedrada, Cacabelos) asina como numberosísimes afayadures: utensilios, epigrafíes (ara de San Pedro de Trones) y una ayalga de singular importancia, l'Edictu d'Augustu, más conocíu como Bronce d'El Bierzu (edictu en Bronce del Emperador Augustu) que permitió un mayor conocimientu de les rellaciones y pactos del Imperiu Romanu coles tribus indíxenes. La fastera actual d'El Bierzu perteneció al Conventus Asturicensis, con capital n'Asturica Augusta, que formaba parte a la provincia Tarraconensis. Por mor de les reformes de Dioclecianu, nel sieglu III, dichu conventu foi conseñáu a Gallaecia, provincia de nueva creación arrincada de la Tarraconensis..

Alta Edá Media

Cruz de Peñalba (Santiagu de Peñalba). Simbolu d'El Bierzu

Tres la entrada de los pueblos xermanos na Península, los suevos y los vándalos asdingos (que posteriormente treslladaríense a la Bética) instaláronse na provincia de Gallaecia na que s'inclúi El Bierzu. La información sobre la dómina sueva ye mui escasa, sábese qu'El Bierzu taba dientro d'esi territoriu pol Parrochiale Suevum y dagunes afayadures arqueolóxiques.

El dominiu suevu sobre El Bierzu fina tres d'una riestra de sucesos qu'entamen nel llevantamientu d'Aspidiu escontra'l rei visigodu Leoviguildu, apoyáu aquelli pol rei suevu Miru que muerre llueu de sofitar al fíu de Leoviguildu, Hermeneguildu contra so padre. Tres 177 años los visigodos afecharon col reinu suevu. Del dominiu visigodu d'El Bierzu esiste mayor información, proporcionada ésta tanto por fontes escrites, como por exemplu la Vida de San Fructuosu, escrita, probablemente por San Valeriu, y otres obres d'esti Santu y estremaos restos arqueolóxicos y ayalgues numismátiques de importancia como son dos monedes, una que correspuende al rei Sisebutu que pue lleese nel aviesu Bergio Pius, faciendo referencia a Castru Bergidum onde esistió un enclave visigodu y un tremisse alcontráu nel Castiellu de Ponferrada de Recesvintu.

Gracies a la Vida de San Fructuosu conocemos que'l padre d'ésti yera dux de Gallaecia y que munches de les sos propiedaes alcontrábase nuna zona d'esa provincia llamada Bergidensis territori (territoriu Bergidensi).

Lo más destacao d'esta dómina ye la creación de la denomada Tebaida Berciana, un florecimientu monésticu n'El Bierzu que llevo a numberoses fundaciones, siendo'l so principal aguiyador a San Fructuosu, entamando pol desapaecíu Monesteriu de Compludu, destacando asinamesmo la fundación del Monesteriu de San Pedru de Montes. Gracies a la fundación d'estos centros monacales escomencipia a surdir un texíu cultural que continuará nos sieglos posteriores.

Desconocemos la evolución de les ciudades y los pueblos bercianos, probablemente les escavaciones arqueolóxiques que güei se realicen en Castru Bergidum contribuyan a aclaralo, recadando que nesi emplazamientu allúgase a priori una ceca visigoda llamada Bergium.

De la dominación musulmana, tres la conquista de la península ibérica nel 711, poseyemos poca información, supónse que tres la rápida ocupación peninsular per parte musulmana, asitiríense guarniciones encargaes de cobrar tributos.

Tres la Batalla de Cuadonga los reis asturianos, dempués de controlar gran parte de Galicia, tenten de realizar lo mesmo en territoriu bercianu. Bermudu I (o Vermudu I) cai derrotáu na batalla del Burbia (Vilafranca), nel 791, y abdica voluntariamente. Los monarques asturianos nun llograríen un dominiu absolutu sobre El Bierzu hasta los reinaos d'Alfonsu II y de Ramiru I, teniendo pasao de manes musulmanes a cristianes alternativamente. D'esta dómina queden testimonios, más o menos llexendarios, sobre les distinte batalles n'El Bierzu, destaquen ente elles la toma del Castiellu de Sarracín (A Veiga de Valcarce) heroicamente, fechu que quedará reflexáu nel escudu de dichu conceyu.

Ye nesta dómina, reináu de Ramiru I (842-850) cuando El Bierzu entama a tar baxo dominiu de condes, siendo'l primer d'ellos Don Llorienzu y el más conocíu el Conde Gatón que repuebla numberoses zones al Este d'El Bierzu. Nel reináu d'Alfonsu II, el dominiu sobre El Bierzu per parte de los monarques asturianos paez yá afitáu dafechu.

El surdimientu del monacatu bercianu tres del paréntesis de la conquista musulmana ye un fechu, destacando les fundaciones y refundaciones llevaes a cabu por San Xenadiu de Santiagu de Peñalba y del Monesteriu de San Pedru de Montes. Los monumentos y restos arqueolóxicos que conocemos son mui abondosos y l'arte sacru bercianu ye mui destacáu, como exemplos la Cruz de Peñalba y el Cáliz y la Patena del Abá Pelayu.

El Bierzu feudal

Interior Ilesia de Santu Tomás de las Ollas

Ilesia del Monesteriu de San Pedru de Montes

Esta dómina de transición abarca dende últimos del sieglu IX hasta'l sieglu XIII, inclusive.

Ente'l periodu Altomedieval y el Baxomedieval d'El Bierzu vienen distinguiéndose, de cutio, polos historiadores, una estapa denomada, El Bierzu Feudal.

Trátase duna denomación socio-económica na qu'unos grupos poseyen la tierra y otros la esploten, basándose la economía na esplotación agraria y ganadera. Namás a partir del sieglu XII tien llugar una diversificación progresiva de la economía, enanchándose a la minería y tresformación de los recursos minerales (ferreríes), la pesca y entamando a desenrollase'l comerciu al traviés de feries y mercaos y pequeños "empresarios" dedicaos a la compra-venta-tresporte de mercaderíes.

La propiedá concéntrase en poques manes realizándose una distinción ente propiedaes de calter eclesiásticu, de los que los pincipales esponentes son los monesterios de San Pedru de Montes y de San Andrés de Veiga de Espiñadera (benedictinos) y el Santa María de Carracedo y de San Miguel de las Dueñas (cistercienses), y propiedaes de realengu y nobiliar, ensin escaecer el papel desempeñáu poles órdenes militares de Santiagu, l'Hospital y el Temple. L'analís del sistema de propiedaes y su evolución ye enforma estensu y complexu, y imposible de resumir en poques pallabres. Sorrayar que los conflictos ente los conceyos y los señores, ensin importar qu'éstos seyan eclesiásticos o nobiliares.

Alministrativamente, El Bierzu, hasta l'añu 910, como indicáremos yá, integrábase nel reinu d'Asturies, y nel de Lleón ente'l 910 y el 1037, a partir d'esi añu inclúise na Corona de Castiella, pa tornar al de Lleón nel 1157 y terminar nel 1230 de vuelta na Corona de Castiella. A partir de 1187 El Bierzu pasa a ser señoríu, y tien por tal a D. Velasco Fernández, pasando, a entamos del sieglu XII a tener gobernadores, ún de los más conocíos foi D. Gonzalo Peláez y nel añu 1243 apaez, como merín d'El Bierzu, D. García Carnota. El Bierzu nesta estapa divídese en tenencies (Ancares, Ulver, Bueza, Aguiar, Valcarce, y tenencies d'un ámbitu territorial más reducíu nes que podemos incluyir a les villes) dientro d'otra mayor (Tenencia mayor). A partir de mediaos del sieglu XIII estes tenencias dan pasu a les merindaes mayores que terminarán tornándose, posteriormente, n'adelatamientos.

Queden bien d'exemplos artísticos d'esta dómina, destacando'l Monesteriu de Santa María de Carracedo y el Castiellu de Ponferrada (nes partes que correspuenden a esti periodu) y la ilesia de San Miguel de Corullón, en cuantes a edificaciones y numberoses representaciones marianes y de crucificaos de gran valir artísticu como'l Calvariu de Corullón.

Baxa Edá Media

Castiellu de Valboa. Valboa (El Bierzu)

La Baxa Edá media n'El Bierzu carauterízase, principalmente, pola crisis de los señoríos monásticos y l'auxe, munches veces a costa d'éstos, de los llaicos, personificaos na figura de ciertos nobles qu'empleguen la encomienda como instrumentu pa usurpar munchos de los bienes de los señoríos monásticos.

Destacar ente los señoríos llaicos el de Bembibre, entamando en 1304 por Alfonso de la Cerda (bicácanu d'Alfonsu X), integráu, al empiezu, na Casa de Medinaceli; y el de Vilafranca que correspuende a la familia de los Osorio, "integráu" nel Condáu de Lemos, posteriormente tresformóse en marquesáu.

Tienen llugar numberosos conflictos sociales producíos por esti cambéu. Destaca la Revuelta Irmandiña que causó non poques amarraces y la guerra civil de la década de los ochenta del sieglu XV.

Alministrativamente debemos tener en cuenta qu'El Bierzu que pasa, a mediaos del XIII, de les tenencies a les Merindaes Mayores la fragmentación territorial que supón los señoríos de la que se llibra la villa de Ponferrada, comprada polos Reis Católicos en 1486, constituyéndose en Correximientu en 1494 hasta l'añu 1780.

Como espresión de la singularidá d'El Bierzu y la so fuerte identidá dende cuantayá hai que sorrayar la carta unviada al ayuntamientu de la ciudá de Lleón, en 1567, y que continua una correspondencia d'avientu 1563 d'intención asemeyada solicitando que la provincia d'El Bierzu (sic) se dixebrare del Adelantamientu de Lleón, argumentando esta pretensión pola llonxanza xeográfica, pidiendo que l'audiencia (de los negocios d'El Bierzu) s'atienda na persona del Correxidor de Ponferrada y pa facelo pretenden pidilo "por capítulu de Cortes".

Nel apartáu artísticu, les edificaciones militares tienen una importancia relevante dao'l poder de los señoríos. Destacar ente ellos el de Ponferrada, que medra enormemente en tamañu calteniendo gran parte de les sos muries orixinales templaries (sieglos XI-XII), Castiellu de Cornatel, de Sarracín d'Autares, Valboa,…

El Vieyu Réxime

Ferrería de Llinares. Antigua ferrería del Monesteriu de San Pedru de Montes

Escudu de los Caruxu. Familia que tuvo numberosos niembros de gran influyencia n'actividá política y económica d'El Bierzu nos sieglos modernos, establecida nel Bierzu Baxu. Semeya tomada de la casa de los Caruxu, en San Llorienzu del Bierzu (Ponferrada)

Esti periodu abarca dende'l sieglu XVI hasta entamos del XIX. Diérase-y en llamar, tamién, feudalismu desenrolláu ya que caltién munches de les carauterístiques medievales. N'El Bierzu asoceden socesivos cambeos demográficos a lo llargo d'esti periodu, estaes de medría, estancamientu y descensu, por mor de les respeutives estaes de bonanza y crisis económiques, producíes éstes por males colleches y pestes, y ye qu'El Bierzu sigui siendo principalmente agrariu, siendo la vide'l so prencipal productu, y nes estayes montesines ganaderu, heriedando del periodu medieval el minifundismu y la gran cantidá de tierres en manes d'eclesiásticos. Destacar la introducción nesti periodu (sieglu XVII) d'ún de los productos que tendrá mayor sonadía y calidá, el pemientu.

El comerciu continua nún espoxigue incipiente. Feries y mercaos marquen l'actividá comercial nes principales villes (Ponferrada, Bembibre, Vilafranca y Cacabelos) nes qu'existen tenderos y dalgún mercader espoxigando'l comerciu ambulante gracies a ancareses y fornelos pesie de la precariedá de les víes de comunicación y los impuestos al treviesar les llendes internes, llamaos equí pontazgos (protalgos), y dalgún otru d'estremada natura.

Na estaya industrial destaca la industria testil, manque numberoses veces nun tapez más que l'autoabastimientu. En Bembibre y na merindá de Cornatel ellaboraben unos paños de llienzu blanco llamaos bierzos que tuvieron gran éxitu y reconocimientu y comercializaron fuera d'El Bierzu con gran demanda. Tamién destaquen les numberoses ferreríes, delles con una producción significativa que llevó a intentar producir aceru ya inclusive una fábrica d'armes, en 1779, en Vilafranca.

La sociedá taba organizada en tres estamentos: cleru, nobleza y el pueblu llanu o Estáu llanu. El primer, el cleru, aparte de la so gran influyencia ideolóxica y cultural , acentuada pola so doyura padrimonial, tán exentos de pagar impuestos y la so gran cantidá proporcional, respeutu al restu de la sociedá, de persones que formen parte d'esti estamentu, unas 1000 pa caberos del sieglu XVIII, refuercia'l so poder y influyencia.

El casu de la nobleza ye distintu, ya que nesti estamentu cueyen dende los Grandes d'España, la que podríamos llamar, nobleza más "alto" , hasta los fidalgos, l'aviesu, nesti caberu grupu, el de los fidalgos ye especialmente significativu el gran númberu de persones que formaben parte d'elli nesta rexón pa caberos del sieglu XVIII, albídrase que n'El Bierzu el 50% de les presonas incluyíense nesti estamentu, y d'ellos, de los más, fidalgos. Sicasí, dellos, ensinón munchos d'estos fidalgos, malvivíen de pequeños españamientos agrarios de cuasi subsistencia, amatando esi allugamientu baxo esi titulu de "baxa" nobleza.

L'Estáu llanu, el tercer estamentu, fromábenlu, aproximao, pa caberos del sieglu XVIII, el 38% de la sociedá (ensin cuntar parte de los fidalgos que, como endiciáremos, tendríen más que ver con esti estamentu que col de la nobleza). Encadarmábenlu llabraores, artesanos y comerciantes sobreviviendo maguer sofrir les mayores cargues impositives.

El Partíu de Ponferrada.

Mapa de la Provincia del Vierzo (1786) de D. Tomás López

Demientres los sieglos modernos y hasta les reformes del sieglu XIX, El Bierzu formó parte duna enantada Intendencia-Provincia integrada pol Partíu de Lleón, el Principáu d'Asturies y el Partíu de Ponferrada. No tocántenes a El Bierzu d'anguaño, incluyíase dientro'l Partíu de Ponferrada el cual incluyía otres zones que güei nun formen parte d'El Bierzu: merindá d'Aguiar, anguaño comarca de Valdiorras y la xurisdición de Lluciellu. Esti Partíu yera gobernáu dende Ponferrada, villa realenga, por un correxidor de nomamiento rial, subdividiéndose El Bierzu en merindaes, cuetos, conceyos, xurisdiciones. Inda dependiendo'l noyu "central", Ponferrada, estes subdivisiones yeren, na práutica, cuasi autónomes, siendo señoríos llaicos o eclesiásticos na so mayoría y unos pocos percaciaren xurisdición propia.

La Provincia del Vierzu

Artículu principal: Provincia del Vierzo

Política y gobiernu

Conseyu Comarcal d'El Bierzu

Artículu principal: Conseyu Comarcal d'El Bierzu

Sede del Consejo en Ponferrada.

El Conseyu Comarcal d'El Bierzu ye la institución pública llocal encargada del gobiernu y alministración de la Comarca d'El Bierzu.

Comarques y subcomarques

Atendiendo a las peculiaridaes históriques, xeográfiques y culturales d'esta gran comarca, compuesta por 37 conceyos, nun se podría dicir que ye una comarca xunitaria, cuásique podría dicise que ye una provincia dientro la Rexón de Lleón.

• Comarques: Nel Bierzu tan engadíes otres comarques propiamente diches por circustancies históriques y tradicionales como son:.

1. Ancares: los conceyos de Valboa, Candín (considerada la capital de la comarca), y la parte occidental de Vilafranca y La Veiga d'Espinareda.
2. Altu Sil: conceyu de Páramu de Sil, históricamente lligáu a Ḷḷaciana ya incluyíu nuna ensame colos Cuatru Val.les.
3. Benuza, esti conceyu nun ye nenguna comarca pero forma parte de La Cabreira Baxa manque tea incluyíu dientro del Bierzu, por tolos aspeutos nun pue coxitase bercianu ensinón cabreirés.
4. Forniella: conceyu de Peranzanes.
5. Bueza: conceyos de Bimbibre, Noceda, Castrupodame, Molinaseca, Torre/Conceyu de Montes, Folgosu la Ribeira, Congostu ya Igüeña. La so capital ye Bimbibre.

La dixebra tradicional del Bierzu cíncase nel altor medio de los sos conceyos, y amás dicha dixebra ye atalantada como tala polos sos habitantes:

1. Altu: conceyos con un altor cimero a 700 metros y la so capital ye Torenu.
2. Baxu: conceyos con un altor inferior a 700 metros y la so capital ye Vilafranca.
3. Valdueza, incluyida nel conceyu de Ponferrada sería una dixebra subcomarcal tradicional.

Ye importante sorrayar qu'esta comarca nun entendiéu de divisiones atendiendo a les llingües falaes nun conceyu u otru, dao que les subdivisiones siñalaes enantes incluyen conceyos del domeñu llingúísitu gallegu y astur.

Tamién débese endiciar que, anque dacuando se nome a Ḷḷaciana y Cabreira como bercianas, dambes les dos tan estrenchamente arreyaes con otres estayes xeohestóriques de la rexón; poseyendo, amás, una perfuerte personalidá cultural ya identitaria.

Xeografía humana y sociedá

Llingua

La llingua predominante ye'l castellán, pero con importantes enfluyencies del gallegu y del llionés que van aduciendo según vase d'oriente a occidente y el norte reupectivamente. L'emplegu del gallegu y del llionés nel usu de cutio tien suertes dispares, magar que dambos gociaren duna reciente revitalización per aciu'l llabor d'estramaes asociaciones que promueven el so usu y estudiu, siendo, el gallegu'l más favorecíu, enantándose'l so emplegu na so zona d'influyencia, y el llionés continúa sofriendo un usu mui llimitáu.

Coxitárase siempres a El Bierzu como una ponte ente'l gallegu y el llionés; pero con cálteres propios mui estremaos, que llevaron a encartichar esi falaxe d'El Bierzu como dialeutu bercianu nel sieglu XIX recoyíu posteriormente en diverses espublizaciones.

Una llende imaxinaria que parte del Altu Cúa hasta parte del anguaño conceyu de Ponferrada (Fontesnovas y As Devesas) dixebra los territorios llingüísticos. Dende antiguu dambos foren la fala o falaxe de cutio o tradicional. Güei, evitando les poblaciones más urbanes, onde lo llariegu, llingüísticamente falando, práuticamente desaniciara, nótase como hibrídense, dacuando, y como mesturen resultados fonéticos gallegos y llioneses (y entá castiellanos) coesistiendo dambes formes en dellos casos. D'otra miente, munchos de los valles o comarques que formen El Bierzu caltienen significatives pecuñariedaes na so fala, surdiendo asina xergues como'l burón (xerga de los vendedores y albarderos ambulantes de Forniella), y el dialeutu ancarés.

Economía

Esiste una gran actividá industrial na comarca alrodiu les estayes del carbón emplegáu pa la producción de lletricidá, n'El Bierzu fundó L'Estáu ENDESA en 1944 pa la producción d'enerxía lléctrico y continúa presente al tresvel del Compostilla II, la segunda central termolléctrica más grande d'España (5 grupos térmicos) , la estaya siderúrxica (Roldán), eólicu (Comonor, LM), la estración de cayuela (numberoses emprese), y presencia nes estayes del vidriu, el cementu (Cosmos) y la construcción (Martínez Nuñez, Begar). Asinamesmo posee un texíu de pequeñes empreses nes tres estayes. La estaya servicios al empar que nel restu'l país va adquiriendo más pesu de la que se desmantela la estaya secundaria. Tou ello xuníu a una industria agroalimentaria en progresión tantu en cantidá como en calidá y prestixu(vinu, industries cárniques,hortofrutícoles).

Pendón de llancies cola Cruz de San Andrés. Ispiración de la bandera d'anguaño d'El Bierzu (Muséu d'El Bierzu, Ponferrada)

Agricultura

El clima bercianu posibilita una producción perbona de frutes y berces. Asina como una magnífica variedá de vinos, ente los que destaquen los que tán iscritos na Denomación d'Orixe d'El Bierzu.

L'agricultura berciana duxñebrase en dos partes, la del Bierzu Altu y la de la Zona baxa de la Comarca. El Bierzu Altu pecuñarízase pola abundancia d'agricultura de tipu tradicional y a tiempo parcial. Maguer, na Zona baxa, desenrróllase una agricultura moderna cincada nel regadíu y cultivos con bona salida nel mercáu.

Denomaciones d'orixe

• Vinu.
• Manzana Reineta.
• Pera conferencia.
• Pemientu Asáu.
• Castaña.
• Botiellu d'El Bierzu.

Minería

Empreses como Minero Siderurgica de Ponferrada, Uminsa, HCCSA, Grupo Alto Bierzo, Carbones Arlanza, Minas de Valdeloso tienen los sos noyos de trabayu nel Bierzu y na vecina comarca de Ḷḷaciana.

Construcción

Trubiecu de los dos principales grupos empresariales de Castiella y Lleón. Begar (Begar, UFC, Televisión Castilla y León, Punto Radio y l'antigua empresa de cable Retecal, adquirida ONO) de la mán de José Luis Ulibarri, y del Grupo Martínez Núñez (Teconsa, Proinsa, La Estrella, GH, La Cronica de León) propiedá de José Martínez Nuñez.

Gastronomía

Delles de les sos más típiques bayures culinaries son el botiellu, l'androlla, los pemientos, la manzana reineta, la pera conferencia, les castañes, les zreces y los sos vinos de la variedá mencía baxo la Denominación d'Orixe Bierzu.

As Médulas

Cultura y medios de comunicación

La comarca posee un texíu cultural del que podríase destacar el Campus del Bierzu en Ponferrada, perteneciente a la Universidá de Lleón y los movimientos culturales xeneraos por iniciativa del ayuntamientu ponferradín (per aciu de los museos conceyiles y de la Casa de la Cultura), la Obra Social de Caxa España, Ediciones Hontanar ya l'Istitutu d'Estudios Bercianos. Asinamesmo, n'El Bierzu tán presentes les emisores de radio: Ondacero, RNE, Onda Bierzo-Punto Radio, COPE, Radio Bierzo-Cadena Ser, Fórmula Hit; la prensa escrita: Diario de León, La Crónica del Bierzo, Bierzo 7, asina como estremaos medios de prensa dixital y televisiones llocales y per Internet: InfoBierzo.com, El Bierzo Digital, Bierzo TV.

Personalidaes

Orixinarios d'El Bierzu son:

• Pedro Álvarez Osorio, Conde de Lemos
• Amparo Carballo Blanco, escritora y editora.
• Ramón Carnicer Blanco, escritor.
• Antonio Fernández Morales, escritor.
• Pascual Fernández Baeza, poeta, maxistráu y senador.
• San Fructuoso de Braga, santu, patriarca del monacato español, obispu de Dumio y arzobispu de Braga
• El Conde Gatón, primer conde bercianu.
• Enrique Gil y Carrasco, escritor.
• Severo Gómez Núñez, xeneral, diputáu, defensor y divulgador d'El Bierzu.
• Jan (Juan López Fernández), dibuxante.
• Álvaro de Mendaña, descubridor de les Islles Marqueses.
• Roberto González-Quevedo secretariu de l'ALLA
• Eva González, escritora del surdimientu asturllionés; en patsuezu.
• Luis del Olmo, periodista.
• Amancio Prada, músicu y compositor
• Antonio Pereira, escritor.
• Valentín García Yebra, filólogu, traductor y miembru de la Real Academia Española de la Llingua.
• Martín Sarmiento, escritor.
• Sampiro, notariu, cronista, historiador y obispu d'Estorga.
• Valerio del Bierzo, santu y ermitañu cristianu (s. VII).

En Vilafranca pasa delles estaes el compositor Cristóbal Halffter. Ye a sorrayase que l'enfluyente políticu del sieglu XIX José María Queipo de Llano llevó'l títulu de la llocalidá berciana de Torenu, siendo conocíu na historia como Conde de Torenu.

En Páramu del Sil, pasó tres años de la so vida alitándose de tuberculosis, el poeta Ángel González.

Ver tamién

• Dialeutu bercianu

Referencies

Enllaces esternos

• Wikimedia Commons tien conteníu multimedia tocante a El Bierzu.
• Conseyu Comarcal del Bierzu
• Historia d'El Bierzu
• Istitutu d'Estudios Bercianos
• Cancios tradicionales d'El Bierzu

• Datos: Q780060
• Multimedia: El Bierzo