Tromelin

Islla Tromelin (francés: île Tromelin) ye un castru de 0.8 km² allugáu nel Océanu Índicu, al este de Madagascar y al norte de la islla Reunión. Alministrativamente, tres d'un alcuerdu col Reinu Xuníu en 1954, ye un territoriu francés d'ultramar, magar que la so soberanía ye reclamada por Mauriciu y les Seixeles. Acueye una estación metereolóxica, y ye llugar d'añeramientu de páxaros bobos y de tortugues. La islla ye, básicamente, un bancu d'arena de 1.700 m de llargor y 700 m d'anchor y 80 ha d'estensión, con un altor máximu sobro'l nivel de la mar de 7 m, y ta cubierta de sebe y arrodiada d'arrecifes de coral. Nun hai puertos o bahíes naturales, lo que fai abegosu l'accesu per mar; un aeródromu con 1.200 m de pista d'aterrizaxe ye la conexón de la islla col mundu esterior.

Tromelin
Alministración
País	Francia
Territoriu dependiente	[[Tierres Australes y Antártiques Franceses|{{{2}}}
Grupu	[[Islles Esvalixaes del Océanu Índicu|{{{2}}}
Tipu d'entidá	islla
Nome oficial	Île Tromelin (fr)
Xeografía
Coordenaes	15°53′32″S 54°31′29″E
Superficie	0.8 km²
Altitú media	7 m
Demografía
Población	3 hab.
Densidá	3,75 hab/km²
Más información
Estaya horaria	UTC+04:00

Historia

La islla foi reconocida por primer vegada por un marín francés, Jean Marie Briand de la Feuillée, y nomada (1722) Île des Sables (Islla del Sable). En 1761 el barcu francés Utile, que carretaba esclavos de Madagascar pa Mauriciu, encalló nos cantiles de la islla. La tripulación aportó a Madagascar nuna balsa, dexando abandonaos a 60 esclavos na islla desierta. Quince años dempués, en 1776, Bernard Boudin de Tromelin, capitán del barcu de guerra francés La Dauphine, visitó la islla y rescató a los sobrevivientes: siete muyeres y un nenu d'ocho meses d'edá. De magar la islla recibió'l so nome actual.

La reclamación francesa de la so soberanía remóntase a 1810. Por embargu, dende'l sieglu XIX hasta la década del 1950 Tromelin foi una dependencia de la colonia británica de Mauriciu. En 1954, tres d'un alcuerdu franco-británicu, Francia construyó una estación metereolóxica y una pista d'aterrizaxe na islla. Discútese si esi alcuerdu tresfirió tamién la soberanía de la islla, y esa ye la base argumental pola que Mauriciu, que considera que la soberanía nun fora tresferida y, poro, Tromelin yera parte de la colonia británica de Mauriciu, reclama la islla. La reclamación ye antigua. Yá en 1959, primero de la so independencia, Mauriciu informó a la Organización Metereolóxica Mundial que consideraba que la islla yera de so. En 2010 Francia y Mauriciu roblaron un alcuerdu pa xestionar conxuntamente'l territoriu.

Tromelin tien una Zona Económica Esclusiva de 280.000 km², que llenda cola de la silla Reunión. La estación metereolóxica, que ye un puntu avanzáu d'alerta por ciclones, sigue siendo de propiedá francesa, magar que los sos trabayadores son meteorólogos de Reunión. Los sos únicos habitantes permanentes, sicasí, son una guarnición francesa de quince soldaos.

Enllaces esternos

• Wikimedia Commons acueye conteníu multimedia sobre Tromelin.

• Datos: Q234208
• Multimedia: Tromelin