Etiopía
Etiopía[10], oficialmente República Democrática Federal d'Etiopía (n'amháricu ኢትዮጵያ?, ʾĪtyōṗṗyā), ye un país del este d'África, asitiáu na rexón conocida como Cuernu d'África. Llenda con Eritrea al norte y noreste, con Djibouti y Somalia al este, con Sudán y Sudán del Sur al oeste y con Kenia al sur. Con 92 millones d'habitantes, Etiopía ye'l país ensin accesu al mar con más población del mundu, amás de ser el segundu más pobláu d'África dempués de Nixeria. La so estensión ye de 1.100.000 km², y la so capital y ciudá más poblada ye Adís Abeba.
.svg)
Dalgunes de les evidencies más antigües de la presencia de los humanos modernos alcontráronse n'Etiopía, dende aú se supón que l'Homo sapiens foi emigrando hacia Oriente Mediu y otres zones del planeta. Na época histórica Etiopía, polo menos dende'l II Mileniu e.C., tien sío cuasi de contino una monarquía. Nos primeros sieglos de la nuesa era el reinu d'Aksum caltuvo una civilización en la rexón.
El prestixu etíope vién-y de tener sío l'únicu estáu africanu que llogró resistir militarmente l'anexión por dalguna de les potencies europees que se repartieron el continente nel sieglu XIX, y esto fizo que munches naciones africanes adoptaran los colores de la bandera etíope de la qu'inventaron una bandera nacional dempués d'algamar la independencia. Etiopía foi, como queda dicho, l'únicu país africanu en derrotar militarmente a los europeos y caltener la so independenca y soberanía nacional, y tamién el primer miembru africanu (como país independiente) de la Sociedá de Naciones y la ONX. En 1974, al final del reináu de Haile Selassie I, el gobiernu pasó, col sofitu de la Xunión Soviética, a manes d'una xunta militar d'ideoloxía comunista conocida como Derg, que dirixó'l país hasta'l colapsu de la XRSS. Nesi momentu'l poder pasó a manes del EPRDF (Ethiopian People's Revolutionary Democratic Front, Frente Democráticu Revolucionariu del Pueblu d'Etiopía), que sigue controlándolo anguaño.
Etiopía ye una sociedá multillingüe na que conviven 80 grupos étnicos; los mayores son los Oromo y los Amhara. Tierra d'orixe del café, ye una tierra de contrastes: ellí alcontramos tierres mui fértiles, selva y ríos a esgaya, pero tamién la zona más calurosa del hemisferiu Norte, la cordillera montañosa más llarga d'África y la cueva (Sof Omar) más llarga del continente. Ye'l país africanu nel que hai más llugares y monumentos declaraos Patrimoniu de la Humanidá pola UNESCO, y la so escritura, nomada etiópica o Ge'ez, ye ún de los alfabetos más antiguos entá n'usu nel mundu. El calendariu etiópicu, que va siete años y cuasi trés meses per detrás del calendariu gregorianu, coexiste nel país col calendariu Oromo. No que cinca a la relixón, la mayoría de la población ye cristiana, magar qu'un terciu d'ella ye musulmana. Nel país, en Negash, ta l'asentamientu musulmán más antiguu d'África. El país tenía tamién un númberu importante de xudíos, conocíos como Beta Israel, magar que munchos d'ellos tienen emigrao a Israel dende la década del 1980.
Etiopía ye ún de los miembros fundadores de la ONX, y pertenez tamién al G-24 (grupu de los 24), al Movimientu de los Países non Alliniaos, al G-77 (grupu de los 77) y a la Xunión Africana, que tien n'Addis Abeba la so sé. Pese a tar travesáu pel ríu Nilu el país sufrió sequías y fame na década de 1980, empeoraes poles guerres civiles y la situación xeopolítica internacional. Nos caberos años Etiopía foi recuperándose pasín ente pasu, y anguaño ye'l país col mayor PNB del África Central y Oriental.
Historia
editarEtiopía, o Abisinia, nome col que se la conocía hasta los primeros años del sieglu pasáu, tien una de les histories más llargues como nación independiente nel continente africanu. Nel sieglu XX, la monarquía etíope fixo frente a les potencies coloniales y caltuvo la independencia, cola esceición de la ocupación italiana que duró cinco años, ente 1936 y 1941.
En 1974, una xunta militar marxista-leninista derrocó al emperador Haile Selasie, que gobernaba'l país dende 1930, y estableció un gobiernu socialista de partíu únicu. Una coalición de fuercies rebeldes, el Frente Democráticu Revolucionariu Popular d'Etiopía, punxo fin a esti réxime en 1991.
En 1994 el país adoptó una constitución democrática, y un añu más tarde tuvieron llugar les primeres eleiciones multipartidistes. En 1998 Etiopía entró en guerra con Eritrea (independiente dende 1992).
Xeografía
editarEtiopía ta allugada nuna península del noreste d'África que se conoz col nome de "Cuernu d'África". Tien una superficie de 1.127.127 km² y 5 311 km de fronteres terrestres, con Eritrea, Kenia, Somalia, Djibouti, Sudán y Sudán del Sur.
El centru del país ye una meseta con una altura d'entre 1800 y 3000 metros, llegando a 4620 en Ras Dachen.
El clima ye templao na meseta y caliente nes fasteres más baxes.
Referencies
editar- ↑ URL de la referencia: https://www.interpol.int/Member-countries/World. Editorial: Interpol. Data de consulta: 7 avientu 2017.
- ↑ URL de la referencia: https://www.opcw.org/about-opcw/member-states/. Editorial: Organización pa la Prohibición d'Armes Químiques. Data de consulta: 7 avientu 2017.
- ↑ URL de la referencia: http://www.unesco.org/eri/cp/ListeMS_Indicators.asp.
- ↑ URL de la referencia: http://www.upu.int/en/the-upu/member-countries.html. Data de consulta: 4 mayu 2019.
- ↑ URL de la referencia: https://www.itu.int/online/mm/scripts/gensel8. Data de consulta: 4 mayu 2019.
- ↑ URL de la referencia: https://public.wmo.int/en/members/ethiopia. Data de consulta: 26 mayu 2020.
- ↑ URL de la referencia: https://www.who.int/choice/demography/by_country/en/. Data de consulta: 21 xunetu 2020.
- ↑ URL de la referencia: https://www.wcoomd.org/-/media/wco/public/global/pdf/about-us/wco-members/list-of-members-with-membership-date.pdf. Data de consulta: 16 marzu 2024. Páxina: 6. Supports qualifier: data de principiu.
- ↑ Aplícase a esta parte: masculín singular.
- ↑ (2010) Cartafueyos Normativos. Nomes de los países del mundu y de les sos capitales y xentilicios. Uviéu: Academia de la Llingua Asturiana. ISBN 978-84-8168-500-8.
Enllaces esternos
editar
Wikimedia Commons acueye conteníu multimedia sobre Etiopía.
| África |
| Angola | Arxelia | Benín | Botsuana | Burkina Fasu | Burundi | Cabu Verde | Camerún | República Centroafricana | Chad | Comores | El Congu | República Democrática d'El Congu | Costa de Marfil | Eritrea | Etiopía | Exiptu | Gabón | Gambia | Ghana | Guinea | Guinea-Bisáu | Guinea Ecuatorial | Kenia | Lesothu | Liberia | Libia | Madagascar | Malaui | Malí | Marruecos | Mauriciu | Mauritania | Mozambique | Namibia | Níxer | Nixeria | Ruanda | Santu Tomé y Príncipe | Seixeles | Senegal | Sierra Lleona | Somalia | Suazilandia | Sudáfrica | Sudán | Sudán del Sur | Tanzania | Togu | Tunicia | Uganda | Xibuti | Zambia | Zimbabue
Dependencies: Islles Kerguelen | Mayotte | Reunión | El Sáḥara Occidental | Socotra | Tromelin |
