Wikipedia

John Ritter

John Ritter (17 de setiembre de 1948, Burbank – 11 de setiembre de 2003, Burbank) foi un actor de televisión, actor de cine, actor de teatru, actor de voz, actor y productor de cine d'Estaos Xuníos.

John Ritter
Vida
Nacimientu Burbank, 17 de setiembre de 1948[1]
Nacionalidá Bandera de Estaos Xuníos d'América Estaos Xuníos
Llingua materna inglés
Muerte Burbank, 11 de setiembre de 2003[1] (54 años)
Sepultura Forest Lawn Memorial Park
Causa de la muerte diseición aórtica
Familia
Padre Tex Ritter
Madre Dorothy Fay
Casáu con Nancy Morgan (1977 – 1996)
Amy Yasbeck (1999 – 2003)
Fíos/es
Estudios
Estudios Universidá del Sur de California
Escuela de Artes Dramáticas de la USC (es) Traducir
Escuela Preparatoria de Hollywood (es) Traducir
Llingües falaes inglés[3]
Oficiu actor de televisión, actor de cine, actor de teatru, actor de voz, actor, productor de cine
Premios
Creencies
Relixón cristianismu
IMDb nm0000615
Cambiar los datos en Wikidata

Xeneralidaes

editar

Un comediante nato fantásticu, que daba fondura a los papeles más curtios, dar a conocer interpretando al protagonista masculín de la versión estauxunidense d'una serie de comedia (sitcom) británica de los años 1970, onde demostraba tol so talentu na comedia física (conocida como slapstick), pero coles mesmes -y encasilló y torgólu que les sos apaiciones nel cine tuvieren la reconocencia debida. Interpretó na mayoría de los sos personaxes a homes de bon corazón, bondosos y desinteresaos, entá cuando'l so rexistru dexára-y papeles más variaos.

Biografía

editar

El so verdaderu nome yera Jonathan Southworth Ritter. Nació en Burbank, California, siendo fíu del cantante y actor country Tex Ritter y l'actriz Dorothy Fay.

Ritter cursó estudios na Hollywood High School, onde foi'l Presidente del Conseyu Estudiantil. Na Universidá del Sur de California, llogró los graos de psicoloxía y arquiteutura. Ensin terminar psicoloxía y arquiteutura, cuando cursaba'l so tercer añu, tomó unes clases de drama. N'estudiando dos años na Universidá, empezó a asistir a clases d'actuación a instancies de l'actriz Nina Foch. Ritter camudó'l so títulu a Artes Dramátiques, graduándose en 1971 como Bachiller n'Artes, con grau n'actuación. Más tarde estudiaría teatru con dos conocíos actores de comedia. Dempués de Nina Foch, estudió actuación con Stella Adler, na Escuela de Comedia de Harver Lembeck.

En 1977 casóse cola actriz Nancy Morgan. La unión duró hasta 1986 y xuntos tuvieron tres fíos (Carly, Tyler y Jason,esti postreru tamién actor).

El 18 de setiembre de 1999 casóse cola actriz Amy Yasbeck, cola que tuvo namái una fía (Stella). Tuvieron xuntos hasta'l so fatal desenllaz.

Carrera interpretativa

editar

Una vegada terminaos los sos estudios, llogró pequeños papeles en sitcoms, inclusive tuvo'l so debú nel cine cola comedia "The Barefoot Executive", onde interpretaba al sobrín cascante del xefe del protagonista, Kurt Russell. Un inútil que trabayaba nel departamentu de correspondencia d'una canal y que diba xubiendo nel escalafón gracies a un chimpancé que tenía l'habilidá d'aldovinar a qué programes-yos diría bien nel rating. Ente 1973 y 1976 formó parte de la serie de TV familiar "The Waltons", onde faía del reverendu d'un pueblu allugáu nos montes de Virginia, mientres la dómina de la Depresión. Con Richard Thomas. Cola comedia "Nickelodeon", apaeció per primer vegada nuna película de gran presupuestu de Peter Bogdanovich. Faía'l rol del camarógrafu d'un direutor novatu que fuera abogáu, dempués productor, pa finalmente dedicase de llenu al naciente imperiu del cine de principios del sieglu XX. Los actores del repartu yeren Ryan O'Neal, Burt Reynolds, Tatum O'Neal, Stella Stevens y M. Emmet Walsh.

 
Joyce DeWitt, John y Suzanne Somers en "Three's Company" (1977).

Antes de faer el so gran ésitu en 1975 Ritter foi escoyíu ente cincuenta postulantes, unu d'ellos Billy Crystal, pa protagonizar una nueva sitcom. Esto debió a que yá se destacó nel papel de protagonista en dellos montaxes pal teatru y otros medios. La serie tardó más d'un añu en salir al aire, pero cuando lu fixo tuvo un atayante ésitu. Three's Company (Trés son Ensame o Three's Company n'América llatina), cuntaba les peripecies d'un nuevu varón que se faía pasar por homosexual pa compartir un departamentu con dos chiques nuevos. Interpretando a un estudiante de cocina (Jack Tripper), quien vive con dos compañeres d'habitación, con quien pretende siempres caltener un arreglu pal agospéu.

Esta serie ye una versión de la serie de televisión británica Un home en casa. La serie yera más moderada que'l so anterior contrapartida británica, na cual el protagonista permanez indecisu mientres un considerable periodu, hasta que decide cuál de los dos compañeres de pisu gústa-y más. Tuvo nel aire hasta 1984 y John ganó un Emmy y un Globu d'Oru pola so interpretación. Con Joyce DeWitt, Suzanne Somers y Priscilla Barnes.

Tuvo mientres delles temporaes cerca de los ratings de mayor audiencia de la televisión, enantes del so fin, nel añu 1984, entós que Ritter empezara a actuar n'otra serie, el spin-off Three's A Crowd, nel que'l so personaxe conocía a una muyer divorciada y díbase a vivir con ella ensin regularizar los papeles. Duró una temporada.

"Three's Company" empezó a flaquear nel rating y na so octava temporada foi retirada del aire. Dempués de "Three's Company", apaeció en delles películes, siendo les más destacaes Problem Child na so primer secuela, en Sling-Blade y Noises Off.

Na comedia de Peter Bogdanovich "Noises Off..." yera un neuróticu actor que s'engarraba con tol mundu enantes, mientres y dempués d'una función teatral. Con Carol Burnett, Michael Caine, Denholm Elliott, Julie Hagerty, Marilu Henner, Mark Linn-Baker, Christopher Reeve y Nicollette Sheridan.

En 1978, interpretó'l papel del manager de Ringo Starr nun especial de televisión dedicáu a Ringo.

Na comedia "Americathon" yera'l Presidente d'Estaos Xuníos, quien decidía faer un Telemaratón pa recaldar fondos en pro de pagar les deldes del país. Con Fred Willard, Peter Riegert, Meat Loaf, Elvis Costello, Jay Leno, John Lone, Cybill Shepherd y Dorothy Stratten.

Na comedia de 1980 "Hero at Large" traducida como "Finalmente Héroe" interpretaba un actor en paru que consiguía un trabayu faciendo publicidá pa una película. Vistíu como'l Capitán Vengador torgaba un atracu na cai y la xente empezaba a creer que yera un superhéroe de verdá. Con Anne Archer y Kevin Bacon. A pesar del ésitu, que-y valió dellos papeles más, esta película ye bien malo d'atopar o consiguir.

Participó en delles películes pal llar y como convidáu como en Ally McBeal y Buffy the Vampire Slayer. Amás, dio-y vida a la voz de Clifford na serie animada de Clifford, el gran perru coloráu, que-y fixo merecedor de dos nominaciones a los premios Emmy.

La comedia de fantasía "Wholly Moses!" cuntaba la hestoria d'un sosias de Moisés, quien nun tuvo la suerte de ser atopáu nel Nilu, pero que la so vida colaba en paralelu. Ritter faía d'un particular Satanás. Con Dudley Moore, Dom DeLuise, John Houseman, Madeline Kahn y Richard Pryor.

Na comedia de Blake Edwards "Skin Deep", daba vida a un escritor muyeriegu y alcohólicu que decidía abandonar los vicios por que la so vida empezara a colar de normal. Con Vincent Gardenia, Chelsea Field y Bob Hopkins.

Na comedia familiar "Problem Child" yera un home que decidía adoptar a un neñu de 7 años que fuera devueltu más de trenta veces al orfanatu. Magar que nun principiu amuésase como un ánxel, nun va tardar en despedazar la vida de los sos nuevos padres. Con Jack Warden, Amy Yasbeck y Michael Richards. El filme tuvo una segunda parte, na que tamién apaecíen Charlene Tilton y Zach Grenier.

Na comedia d'horror "Bride of Chucky" yera'l xefe de policía, quien taba al cargu de pillar al moñecu diabólicu y a la so novia. Con Brad Dourif, Jennifer Tilly, Katherine Heigl, Nick Stabile, Alexis Arquette, Vince Corazza y Kathy Najimy.

De 1992 hasta 1995 trabayó na serie de TV "Hearts Afire", onde faía del asistente d'un senador. Con Billy Bob Thornton y Edward Asner.

Nel añu 2000, interpretó a Claude Pinchon en The Dinner Party, nel Music Box Theatre en Broadway. Gracies a esta interpretación, ganó'l premiu Theatre World Award.

Nel 2002, vuelve a la televisión na serie 8 Simple Rules for Dating My Teenage Daughter. Nesi mesmu añu tamién participó na serie "Scrubs" como padre del personaxe principal "Dr. "J.D." Dorian". Posterior a la so muerte nel 2003, na serie "Scrubs" dedicóse-y un capítulu a la so muerte.

Na comedia dramática "Panic" yera'l terapeuta d'un sicariu que se namoraba de la moza a la que tenía qu'asesinar. Con William H. Macy, Nieve Campbell, Donald Sutherland, Tracey Ullman, Barbara Bain, David Dorfman, Miguel Sandoval y Nick Cassavetes.

Na comedia dramática "Lost in the Pershing Point Hotel" yera un terapeuta cristianu que na década del '70 trataba de torgar qu'un mozu siguiera siendo homosexual. Con Mark Pellegrino y Marilu Henner. Nel thriller "TripFall" yera un home de negocios que, mientres vacacionaba en California, tenía 24 hores pa recuperar a la so familia secuestrada por un brutal asesín (Eric Roberts).

Na comedia d'horror "Terror Tract" yera un particular axente inmobiliariu que-y amosaba trés cases a una pareya de recién casaos. caúna d'elles tenía una hestoria y él encargábase de cunta-y les. Con Carmine Giovinazzo.

Na comedia romántica "Tadpole" yera un profesor universitariu que'l so fíu taba fondamente namoráu de la so madrasca. Con Bebi Neuwirth, Ron Rifkin y Sigourney Weaver.

Na comedia dramática "Man of the Year" yera l'invitáu d'honor d'una fiesta ultra elegante que terminaba con un muertu y munches verdaes que forguen. Ye una esperimentación dixital, filmada nuna nueche y con 20 cámares que siguen a cada unu de los presentes na xunta. Con Leeza Gibbons y James Wilder.

Na comedia dramática "Manhood" variando de rexistru, interpretaba a un canalla que-y faía la vida imposible a un casanova tratando de reformase en pos de recuperar a la so familia. Con Nestor Carbonell, Janeane Garofalo, Bonnie Bedelia, Meredith Monroe, Tom Arnold, Thomas Gibson, Anthony LaPaglia, Traci Lords y Chris Mulkey.

La última película que filmó foi Bad Santa (2003), una comedia negra empobinada por Terry Zwigoff. Nella va realizar la so última interpretación pal cine, faciendo'l papel d'encargáu d'un centru comercial que tarrecía perder el so puestu por ser "políticamente incorreutu" y faía desdexación d'autoridá colos sos emplegaos, intentáu nun fadiar a naide y evitar asina enfrentamientos. Con Billy Bob Thornton, Lauren Graham, Bernie Mac y Cloris Leachman.

Muerte

editar

En 2003, mientres la segunda temporada na serie de televisión 8 Simple Rules for Dating My Teenage Daughter, enferma seriamente, y muerre el día 11 de setiembre de 2003, a la edá de 54 años, nun hospital cerca a Burbank. La causa de la so muerte foi por una diseición na arteria aorta, resultáu d'una enfermedá conxénita non diagnosticada. Taba metanes les grabaciones de "8 Simple Rules... " cuando sintió un fondu dolor que lo llevó direutu al hospital. Nada pudieron faer nel llugar y John Ritter finó a les poques hores. Los productores viéronse obligaos a faer reestructuraciones na serie. Interpretaba a un cariñosu y racional padre que tenía de trepar colos conflictos y necesidaes de los sos trés problemáticos fíos adolescentes. Con Katey Sagal, James Garner y David Spade.

Series de televisión

editar

Cine

editar

Ver tamién

editar

Referencies

editar
  1. ↑ 1,0 1,1 Afirmao en: Gemeinsame Normdatei. Data de consulta: 27 abril 2014. Llingua de la obra o nome: alemán. Autor: Biblioteca Nacional d'Alemaña.
  2. ↑ URL de la referencia: https://news.amomama.com/152118-meet-noah-lee-threes-companys-john-ritte.html.
  3. ↑ Identificador CONOR.SI: 40396899. Afirmao en: CONOR.SI.
  4. ↑ URL de la referencia: http://www.theatreworldawards.org/past-recipients.html.

Enllaces esternos

editar
Sacáu de «https://ast.wikipedia.org/w/index.php?title=John_Ritter&oldid=4256448»