Idioma alemán

Deutsch
Faláu en
Faláu en	Alemaña, Austria, Bélxica, Chequia, Dinamarca, Italia, Liechtenstein, Luxemburgu, Polonia, Suiza, Francia y Rusia
Númberu de falantes
Datos
Familia	South Germanic (en) y llingües xermániques occidentales
Estáu de vulnerabilidá	1 seguru
Sistema d'escritura	alfabeto alemán (es) y alfabetu llatín
Reguláu por	Rat für deutsche Rechtschreibung (es) y Leibniz Institute for the German Language (en)
Códigos
ISO 639-1	de
ISO 639-2	deu y ger
ISO 639-3	deu

L'alemán (Deutsch) ye un idioma indoeuropéu perteneciente al grupu de les llingües xermániques.

Hasta principios del sieglu XIX, l'alemán estándar yera esclusivamente un idioma escritu; en 1860 espublizáronse por primer vegada unes regles gramaticales y ortográfiques (nel Manual Duden). En 1901 declaráronse estes regles como les definiciones estándar del alemán.

Definición

Actualmente entiéndese como llingua alemana la llingua estándar (Alemán estándar) sordida de los dialeutos del alemán mediu y l'alemán superior y toes aquelles variedaes llingüístiques del continuum dialeutal xermánicu occidental que conviven con esti estándar.

Tamién cuenten como "alemán" les antigües llingües antiguu altu alemán (Althochdeutsch) y l'altu alemán mediu (Mittelhochdeutsch) además de les variedaes coloquiales de l'alemán estándar (Umgangsprache) y llingües amestaes (como'l Missingsch).

El luxemburgués y otres variedaes en diáspora (como'l Pennsylvania Dutch) nun se correspuenden col términu "alemán" stricto sensu por nun tar "subordinaes" a l'alemán estándar. Tampoco ye consideráu'l jiddisch como parte del alemán magar que tien el so orixe nel altu alemán mediu.

Oficialidá

L'alemán ye l'únicu idioma oficial n'Alemaña, Austria y Liechtenstein. Comparte oficialidá en Bélxica (col francés y l'holandés), Luxemburgu (col francés y el luxemburgués), Suiza (col francés, l'italián, y el retorrománicu), en delles rexones italines (col italián) y en Namibia (dende xunu de 1984 xunto col afrikaans y l'inglés).

L'alemán foi durante un tiempu la llingua franca d'Europa central, septentrional y oriental, hasta la Segunda Guerra Mundial. Anguaño, como llingua estranxera na enseñanza ye más popular que'l francés. El 38% de los europeos aseguren poder conversar n'alemán (ensin contar los nativos).

Dialeutos

Anque utilizamos el términu "alemán" pa referinos al idioma escritu, na fala diaria hai una bayura de variantes toes elles pertenecientes al continuum llingüísticu xermanu occidental continental, xunto col luxemburgués y el neerlandés.

Les variaciones ente los distintos dialeutos son considerables; ye posible que falantes de distintos dialeutos nun se puedan entender ente sí. Pue estremase los grupos dialeutales en dos variantes: el baxoalemán y l'altoalemán.

La separtación ente elles dase na Llinia de Benrath. Esta separta les zones que sufrieron la segunda mutación consonántica xermánica de les que nun la sufrieron. Esta mutación fízose alrodiu del añu 500 d.C. nos pueblos al sur d'esta llinia; los dialeutos d'estos pueblos dieron orixe al altoalemán d'anguaño. Los dialeutos de los pueblos al norte d'esta llinia formaron l'inglés, holandés, frisón y baxoalemán.

Un exemplu de les variaciones fonéticas vense darréu:

Pallabra del baxoalemán	Pallabra del altoalemán	Significáu
ik	ich	yo
maken	machen	facer
Dorp	Dorf	pueblu
tussen	zwischen	ente
op	auf	encima de
Korf	Korb	cesta
dat	das	eso
Appel	Apfel	mazana

Sicasí l'altu alemán ta xebráu en alemán mediu y alemán superior utilizando la Llinia Speyer (Appel/Apfel) o la Llinia Germersheim (Pund/Pfund)

A continuación una clasificación de les variedaes llingüístiques:

Dialeutos altoalemanes
- Alemán mediu
  - Alemán mediu occidental (véase Llingües fránciques)
    - Fráncicu mediu (Ripuariu, Fráncicu moselán, Luxemburgués)
    - Fráncicu renanu (Pfälzisch, Hésicu)
  - Alemán mediu oriental
- Fráncicu (entendíu como transición ente l'alemán mediu y l'altu alemán)
  - Fráncicu oriental
  - Fráncicu renanu meridional
- Alemán superior
  - Alemánicu
    - Altoalemánicu (la mayor parte de los dialeutos del Suizoalemán)
    - Alemánicu superior (dialeutos sureños de suizoalemán)
    - Baxoalemánicu (ente ellos la mayor parte de dialeutos de l'alsacianu y l'alemán de Basilea)
    - Suabu
  - Bávaroaustriacu
    - Bávaru mediu
    - Bávaru septentrional
    - Bávaru meridional
Dialeutos baxoalemanes
- Baxu saxón
  - Baxu saxón septentrional
  - Ostfalianu
  - Westfalianu
- Baxu alemán oriental
  - Märkisch
  - Mecklenburgisch-Vorpommersch
  - Baxoprusianu
  - Ostpommersch
- Baxo fráncicu (ente ellos los dialeutos del neerlandés)

Gramática

L'alemán ye una llingua flexiva. A diferencia del llatín, la inflexón nun sólo afecta al final de la pallabra, sinón tamién a la so raíz, lo cual fai la declinación y la conxugación daqué más complexa.

Flexón nominal

Los nomes alemanes flexónense según:

Tres tipos de la declinación (fuerte, débil o mixta).
Tres xéneros (masculín, femenín o neutru).
Dos númberos (singular o plural).
Cuatro casos (nominativu, acusativu, xenitivu o dativu).

Los nomes sustantivos escríbense con mayúscules, seyan comunes o propios.

Otra notable (pero non esclusiva) carauterística del alemán ye l'habilidá pa construyir pallabres compuestes de complexidá teóricamente illimitada. Por ello, a muchos inventos dáse-yos nomes compuestos d'esti tipu, en vez d'inventar pallabres nueves: por exemplu, "frigoríficu" ye Kühlschrank ('armariu fríu'); televisor ye Fernseher ('visor llonxanu'); telescopiu ye Fernrohr ('tubo llonxanu'). Oxetos antiguos tamién siguen el mesmu patrón, como Handschuhe (guantes, 'zapatos de mano').

Falantes d'alemán nel mundu

Alemaña (idioma oficial) 82.300.000
Austria (idioma oficial) 7.500.000
Estaos Xuníos 6.093.054
Suiza (idioma cooficial) 4.500.000
Brasil 1.900.000
Francia 1.200.000 Elsass-Lothringen
Polonia 173.000
Kazakstán 358.000
Rusia 896.000
Rumanía 500.000
Arxentina 300.000
Chile 100.000-200.000
Paraguái 200.000
Hungría 100.000
Chequia 100.000 Eslovaquia 10.000
Bélxica 112.000 Weltalmanach 2003
Australia 150.000
Kirguistán 101.057
Sudáfrica 100.000
Uzbequistán 40.000
Ecuador 32.000
Liechtenstein (idioma oficial) 30.000
Uruguái 28.000
Dinamarca 23.000
Namibia 30.000
Eslovenia 20.000
Luxemburgu (idioma cooficial) 9.200
Moldavia 7.000

Delles frases corrientes n'alemán

Torna a l'asturianu	Frase
alemán	Deutsch
hola	Hallo
adiós	auf Wiedersehen
por favor	Bitte
gracies	Danke
eso	das
cuánto?	wie viel?
asturianu (alxetivu, llingua)	Asturisch
asturianu (home d'Asturies)	Asturier
sí	ja
non	nein
u ta la casa bañu?	Wo ist die Toilette?
salú!	prosit prost
Fala inglés?	Sprechen Sie Englisch?
Nun entiendo	Ich verstehe nicht.
Disculpe	Entschuldigung
Nun lo sé	Ich weiß es nicht

Referencies

Enllaces esternos

Consulta la edición de Wikipedia n'idioma alemán.
German 101 Learn German online (n'inglés)
http://diccionario.escomposlinux.org Archiváu 2013-08-18 en Wayback Machine
Diccionarios de alemán Archiváu 2007-02-28 en Wayback Machine
Historia del alemán Archiváu 2011-09-17 en Wayback Machine - Historia del alemán y outras llinguas xermánicas.
ESmedo - Historia del idioma.
Diccionario alemán-español Archiváu 2019-04-05 en Wayback Machine (>107.000 entradas, incluye la gramática y foros)
Diccionario Freelang - Diccionario alemán-español/español-alemán.
Diccionario PONS Archiváu 2005-02-06 en Wayback Machine - Diccionario PONS alemán-español/español-alemán (120.000 entradas y giros).
German English Dictionary (enllaz rotu disponible n'Internet Archive; ver l'historial y la última versión).