Gustavo Bueno

Gustavo Bueno Martínez (1 de setiembre de 1924, Santo Domingo de la Calzada – 7 d'agostu de 2016, Niembru) foi un filósofu español. Dende 1970 foi desarrollando un sistema que más tarde denominó «materialismu filosóficu». Ye consideráu ún de los mayores filósofos españoles del sieglu XX y entamos del XXI.

Gustavo Bueno
Vida
Nacimientu	Santo Domingo de la Calzada, 1 de setiembre de 1924
Nacionalidá	España
Llingua materna	castellanu
Muerte	Niembru, 7 d'agostu de 2016 (91 años)
Estudios
Estudios	Universidá de La Rioxa Universidá de Zaragoza Universidá de Madrid
Direutor de tesis	Santiago Montero Díaz
Llingües falaes	castellanu
Oficiu	filósofu, profesor universitariu, profesor d'enseñanza secundaria
Participante manifiesto de reconversión.es (es)
Emplegadores	IES Lucía de Medrano (es)  (1949 –  1960) Universidá d'Uviéu  (1960 –  1998)
Trabayos destacaos	España frente a Europa (es)
Creencies
Relixón	Ateísmo católico (es)

La so obra construyóse en constante intercambiu coles ciencies y la historia de la filosofía. Gustavo Bueno ye autor de numberosos llibros y artículos sobre ontoloxía , filosofía de la ciencia, historia de la filosofía, antropoloxía, filosofía de la relixón, filosofía política, ateísmu y televisión, ente otres temes. Amás, amosó dende la so mocedá un fondu interés poles cuestiones de Teoloxía, hasta'l puntu de que se dixo d'él que "conocía la Escolástica de memoria". Nos sos últimos años, amás d'escribir, grabó videos y audios con analises de numberoses cuestiones filosófiques. El so fíu mayor, Gustavo Fernando Bueno Sánchez, ye profesor de Filosofía.

N'España ye especialmente conocíu pola so participación n'alderiques públicos y la so apaición en programes de televisión como Gran Hermano. Dellos llibros suyos algamaron notable espardimientu, como Ensayos materialistes, El mitu de la izquierda, El mitu de la cultura o Telebasura y democracia. La so obra dio llugar a un bon númberu de tesis doctorales y artículos de siguidores y detractores, y en redol a ella publiquen les revistes El Basiliscu y El Catoblepas. La Escuela de Filosofía d'Uviéu axúntase davezu na Fundación Gustavo Bueno, asitiada na mesma ciudá. Dalgunos de los sos llibros traduciéronse al alemán, al inglés y al chinu.

Alumnu del nacionalsindicalista Santiago Montero Díaz, la so trayectoria ideolóxica llevólu a abrazar unu amiestu de autoritarismu de dereches y d'esquierdes mientres el tardofranquismu.

Biografía

Fíu del médicu Gustavo Bueno Arnedillo y de María Martínez Pérez, ñació nel conceyu rioxanu de Santo Domingo de la Calzada, d'onde foi nomáu fíu predilectu en 1997. Recibió una educación católica y estudió nes universidaes de La Rioxa, Zaragoza y Madrid. Fixo la so tesis doctoral como becariu del CSIC a los venticinco años, en 1949, una cátedra d'Enseñanza Media. Coles mesmes, en 1949 empieza la so vida docente nel institutu Lucía de Medrano de Salamanca, onde va exercer hasta 1960.

Mientres la so formación como becariu nel Instituto Luis Vives de Madrid a la qu'aportó pola so amistá con Rafael Sánchez Mazas, Bueno foi aprendiz de los falanxistes Eugenio Frutos Cortés y Yela Utrilla , amás de los opusdeístes Raimundo Pániker y Rafael Gambra.

En 1960 s'establez n'Asturies, onde exerz como caderalgu de Fundamentos de Filosofía y Historia de los Sistemes Filosóficos de la Universidá d'Uviéu hasta 1998. A partir d'esta fecha desarrolla'l so llabor na Fundación Gustavo Bueno, que tien la so sede n'Uviéu, ciudá qu'en 1995 reconociólu como fíu adoptivu.

Miembru y patronu d'honor de la Fundación para la Defensa de la Nación Española (DENAES), nun tuvo reparos en trazar un orixe de la nación española» nun pasáu alloñáu.

Obres

• El papel de la filosofía en el conjunto del saber (1970)
• Etnología y utopía (1971)
• Ensayos materialistas (1972)
• Ensayo sobre las categorías de la economía política (1973)
• La metafísica presocrática (1975)
• La idea de ciencia desde la teoría del cierre categorial (1976)
• El animal divino (1985)
• Cuestiones cuodlibetales sobre Dios y la religión (1989)
• Materia (1990)
• Nosotros y ellos (1990)
• Primer ensayo sobre las categorías de las 'ciencias políticas' (1991)
• Teoría del cierre categorial (1993) [cinco tomos espublizaos, d'un total de quince previstos]
• ¿Qué es la filosofía? (1995)
• ¿Qué es la ciencia? (1995)
• El sentido de la vida. Seis lecturas de filosofía moral (1996)
• El mito de la cultura: ensayo de una teoría materialista de la cultura (1996)
• España frente a Europa (1999)
• Televisión: Apariencia y (1990) (2000)
• Telebasura y democracia (2002)
• El mito de la izquierda: las izquierdas y la derecha (2003)
• La vuelta a la caverna: terrorismo, guerra y globalización (2004)
• Panfleto contra la democracia realmente existente (2004)
• España no es un mito: claves para una defensa razonada (2005)
• El mito de la felicidad (2005)
• Zapatero y el pensamiento Alicia: un presidente en el país de las maravillas (2006)
• La fe del ateo (2007)
• El mito de la derecha (2008)
• El fundamentalismo democrático. La democracia española a examen (2010)
• Sciences as Categorical Closures (2013)
• Ensayo de una definición filosófica de la Idea de Deporte (2014)
• El Ego trascendental (2016)

Amás de los anteriores llibros suyos, hai que sumar tamién:

• Dios salve a la razón (2008), conxuntamente con VV. AA. (ente ellos Benedicto XVI).
• El númberu 42 d'El Basilisco (2011) contién un artículu pergrande de Gustavo Bueno con «Algunas precisiones sobre la idea de "holización"».
• Gustavo Bueno tamién collaboró na revista lleutrónica El Catoblepas, cola seición «Rasguños».

Polémiques

Ideoloxía política y relixón

Definieron la ideoloxía de Bueno como ateísmu católicu, marxista heterodoxu (críticu col marxismu vulgar», yá qu'entendía'l materialismu filosóficu como una «vuelta del revés» del marxismu clásicu); tomista non creyente (defensor de la tradición escolástica española empecipiada na Escuela de Traductores de Toledo); platónicu (nel sentíu de la filosofía académica de l'Academia de Platón, cola que llegó a comparase); d'esquierdes (nel sentíu de que renegaba del particularismu derechiega, anque pasó a postulase como parte d'una izquierda materialista bien crítica coles izquierdes realmente esistentes n'España, lo que-y valió l'acusación per parte d'aquelles d'habese vuelto conservador y nacionalista español.

Nos sos últimos años, asitióse públicamente allegáu al Partíu Popular (PP) en diverses ocasiones, sofitando la candidatura de Mariano Rajoy a la presidencia del Gobiernu d'España. Defendió tamién al PP en candidatures llocales.

Coles mesmes, tanto la filosofía de Bueno como la Fundación Gustavo Bueno sirvieron de posu ideolóxicu" pa parte de les posiciones polítiques del partíu ultraderechista Vox. Son "destacables", nesti sentíu, les semeyances ente la escuela de Bueno y el partíu d'estrema derecha, con una rellación que s'estableció tamién "al traviés del tratu personal". Pa Bueno Sánchez, "les claves que marquen a Vox son les que siempres defendió Gustavo Bueno".

Reñedielles ya incidentes en redol a Gustavo Bueno

Pola dificultá d'encasillar el so pensamientu y pola constitución dialéutica del so sistema, a lo llargo de la so carrera Gustavo Bueno viose envolubráu en numberosos discutinios con distintos grupos:

• El 1 d'avientu de 1970, unos estudiantes maoístes del Partíu Comunista Proletariu de Barcelona tiráron-y a la cara un bote de pintura, afrelláron-y ya intentaron poner un cartelu de "Llacayu del capitalismu".

• En 1977 un grupu d'estrema derecha denomináu Batallón Vasco Español amburó de madrugada un touterrén de la so propiedá, na avenida de Galicia d'Uviéu.

• En 1985, cola publicación del so llibru L'animal divín, entró nun llargu discutiniu col embaxador español Gonzalo Ponte Ojea. L'embaxador acusó a Bueno d'errar nel so diagnósticu sobre l'orixe de les relixones. Pa Gustavo Bueno, sicasí, les relixones surden nun procesu históricu y dialéuticu que s'empecipia col cultu a los animales, estremando asina trés etapes hestóriques na evolución relixosa de les sociedaes humanes: la de les relixones primaries (les que rindíen cultu a los animales); la de les relixones secundaries (qu'entamaron a rindir cultu de manera animista y politeísta a deidaes numinoses, con carauterístiques animales y humanes), y la de les relixones terciaries (la de los monoteísmos que personalicen a Dios, en mayor o menor gráu, principalmente'l xudaísmu, el cristianismu ya l'islam). Pa Bueno, la creencia recién en seres estraterrestres ye una recuperación d'eses relixones secundaries.
• En 1987, llamó "tipo" y "pabardu completu" a Lluis Xabel Álvarez, polo qu'ésti-y denunció por inxuries énte l'Audiencia Provincial d'Uviéu, que falló en favor de Bueno en 1989. La sentencia foi ratificada pol Tribunal Supremu en 1991, quien asumió que Bueno nun inxurió a Lluis Álvarez.

• En 1989, nel desapaecíu programa La clave de José Luis Balbín, en Televisión Española, entabló en direutu una reña con un xesuita en redol al supuestu milagru de Fátima, acusando Bueno al xesuita de desconocimientu total del so propiu dogma relixosu y calificando d'absurdu al milagru.

• En 1998 Bueno protestó contra la decisión de la Xunta de Gobiernu de la Universidá d'Uviéu de nomalo profesor eméritu honoríficu, que traía la so xubilación. Según Bueno, esto significaba la so "espulsión de les aules", polo que llegó a calificar al rector de la universidá, Julio Rodríguez, de "miserable". Sicasí, la mesma Xunta desplicó que la decisión nun torga que Bueno siguiera impartiendo enseñanza ensin reglar, anque ensin retribución económica de la Universidá. La postura de Bueno foi calificada como "sobeyosa", coles pallabres "quien se considere insustituible al llega-y la hora del retiru nun ye un auténticu maestru, pos nun supo dexar grana que fructifique puxantemente nos sos discípulos".

• En 1999, cola publicación d'España frente a Europa, entró en discutiniu col profesor de filosofía Juan Bautista Fuentes Ortega, en redol a les tesis "españolistes" de Bueno, denominándolu Fuentes, ente que Bueno calificólu de trotskista, defendiendo la idea d'imperiu como categoría política de la que nun se pue prescindir en nenguna etapa histórica. A partir de la publicación d'esti llibru, y de El mitu de la cultura, ye cuando entamaron les acusaciones de volvese conservador.

• En 2003, cola publicación d'El mito de la Izquierda, ganóse la enemistá de grupos soberanistes españoles, que lu acusaron de fascista, al igual que dellos politólogos criticaron la so teoría de les xeneraciones d'izquierda. Bueno defendióse diciendo qu'esos grupos nun teníen nin idea de lo que ye la izquierda política y de los sos oríxenes. Entabló polémiques al respeutu en diversos programes de Fernando Sánchez Dragó con Santiago Carrillo, Ignacio Sotelo y José Antonio Marina. Amás de fascista, Bueno foi acusáu d'estalinista, por pretender, según los sos detractores, crear una especie d'alianza ente lliberales, comunistes y católicos frente a la socialdemocracia.

• En 2007, grupos independentistes andaluces calificaron a Bueno de conservador ya islamófobu en criticando que se designara nel nuevu Estatutu d'Autonomía andaluz a Blas Infante como pá de la patria andaluza. Amás, recordaron les afirmaciones xenófobes de Bueno nuna entrevista fecha tres los atentaos del 11 de setiembre de 2001 escontra les Torres ximielgues, na qu'afirmaba: «Hai que destruyir los raigaños del Islam». Bueno defendióse de les acusaciones diciendo que,q nun hai que culpar a tol islam de los atentaos terroristes, sí hai que dicir qu'esi tipu d'atentaos nos que s'inmola'l terrorista solo puen dase nel budismu y nel islam. Sobre'l so pidimientu de destrucción de los raigaños filosóficos del islam, Bueno defendióse de les acusaciones d'islamófobu diciendo que, de la mesma manera en que nos sieglos XVII y XVIII el racionalismu filosóficu esmagayó los raigaños ideolóxicos cristianos, hai que facer lo mesmuq col islam y con cualquier relixón. Coles mesmes, calificó de risibles y absurdes les calificaciones de conservador o racista por criticar al islam, llamando ad hominem "inorantes" a los que lo facíen.

• En 2009, el PSOE acusó a Bueno de "facer apoloxía de la violencia de xéneru", n'afirmando nuna charra en contra del albuertu qu'"a la ministra que dixebra razón de relixón habría que tirala pela ventana". Nesa mesma conferencia, afirmó amás que "la muyer que reivindica'l so drechu a albortar por nun ser una contenedora yá tien abondo enriba con un celebru tan pequeñín". Recibió crítiques por ello y foi calificáu de "sexista" y "violentu" al realizar comentarios que "falten y afrellen a les muyeres".

Bueno, nel so ateísmu fuerte, non solo negó la esistencia de Dios sinón que criticó la idea filosófica de Dios como contradictoria, insustancial y absurda. Sicasí, nunca negó les sos simpatíes pola Ilesia católica. Per otra parte, foi muncho más críticu col protestantismu y Martín Lutero, calificando a esti de "principiu del mal" y "representante xenuinu del irracionalismu", contra'l cual el catolicismu sería un preséu muncho más racional.

Coles mesmes, Bueno asitióse en contra del albuertu. De la mesma, consideró la categoría de xéneru como una forma pa les muyeres de sintise víctimes y arrexuntase".

Bueno llamó "esbarriáu" al movimientu animalista, calificándolo d'"absurdu" la reconocencia de los derechos de los animales.

Gustavo Bueno y la llingua asturiana

Gustavo Bueno negó la esistencia del asturianu, calificándolu de "modalidá del español" y acusó a l'Academia de la Llingua Asturiana d'inventar una llingua. Foi ún de los miembros fundadores de la organización "Amigos de los Bables", una organización que taba en contra de la normalización del asturianu. Declaró que "l'asturianu tien una corriente ideolóxica" y que los sos proteutores son "minoríes abertzales". En 1987 tuvo una reña con Lluis Xabel Álvarez, cofundador de Conceyu Bable, que foi llamáu "pabardu" por Gustavo Bueno y esti foi denunciáu énte los tribunales.

En 2005 acusó a Izquierda Xunida de ser "una ONG del bable".

Obra: el materialismu filosóficu

Artículu principal: materialismu filosóficu

El materialismu filosóficu tien como traza común la negación del espiritualismu, la negación de la esistencia de sustancies espirituales. Pero nun amenorga'l materialismu a corporeísmu, como de fechu asocede con otros materialismos. El materialismu filosóficu almite la realidá de seres materiales incorpórevos: por casu, la rellación real (non mental) de la distancia qu'esiste ente dos botelles d'agua que tán enriba d'una mesa ye tan real como eses dos botelles corpórees; esa distancia ye material incorpórea y nada tien d'espiritual.

Esti sistema va desendolcase en numberosos ámbitos ente los que puen destacar los siguientes:

• la ontoloxía (xeneral y especial);
• la gnoseoloxía (teoría del zarru categorial);
• la filosofía de la relixón (y el papel de los animales na esencia de la relixón).

Estos yeren los temes predominantes nos testos de Gustavo Bueno hasta los años 90. Sicasí, a partir del nuevu mileniu, entamó a tratar temes d'ética y crítica social y política. Por casu, díxose de la so crítica al pacifismu que ye más un intentu de realizar "analises engañosos", d'actitú retórica" y que lleguen de cutiu "al insultu y a descalificaciones gratuites dende analises parciales", ensin amosar nunca cambeos de postura nos sos argumentos. Foi tratando otros temes que tienen que ver, ente otros, con:

• la crítica a la idea de cultura (como trasunto de la idea ontoteolóxica de gracia);
• la teoría del Estáu (y los sos 18 poderes);
• la escurre d'España (la so unidá ya identidá na historia y nel presente);
• l'analís de la esencia de la televisión.

Díxose que la so obra permanez "presa de la metafísica escolástica" na so defensa de la idea de verdá". Coles mesmes, tampoco s'abriría a aceutar el constructivismu que realmente prauticaría "en tola so obra".

Sobre la oratoria de Gustavo Bueno nos medios de comunicación, dalgunos afirmaron que cultivaba la estravagancia y la salida de tonu". Pa delles persones, Guststavo Bueno, tamién resultaba "hiriente nel insultu", arbitrariu nes sos decisiones y violentu nes sos formes.

Enllaces esternos

• Wikiquote tien frases célebres suyes o que faen referencia a Gustavo Bueno.
• Biografía de Gustavo Bueno en diccionarios y obres xenerales, nel sitiu Web del Proyeutu de Filosofía n'español
• Vídeoteca de Gustavo Bueno na Fundación Gustavo Bueno
• Canal de Youtube fgbueno.tv
• Canal de Youtube de Nódulo Materialista
• Revista El Basilisco
• Revista El Catoblepas

• Datos: Q978049
• Cites famoses: Gustavo Bueno