Wikipedia

Taxus baccata

especie de planta
(Redirixío dende Texu)

El texu[1] (Taxus baccata) ye una especie ximnosperma de la familia Taxaceae (clase Pinopsida). Ye orixinaria d'Europa occidental, central y meridional, oeste d'Asia y norte d'África[2]. Ye una planta carauterizada pol so espollete lentu, gran llonxevidá y calter venenosu. Suel atopase normalmente como exemplares aisllaos, más raramente en formaciones.

Taxus baccata
texu
Clasificación científica
Reinu: Plantae
División: Pinophyta
Clas: Pinopsida
Orde: Cupressales
Familia: Taxaceae
Xéneru: Taxus
Especie: Taxus baccata
L.
Distribución
Consultes
Royal Botanic Gardens, Kew Royal Botanic Gardens, Kew
World Flora Online World Flora online
[editar datos en Wikidata]
El texu de Bermiego.

Etimoloxía y nome

editar

El texu foi descritu en 1753 como Taxus baccata por Carl von Linné y publicáu en ''Species Plantarum'' 2: 1040[3].

Taxus yera'l nome llatín clásicu pa designar la mesma especie qu'anguaño conocemos como texu. La pallabra tien un orixe inciertu. La hipótesis más aceutada vencéyala cola griega tóxon (arcu) pola flexibilidá de la so madera. La especie baccata deriva del llatín bacca, n'alusión a la baga que produz.

La mayor parte de los nomes romances actuales provienen del llatín taxus: asturianu texu, italianu tasso, corsu tassu, occitanu teis, catalán teix, gascón tech, castellanu tejo, portugués teixo, gallegu teixo o rumanu tisa. Hai una esceición nel francés if que pudiera emparentase coles llingües protoxermániques como l'inglés yew, bretón ivin, irlandés ēo y galés ywen. Toes estes tienen un aniciu posiblemente del galu *ivos.

editar

N'asturianu amás de texu, esisten otres variantes como teḥa, texa, teixu y tixu, más la forma mocal o mocayal que pudiera remanecer del nome popular de la so baga, mocu o moquiellu[4]. Hai que notar qu'anque texu ye la voz xenérica pa cualesquier individuu d'esta especie, n'asturianu dase variación de xéneru dientro del propiu nome (texu-texa), amosando'l so calter d'especie dioica, ye dicir, que presenta dos pies de planta, unu por cada sexu.

Fitonimia

editar

Los nomes de llugares que remanecen de la pallabra texu pola so esistencia nel pasáu son abondosos pela xeografía. N'Asturies atópense varios, El Tixu (Morcín), El Teixu (Quirós), Ḷḷanu los Teixos (Quirós), La Texera (Ayer), Les Tixeres (Riosa), Teixeda (Villayón), La Texera (Avilés, Cabranes), Os Teixóis (Taramundi) o El Texu (Cabrales, Llanes), ente otros[5][6][7]; pel restu d'España hai El Tejo (Cantabria), Cova del Teix (banzáu de Margalef, Cataluña), La Tejera (Zamora), Fuente del Tejo (Sierra de Segura, Jaén) o Aginamendi (del vascu hagin -texu-, País Vascu). Per Europa, hai los de ciudaes como York (Reinu Xuníu) o Évora (Portugal), en dambos casos derivaos del celta *eburo (texu). D'esta pallabra celta tomó tamién nome la tribu belga de los eburones.

Bioloxía

editar

Descripción

editar

El texu ye un árbol de rama verde escuro que caltién la fueya tol añu y pue llegar a midir hasta 20 m d'altor, anque cuando sufre estrés o presión esterior pue presentase como arbustu. La rama en xeneral ye trupo, con gran proliferación de cañes en posición horizontal y colingando selemente pela pica. Les fueyes son pequeñes (1-4 cm) allargaes y estreches, de color verde escuro pela facha pero más ablancuzaes y col nerviu mediu sobresaliendo pel envés. El marxe ye lisu. El tueru ye gruesu, con una corteya pardo-abuxao que s'esforgaxa en plaques irregulares.

Como especie dioica, los individuos machos namás producen estames y les femes grana. Visualmente son iguales, anque la proliferación de cada gónada ye la que los delata. El texu, el pie masculín, produz nes axiles de les fueyes unos conos globosos pequeños de color marelludo cola apariencia d'un floreru del que sal una columna coronada por 6 a 8 escames peltaes, caúna con 4 a 8 sacos polínicos[8]. La texa, el pie femenín, lleva un rudimentu seminal solitariu nel apéndiz d'una curtia prollongación escamosa allugáu tamién nes axiles de les fueyes. Tien forma ovoide y ta arrodiáu per una bráctea verdosa que, demientres la madurez del embrión, desendolca una envoltura carnosa y mucilaxinosa de color colorao esllendante llamada, en botánica, arilu. Esta envoltura nun enzarra dafechu la semiente, dexando perfeutamente visible'l so color marrón, forma apiculada y naturaleza lleñosa. L'arilu, nun se considera un frutu como'l de les anxospermes, sinón un pseudofrutu. N'asturianu llámase moquiellu o mocu.

Floración y fructificación

editar

La floración desendólcase de febreru a abril. Les abeyes y otros inseutos acopien dalgo del so polen pero la dispersión faise mayoritariamente pel aire. El moquiellu madura pela seronda y son les aves les que contribuyen a la dispersión de la grana.

Hábitat

editar

El texu vive en sitios aveseos y soleyeros, magar que prefier llugares llentos pero non enllamuergaos. Mui raramente apaez formando viesques monoespecífiques, llamaes texeos, sinón más bien asociáu a otres especies como les fayes[9]. Ye indiferente a la naturaleza del sustratu pero paez decantase pola caliar. Pue atopase hasta los 1800 m.

Llonxevidá

editar

La edá qu'algamen munchos exemplares de texu ye de varios sieglos, superando incluso'l mileniu. Sicasí, la edá esauta ye imposible de conocer. La necesaria preservación de los sos tueros énte cualesquier preba cronolóxica que puea alteralos fai refugales categóricamente. Amás, nes cañes y tueros muertos, suelen presentar oquedaes qu'imposibiliten dafechu'l recuentu d'aniellos.

Un dichu popular inglés amuesa'l so calter llonxevu:

«La vida de tres artos, la vida d'un sabuesu;

les vides de tres perros, la vida d'un corcel;

Les vides de tres corceles, la vida d'un home;

les vides de tres homes, la vida d'un águila;

les vides de tres águiles, la vida d'un texu;

la vida d'un texu, la llonxitú d'una era;

Siete eres dende la creación hasta'l día del Xuiciu».[10]

La llonxitú d'una era ye por términu mediu 729 años.

Toxicidá

editar

Sacante los moquiellos, toles partes del árbol contienen una sustancia llamada taxina: un entemez d'alcaloides con efeutu cardiotóxicu que produz parálisis nel corazón. Los alcaloides sintetizaos por cualquier especie del xéneru Taxus reciben el nome específicu de taxoides.

La inxesta de taxoides nos animales provoca reaiciones de graves consecuencies. Na especie humana, anque la inxesta de taxina ye mortal por provocar parálisis respiratoria, esta capacidá venenosa paes tener diferentes efeutos dependiendo de la dosis. Esta dilución de la concentración de taxina usóse n'Asturies con fines albortivos, anque ye práutica dafechu refugada poles consecuencies mortales que conlleva.

L'envenenamientu produzse pola inxestión de les fueyes. Los síntomes d'un intoxicáu entamen con náusees, voltura, dolores intestinales y aumentu del ritmu cardiacu. Al poco, atópase somnolientu, lletárxicu y comatosu; la presión sanguínea amiya rápidamente debilitándose'l pulsu. L'electrocardiograma rexistra fondes alteraciones (arritmies ventriculares) y l'estáu clínicu degrádase aína: cianosis o parada respiratoria, necesidá de masaxe cardiacu y ventilación asistida. Finalmente, muerte por paru cardiacu.

Magar que los casos de muerte actuales por envenenamientu n'humanos son raros, el caberu rexistráu n'Asturies foi en xunu de 2018[11]. N'animales, esisten varios testimonios sobre vaqueros qu'atoparon caballos, vaques, oveyes o otros animales domésticos agonizando o muertos pola so inxestión fortuita.

Usos médicos

editar

En 1967 ciertos compuestos na corteya de los texos foron atopaos por Wall y Wani como eficaces axentes anticanceríxenos[12]. Esta propiedá alcuéntrase nel taxoide paclitaxel. El cáncanu consiste nuna proliferación celular descontrolada que conlleva a la disfunción orgánica y a la muerte del organismu. L’aición del paclitaxel consiste n'inhibir esta división celular, bloquiar la so proliferación y conducir a la muerte celular. El nome comercial del paclitaxel ye taxol. Úsase pal tratamientu de cáncanu de mama, ovariu, polmón, vexiga, próstata, melanoma, esófagu, fégadu y otros tumores sólidos[13]. El descubrimientu del paclitaxel aumentó la corta de texos, pero’l so conteníu nos árboles ye baxu. Esti fechu incrementó la collecha descontrolada pa la obtención de paclitaxel a partir del texu del Pacíficu lo que motivó que s’intentase la so producción semisintética. Un enfermu de cáncanu consumía aproximao 8 árboles de 60 años de texu[14]. A esti productu semisintéticu llamóse docetaxel[15].

Relixón y cultura

editar

L'atraición que los texos supunxo pa les diferentes cultures europees encóntiase en varios motivos. Unu ye la resistencia de la so madera, d'abegosa pudrición, que lu fizo yá material importante dende l'antigüedá. N'Essex, Reinu Xuníu, atopóse una llanza de texu, conocida como la Llanza de Clacton, con una antigüedá estimada superior a los 400.000 años[16]. N'Asturies, surdieron aperios metalúrxicos nes cueves prehistóriques de cobre y bronce de La Pena L'Aramo fechos de texu[17]. Otru motivu importante ye'l color de la so madera, poro n'Asturies se diz que «cuando se taraza una caña sangra como un paisanu»[18]. Sicasí, pudiera ser que'l so calter venenosu fuera la carauterística más especial, seique la más señalada. Informa Xuliu César que na Guerra de les Galies, el rei de los Eburones, Cativolcus, ablayáu yá pola edá y viéndose incapaz d'afrontar les penalidaes de la guerra o de l'afuxida, resolvió quitase la vida con zusmiu de texu pa nun cayer en poder romanu[19]. Esti mesmu fechu ta constatáu nos pueblos ibéricos polos los historiadores romanu Florus ya hispanu Orosius rexistrando nos sos testos que, los habitantes del norte (galaicos, astures y cántabros), preferíen acabar la vida suicidándose coles sos propies espades o col venenu del texu que capturaos polos romanos. El tamién poeta romanu Ovidius coloca estos árboles estendiendo la so solombra trupa pelos caminos del infiernu «Hai un camín cuesta abaxo al aveséu de fúnebres texos, empobina al traviés de mudos silencios a les moraes infernales» (Metamorfosis llibru IV, 432-433). Hai sarcófagos de los faraones exipcios construyíos con madera de texu.

Relixón

editar

El sentíu ancestral del texu como árbol funerariu y el so venceyu col Más Allá en ciertos pueblos europeos paez ser indiscutible. El so cultu nel norte ibéricu podría tar presente nes esteles vadinienses. Son llábanes de piedra con inscripciones llatines y representaciones esquemátiques d'un árbol y caballos. La inclusión d'un árbol venceyáu cola muerte y la coincidencia de los esquemes cola disposición foliar podría corresponder al texu[20]. La rodiada de munchos texos amuesen una variada presencia de restos megalíticos y un gran númberu d'exemplares d'esta especie medren dende hai munchos sieglos averaos a los cementerios[21]. Ye habitual tamién atopar a llau de los texos ilesies remocicaes o renovaes d'una anterior. Esta presencia cristiana esplícase como un exemplu de suplantación teolóxica sobre les antigües relixones paganes.

El texu na cultura asturiana

editar

La tradición y cultura del texu n'Asturies amuesa vínculos ancestrales. La so simboloxía ye un entemez de símbolu relixosu, valir ancestral, herencia común, identidá, llibertá, xusticia y democracia. La presencia de texos llantaos en cementerios per toda Asturies ye bayurosa. Dende tiempos inmemoriales, baxo la so groma entamábense’l Conceyu Abiertu nel que’l pueblu ponía en común los sos problemes y restolaba una solución. Los homes más vieyos impartíen la llei y la xusticia baxo él. Recueye Constantino Cabal: «(...) decretaben que les Xuntes del conceyu siempres les presidieren cuatro ancianos, homes bonos del llugar. Ellos actuaben como xueces y yeren inapelables les sos sentencies».

Na tradición asturiana, demientres la foguera de San Xuan, yera vezu que los rapazos asturianos dexaren unes cañes de texu nel ventanal o puerta del llar de la rapaza que taben cortexando. Amás, el Día de Tolos Santos llevábase una cañina de texu a la tumba de los difuntos. Demientres les fiestes de los pueblos, los músicos atopaben el so escenariu baxo los texos, celebrándose na so rodiada los bailles y dances. Sicasí, teníase la creyencia que dormir a la so solombra podía provocar la muerte.

El texu na cultura europea

editar

Los texos foron árboles veneraos polos duides y símbolos d'inmortalidá nos tiempos de los celtes. En Bretaña y Normandía, Francia, esisten una gran cantidá de texos funerarios. Nesta tierra recoyóse la creyencia de que los texos de los cementerios estendíen una raíz hasta la boca de caún de los cadabres y que, tamién, los texos tán llantaos nos cementerios pa que cuiden a los muertos.

Na mitoloxía nórdica, l'árbol de la vida llamábase Yggdrasil. La so raigonera y cañes amestaben los nueve mundos de la cosmoloxía nórdica. Anque'l significáu xeneralmente más aceutáu indica que la so etimoloxía sería “pollín d'Odín”, otra teoría apunta a que podría derivar de *gwja (texu). Nesti sen, nel alfabetu rúnicu, la runa 13 ye *ei(h)waz (texu), representaba la muerte y el renacimientu. Esta runa asóciase a vegaes col árbol Yggdrasil.

N’heráldica, el texu apaez representáu con tres exemplares nel escudu de Guipuzcoa, País Vascu.

Usos

editar

La madera de texu ye de mui bona calidá, de tonalidá colorao con albura marelludo, mui duro y compauto. Ye de de les poques especies de coníferes que la so madera pue curvase al vapor. Tornease mui bien y aceuta pulimentu. Toes estes cualidaes faen d'ella una madera mui estimada n'ebanistería y tornería.

Usos ancestrales

editar

La durabilidá y flexibilidá de la madera del texu fizo que fuera esbilláu dende tiempos inmemoriables como materia prima na fabricación d'estremaos utensilios. En Cataluña atopáronse tres arcos con una antigüedá estimada ente 7400 y 7200 años[22]. Un poco más recién, pero d'indiscutible antigüedá, ye l'arcu llargu de texu (n'inglés longbow) atopáu n'Escocia con una fecha calibrada de 4040 a 3640 años enantes de Cristu[23]. D'esta miente, el mangu del hacha de cobre que puxaba Ötzi datáu ente 3400 y 3100 años e.C. yera tamién de texu[24]. Tocántenes a Asturies, la madera de texu usóse pola so dureza pa ventanes y postes de cuadres y cabañes, yá qu'al dicir de los artesanos «nun-y entra'l coroyu»[25]. Foi madera adecuada pa facer ferraes y canxilones[26], amás de los tableros y estructures de les bodegues de formentación del quesu pel oriente. Tamién tuvo usu xeneralizáu como xebe de praos pola so poda fácil y rama trupo.

Usos actuales

editar

Pola so naturaleza cuasi imputrescibles, mui elástica, dura, inodora, duradera y decorativa, la madera de texu ye mui fácil d'esculpir, lo que-y confier un gran abanicu d'usos. Ye perafayadiza pa muebles, ebanistería de calidá, suelos, puertes y paneles.

Texos patrimoniales

editar

Los texos patrimoniales son exemplares que tán allugaos dientro d'un espaciu antropizáu y amuesen una edá mui avanzada. La so presencia nel llugar ye testimoniu d'herencia común ente los vecinos, a vegaes del conceyu, al traviés de les xeneraciones. De munchos persábese que foron semaos a costafecha nel llugar onde s'alcuentren, d'otros nun se conoz el motivu, pero toos comparten la preservación de la memoria coleutiva de la rodiada, el respetu a la naturaleza y una carga simbólica y relixosa al empar que caltria nel cantu la memoria.

Asturies

editar

Amigos del texu ye una asociación asturiana que censa, cataloga y promueve la defensa de los texos. Tien recoyíos cuasi 280 texos patrimoniales pela xeografía asturiana, anque son 215 los sobrevivientes. Los más reseñables son:

*Esti llistáu ta siendo ampliáu.

Amieva Texu de San Román
Avilés Texu del Parque de Ferrera (Avilés)
Allande Texos de Santa Colomba Texu de Bustantigo Texu de Llago
Ayer Texu de Santibanes de la Fuente
Bimenes Texu de Piñera Texu de Suares
Bual Texos de Rozadas
Cabranes Texu de Madiéu
Casu Texos de Bueres
Eilao Texu de Pastur
Ḷḷena Texu de Cabezón Texu de Casorvía Texu de Chanos Texos de Los Pontones Texu de Samiguel del Río
Texu de Sotieḷḷo Texu de Santa Marina
Miranda Texu d'Antuñana Texu de Cuevas Texu de Montoubu Texu de Samartín d'Ondes
Parres Texu de Bodes
Proaza Texu de Llinares
Quirós Texu de Bermiego Texu de Murieḷḷos Texu de Pedroveya Texu de Pirueño
Salas Texu de Salas Texu d'Ardesaldu Texu de Camuñu
Sariegu Texu de Narzana
Siero Texu de Ceñal (La Collá) Texu d'Hevia Texu de Lieres
Uviéu Texu de Mexide Texu de Priorio

España

editar

Francia

editar

L’asociación A.R.B.R.E.S[27] cataloga tolos árboles notables del país. Ente ellos atópense varios texos, la inmensa mayoría en Normandía.

Normandía Texos de La Haye-de-Routot Texu d'Estry Texu de Saint-Pierre-la-Vieille Texu de Saint-Sulpice-de-Grimbouville Texu de Foulbec
Texos de La Lande-Patry Texu de Courson Texu de Saint-Rémy Texu de Fiquefleur Texos de Boisney
Texu de Saint-Ursin Texu de Castillon Texu de Pierres Texu de Saint-Symphorien Texu d'Épreville-en-Roumois
Texu de Troncq Texu de Mandeville Texu de Saint-Victor-d'Épine Texu de Saint-Mards-de-Blacarville Texu de Saint-Clair-d'Arcey
Texu de Triqueville Texu de Saint-Martin-du-Tilleul Texu de Quincarnon Texu de Montgardon Texu de Chefresne
Texu de Brix Texu de la Bloutière Texu de la Lucerne-d'Outremer Texu de Moitiers-en-Bauptois Texu de Montcuit
Texu de Nicorps Texu de Boutteville Texu irlandés de Mesnil-Angot Texu de Ménil-Ciboult Texu de Lalacelle
Texu d'Offranville Texu de Trois-Pierres Texu de Gouy
Restu Francia Texu d'Yvignac-la-Tour Texu de Saint-Maudez Texu de La Motte-Feuilly Texu de Dornot Texu de Bossuet
Texu de Neuvicq-le-Château Texu de Vigeois

Reinu Xuníu

editar

Como continuación a una campaña gubernamental entamada en 1973 que promovía la plantación d'árboles, en 1974 fúndase la organización Conceyu del árbol (n'inglés The Tree Council)[28] pa caltener la mesma iniciativa a lo llargu’l tiempu. Parte de los sos oxetivos ye facer una esbilla de los 50 árboles más notables del Reinu Xuníu. Na llista atópense dellos texos:

Inglaterra Texu de Heavitree Texu d'Ashbrittle Texu de Selborne Texu d'Ankerwycke Texu de Crowhurst
Texu de Borrowdale Texu de Levens Hall
Irlanda del Norte Texu de Crom Castle
Escocia Texu de Fortingall Texu de Craigends
Gales Texu de Llangernym

Ye tamién de gran sonadía'l texu de Florencecourt (Irlanda del Norte).

Otra asociación, Texu antiguu (n'inglés Ancient Yew)[29], atecla tamién polos texos británicos.

Alemaña

editar
  • Texu de Balderschwang

Bélxica

editar
  • Texu de Caesarsblomm

Preservación

editar

Los texos enriba enumberaos superaron al traviés de los sieglos toles torgues que la vida-yos impuso. Sicasí, ye nestes caberes décades cuando tán afrontando la mayor amenaza de toes: la presión humana. L’antropización de tolos espacios del planeta ta faciendo que cada vez más texos singulares muerran y desaparezan cuando gozaben de mui bona salú pocos años enantes. Amigos del texu recoyó nun decálogu[30] les midíes más inmediates pa la preservación de los texos. Recoyemos equí dalgunes más básiques:

1. Un rellenu de tierra na superficie alredor del tueru pue acabar cola vida del árbol.

2. Un fuexu o zanxa averaos al texu pue dañar el sistema radicular del árbol. Amás, podría baxar el nivel freáticu y secar les raíces.

3. Les obres al so llau deben tener un procuru especial. La maquinaria nun debería escavar na so vera, nin vaciar l'agua que contengan o transitar cerca del árbol.

4. Los texos que tengan corra, ésta nun ha remocicase con cementu.

5. Procurar preservar la rodiada tal y como llegó a nosotros y nun introducir modificaciones.

6. La visita por humanos debe ser respetuosa cola rodiada, evitando la masificación que compacte’l suelu.

Referencies

editar
  1. ↑ URL de la referencia: http://www.sabencia.net/nomenclator.php.
  2. ↑ LOPEZ GONZÁLEZ, G. (2004). Guía de los árboles y arbustos de la Península Ibérica y Baleares, Ediciones Mundi-Prensa. Madrid. p 228-230. ISBN 84-8476-210-6.
  3. ↑ http://www.botanicus.org/title.aspx?bibid=b12069590.
  4. ↑ ORDIALES, B. & RUIZ, G. (2006). Guía de los árboles d'Asturies, Ediciones Trabe. Uviéu. p 94-98.
  5. ↑ CONCEPCIÓN SUÁREZ, J. (2001). Diccionario toponímico de la montaña asturiana, Ediciones KRK. Uviéu. p 609-610.
  6. ↑ http://www.xuliocs.com
  7. ↑ https://mas.lne.es/toponimia/index.php?leer=720&pallabra=tixu.
  8. ↑ LASTRA, J. J. et al. (2003). Etnobotánica en el Parque Nacional de Picos de Europa, Ministerio de Medio Ambiente. Madrid. p 283-286.
  9. ↑ LASTRA, J. J. et al. (2003). Etnobotánica en el Parque Nacional de Picos de Europa, Ministerio de Medio Ambiente. Madrid. p 283-286.
  10. ↑ GRAVES, R. (1948). The white goddes. UK. Faber & Faber p 268.
  11. ↑ https://www.lne.es/asturias/2018/05/03/misterio-estudiante-letona-quiros-murio/2279688.html
  12. ↑ http://www.redalyc.org/pdf/629/62924540006.pdf
  13. ↑ «Archived copy». Archiváu dende l'orixinal, el 2018-06-15.
  14. ↑ «Archived copy». Archiváu dende l'orixinal, el 2020-08-09.
  15. ↑ http://www.revfarmacia.sld.cu/index.php/far/article/view/53/57
  16. ↑ http://archaeologydataservice.ac.uk/archiveDS/archiveDownload?t=arch-985-1/dissemination/pdf/The_Lower_and_Middle_Palaeolithic_of_Cambridgeshire.pdf
  17. ↑ http://revistaseug.ugr.es/index.php/cpag/article/viewFile/4088/4032
  18. ↑ ABELLA, I. (2009). La cultura del tejo, Editorial La Editorial de Urueña. Valladolid.
  19. ↑ http://www.revistaadios.es/ampliacion/4/El-Tejo.html
  20. ↑ ABELLA, I. (1996). </nowiki>La Magia de los Árboles, RBA Libros, Barcelona.
  21. ↑ https://web.archive.org/web/20131002060246/http://www.ancient-yew.org/userfiles/file/Living_legend_5Jan2010.pdf
  22. ↑ https://www.elmundo.es/la-aventura-de-la-historia/2015/02/03/54d0b5dce2704e7e2b8b4582.html.
  23. ↑ https://www.historic-uk.com/HistoryUK/HistoryofEngland/The-Longbow./
  24. ↑ https://www.cambridge.org/core/journals/radiocarbon/article/ams-14c-age-determinations-of-tissue-bone-and-grass-samples-from-the-otztal-ice-man/91BC7943558A041387DEEDD6E4A82071.
  25. ↑ LASTRA, J. J. et al. (2003). Etnobotánica en el Parque Nacional de Picos de Europa, Ministerio de Medio Ambiente. Madrid. p 283-286.
  26. ↑ MERINO CRISTÓBAL, L. (2004) Usos tradicionales de los árboles en el occidente de Asturias, Museo Nacional de Ciencias Naturales. Madrid.
  27. ↑ http://www.arbres.org/association.html
  28. ↑ https://www.treecouncil.org.uk/
  29. ↑ https://www.ancient-yew.org/
  30. ↑ https://texu.files.wordpress.com/2010/01/imagen-22.png?w=445

Enllaces esternos

editar
Sacáu de «https://ast.wikipedia.org/w/index.php?title=Taxus_baccata&oldid=4225050»