Brad Pitt

actor y productor de cine americanu

William Bradley Pitt (18 d'avientu de 1963Shawnee (es) Traducir), conocíu como Brad Pitt, ye un actor y productor de cine norteamericanu varies veces nomáu a los Premios Óscar y a los premios Globu d'Oru. Tamién tien sío descrito como ún de los homes más atractivos del mundu[ensin referencies], polo que tien recibío muncha atención de los medios.

Brad Pitt
Vida
Nacimientu Shawnee (es) Traducir[1]18 d'avientu de 1963[2] (60 años)
Nacionalidá Bandera de Estaos Xuníos d'América Estaos Xuníos [3]
Residencia Springfield
Los Angeles
Llingua materna inglés d'Estaos Xuníos
inglés
Familia
Padre William Alvin Pitt
Madre Jane Etta Hillhouse
Casáu con Jennifer Aniston (2000 – div. 2005)
Angelina Jolie (2014 – Separación de hecho (es) Traducir 2019)
Pareyes Juliette Lewis
Gwyneth Paltrow
Jennifer Aniston
Angelina Jolie
Fíos/es
Hermanos/es Douglas Pitt
Familia
Estudios
Estudios Universidá de Missouri
Kickapoo High School (es) Traducir
Llingües falaes inglés[4]
Alumnu de Roy London
Ivana Chubbuck
Oficiu actor de televisión, actor de cine, productor de cine, direutor de cine, actor de voz, modelu, productor executivuproductor de televisión
Altor 1,8 m
Premios
Nominaciones
IMDb nm0000093
Cambiar los datos en Wikidata
Brad Pitt.

Pitt entamó la so carrera como actor al aprucir como convidáu en programes de televisión, ente los cuales s'inclúi un papel na novela de CBS Dallas, en 1987. Más sero, tuvo reconocencia de la prensa cola interpretación del cowboy autoestopista que seduz al personaxe de Geena Davis na película de 1991 Thelma & Louise. Los primeros papeles protagonistes de Pitt en producciones d'altu presupuestu foron A River Runs Through It (1992) y Interview with the Vampire, (1994). Tamién participó xunto con Anthony Hopkins nel drama de 1994 Legends of the fall, papel que-y fizo obtener la so primer nominación a los premios Globu d'Oru. En 1995 recibió allabancies de la crítica poles sos interpretaciones nel filme de suspense Se7en y nel de ciencia ficción Doce monos, siendo esta postrera la que-y fizo ganar un Globu d'Oru na estaya de "meyor actor de repartu" y una nominación al premiu Óscar. Cuatro años más sero, en 1999, protagonizó l'éxitu de cultu Fight Club, y poco dempués actuó nel exitosu filme Ocean's Eleven (2001) nel papel de Rusty Ryan y lo mesmu nes sos secueles, Ocean's Twelve (2004) y Ocean's Thirteen (2007). Los sos mayores éxitos a nivel comercial tienen sío Troya (2004) y Mr. & Mrs. Smith (2005). Pitt recibió la so segunda nominación al premiu de l'Academia pol so papel protagonista na película de 2008 The Curious Case of Benjamin Button.

Tres una rellación cola actriz Gwyneth Paltrow, Pitt tuvo casau con Jennifer Aniston mientres cinco años. Sicasí, dempués entamó a convivir con Angelina Jolie, siendo esta una rellación que tuvo muncha fama. Tienen seyes fíos: Maddox, Zahara, Pax, Shiloh, Knox y Vivienne. Dende qu'entamó la so rellación con Jolie, involucróse en munches causes sociales nos Estaos Xuníos y a nivel internacional. Pitt tien una compañía de producción llamada Plan B Entertainment, ente cuyos trabayos se cuenten la ganadora del Óscar a la meyor película, The Departed (2007).

Primeros años editar

Fíu de Jane Etta -cuyo apellíu de soltera yera Hillhouse-, secretaria d'una escuela secundaria y de William Alvin Pitt, dueñu d'una compañía fabricante de camiones, l'actor nació en Shawnee, Oklahoma. Sicasí, xunta sos hermanos Doug (1966) y Julie neal (1969) en Springfield, Missouri, llugar au la familia se mudó tres la so nacencia.

Pitt asistió a la Kickapoo High School, onde foi miembru de los equipos de golf, tenis y natación. Tamién participaba nos clubes escolinos Key y Forensics, n'alderiques y musicales. Tres la so graduación inxirió na Universidá de Missouri en 1982, especializándose en periodismu y publicidá. Como miembru de la fraternidá de Sigma Chi participó en munchos eventos de la organización. A midida que la so graduación s'averaba, vía como los sos amigos atopaben trabayu, pero Pitt nun se sentía aviao pa ello. Según les sos propies pallabres, prestába-y el cine, al que camentaba como "un estragal hacia mundos estremaos", y como les películes nun se facíen en Missouri, decidió dir onde se filmaben. Dos selmanes enantes de recibir el so diploma, Pitt dexó la universidá y marchó a Los Angeles, onde dio clases de teatru y tuvo dellos trabayos.

Carrera editar

Primeros trabayos como actor editar

Mientres lluchaba por asítiase en Los Angeles, Pitt dio iclases de teatru col británicu Roy London. Tuvo dellos trabayos temporales, trabayó como xofer y más sero vistióse como la mascota del Pitu Llocu pa pagar les sos lleiciones de teatru. La carrera de Pitt nes pantalles entamó en 1987, con papeles ensin figurar nos créditos de les películes No way out, No Man's Land y Less Than Zero. El so debut na televisión llegó en payares del mesmu añu, cuando se presentó como convidáu na comedia de situación de la cadena ABC Growing Pains. Aprució en cuatro episodios de la novela de CBS Dallas ente avientu de 1987 y febreru de 1988 nel papel de Randy, el noviu de Charlie Wade -interpretada por Shalane McCall-. Pitt describió'l personaxe como "un noviu babayu que queda apilancáu na paya". Sobre les sos escenes con McCall, l'actor más sero mentó: "yera xabaz, porque nunca enantes nos atopáramos". Tiempu dempués, en 1988, presentóse como convidáu nel drama policiacu Comandu Especial de la cadena Fox Nel mesmu añu, Pitt tuvo'l so primer papel protagonista nun llargumetraxe, cola producción yugoslavo-norteamericana The Dark Side of the Sun. Nella, l'actor interpreta a un mozu d'Estaos Xuníos lleváu a Europa pola so familia pa curar les sos problemes na piel. Sicasí, el film nun s'estrenó esi añu per aciu del españíu de la Guerra Croata d'Independencia y atrasóse hasta 1997, cuasi una década dempués. Pitt tamién actuó en dos películes más en 1989, la primera consistía nun papel de repartu na comedia Happy together y la segunda nun papel cimeru na película de mieu Cutting Class. Esta postrera foi la primer película na que trabayó Pitt y que s'amosó nes sales de cines. Lluegu fizo más presentaciones como convidáu nes series de televisión Head of the Class, Freddy's Nightmares, Thirtysomething y, por segunda vegada, en Growing Pains.

Tamién, Pitt interpretó a Billy Canton, un drogadictu que s'aprovechaba d'una moza -Juliette Lewis- na película de televisión de 1990 de NBC Too Young to Die?, la historia d'una rapaza, de la que s'abusó sexualmente, que ye condergada a muerte por asesinatu. Ken Tucker, críticu d'Entertainmente Weekly dixo que "Pitt ye un canalla magníficu nel so papel de noviu matón, al mirar alredor como un John Cougar Mellencamp malu, realmente apavora". Nel mesmu añu, Pitt coprotagonizó'l drama de Fox Glory Days, y interpretó un papel de repartu na película televisiva de HBO The Image. La so siguiente presentación foi na película de 1991 Across the Tracks, onde Pitt interpretó a Joe Maloney, un corredor d'escuela secundaria con un hermanu delincuente -Richy Schroder-.

Tres dellos años d'interpretar papeles de repartu y frecuentes apaiciones en televisión como convidáu, Pitt tuvo gran reconocencia pola so actuación na película de 1991 Thelma & Louise. Fizo de J.D., el noviu lladrón de Thelma -Geena Davis- y cuntóse la escena romántica con ella como'l momentu que definió a Pitt como sex symbol.

Dempués de Thelma & Louise aprució na película de 1991 Johnny Suede, un film de baxu presupuestu sobre un aspirante a estrella de rock, y llueu en Cool World de 1992, anque denguna de les dos contribuyó a la so carrera ya que nun recibieron reseñas favoratibles nin numberosos espectadores. Pitt fizo'l papel de Paul McLean na película biográfica de 1992 A River Runs Through It, dirixida por Robert Redford. De la so interpretación díxose qu'amosó que Pitt podía ser más que "un bon home con sombreru de cowboy", anque él admitió que se sintió aguyáu mientres el rodaxe. Pitt mentó que camentaba que yera una de les sos "actuaciones más sonces". Estrañóse de que terminara por ser una de les películes poles que recibió "muncha atención de los medios". Pitt cuidó que'l so progresu se debía a trabayar con actores tan bonos. Acomparó el trabayu con Redfor con xugar al tenis: "cuando xuegas con dalguién meyor que tú, entós la to forma de xugar meyora".

En 1993 Pitt trabayó otra vegada con Juliette Lewis na película Kalifornia. Ellí fizo d'Early Grace, un asesinu en serie y noviu del personaxe de Lewis. Sobre la so actuación, Peter Travers de la revista Rolling Ston dixo que camentaba que yera "sobresaliente". Pitt tamién encalcó nuna curtia apaición na película de cultu True Romance, onde interpretó al personaxe Floyd. Nesi mesmu añu ganó un premiu apurríu pola National Association of Theatre owners na estaya de "estrella masculina del mañana".

1994-1998: éxitu y aclamación del públicu editar

En 1994 Pitt fizo del vampiru Louis de Pointe du Lac na adautación cinematográfica de la novela d'Anne Rice Interview with the Vampire. El papel del vampiru del sieglu XVIII supunxo que Pitt pasara munches hores maquillándose pa tener la carauterística piel blanca aesgaya; amás tuvo qu'usar llentes de contautu verdes y caniles de vampiru pa completar el so aspeutu. Los sos ñeros de repartu incluyeron a Kirsten Dunst, Tom Cruise, Christian Slater y Antonio Banderas. Anque tuvo dos premios MTV Movie en 1995 pol papel, la so interpretación recibió crítiques negatives. Según Dallas Observer, "Brad Pitt ye una importante parte del problema".

En 1994, tres asoleyase Interview with the Vampire, Pitt protagonizó Legends of the Fall, una película allugada nes cuatro primeres décades del sieglu XX. L'actor fizo de Tristan Ludlow, fíu del coronel William Ludlow -Anthony Hopkins- y recibió la so primer nominación a los premios Globu d'Oru na estaya de "meyor actor". Aidan Quinn y Henry Thomas interpretaron a los hermanos del personaxe de Pitt. Anque la película anició opiniones polarizaes, munchos críticos emponderaron l'actuación de Pitt. Janet Maslin de New York Times afirmó que "la remestura diverxente d'actuación y actitú de Pitt funciona [faciendo] tal perfeición de robacorazones que ye una vergoña que la superficialidá de la película se cruce nel so camín". Al tiempu, Deseret News mentó que'l film postiaría la reputacón de Pitt como actor cimeru.

En 1995, Pitt protagonizó, xunta Morgan Freeman y Gwyneth Paltrow, el film de suspense Se7en, onde fai'l personaxe d'un detective qu'esquera a un asesinu en serie -interpretáu por Kevin Spacey-. L'actor dixo que yera una bona película y que'l papel espardiría los sos horizontes. Amás, espresó'l deseyu d'alloñase d'esta "cosa de "neñu guapu" y interpretar a "dalguién con defectos". La so actuación foi bien recibida pola crítica. Variety dixo que foi la meyor de Pitt y encalcó la so habilidá de coyer un "trabayu determináu, con determín y creíble" al protagonizar al detective. Se7en atropó 327 millones de dólares nes taquilles.

En 1995 Pitt tuvo un papel de repartu como Jeffrey Goines nel llargumetraxe de ciencia ficción 12 Monkeys, dirixida por Terry Gilliam. La película recibió, en xeneral, crítiques positives, y empónderose a Pitt en particular. Janet Maslin de New York Times calificó la so actuación como "intensa y perturbadora" y encalcó la "interpretación qu'alloria" de Pitt, pa rematar que "enllena a Jeffrey con un estrañu manetismu que lluegu se torna importante a lo llargo de la película". Ganó un Globu d'Oru al "meyor actor de repartu" por dicha película. Tamién recibió la so primer nominación al Óscar na mesma estaya.

Nel añu siguiente, tuvo un papel nel drama Sleepers basáu na novela homónima de Lorenzo Carcaterra. Tres el so estrenu, el film recibió crítiques estremaes. En 1997, Pitt trabayó xunta Harrison Ford, al facer d'un terrorista del IRA, Rory Devany en The Devil's Own, la primera de munches películes nes que Pitt utilizó un acentu irlandés. La opinión de la crítica tuvo dixebrada en cuantes a la so aproximación: San Francisco Chronicle escribió que "Pitt atopa'l tonu afayadizu d'ambigüedá moral, pero a vegaes el so acentu irlandés ye tan teal que ye abegosu atolenar lo que diz". Otra miente, una periodista de The Charleston Gazette cuntó que'l so acentu meyoraba mientres el trescursu de la película. Magar pañó 140 millones de dólares en tol mundu, recibió crítiques negatives. Esi mesmu añu tuvo'l papel cimeru, como l'alpinista austriacu Heinrich Harrer, na película de Jean-Jacques Annaud Seven Years in Tibet. Tuvo qu'entrenar mientres meses pa poder llevar a cabu'l papel, ya que supunxo un gran desafíu pol nivel d'alpinismu que se facía falta. Poro,esguiló en California y nos Alpes xunto con David Thewlis. Pola mor de la tema de nacionalismu tibetanu de la película, el gobiernu chinu prohibió-y a Pitt entrar nel país pa siempre. La película tuvo sobretoo crítiques negatives y consideróse una desilusión. En 1998, Pitt protagonizó la película Meet Joe Black, onde fizo de la Muerte, la cual aniaba nel cuerpu d'un mozu pa saber cómo yera ser humanu. La película dio-y a Pitt otra oportunidá de trabayar col actor galés Anthony Hopkins, con quien trabayara enantes en Legends of the Fall. La película recibió estremaes crítiques y a munchos nun-yos gustó la interpretación de Pitt. Según Mick LaSalle, de San Francisco Chronicle, Pitt nun foi quien a "facer creyer al públicu que conocía tolos secretos de la muerte y la eternidá.

1999-2003 reconocencia mundial editar

En 1999 foi Tyler Durden, un mozu intransixente y carismáticu en Fight Club, l'adautación cinematográfica de la novela homónima de Chuck Palahniuk, baxo la direición de David Fincher. Pa interpretar el papel, Pitt dio lleiciones de boxéu y taekwondo. Amás permitió que-y foran abayaes dalgunes pieces dentales frontales, que foron restauraes cuando remató la filmación. Mientres la promoción de Fight Club Pitt dixo que la fin de la película nun yera necesariamente treslladar les agresiones hacia otra persona, sinón "tener una esperiencia y poner a preba a ún mesmu". Fight Club estrenóse nel [[Festival Internacional de Cine de Venecia de 1999 y, magar tuvo crítiques de toda triba, la so actuación personal foi allabanciada. Paul Clinton, de CNN, encalcó la natura arriesgada pero exitosa de la película, mientres que los críticos de Variety mentaron la capacidá de Pitt pa ser "xenial y carismáticu" y dixeron que "escurque, foi quien a encalcar el so físicu de manera más dinámica que nel so clásicu papel en Thelma and Louise". Magar la recaudación na taquilla nun foi tan bona como s'esperaba, Fight Club convirtióse nuna Película de cultu dempués d'asoleyase en DVD nel añu 2000.

Nel añu 2000, dempués de Fight Club, Pitt interpretó a un boxeador xitanu irlandés d'acentu soncemente abegosu d'atolenar en Snatch, una película de gángsteres dirixida por Guy Ritchie. Dellos especialistes criticaron negativamente a Snatch, pero la mayoría encalcó la actuación de Pitt. Mick LaSalle, del San Francisco Chronicle, dixo que Pitt foi "el candidatu perfeutu pa interpretar a un irlandes con un acentu tan marcáu que nin siquiera los británicos son quienes a atolenalu", y añadió que, enantes de Snatch, "taba arreyao a papeles serios, pero recientemente pudo adaptase a papeles propios de la comedia negra y que necesiten estroversión". Pola so parte, Amy Taubin, de The Village Voice, dixo que "Pitt tuvo la so máxima espresión cómica nun papel d'una sola llinia d'humor".

Al añu siguiente, Pitt foi protagonista na comedia romántica The Mexican xunta Julia Roberts. La película recibió crítiques estremaes pero foi un éxitu na taquilla. El so siguiente papel foi en Spy Game, un thriller asitiáu na dómina de la Guera Fría, qu'atropó 143 millones de dólares. Pitt fizo de Tom Bishop, un operariu de la Estaya d'Actividaes Especiales de la CIA, cuyo tutor ye'l personaxe de Robert Redford. Los críticos esfrutaron de la película, anque-yos abultó que nin Pitt nin Redford amestaron "emocionalmente cola audiencia". El 22 de payares de 2001, Pitt participó como estrella convidada nun episodiu de la octava temporada de la serie televisiva Friends, onde interpretó a Will, un antiguu ñeru d'escuela de Rachel Green -Jennifer Aniston, so esposa nesi momentu-. Esta actuación valió-y una nominación a los premios Premios Primetime Emmy na estaya de "meyor estrella convidada nuna serie de comedia". N'avientu de 2001, Pitt interpretó a Rusty Ryan na película Ocean's Eleven (película de 2001O, un remake de la versión orixinal de 1960. Xunta él tuvieron dellos actores de primer nivel, como George Clooney, Matt Damon, Andy García y Julia Roberts. Emponderada pola crítica, Ocean's Eleven foi un éxitu en taquilla y pañó 450 millones de dólares en tol mundu.

En febreru de 2002, Pitt aprució en dos episodios de la serie cómica de MTV Jackass, onde corrió peles cais de Los Angeles con dellos ñeros disfrazáu de gorila, y organizó'l so propiu secuestru n'otru episodiu. Esi mesmu añu, Pitt tuvo un papel secundariu nel debut como direutor de George Clooney, Confessions of a Dangerous Mind. Fizo'l so primer trabayu como actor de voz en 2003, cuando emprestó la so voz al protagonista de la película animada de DreamWorks Sinbad: Legend of the Seven Seas, y, más sero, foi la voz de Patch Boomhauer nun episodiu de la serie animada King of the Hill.

Dempués de 2003 editar

Pitt tuvo dos papeles importantes en 2004 al interpretar a Aquiles en Troya, cuya trama ta basada na obra griega Ilíada. Amás fizo otra vegada de Rusty Ryan en Ocean's Twelve, la continuación d'Ocean's Eleven. Na producción de Troya, pa interpretar a Aquiles pasó seyes meses d'entrenamientu con espaes, y mancóse nel tendón d'Aquiles, polo que la producción s'atrasó delles selmanes. Con una pañadura mundial de 497 millones de dólares, Troya ye'l mayor éxitu de taquilla de Pitt en tola so trayeutoria como actor. En cuantes a les crítiques, Stephen Hunter de The Washington Times, mentó que Pitt foi quien a encalcar tovía con un papel esixente. Otra miente, Ocean's Twelve consiguió 362 millones de dolares en tol mundu, mientres que'l llabor de Pitt y Clooney foi camentada por Paul Clinton, de la cadena CNN, como "la meyor química masculina dende Paul Newman y Robert Redfor" refiriéndose a les películes Butch Cassidy and the Sundance Kid y The Sting.

En 2005, Pitt protagonizó la comedia d'aición Mr. y Mrs. Smith, dirixida por Doug Liman. Na película, una aburrida pareya descubre que dambos son asesinos a sueldu cuya misión ye matase l'ún al otro. Lo que más encalcó la crítica foi la química ente Pitt y Angelina Jolie, quien fizo de jane Smith, la esposa del personaxe de Pitt. Star Tribune definióla como "termonuclear". Mr. y Mrs. Smith atropó 478 millones de dólares en tol mundu y convirtióse nún de los mayores éxitos de 2005. El siguiente llargumetraxe protagonizáu por Pitt foi'l drama Babel, dirixida por Alejandro González Iñárritu y protagonizada tamién por Cate Blanchett, en 2006. L'actuación de Pitt gustó a la crítica. Más sero, l'actor dixo qu'aceptar esi papel fuera una de las mayores decisiones de la so carrera. La película estrenóse nuna presentación especial mientres el Festival Internacional de Cine de Cannes de 2006 y más sero nel Festival Internacional de Cine de Toronto el mesmu añu. Recibió siete nominaciones a los premios Óscar y Globu d'Oru, y tuvo'l Globu d'Oru a la "meyor película dramática"; pola so parte, Pitt tuvo nominao pal Globu d'Oru al "meyor actor de repartu".

En 2007, Pitt fizo por tercer vegada de Rusty Ryan n'Ocean's Thirteen. Anque nun recaudó tantes perres como les dos primeres películes, pañó 311 millones de dólares en tol mundu. El so siguiente papel cinematográficu foi nel drama western de 2007 The Assassination of Jeesse James by the Coward Robert Ford, adaptáu de la novela homónima de 1983 escrita por Ron Hansen, onde interpretó al afamáu bandidu Jesse James. Dirixida por Andrew Dominik y producida por Plan B, la compañía de Pitt, la película estrenóse nel Festival Internacional de Cine de Venecia de 2007. Según Lewis Beale del Film Journal International, Pitt fizo un papel "tenebrosu y carismáticu" y aportó-y la Copa Volpi nel mesmu festival. Anque l'actor asistió al festival pa promocionar la película, tuvo que marachar ceo tres sofrir un ataque d'un fanáticu que se-y averó ente los guardaespaldes. A la fin recibió'l premiu un añu más sero, nel festival de 2008.

La siguiente apaición de Pitt nel cine foi na comedia negra de 2008 Burn After Reading, la so primer collaboración colos hermanos Coen. La película gustó-y a los críticos: The Guardian describióla como "un campeón de boxeu: de movimientu rápidu, muncha actitú y col determín de dar un güelpe mortal en cuantes pueda", y encalcaron l'actuación de Pitt como una de les más sandungueres. Más sero, foi elixíu pa facer de Benjamin Button, el protagonista de la película de 2008 The Curious Case of Benjamin Button, dirixida por David Fincher. La película ye una versión soncemente adaptada del cuentu curtiu homónimu de 1921 escrito por F. Scott Fitzgerald. La historia trata sobre un home que naz vieyu y va remocicando según pasa'l tiempu, y, según Michael Sragow de The Baltimore Sun, l'actuación "sensata" de Pitt tornó a Benjamin Button nuna "obra mayestra ensin tiempu". Esti trabayu sirvió-y pa la so primer nominación a los Premios SAG, amás de la so cuarta nominación a los Globos d'Oru y la segunda a los Óscar, toos na estaya de "meyor actor". La película, pola so parte, recibió trece nominaciones a los premios Óscar y pañó 329 millones de dólares a nivel mundial.

Dende 2008, los trabayos de Pitt inclúin un papel protagonista en Inglourious Basterds, dirixida por Quentin Tarantino y estrenada n'agostu de 2009 nuna presentación especial mientres el Festival Internacional de Cine de Cannes de 2009. L'actor fizo de Teniente Aldo Raine, un lluchador norteamericanu de la resistencia escontra los nazis en Francia mientres la Segunda Guerra Mundial. La película foi otru éxitu en taquilla: consiguió 311 millones de dólares en tol mundu y les crítiques foron nan so mayoría positives. Inglourious Basterds recibió bien de premios y nominaciones, ente les que s'incluyeron ocho nominaciones a los Óscar y siete a los MTV Movie Awards, ente les que taba una nominación na estaya de Meyor actor pa Pitt. Foi la voz del superhéroe Metro Man nel llargumetraxe animáu de 2010 Megamind.

La próxima película de Pitt será'l drama de Terrence Malick The Tree of Life, protagonizáu xunta Sean Penn. Amás firmó un contratu pa facer el personaxe d'un esplorador británicu qu'esquera una misteriosa civilización amazónica en Lost City of Z, basada nel llibru homónimu de David Grann.

Vida personal editar

A fines de la década de 1980 y mientres la década de 1990, Pitt tuvo venceyao sentimentalmente con munches estrelles de cine, incluyendo a Robin Givens -de Head of the Class-, Jill Schoelen -de Cutting Class-, Juliette Lewis -de Too Young to Die? y Kalifornia-, quien con selce años yera diez años menor qu'él cuando entamaron a salir, y Gwyneth Paltrow -Se7en, con quien tuvo un compromisu con muncha repercusión nos medios. Pitt tamién salió coles actrices Sinitta y Thandie Newton.

Matrimoñu con Jennifer Aniston editar

Pitt conoció a l'actriz de Friends Jennifer Aniston en 1998 y casóse con ella nuna ceremonia privada en Malibú'l 29 de xunetu de 2000. La pareya seguróse de que'l casamientu sería priváu contratando a un cientu de guardias pa qu'allancaren cualesquier intentu d'invasión por parte de periodistes; namái una semeya foi asoleyada. Poco dempués del casamientu, Pitt demandó a la empresa Damiani International, quienes fixeren el so aniellu de boda, por vender répliques del so modelu de diseñu escluvivu, llamáu "Brad y Jennifer". Baxo l'alcuerdu algamáu en xineru de 2002, Pitt diseñaría xoyería pa Damiani y Aniston modelaríala, asina, la compañía dexaría de vender les copies.

Magar el matrimoñu foi considerau mientres años como un éxitu en Hollywood, entamó a haber rumores de problemes nel matrimoñu, y Pitt dio anuncia de la dixebra'l 7 de xineru de 2005. Mientres el matrimoñu de Pitt y Aniston sumía, él y l'actriz Angelina Jolie principiaron a vese venceyaos nun tracamundiu mediáticu nel que Jolie yera davezu nomada como "la otra muyer", de resultes del so trabayu en Mr. & Mrs. Smith. Ente Jolie y Pitt refugaben les acusaciones d'adulteriu, les espiculaciones continuaron mientres 2004 y 2005. Nuna entrevista con Ann Curry en xunu de 2005, Jolie desplicaba: "nun me perdonaría tar con un home casáu, cuando mio pá engañó a mio ma. Nun podría mirame al espeyu cada mañana si fixera eso. Nun me gustaría un home que fuera quien a engañar a la so esposa".

Nel entamu de 2005, el conceptu de "matrimoñu con problemes" inspiró a Pitt a acomuñar col fotógrafu Steven Klein pa una sesión de semeyes entitulada "Felicidá doméstica" pa la revista W. Les tomes amosaben a Pitt y a Jolie como una pareya casada con fíos, ambientaos en 1963. Pitt espresó'l so deseyu d'amosar la realidá d'una manera más evidente y dura, pero amosando a una pareya feliz. "Nun sabes qué ye lo que ta mal", dixo, "porque'l matrimoñu ye cenciellamente dalgo polo que firmaste". Pola so parte, Aniston, más sero, mentó la toma de semeyes como la evidencia de que "la so conciencia y la so sensibilidá desapaecieran". Aniston firmó'l divorciu'l 25 de marzu de 2005, que remató'l 2 d'ochobre del mesmu añu na Corte Superior de Los Angeles. Magar los comentarios de la prensa que cuiden que Pitt y Aniston lleven una rellación negativa, nuna entrevista de febreru de 2009, l'actor dixo que nun ye asina, añediendo que dambos costitúin una gran parte na vida del otro.

Rellación con Angelina Jolie y fíos editar

 
Brad Pitt con Angelina Jolie.

Un més dempués de qu'Anistón firmó'l divorciu, n'abril de 2005, aprució nos medios una serie de semeyes que confirmó los rumores d'una rellación ente Brad Pitt y l'actriz Angelina Jolie. Les semeyes, que foren vendíes en 500000 dólares, amuesen a Pitt Jolie y a so fíu Maddox nuna playa en Kenia. Mientres el branu la pareya foi vista xunta cada vegada con más frecuencia, y la prensa entamó a llamala "Brangelina". Dos meses más sero, en xunetu, asoleyó un artículu mui divulgáu, onde s'amosó a Pitt y a Jolie posando como pareya.

En xunetu de 2005, Pitt acompañó a Jolie a Etiopía onde ella adoptó a so segunda fía, una neña de seyes meses llamada Zahara; más sero Jolie dixo qu'ella y Pitt tomaren xuntos la decisión d'adoptala. N'avientu de 2005, confirmóse que Pitt taba tratando d'adoptar llegalmente a los dos fíos de Jolie, y per aciu de los requisitos llegales, nos anuncios clasificaos nel periódicu de Los Angeles Daily Commerce, diose anuncia del pidimentu de cambio d'apellíu. El 19 de xineru de 2006, un xuez de Califorña aprobó'l pidimentu, y los apellíos llegales de los neños foron camudaos formalmente a "Jolie-Pitt".

El 11 de xineru de 2006, Jolie confirmó a la revista People que taba embarazada. El 27 de mayu de 2006, Jolie dio a lluz a so fía, Shiloh Nouvel Jolie-Pitt en Swakopmund, Namibia, por cesárea. Pitt confirmó que so fía tendría pasaporte namibiu y Jolie decidió ufrir les primeres semeyes de Shiloh al traviés del distibuidor Getty Images, enverde permiti-y a los periodistes vender semeyes clandestines a precios mui altos. People pagó más de 4,1 millones de dólares polos derechos n'Estaos Xuníos, mientres que la revista británica Hello! tuvo los derechos internacionales por aproximadamente 3,5 millones de dólares; los derechos totales algamaron un total de 10 millones en tol mundu, tornándose na imaxe d'un afamáu más cara de la historia. Toles ganancies foron donaes a una organización de caridá por Jolie y Pitt. Madame Tussauds en Nueva York anició una figura de cera de Shiloh, de dos meses d'edá; foi la primer neña en ser semeyada en cera por esti muséu. N'ochobre del mesmu añu, mientres una entrevista con Esquire, Pitt afirmó que se casaría con Jolie cuando toos n'Estaos Xuníos pudieren facelo de manera llegal.

El 15 de marzu de 2007, Jolie adoptó un neñu de trés años d'edá de Vietnam, Pax Thien Jolie-Pitt. Pola mor de que l'orfanatu nun dexaba adoptar a pareya que nun tuvieran casaes, Jolie adoptó a Pax como ma soltera y Pitt lluegu adoptó al neñu como so fíu n'Estaos Xuníos.

Tres que n'entrevistes y artículos nos medios internacionales s'encamentó que Jolie tuviera embarazada otra vegada, l'actriz foi a la entrega de los premios Independent Spirit con un vistíu aferíu, confirmando indireutamente los rumores. People asoleyó un artículu nel que se confirmó l'embarazu. En mayu de 2008, Jolie confirmó nel programa Today qu'esperaben ximielgos. El 12 de xunetu de 2008 Pitt tornóse en pá otra vegada, d'una neña llamada Vivienne Marcheline y un neñu llamáu Knox Léon. Amás, aidó na cesárea y el mélicu qu'atendió a l'actriz, Michael Sussman, dixo que "Brad Pitt tuvo mui emocionáu mientres l'allumamientu". En febreru de 2010, Pitt y Jolie demandaron a la publicación sensacionalista británica News of the World por difundur que la pareya se taba dixebrando.

Vida en Nueva Orleans editar

La familia dixebra'l tiempu ente Los Angeles y Nueva Orleans. Nuna entrevista con The Times-Picayune, ente se filmaba The Curious Case of Benjamin Button, Pitt dixo: "nun soi quien a saber porqué se nos dexa vivir una vida tan normal -en Nueva Orleans-. Vivir nel French Quarter ye mui bonu pa nós. Tenemos un aniciu de lo que ye una verdadera vida familiar. La xente foi mui, mui amable con nós. Si tamos nel muelle de nueso, la xente pasa por ellí y díznos "hola". Llueu siguen el so camín". En marzu de 2009, cuando l'actor se vio col presidente Barack Obama pa coordinar un proyeutu venceyáu cola recostrucción de la ciudá, espardióse l'anuncia de que Brad Pitt ye'l primu novenu del presidente. Dambos tan emparentaos per aciu d'un antepasáu llamáu Edwin Hickman, un policía del estáu de Virxinia que finó en 1769.

Filmografía editar

Actor editar

Actor
Añu Película Papel Notes
1987 No Way Out Oficial na folixa
1987 No Man's Land Taberneru
1987 Less Than Zero Convidáu
1987 Growing Pains Jeff Serie de televisión (dos episodios: Who's Zoomin' Who?" y "Feet of Clay" 1989)
1987 Dallas Randy Serie de televisión (cuatro episodios)
1988 21 Jump Street Peter Serie de televisión (un episodiu: "Best Years of Your Life")
1987 Happy Together Brian
1987 Cutting Class Dwight Ingalls
1987 Head of the Class Chuck Serie de televisión (un episodiu: "Partners")
1987 Freddy's Nightmares Rick Austin Serie de televisión (un episodiu: "Black Tickets")
1990 The Image Cameraman Película de televisión
1990 Too Young to Die? Billy Canton Película de televisión
1990 Glory Days Walker Lovejoy Serie de televisión (seyes episodios)
1991 Across the Tracks Joe Maloney
1991 Thelma & Louise J.D.
1991 Johnny Suede Johnny Suede
1992 Contact Cox
1992 Cool World Detective Frank Harris
1992 A River Runs Through It Paul Maclean
1993 Kalifornia Early Grayce
1993 True Romance Floyd
1994 The Favor Elliott Fowler
1994 Interview with the Vampire Louis de Pointe du Lac
1994 Legends of the Fall Tristan Ludlow
1995 Seven David Mills
1995 12 Monkeys Jeffrey Goines
1996 Sleepers Michael Sullivan
1997 The Devil's Own Francis "Frankie" Austin McQuire/Rory Devaney
1997 Seven Years in Tibet Heinrich Harrer
1997 The Dark Side of the Sun Rick
1998 Meet Joe Black Joe Black/Home na Tienda de Café
1999 Fight Club Tyler Durden
1999 Being John Malkovich Él mesmu
2000 Snatch Mickey O'Neil
2001 The Mexican Jerry Welbach
2001 Spy Game Tom Bishop
2001 Ocean's Eleven Rusty Ryan
2001 Friends Will Colbert Serie de televisión (un episodiu: "The One with the Rumor")
2002 Full Frontal Él mesmu
2002 Confessions of a Dangerous Mind Brad, Solteru #1
2003 Sinbad: Legend of the Seven Seas Sinbad Voz
2003 Abby Singer Él mesmu Apaición
2004 Troya Aquiles
2004 Ocean's Twelve Rusty Ryan
2005 Mr. & Mrs. Smith John Smith
2006 Babel Richard
2007 Ocean's Thirteen Rusty Ryan
2007 The Assassination of Jesse James By The Coward Robert Ford Jesse James
2008 Burn After Reading Chad Feldheimer
2008 The Curious Case of Benjamin Button Benjamin Button
2009 Inglourious Basterds Lt. Aldo Raine
2010 Megamind Metro-Man
2011 The Tree of Life Sr. O'Brien
2011 Moneyball Billy Beane En filmación
2012 World War Z Max Brooks En filmación
2012 The tiger
2012 Cogan's Trade Jackie Cogan
2014 Voyage of Time él mesmu (narración) Documental

Productor editar

Añu Película Notas
2006 God Grew Tired of Us Productor executivu
2006 The Departed
2006 Running with Scissors
2007 The Tehuacan Project Productor ejecutivo
2007 Year of the Dog Productor ejecutivo
2007 A Mighty Heart Co-productor
2007 The Assassination of Jesse James by the Coward Robert Ford
2008 Pretty/Handsome Productor executivu (TV)
2009 The Time Traveler's Wife
2009 The Private Lives of Pippa Lee Productor executivu
2010 Kick-Ass
2010 Eat Pray Love
2011 The Tree of Life
2012 World War Z

Referencies editar

  1. URL de la referencia: https://www.okhistory.org/publications/enc/entry?entry=PI014.
  2. Afirmao en: Gemeinsame Normdatei. Data de consulta: 9 abril 2010. Llingua de la obra o nome: alemán. Autor: Biblioteca Nacional d'Alemaña.
  3. «LIBRIS» (26 marzu 2018). Consultáu'l 24 agostu 2018.
  4. Biblioteca Nacional de Francia. «autoridaes BNF» (francés). Consultáu'l 10 ochobre 2015.
  5. URL de la referencia: https://content.time.com/time/specials/2007/time100/article/0,28804,1595326_1595332_1616809,00.html.
  6. URL de la referencia: https://content.time.com/time/specials/2007/article/0,28804,1733748_1733756_1735278,00.html.
  7. URL de la referencia: https://www.europeanfilmacademy.org/2010.137.0.html. Direición web d'archivu: https://web.archive.org/web/20160828084904/http://www.europeanfilmacademy.org/2010.137.0.html. Data de consulta: 10 xineru 2020.
  8. «92ND OSCARS® NOMINATIONS ANNOUNCED | Oscars.org | Academy of Motion Picture Arts and Sciences» (inglés) (13 xineru 2020). Consultáu'l 15 marzu 2023.
  9. URL de la referencia: https://www.vanityfair.fr/ecrans/article/golden-globes-2023-palmares-complet.

Enllaces esternos editar