Península Ibérica

(Redirixío dende Península ibérica)

La Península Ibérica[1] ye una península asitiada al suroeste del continente européu. El so territoriu divídese principalmente ente España y Portugal, magar que tamién inclúi Andorra, una pequeña parte de territoriu francés nel so estremu nororiental y la pequeña península de Xibraltar, que pertenez al Reinu Xuníu. Con una estensión d'alredor de 582.000 km², ye, tres de la Península Escandinava, la segunda mayor del continente européu.

Península Ibérica
Situación
Tipu península
Asitiáu en Océanu Atlánticu
Coordenaes 40°14′24″N 4°14′21″W / 40.24°N 4.2392°O / 40.24; -4.2392
Península Ibérica alcuéntrase n'España
Península Ibérica
Península Ibérica
Península Ibérica (España)
Datos
Puntu más altu Mulhacén
Superficie 596 740 km²
Cambiar los datos en Wikidata

Toponimia editar

 
Mapa d'Europa, incluyendo Iberia, acordies cola Geographica d'Estrabón.

Los xeógrafos de l'Antigua Grecia usaron, yá en tiempos de l'Imperiu romanu, la pallabra griega Ἰβηρία (Iberia) pa referise a la Península Ibérica[2]. Nesta dómina el nome nun describía una entidá política única nin a un solu pueblu; la Iberia d'Estrabón taba separtada de la Galia pelos Pirineos[3], y comprendía a la masa de tierra asitiada al suroeste (al oeste, decía elli) d'esa cordelera[4].

Los antiguos griegos aportaron a la península, de la que tuvieran noticia polos fenicios,viaxando hacia l'oeste pol mar Mediterraneu[5]. Hecateu de Mileto ye'l primer autor conocíu qu'usara'l términu "Iberia", alredor del añu 540 e.C.[6]Herodotu dixo de los foceos que "ellos foron los que ficieron a los griegos familiarizase con Iberia", y, acordies con Estrabón[7] los historiadores antiguos usaben el nome "Iberia" pa referise al país de los íberos hasta'l cursu del ríu Garona (Francia), pero na so época usaben yá los Pirineos como llende. Polibiu coincide con elli, pero identifica Iberia cola fastera mediterránea de la península, hasta Xibraltar, y nun da nome dengunu a la fastera atlántica[8]. Notru llugar de la so obra diz que Sagunto ta "a la vera la mar, al final de la cordelera que coneuta Iberia y Celtiberia".

Les fontes antigües, neto en llatín qu'en griegu, usaben Hispania ya Hiberia (Iberia en griegu) como sinónimos. La confusión derívase del solapamientu de dos perspectives, la xeográfica y la política. La pallabra llatina Hiberia, asemeyada a la griega Iberia, significa testualmente "la tierra los íberos", y deriva del ríu Ebro, nomáu Hiberus polos romanos. El mesmu términu, Hiber, usábase pa referise a los pueblos que vivíen na rodiada d'esi ríu[9]. La primer mención a esta pallabra na lliteratura llatina remóntase a una obra del poeta Ennio del añu 200 e.C.[10]. Los xeógrafos y escritores romanos llamen a la península Hispania dende'l final de la dómina de la república.

Cuando Roma entamó a tener interés políticu nos territorios que foran del Imperiu cartaxinés, entamó a estremase ente la Hispania Citerior y la Hispania Ulterior. Tres de la división provincial de la península Estrabón diz[11] que los romanos usen Hispania ya Iberia como sinónimos, faciendo la distinción ente la citerior (cercana), qu'inclúi la so fastera septentrional, y la ulterior (llonxana), formada poles provincies meridionales.

Xeografía y xeoloxía editar

La Península Ibérica ye la más occidental de les trés principales penínsules europees (Ibérica, Itálica y Balcánica). Ta arrodiada al este y sureste pol mar Mediterraneu, y al norte, oeste y suroeste pol océanu Atlánticu. El so estremu nororiental, pol que se xune col restu d'Europa, ocúpalo la cordelera de los Pirineos. El so estremu más meridional ta peraveráu a la costa noroccidental d'África, separtáu d'ella namái pol estrechu de Xibraltar y el mar Mediterraneu.

El so estremu más meridional ye la punta de Tarifa (36°00′15″N 5°36′37″W / 36.00417°N 5.61028°O / 36.00417; -5.61028), y el más septentrional el cabu d'Estaca de Bares (43°47′38″N 7°41′17″W / 43.79389°N 7.68806°O / 43.79389; -7.68806); estos tán separtaos por una distancia, midida en llinies de llatitú, d'unos 865 km. El so estremu más occidental ye'l cabu de la Roca (38°46′51″N 9°29′54″W / 38.78083°N 9.49833°O / 38.78083; -9.49833), y el más oriental el cabu de Creus (42°19′09″N 3°19′19″E / 42.31917°N 3.32194°E / 42.31917; 3.32194); ente ellos hai una distancia, midida en llinies de llonxitú, de 1.155 km. La forma, básicamente octogonal anque irregular, comprendida ente estos cuatro estremos foi comparada, pol xeógrafu Estrabón, con una piel de toru[12].

Casi trés cuartes partes d'esti octógonu ocúpelas la Meseta Central, una gran meseta asitiada ente los 610 y los 760 m d'altor[13]. Asítiase aproximadamente nel centru de la Península, llixeramente escalonada hacia l'este y llixeramente inclinada hacia l'oeste. Ta arrodiada por cordeleres montañoses que son orixe de la mayoría de los ríos peninsulares, que van alcontrando la so salida a la mar al traviés de pasos que crucien les cadenes montañoses en toles direiciones.

Costa editar

La llinia costera de la Península Ibérica mide 3.313 km, 1.660 km na fastera mediterránea y 1.653 km na atlántica[nota 1]. La costa actual tuvo inundada a lo llargo del tiempu; el so altor mínimu, unos 115-120 m menor del actual, alcanzólu demientres l'Últimu Máximu Glacial (26.500 AP), y llegó al so nivel actual nel 4.000 AP[14]. La plataforma costera creada pola sedimentación a lo llargo d'esi tiempu permanece sumerxida, magar que, na fastera atlántica, nunca nun foi mui ancha, una y bones la plataforma continental fúndese a gran fondura cerca de la costa peninsular.

La topografía submarina de les agües costeres de la Península Ibérica conozse en detalle como resultáu de les prospecciones realizaes pa tentar d'atopar petroleu. Gracies a elles sabemos que la plataforma fúndese nuna sima abisal, el golfu de Vizcaya, al norte, na llanura abisal ibérica (4.800 m de fondura) al oeste, y na llanura abisal del Tajo al sur. Al norte, ente la plataforma continental y la sima atlántica, alcuéntrase una estensión nomada bancu de Galicia, una meseta qu'inclúi les cordeleres submarines de Porto, Vigo y Vasco da Gama, que formen la cuenca interior gallega. La llende meridional d'estes formaciones del relieve márcala'l cañón de Nazaré, que fiende la plataforma continental y da pasu a la sima abisal.

 
Ríos de la Península Ibérica.

Ríos editar

Los principales ríos de la Península Ibérica (Ebro, Duero, Tajo, Guadiana y Guadalquivir) cuerren al traviés de valles anchos asitiaos ente los sistemes montañosos de la península y toos ellos presenten variaciones importantes de caudal según la estación del añu.

El más llargu ye'l Tajo, que va, como'l Duero, en direición oeste al traviés de la península, llegando al mar dambos en tierres de Portugal. El Guadiana curre na mesma direición, pero nel últimu tramu del so cursu xira hacia'l sur y forma la llende ente España y Portugal .

Montes editar

 
Principales unidaes xeolóxiques de la Península Ibérica.

El territoriu de la Península Ibérica ye mayoritariamente montún. Los principales sistemes montañosos de so son:

  • Los Pirineos y les cordeleres menores que los arrodien, nomaos Prepirineu, qu'ocupen completamente l'istmu de la península. El picu Aneto, nel macizu de la Maladeta, ye, colos sos 3.404 m d'altor, el so puntu cimeru.
  • La Cordelera Cantábrica, paralela a la costa septentrional de la península. El so macizu más importante son los picos d'Europa, y el so picu más altu ye La Torre Cerréu, con 2.648 m d'altor.
  • El Macizu Galaicu, nel estremu noroccidental, que ta formáu por roques pervieyes pererosionaes[15]. El so puntu cimeru ye la peña Trevinca, de 2.127 m d'altor.
  • El Sistema Ibéricu, un sistema montañosu complexu, ocupa la rexón centruoriental peninsular. Compriende un gran númberu de cordeleres, y divide les conques de los ríos Tajo, Duero y Ebro. El so puntu cimeru ye'l picu Moncayo, de 2.313 m d'altor.
  • El Sistema Central, que divide la Meseta Central en dos somesetes, septentrional y meridional. El so puntu cimeru ye'l picu Almanzor, na sierra de Gredos, de 2.592 m d'altor, ya inclúi tamién el mayor cumal del territoriu continental de Portugal, na serra da Estrela (1.993 m).
  • Los Montes de Toledo, na someseta sur, que dende la rexón de La Mancha al este estiéndese hacia l'oeste penetrando en territoriu portugués. El so puntu cimeru ye'l picu La Villuerca, na sierra de Guadalupe (Estremadura, España), que mide 1.603 m.
  • Sierra Morena, una cordelera que divide les conques fluviales de los ríos Guadiana y Guadalquivir. El so puntu cimeru ye'l picu Bañuela, de 1.332 m d'altor.
  • El Sistema Béticu, que s'estiende dende Cádiz y Xibraltar en direición noreste hacia la provincia d'Alicante. Ta sodividíu en trés sosistemes:
    • Sistema Prebéticu, qu'entama al oeste de la sierra Sur de Xaén y llega a la costa mediterránea na provincia d'Alicante. El picu La Sagra, a 2.382 m sobro'l nivel de la mar, ye'l so puntu cimeru.
    • Sistema Subbéticu, qu'ocupa una posición central, ente l'anterior y el Penibéticu, y que s'estiende dende'l cabu Trafalgar, na provincia de Cádiz, hasta la Rexón de Murcia. El so puntu cimeru ye la peña de la Cruz, na Sierra Arana.
    • Sistema Penibéticu, asitiáu na fastera más suroriental del territoriu del Sistema Béticu, y que s'estiende dende Xibraltar hacia oriente, averáu a la costa mediterránea andaluza. Inclúi el puntu más altu de la península, el picu Mulhacén, de 3.478 m d'altor, asitiáu na Sierra Nevada.

Xeoloxía editar

Na Península Ibérica alcuéntrense roques de tolos periodos xeolóxicos, dende l'Ediacáricu hasta l'Holocenu, y pueden atopase nella práuticamente tolos tipos de roques qu'esisten. El nucleu de la península fórmalu un bloque cratón hercinianu conocíu como Macizu Ibéricu. Esti ta arrodiáu, al noreste, pol cinturón pirenaicu, y al sureste pol Sistema Béticu; dambes cadenes montañoses pertenecen al cinturón alpín. Al oeste la península ta delimitada pola llende continental formada pol abismu que se forma, más al oeste del cañón de Nazaré, nel océanu Atlánticu. El bloque hercinianu ta tapáu, hacia l'este peninsular, por roques del Mesozoicu y el Terciariu, magar qu'aflora nel Sistema Ibéricu y nes Cordeleres Costeres Catalanes.

Clima editar

Na Península Ibérica predominen dos tipos climáticos. La rexón costera atlántica tien un clima oceánicu, con temperatures bastante uniformes a lo llargo l'añu y branos frescos. El restu la península, por embargu, tien clima mediterraneu, con rangos de temperatura y lluvia pervariables en función de la llatitú y la distancia al mar. Hai, inclusive, llugares de la zona central d'España que tienen un clima semiáridu, con temperatures propies d'un clima mediterraneu continental. Hai, tamién, zones concretes de la península con otros climes: l'alpín en, por exemplu, Sierra Nevada, y el desérticu y semiáridu en zones de les provincies d'Almería[16], Murcia y Alicante.

Nel interior de la península alcáncense les temperatures más altes d'Europa, con una media de temperatura máxima diurna, na ciudá de Córdoba, de cásique 37°C en xunetu[17], y valores perriba de los 30º de media en toa la costa mediterránea. Nel estremu contrariu alcontramos, na fastera noroccidental de la península, la ciudá d'A Coruña, con una temperatura media diurna nel branu d'alredor de 23ºC[18]. Esti patrón de branos frescos y húmidos aparez en tola fachada septentrional peninsular.

Les temperatures n'iviernu siguen un patrón más constante en tol territoriu, y magar que son frecuentes les xelaes nel interior d'España, polo xeneral les temperatures diurnes máximes suelen tar perriba de los 0ºC. No que cinca a Portugal, los iviernos más caldios son los del Algarve, con temperatures mui asemeyaes a les de la provincia de Huelva, pero la mayoría de la fastera costera tien iviernos frescos y húmidos, asemeyaos a los de Galicia.

Temperatures medies de les seis mayores árees urbanes de la Península Ibérica[19][20]
Ciudá Mes más fríu Abril Mes más caldiu Ochobre
Madrid 9.8 °C (49.6 °F)
2.7 °C (36.9 °F)
18.2 °C (64.8 °F)
7.7 °C (45.9 °F)
32.1 °C (89.8 °F)
19.0 °C (66.2 °F)
19.4 °C (66.9 °F)
10.7 °C (51.3 °F)
Barcelona 14.8 °C (58.6 °F)
8.8 °C (47.8 °F)
19.1 °C (66.4 °F)
12.5 °C (54.5 °F)
29.0 °C (84.2 °F)
23.1 °C (73.6 °F)
22.5 °C (72.5 °F)
16.5 °C (61.7 °F)
Valencia 16.4 °C (61.5 °F)
7.1 °C (44.8 °F)
20.8 °C (69.4 °F)
11.5 °C (52.7 °F)
30.2 °C (86.4 °F)
21.9 °C (71.4 °F)
24.4 °C (75.9 °F)
15.2 °C (59.4 °F)
Sevilla 16.0 °C (60.8 °F)
5.7 °C (42.3 °F)
23.4 °C (74.1 °F)
11.1 °C (52.0 °F)
36.0 °C (96.8 °F)
20.3 °C (68.5 °F)
26.0 °C (78.8 °F)
14.4 °C (57.9 °F)
Lisboa 14.8 °C (58.6 °F)
8.3 °C (46.9 °F)
19.8 °C (67.6 °F)
11.9 °C (53.4 °F)
28.3 °C (82.9 °F)
18.6 °C (65.5 °F)
22.5 °C (72.5 °F)
15.1 °C (59.2 °F)
Porto 13.8 °C (56.8 °F)
5.2 °C (41.4 °F)
18.1 °C (64.6 °F)
9.1 °C (48.4 °F)
25.7 °C (78.3 °F)
15.9 °C (60.6 °F)
20.7 °C (69.3 °F)
12.2 °C (54.0 °F)

Prehistoria de la Península Ibérica editar

 
Cráneu (incompletu) d'un homínidu. Xacimientu d'Atapuerca (Burgos).

Paleolíticu editar

La Península Ibérica lleva habitada polo menos 1,2 millones d'años, como lo demuestren los restos alcontraos nos xacimientos de la Sierra d'Atapuerca. Ente ellos tenemos la cueva nomada Gran Dolina, na que s'alcontraron en 1994 seis esqueletos humanos d'ente 780.000 y un millón d'años d'antigüedá. Discútese entá de qué especie d'homínidu yeren: Homo erectus, Homo heidelbergensis o una especie nueva afayada ellí por primer vegada a la que los sos descubridores nomaron Homo antecessor.

L'Homo neanderthalensis aportó a la península demientres el Paleolíticu inferior, hai unos 200.000 años. Más tarde, alredor del 70.000 AP, na etapa conocida como Paleolíticu mediu, entamó la cabera glaciación, y con ella la cultura musteriense; siguiola otra cultura neanderthal, la chatelperroniense, qu'apaez alredor del 37.000 AP, demientres el Paleolíticu cimeru. Esta cultura, que surdió nel sur de Francia, esistió hasta'l 30.000 AP, cuando desapaeció xunto cola especie que la desarrolló, l'home de Neanderthal.

Hai alredor de 40.000 años l'home modernu aportó a la Península Ibérica dende'l sur de Francia[21], y de magar hasta'l final del Paleolíticu cimeru desarrolló una serie de cultures: auriñaciense, gravetiense, solutrense y magdaleniense.

Neolíticu editar

La península foi l'escenariu, demientres el Neolíticu, de l'apaición y desarrollo de delles cultures megalítiques. Na fastera oriental de la península, por exemplu, vese la influyencia de la cultura de pueblos navegantes del Mediterraneu oriental, la cultura cardial, dende quiciás el V Mileniu e.C. Dellos autores rellacionan a estos pueblos cola apaición posterior de la civilización ibérica.

Calcolíticu editar

El Calcolíticu (c. 3000 e.C.) ye'l momentu d'apaición d'una serie de cultures complexes que han dar llugar a les primeres civilizaciones d'esti entornu xeográficu, y tamién a la de redes perestenses d'intercambios comerciales que traen y lleven oxetos y bienes de la península al norte d'África y a llugares tan alloñaos como Oriente Mediu o les riberes del mar Bálticu. Alredor del añu 2800 e.C. la Cultura del vasu campaniforme, orixinada probablemente nes comunidaes asitiaes na desembocadura del ríu Tajo (Portugal), espardióse dende ellí a delles partes de la Europa occidental[22]

 
La península nel Bronce tardíu (c. 1300 e.C.).

Edá del Bronce editar

Les cultures de la Edá del Bronce entamaron a aparecer c. 1800 e.C., siendo les primeres d'elles les civilizaciones de Los Millares y, posteriormente, la d'El Argar. Dende esti centru, na provincia española d'Almería, la teunoloxía de fabricación del bronce espardióse a otres cultures: les cultures del bronce del Llevante y suroccidental, y la cultura de Las Cogotas (Ávila). Nel Bronce tardíu desarrollose, na fastera occidental d'Andalucía, la civilización urbana de Tartessos, d'influencia fenicia y qu'utilizaba un sistema d'escritura propiu pa la so llingua, el tartesiu, non emparentada llingüísticamente col íberu.

A entamos del I Mileniu e.C. hebo varies foles migratories de preceltes y celtes dende Europa central. Ello camudó parcialmente'l paisaxe étnicu y llingüísticu de la Península. Na fastera noroccidental de la península (norte de Portugal, Asturies y Galicia) desarrollose una cultura celta, la cultura castreña, que construyó delles ciudaes y munchos poblaos (castros) fortificaos.

Edá del Fierro editar

La Edá del Fierro, qu'entamó nel sieglu VII e.C., foi la dómina del desarrollu, na península, de delles civilizaciones agraries y urbanes: delles, como los lusitanos, celtíberos, galaicos, astures o célticos, precéltiques o céltiques, na fastera noroccidental; otres, nes fasteres oriental y meridional, íberes; y otres, de llingua aquitana, na parte más occidental de los Pirineos.

Les costes mediterránees foron llugar d'asentamientu de colonies comerciales demientres varios sieglos: primero de los fenicios, y dempués de los griegos y los cartaxineses. Alredor del 1100 e.C. mercaderes fenicios fundaron la colonia de Gadir o Gades (actual Cádiz). Nel sieglu VIII e.C. les primeres colonies griegues, como la d'Emporion (actual Empúries (Girona)), foron siendo fundaes na fastera oriental de la península, dexando asina la meridional en manes de los fenicios. Los griegos seríen los qu'inventaran el nome Iberia a partir del del ríu Iber (Ebro). Nel sieglu VI e.C. los cartaxineses, metanes la so llucha colos griegos por facese col control del Mediterraneu occidental, aportaron a la península; la so principal colonia había ser Cartago Nova (actual Cartagena).

Historia de la Península Ibérica editar

Dominiu romanu editar

 
Cronoloxía de la ocupación romana de la Península.

Nel añu 218 e.C., demientres la Segunda Guerra Púnica que los enfrentó colos cartaxineses, los primeros soldaos romanos aportaron a la Península Ibérica. Sicasí, nun había ser hasta'l reináu de César Augustu cuando'l so territoriu, dempués de dos sieglos de llucha escontra les tribus celtes ya íberes natives y escontra los griegos, los fenicios y los cartaxineses, que controlaben delles partes de la península, convirtióse de vez en territoriu romanu. De resultes de les socesives conquistes creáronse, a finales de la república, les provincies d'Hispania Citerior ya Hispania Ulterior, que dieron pasu, ya en tiempos del imperiu, a les d'Hispania Tarraconensis (nel noreste), Hispania Baetica (nel sur) y Lusitania (nel suroeste).

Hispania aportó-y al imperiu plata, alimentos, aceite d'oliva, vinu y metales, pero tamién dellos de los sos personaxes más ilustres: los emperadores Traxanu, Adrianu, Marcu Aureliu y Teodosiu I, amás del filósofu Séneca y los poetes Marcial y Lucanu, nacieron nel territoriu de la Península Ibérica.

Reinos xermánicos editar

 
La Península nel añu 560.

A entamos del sieglu V dellos pueblos xermánicos, los suevos, los vándalos (silingos y asdingos) y los alanos, invadieron la península. Namái el reinu suevu perduraría tres de la llegada de la siguiente fola d'invasores xermánicos, los visigodos, qu'ocuparon la península y espulsaron o integraron a los vándalos y los alanos. Tres de la conquista del reinu suevu y la so capital Braccara (anguaño Braga), en 584-585, y de la conquista de la provincia bizantina de Spania, que comprendía les islles Baleares y el sur peninsular, la península entera tuvo embaxu'l so dominiu.

El califatu islámicu editar

 
La Península nel añu 1000.

En 711 un exércitu musulmán invadió'l reinu visigodu. L'exércitu islámicu, mandáu por Tariq ibn Ziyad, desembarcó en Xibraltar y, en ocho años, ocupó tol territoriu peninsular sacante la so fastera más septentrional. Al-Ándalus (n'árabe: الإندلس‎, al-ʾAndalūs, quiciás "la tierra los vándalos")[23] ye'l nome que-y dieron los sos ocupantes árabes y bereberes al territoriu peninsular.

Ente los sieglos VIII-XV los territorios ocupaos por Tariq formaron parte del mundu islámicu, y foron, especialmente demientres la dómina del califatu de Córdoba, un centru cultural de primer orde, col so cumal demientres el reináu d'Abderramán III. Los musulmanes, les xentes a les que los cristianos nomaben en conxuntu moros, yeren non solo árabes y bereberes, sinón tamién habitantes nativos de la Península que tuvieran convirtióse al Islam y que recibíen el nome de muladíes. Los moros tuvieron que facer frente, dende mui ceo, al naciente reinu d'Asturies, qu'entamó a formase en 718 y qu'emburrió a los musulmanes hacia'l sur nos sieglos siguientes.

La Reconquista editar

Munchos de los nobles visigodos espulsaos de les sos tierres polos musulmanes alcontraron abellugu nel reinu d'Asturies, formáu perpocos años dempués de la llegada de los musulmanes. Dende ellí entamaron el procesu d'espansión territorial que xustificaron como llucha de relixón pa recuperar les sos tierres de manes de los "infieles" musulmanes, dando llugar al procesu conocíu de magar como Reconquista. Sicasí, y pesie al so calter teóricu de guerra de relixón, los reinos cristianos y musulmanes llucharon y aliáronse unos escontra otros delles vegaes, ensin importá-yos neses circunstancies cuála yera la fe de los sos aliaos. Los reinos de taifes musulmanes, resultáu de la descomposición del califatu de Córdoba, compitieron ente sí pol patrociniu d'artistes y el desarrollu de la cultura, mentantu que na Hispania cristiana el Camín de Santiago traxo peregrinos a Santiago de Compostela de tolos rincones de la Europa occidental.

 
La Península Ibérica nel sieglu XVIII.

Na Edá Media convivieron nel territoriu peninsular varios pequeños estaos cristianos: los reinos de Llión (heriede del reinu d'Asturies), Castiella, Aragón, Navarra y Portugal. La Hispania musulmana reorganizose embaxu'l dominiu de los almohades, y una vez qu'estos perdieron el poder quedó, como caberu reinu musulmán, el reinu nazarí de Granada, que foi conquistáu por tropes castellanes y aragoneses en 1492. Primero d'esti añu los reinos cristianos toleraron la presencia de musulmanes y xudíos nel so territoriu, pero de magar la conquista de Granada entamó la so persecución, y finalmente foron obligaos a convertise al cristianismu o a colar del so territoriu. Munchos xudíos y musulmanes marcharon pal norte d'África y l'Imperiu otomanu, mentantu qu'otros convirtiéronse y foron nomaos, respeutivamente, marranos y moriscos. Munchos d'estos, sicasí, caltuvieron la so fe en secretu. Los moriscos rebeláronse delles veces escontra'l rei hasta que foron espulsaos de Castiella definitivamente a entamos del sieglu XVII.

Edá moderna y contemporánea editar

Esos pequeños estaos anantes citaos foron axuntándose col pasar del tiempu hasta formar lo qu'había ser España. La única esceición a esti procesu foi'l reinu de Portugal, que, pese a tar xuníu al restu del territoriu peninsular ente 1580 y 1640, dixebrose otra vuelta nesi caberu añu y entamó la so esistencia definitiva como estáu independiente. El territoriu de la Península Ibérica ocúpenlu anguaño España, Portugal, el principáu d'Andorra, la colonia británica de Xibraltar y una pequeña porción de la Cerdaña francesa.

Notes editar

  1. Estes cifres obtuviéronse sumando les cifres qu'apaecen los artículos de la Wikipedia n'inglés sobre la xeografía d'España y Portugal. La mayoría de les fuentes que s'atopen n'Internet inclúin, al dar la llonxitú de les llinies de costa d'España y Portugal, les de les islles que pertenecen a caún de los dos países, y nun son, poro, una fonte fiable pa conocer la llonxitú de la llinia costera peninsular. Amás, la llonxitú d'una llinia de costa puede variar muncho dependiendo de dónde y cómo seya midida.

Referencies editar

  1. Esti términu apaez nel Diccionariu de l'Academia de la Llingua Asturiana. Ver: ibéricu, -a, -o
  2. Lyons, Cl., Papadopoulos, J.K., The Archaeology of Colonialism, páxs. 68-9. Getty Publications, 2002. ISBN 978-0-89236-635-4
  3. Ebel, C., Transalpine Gaul: The Emergence of a Roman Province, páxs. 48-9. Brill Archive, 1976. ISBN 90-04-04384-5
  4. Padrón, R., The Spacious Word: Cartography, Literature, and Empire in Early Modern Spain, p. 252. Chicago, University of Chicago Press, 2004. ISBN 978-0-226-64433-2
  5. Waldman, C., Mason, C., Encyclopedia of European Peoples, p. 404. Infobase Publishing, 2006. ISBN 978-1-4381-2918-1
  6. Jones L.J. (trad.), Strabo's "Geography", vol. II, p. 118. Cambridge, Bill Thayer, 1988.
  7. Jones L.J. (trad.), Strabo's "Geography", vol. III, páxs. 4.19. Cambridge, Bill Thayer, 1988.
  8. Jones L.J. (trad.), Strabo's "Geography", vol. III, p. 17. Cambridge, Bill Thayer, 1988.
  9. Gaffiot, F., Dictionnaire illustré latin-français, p. 765. Hachette, 1934.
  10. Woolf, G., Rome: A empire's story, p. 18. Oxford University Press, 2012.
  11. Jones L.J. (trad.), Strabo's "Geography", vol. III, páxs. 4.19. Cambridge, Bill Thayer, 1988.
  12. Jones L.J. (trad.), Strabo's "Geography", vol. III, p. 1.3. Cambridge, Bill Thayer, 1988.
  13. Fischer, T., The Iberian Peninsula: Spain, p. 368-77. New York y Londres, D. Appleton and Company, 1920.
  14. Edmunds, W.M.; Hinsby, K.; Marlin, C.; Condesso de Melo, M.T.; Manyano, M.; R Vaikmae, R.; Travi, Y. "Evolution of groundwater systems at the European coastline". En Edmunds, W. M.; Milne, C. J. Palaeowaters in Coastal Europe: Evolution of Groundwater Since the Late Pleistocene, p. 305. London, Geological Society, 2001. ISBN 1-86239-086-X
  15. Piçarra, J.M., Gutiérrez-Marco, J. C., Sá, A.A., Meireles, C., González-Clavijo, E., Silurian graptolite biostratigraphy of the Galicia - Tras-os-Montes Zone (Spain and Portugal). GFF -Uppsala- 2006;128(2):185-188.
  16. «Valores climatolóxicos estándar de la provincia d'Almería». Aemet.es. Consultáu'l 24 d'avientu de 2017.
  17. «Valores climatolóxicos estándar de Córdoba». Aemet.es. Consultáu'l 24 d'avientu de 2017.
  18. «Valores climatolóxicos estándar de A Coruña». Aemet.es. Consultáu'l 24 d'avientu de 2017.
  19. «Valores climatolóxicos estándar (España)». Aemet.es. Consultáu'l 24 d'avientu de 2017.
  20. «Valores climatolóxicos estándar (Portugal)». ipma.pt. Consultáu'l 24 d'avientu de 2017.
  21. Adams, J., Species Richness: Patterns in the Diversity of Life, p. 208. Springer, 2010. ISBN 978-3-540-74278-4
  22. Case, H., 'Beakers and Beaker Culture' Beyond Stonehenge: Essays on the Bronze Age in honour of Colin Burgess, páxs. 237-54. Oxbow, 2007.
  23. Samsó, J., The Formation of Al-Andalus: History and society, páxs. 41–42. Ashgate, 1998. ISBN 978-0-86078-708-2

Enllaces esternos editar