Wikipedia

Arxelia

país del norte d'África
(Redirixío dende Arxelina)

Arxelia[15] (n'árabe: الجزائر‎, al-Jazā'ir; en tamazight: Dzayer, ⴷⵣⴰⵢⴻⵔ; y en francés: Algérie), oficialmente República Democrática Popular d'Arxelia, ye un país del norte d'África, na costa del mar Mediterraneu. La so capital y mayor ciudá ye Arxel. Arxelia ye una república semi-presidencialista, que'l so territoriu divídese en 48 provincies y 1.541 conceyos. Con una población de más de 43 900 000 hab. (xineru 2020)[16], ye'l trenenu cuartu país más pobláu del mundu[17]. Con una economía basada na esplotación de los hidrocarburos, el so sector manufactureru padez lo que se conoz n'economía como mal holandés[18]. La so compañía estatal d'hidrocarburos, Sonatrach, ye la mayor compañía de tol continente. Arxelia tien el segundu mayor exércitu, y el mayor presupuestu de defensa, de tol continente. El país tuvo tamién un programa nuclear con fines pacíficos na década del 1990.

Arxelia
(Árabe) جمهورية الجزائر الديمقراطية الشعبية
(Al-Yumhūriyya al-Yazāiiriyya ad-Dīmuqrāţiyya ash-Shaʿbiyya)
(Bereber)ⵟⴰⴳⴷⵓⴷⴰ ⵜⴰⵎⴻⴳⴷⴰⵢⵜ ⵜⴰⵖⴻⵔⴼⴰⵏⵜ ⵜⴰⵣⵣⴰⵢⵔⵉⵜ
(Tagduda Tadzayrit Tugduyant Tagherfant)
estáu soberanu
Bandera d'Arxelia escudu d'Arxelia
Lema nacional بالشّعب وللشّعب (Árabe)
Pal pueblu y pol pueblu
Himnu nacional Kassaman
Alministración
Nome oficial اَلْجُمهُورِيَّة اَلْجَزَائِرِيَّة اَلدِّيمُقرَاطِيَّة اَلشَّعبِيَّة (ar)
Capital Arxel
Forma de gobiernu Sistema semipresidencialista
Presidente d'Arxelia Abdelmadjid Tebboune (dende 19 avientu 2019)
Primer ministru d'Arxelia Nadir LARBAOUI (dende 11 payares 2023)
Llingües oficiales árabe
bereber estándar arxelín
Relixón oficial islam[1]
División
Rellaciones diplomátiques
Miembru de
Xeografía
Coordenaes 28°N 1°E / 28°N 1°E / 28; 1
Superficie 2381741 km²
% agua Irrelevante
Costes 998 km
Llenda con 6.343 km
Puntu más altu Tahat
Puntu más baxu Chott Melrhir (es) Traducir
Demografía
Población 43 900 000 hab. (xineru 2020)
Densidá 18,43 hab/km²
Xentiliciu arxelín[13]
arxelina[14]
Esperanza de vida 76,078 años
IDH 0,745 (2021)
Tasa de fertilidá 2,857 (2014)
Economía
Moneda Dinar arxelín
PIB nominal 163 472 233 246 $ (2021)
Bancu central Bancu d'Arxelia
Más información
Dominiu d'Internet .dz
Códigu telefónicu +213
Códigu ISO 012 / DZA / DZ
Estaya horaria UTC+01:00 y Africa/Algiers (en) Traducir
el-mouradia.dz…
Cambiar los datos en Wikidata

Arxelia ye'l país más grande d'África y de tola cuenca mediterránea, y el décimu más estensu del mundu[19]. Llenda al noreste con Tunicia, al este con Libia, al oeste con Marruecos, al suroeste con El Sáḥara Occidental, Mauritania y Malí, al sureste con Níxer y al norte col mar Mediterraneu. Ye miembru de la Xunión Africana, la Lliga Árabe, la OPEP y la Organización de les Naciones Xuníes, y ye una de les naciones fundadores de la Xunión del Magreb Árabe.

Les tierres qu'anguaño son arxelines foron el llar de bien de cultures prehistóriques, como l'ateriense y la capsiense. Na época histórica el so territoriu foi controláu por dellos imperios y dinastíes, como los numidios, los cartaxineses, los romanos, los vándalos, los bizantinos, los omeyas, los fatimís, los almorávides, los almohávides y los turcos otomanos.

Historia

editar
Artículu principal: Historia d'Arxelia

Historia antigua

editar

Los primeros restos humanos atopaos nes tierres qu'anguaño son d'Arxelia tán dataos alredor del 200.000 e.C., y alcontráronse na rexón d'Ain Hanech, na provincia de Saïda[20]. Más llueu, hai restos de materiales del home de Neanderthal; asina, alcontráronse brueses de manu, d'estilos levalloisiense y musteriense y asemeyaes a les del Oriente Próximu, dataes nel 43.000 e.C.

Dellos milenios después, nel Paleolíticu mediu, Arxelia foi'l sitiu nel qu'algamó'l mayor desarrollu la téunica de fabricación de lasques. Los aperios más antiguos d'esta cultura, nomada ateriense (nome deriváu del del xacimientu arqueolóxicu de Bir el Ater, al sur de la provincia de Tébessa), tán dataos alredor del añu 30.000 e.C.

 
Una de les pintures na roca afayaes na cordillera de Tassili n'Ajjer

La primer cultura que fabricó llámines de piedra nel norte d'África ye la llamada ibero-mauritana. Esta cultura, que los sos xacimientos arxelinos concéntrense na rodiada d'Orán, estendióse peles rexones costeres del Magreb, de Marruecos a Tunicia, ente'l 15.000 y el 10.000 e.C. La civilización neolítica, la primera que desarrolló l'agricultura y domesticó dellos animales, desarrollose nel territoriu del país ente los años 6.000 y 2.000 e.C. Esta forma de vida, que ta documentada nos más de 15.000 petroglifos y pintures atopaes na rexón de Tassili n'Ajjer, ye la que hebo n'Arxelia hasta'l periodu clásicu. L'amiestu de los pueblos del norte d'África demientres estos milenios dio como resultáu un grupu étnicu qu'entamó a ser conocíu como bereber. Los bereberes son los pobladores indíxenes del norte d'África[21]

Los cartaxineses espardiéronse, dende'l so principal centru de poder na ciudá de Cartago, peles costes del norte d'África, creando pequeños puestos comerciales a lo llargo d'elles. Asina, pal 600 e.C. esti pueblu feniciu tenía establecíose en Tipasa, n'Hippo Regius (anguaño Annaba) y Rusicade (anguaño Skikda). L'espoxigue del poder de Cartago afectó enforma, nos sieglos vinientes, a la población indíxena, que taba organizada políticamente en varios estaos. Los llazos comerciales ente los cartaxineses y los bereberes del interior del territoriu medraron, pero la expansión territorial de los primeros acabó cola esclavización de dalgunos bereberes, l'enrolamientu nel exércitu cartaxinés d'otros y el pagu de tributos por otros más. Pa entamos del sieglu IV e.C los bereberes yeren la etnia más numerosa del exércitu cartaxinés.

Na revuelta de los mercenarios, del 241 al 238 e.C., soldaos bereberes rebeláronse porque nun-yos pagaben tres la derrota de Cartago frente a los Imperiu romanu|romanos na Primer Guerra Púnica. Consiguieron controlar bona parte del territoriu cartaxinés del norte d'África y acuñaron monedes nes que se facíen llamar libios (que yera'l nome qu'usaben los griegos pa referise a los pobladores norteafricanos).

La ciudá de Cartago foi destruyida el 146 e.C., pero ya anantes el decayimientu del poder cartaxinés permitió que, nel interior del país, surdieran dellos reinos bereberes. En Numidia, al sur de les zones costeres controlaes por Cartago, había dos, y otros en Mauritania, al oeste de Numidia. El puntu cimeru de la civilización bereber, que nun volvió a igualase hasta la llegada de los almorávides y almohades un mileniu dempués, algamóse demientres el reináu del primer rei de Numidia, Massinissa, que creó al entamar el sieglu II e.C., col sofitu de los romanos, un reinu cola so capital na actual Constantine. Dempués de la so muerte, el 148 e.C., el reinu foi dividíu y reaxuntáu delles veces. La so dinastía sobrevivió hasta que, el 24 e.C., los territorios bereberes foron ocupaes polos romanos.

L'Imperiu romanu gobernó Arxelia demientres varios sieglos. Ellí producíense, como nel restu del so territoriu africanu, cereales y otros productos agrícoles que yeren esportaos a la metrópolis. Los romanos foron espulsaos de la zona polos vándalos que, dirixíos por Xensericu, pasaron al norte d'África en 429 y teníen conquistada, pal 435, la zona costera de Numidia[22]. Por embargu, nun s'asentaron nel territoriu, y esto permitió que fuera reconquistáu pol Imperiu Romanu d'Oriente, que lu controló hasta la llegada de los conquistadores árabes.

Edá Media

editar

Considérase qu'esti periodu abarca, na historia arxelina, el mileniu que llega dende la llegada del Islam a estes tierres, a mediaos del sieglu VII, hasta'l sieglu XVII. La llegada del Islam, contrariamente a lo que pasara coles anteriores cultures y relixones invasoras, diba resultar perduradera en tol territoriu norteafricanu. Los invasores árabes nun traxeron namái una nueva relixón, sinón toa una cultura qu'acabó por sustituyir les práutiques relixoses y sociales tradicionales de los bereberes por nueves normes sociales y formes polítiques. Por embargu, la islamización y arabización de la rexón foi un procesu lentu y abegosu. Magar que los bereberes nomadas convirtiéronse bien ceo y entamaron a collaborar colos invasores árabes, nun va ser hasta'l sieglu XII, cola dinastia almohade, cuando les comunidaes cristianes y xudíes queden definitivamente marxinaes.

El califatu omeya

editar

Les primeres espediciones árabes al Magreb procudiéronse ente 642 y 669. Eses primeres incursiones dende Exiptu foron más el resultáu de la iniciativa de los cabezaleros llocales que la rempuesta a una orde del califatu. Por embargu, cuando la sede del califatu pasó de Medina a Damascu, la dinastía omeya (que dirixó los destinos del Islam de 661 a 750) decatóse de la necesidá estratéxica d'asegurase'l dominiu de la cuenca del Mediterraneu. En 670 un exércitu árabe mandáu por Uqba ibn Nafi creó la ciudá d'Al Qayrawan, unos 160 km de l'actual Túnez, y emprincipió a usala como base para les sos espediciones militares. Asina, el socesor d'Uqba, Abu al Muhajir Dinar, esploró les tierres occidentales y llegó a un alcuerdu de cooperación con Kusayla, cabezaleru d'una gran confederación de bereberes cristianos. Kusayla, que tenía la so capital en Tilimsan (anguaño Tlemcen), convirtióse al islamismu y movió'l so cuartel xeneral a Takirwan, cerca Al Qayrawan.

L'harmonía duró poco, pero foi provechosa. En 711 los soldaos omeyes, axudaos por bereberes convertíos al islam, teníen conquistao tol norte d'África. Los gobernadores enviaos polos califes omeyes controlaben el territoriu dende Al Qaywaran, convertida en capital de la nueva wilaya (provincia) d'Ifriqiya, que comprendía Tripolitania (la parte occidental de l'actual Libia), Tunez y l'este d'Arxelia.

 
Ruines de la mezquita de Mansourah, en Tlemcen

La conversión de los bereberes a l'islam, por embargu, nun garantizó'l so sofitu incondicional a los califes árabes. Les élites árabes punxéron-yos munchos impuestos, tratábenlos como musulmanes de segunda clas y incluso, delles veces, esclavizáronlos. De resultes d'ello los bereberes, qu'abrazaron en bon númeru les idees igualitaries del kharijismu, rebeláronse en 739-40 escontra los árabes. Tres de la revuelta los kharijís crearon un bon númberu de reinos tribales, d'esistencia percurtia los más d'ellos.

Pa 750 los abbásides, que sustituyeron a los omeyes como cabezaleros del Islam, llevaron la sede del califatu pa Baghdad y recuperaron el control de la provincia d'Ifriquiya. Polo menos nominalmente, pues el gobernador qu'unviaron, Ibrahim ibn al Aghlab, y los sos socesores hasta 909, magar que reconocíen obediencia teórica al califa, dirixeron al so petite los destinos del país.

El califatu fatimí

editar

Nes caberes décades del sieglu IX los bereberes teníen sío convertíos al ismailismu, una secta xií. Rebeláronse escontra los gobernadores sunís d'Al Qayrawan y ficiéronse col control del territoriu. L'imán ismailí Ubaydallah proclamose califa, dando entamu a la dinastía fatimí. En 911 conquistaron l'imanatu de Tahert, que tenía controlao por 150 años la metá occidental de l'actual Arxelia, y tentaron bien de tiempu conquistar Marruecos. Sicasí, el so principal enfotu yera conquistar les tierres del este, el Mashriq, qu'inclúi Exiptu y les tierres del Oriente Próximu. Consiguiéronlo na segunda metá del sieglu X, y en 972 llevaron la so capital pa El Cairu. Dexaron al cargu de les tierres arxelines a la dinastía bereber de los zirís.

 
Estensión del califatu fatimí en 969

Estos gobernaron tol territoriu d'Arxelia ente 972 y 1148, y fundaron ciudaes como Miliana, Médéa o Arxel. Al entamu del sieglu XI, por embargu, tuvieron que ceder el control de les tierres asitiaes al oeste d'Ifriquiya a una rama de su familia, los hamidís. Estos tuvieron nel poder ente 1011 y 1151, y ficieron de Béjaïa el puertu más importante del norte d'África. El repartu, sicasí, nun foi pacíficu. Los hamadís refugaron l'ismailismu y negáronse a tar sometíos a los fatimís, lo que-yos llevó a engarrase colos zirís. Entamó entonces una llucha sangrina ente les dos grandes confederaciones de bereberes, los Sanhaja y los Zenata, que debilitó enforma el gobiernu del territoriu. Aprovechando la inestabilidá saquiadores de Xénova, Pisa y Sicilia atacaron los puertos. Too axuntao acabó faciendo que les rutes comerciales esviaren los sos trayectos, evitando'l pasu pol actual territoriu arxelín. Pa enriba beduinos árabes, quiciabes unviaos polos fatimís pa debilitar a los zirís, invadieron el país dende la primer metá del sieglu XI. Pa 1057 teníen derrotao a zirís y hamadís y saquearon Al Qayrawan; dexaron les ciudaes en ruines, y espulsaron pa los montes a los agricultores de las fértiles llanaes costeres. Los que quedaron, tres de pidir proteición a los nuevos dirixentes hilalís, comenzaron a usar l'árabe como la so llingua habitual per primer vegada na zona.

Los almorávides y los almohades

editar

El movimientu almorávide nació a primeros del sieglu XI ente los bereberes Sanhaja d'El Sáḥara occidental. Ún de los sos cabezaleros, Ibrahim al Jaddali, de la tribu Lamtuna, decidió aumentar el nivel de conocimientu y práutica del islam de la so xente. Pa ello traxo con elli, cuando volvió de peregrinar a La Meca en 1048-49, un sabiu marroquín, Abd Allah ibn Yasin al Juzuli. Esti encargóse, nos primeros tiempos, d'imponer disciplina moral y de vixilar pol estrictu cumplimientu de los mandaos del islam. Poco dempués, en 1054, los lamtuna, dirixíos primero por Yahya y dempués pol so hermanu Abu Bakr, entamaron a esparder el so dominiu, dominando toles tierres arxelines al este d'Arxel. El reinu almorávide reconocía l'autoridá espiritual del califa abbasí de Bagdag, polo que demientres un tiempu (hasta 1147) tola comunidá islámica volvió a tar xunida.

Los almohades tamién tuvieron na reforma relixosa la so primera inspiración. El so cabezaleru espiritual, Muhammad ibn Abdallah ibn Tumar, ponía un gran énfasis na so enseñanza na xunidá de Dios. Espulsáu de Marrakech, volvió a la so tribu, los Mamsuda, y ellí declaróse mahdi, imam y masum (persona infalible unviada por Dios). Consultaba les sos decisiones con un conseyu formáu por diez de los sos primeros discípulos, y creó dempués una asamblea tribal de 50 miembros. La esitosa revuelta pa espardir la so visión del islam entamó en 1125, magar que elli malpenes foi testigu d'ello, una y bones morrió en 1130. El so socesor, Abd al Mumin, autonomóse califa y punxo a los sos familiares al mandu, fundando asina una especie de monarquía.

Los almohades teníen conquistao Marruecos pa 1146, conquistaron Arxel en 1151 y pa 1160 controlaben tol territoriu de l'actual Arxelia. El restu del sieglu foi una edá d'oru pal territoriu, con gran desarrollu económicu y cultural. Nel sieglu viniente, en 1229, la corte almohade renunció a les enseñanzas d'Ibn Tumart, y pronto entamó la so decadencia. L'últimu califa almohade foi derrocáu en 1269.

El final de la Edá Media

editar

Tres de la derrota almohade el territoriu arxelín repartióse ente los hafsidís, que pretendíen ser los llexítimos socesores de los almohades n'Ifriqiya, y los ziyánides, bereberes que dirixeron el reinu de Tlemcen y que dicíen ser, tamién, socesores de los almohades. Demientres trés sieglos, hasta la llegada de los turcos nel sieglu XVI, los ziyánides llograron sobrevivir, cuando dependiendo de los marinís o los hafsidís y cuando n'alianza con España. Munches ciudaes costeres, pela so banda, desafiaron a dambes dinastíes y convirtiéronse nuna suerte de repúbliques municipales, que taben gobernaes poles oligarquíes comerciales, por xefes tribales de la so rodiada o por pirates que ficieron d'elles los sos puertos de refuxu.

El final del reinu de Granada tamién tuvo influyencia nel norte d'África. A lo llargo de los sieglos XV y sieglu XVI España foi faciéndose, mediante la construcción de fortificaciones (nomaes presidios) y la esixencia de tributos a les ciudaes costeres, col control de la costa del Magreb. Asina, dominó Mers el Kebir en 1505, Orán en 1509 y Tlemcen, Mostaganem y Ténès en 1510. Esi mesmu añu los mercaderes d'Arxel cedieron ún de los isllotes qu'hai nel puertu de la ciudá pa que los españoles ficieran un fuerte nelli. Pese a ello, la espansión por mediu de presidios demostró ser una forma cara y inefectiva de controlar la zona, y nun pudo asegurar la preeminencia de los mercaderes españoles. Nos munchos puertos llibres qu'había n'Arxelia facíase la mayor parte del comerciu, y a ellos llegaben, amás de mercaderes españoles, otros d'Inglaterra, Portugal, Holanda, Francia, Italia...

L'Arxelia otomana (1516-1830)

editar

En 1516 los hermanos corsarios musulmanes Aruj y Hayreddin Barbarroxa, qu'operaban nes tierres de los hafsidís, establecieron la so base d'operaciones n'Arxel. Cuando Aruj morrió en 1518, demientres la invasión de Tlemcen, el so hermanu asocediólu como comandante militar d'Arxel. El sultán otomanu dio-y el títulu de beylerbey (xefe de xefes) y un exércitu de 2.000 xenízaros. Al mando d'ellos Hayreddin dominó'l territoriu costeru ente Constantine y Orán, esceutu esta postrera ciudá, que siguió siendo española hasta 1791.

 
Hayreddin Barbarroxa, fundador de la rexencia d'Arxel

Hayreddin foi asocedíu como beylerbey pol so fíu Hasan en 1544. Hasta 1587 el territoriu foi gobernáu por funcionarios que nun teníen afitao un intervalu temporal pal desempeñu de les sos funciones. De magar esi añu el gobiernu del territoriu taba, demientres trés años, en manes d'un gobernador nomáu pasha; ayudábenlu los xenízaros, nomaos ojaq n'Arxelia y mandaos por un agha. Estos ojaq, descontentos porque nun cobraben la paga puntualmente, entamaron a rebelase de siguío escontra los pasha a mediaos del sieglu XVII. Finalmente, en 1659, l'agha, acusando al pasha de corruptu y incompetente, fízose col poder. P'aquella la peste ya entamara a diezmar la población de les ciudaes del norte d'África. Asina, Arxel perdió de 30.000 a 50.000 habitantes na epidemia de 1620-21, y padeció tamién gran mortandá nes epidemies de 1654-57, 1665, 1691 y 1740-42[23].

En 1671 los nativos rebeláronse, mataron al agha y punxeron a ún d'ellos al mandu col títulu de dey. Dende 1689 el derechu d'escoyer al dey pasó al divan, un conceyu de sesenta personaxes importantes del territoriu. El conceyu, a lo primeru, taba domináu polos ojaq, pero pal sieglu XVIII quedaría sol mandu del dey. Primero d'eso, en 1710, el dey convenció al sultán pa que lu reconociera a elli y a los sos socesores como rexentes en nome d'elli, faciendo desapaecer con ello la figura del pasha. Asina, magar qu'Arxel siguió siendo parte nominal del imperiu otomanu, el sultán dexó de tener capacidá real de gobiernu na zona.

El dey yera, verdaderamente, un autócrata. Yera, como viemos, escoyíu pal cargu, que yera vitaliciu. Sicasí, nos 159 años nos que sobrevivió'l sistema (1671-1830) 14 de los 29 qu'ocuparon esi cargu morrieron asesinaos. Por embargu, pese a los rexicidios de manes d'usurpadores, los golpes militares y a motinos ocasionales de la población, el sistema rexía con bastante orde los asuntos del territoriu. El dey tentaba d'apoyase nos xefes tribales y favorecelos, pero pese a ello, nun tenía un sofitu unánime ente la población, que protestaba dacuando polos escesivos impuestos. Toleraba la esistencia de miniestaos tribales cuasimente autónomos na Cabilia, y namái de ralo en ralo aplicaba efeutivamente la so autoridá sobre ellos[24].

El tiempu de los corsarios

editar

Los pirates berberiscos actuaron demientres trés sieglos (del XVI al XIX) escontra los barcos cristianos y otros non musulmanes na zona occidental del mar Mediterraneu. Saquiaben los barcos, y les más de les veces apresaben a los sos pasaxeros y la so tripulación pa usalos como esclavos o pa viendelos nos mercaos d'esclavos del norte d'África y l'Imperiu Otomanu. Delles veces, cuando los pasaxeros yeren xente notable, pidíen rescate por ellos. Y tamién atacaben ciudaes costeres d'Europa, tamién pa saquiales y apresar cautivos pa vender como esclavos[25].

En 1544 Hayreddin Barbarroxa, por exemplu, conquistó la islla d'Ischia, llevándose 4.000 prisioneros, y esclavizó a cuasi tolos 9.000 habitantes de Lipari. En 1551 Turgut Reis esclavizó la población entera de la islla maltesa de Gozo, ente 5.000 y 6.000 persones, que foros treslladaes a Libia. En 1554 los corsarios saquiaron la ciudá de Vieste, al sur d'Italia, y marcharon con 7.000 cautivos. Cuatro años dempués, en 1558, Ciutadella (Menorca) foi destruyida; nel ataque morrieron la mayoría de los sos habitantes, y los 3.000 sobrevivientes foron llevaos pa Estambul. Otres ciudaes de les islles Baleares recibíen con frecuencia la visita de los corsarios, lo que fizo que se llevantaran fortificaciones nes islles y qu'incluso la islla de Formentera fuera abandonada pola so población.

Al sieglu siguiente, ente 1609 y 1616, Inglaterra perdió 466 barcos a manes de los pirates. Y muncho dempués, nel sieglu XIX, los corsarios berberiscos formalizaron un alcuerdu con xentes de la zona del mar Caribe, a los que pagaben pa que-yos dieren abellugu seguru nos sos puertos[26]. Hai testimoniu, amás, d'un esclavu americanu qu'afirmaba que los arxelinos esclavizaran 130 marinos americanos nel Mediterraneu y nel Atlánticu ente 1785 y 1793[27].

Estos ataques a navíos norteamericanos nel Mediterraneu llevaron a los Estaos Xuníos a llevar alantre la primer (1801-1805) y segunda (1815) guerres berberisques. A resultes d'elles el poder arxelín debilitóse, y una flota anglo-holandesa dirixida pol marín británicu Lord Exmouth atacó la ciudá d'Arxel. Dempués de nueve hores de bombardéu consiguieron que'l dey roblara un tratáu que reafirmaba les condiciones impuestes pol comandante norteamericanu Stephen Decatur, poles qu'almitía paga-yos tributos, y pol que se comprometía tamién a dexar d'esclavizar cristianos[28]

L'Arxelia francesa (1830-1962)

editar

Los franceses invadieron y capturaron Arxel en 1830, col pretestu de que-y teníen faltao al respetu al so cónsul. La conquista del territoriu arxelín, qu'entamó a continuación cola escusa de "civilizar" el país, foi sangrina enforma; tanto, que fizo, xunto con delles epidemies, que la población indíxena menguara nun terciu ente 1830 y 1872. Una población indíxena que, según dellos historiadores arxelinos, nun había por qué "civilizar", una y bones la tasa d'alfabetización de la población en 1830 (cuasi'l 50%) yera mayor que la de Francia[29]. Los franceses, demientres ocuparon el país, favorecieron el desarrollu d'una elite indíxena educada en francés, formada mayormente por bereberes de la Cabilia de resultes de l'aplicación de la política francesa de "dividir pa reinar". El so gobiernu favoreció sistemáticamente a los cabileños[30], pa los que, por exemplu, construyéronse el 80% de toles escueles del país.

 
Evolución de la estensión de l'Arxelia francesa demientres la ocupación

Dende 1848 hasta la independencia arxelina Francia alministró la rexón como una parte integral de la nación francesa, de la que yera un departamentu. El llargu periodu d'ocupación fizo d'Arxelia el destín de cientos de miles d'inmigrantes europeos (50.000 franceses aportaron a la zona ente 1825 y 1847), que yeren conocíos primeru como colonos y dempués como pied-noirs (pies negros). Los colonos beneficiáronse de la política del gobiernu francés, que confiscaba tierres comunales de les tribus pa dá-yosles. Dempués, l'aplicación de téuniques agrícoles modernes ameyoraba la calidá de la tierra, aumentando la cantidá de tierres afayadíces pa los cultivos.

Poco a poco foi medrando'l descontentu ente la población musulmana, marxinada política y económicamente embaxo'l sistema colonial, y entamaron les demandes de consiguir una mayor autonomía política pal territoriu. Les tensiones ente los dos grupos de población (colonos y indíxenes) entamaron en 1954, cuando entamaron les primeres engarradielles de lo que dempués se conocería como guerra d'Arxelia. Los historiadores tienen estimao qu'ente 30.000 y 150.000 harkis (musulmanes arxelinos lleales a Francia que sirvíen como soldaos auxiliares del exércitu francés n'Arxelia) morrieron de manes del Front de Libération Nationale (FLN) o en disturbios[31]. El FLN entamó a facer atentaos terroristes n'Arxelia y Francia como parte de la so estratexa de llucha, y los franceses respondieron aumentando la represión nel territoriu. La guerra finó en 1962, cuando, tres la firma de los acuerdos d'Evian en marzu de 1962 y la celebración d'un referendu d'autodeterminación en xunetu d'esi mesmu añu Arxelia convirtióse nún país independiente.

Los primeros años d'independencia

editar

El primer presidente de l'Arxelia independiente foi'l cabezaleru del FLN, Ahmed Ben Bella. Tevo que facer frente al intentu marroquín de recuperar delles zones del oeste del país, que foran incorporaes polos franceses a l'Arxelia francesa, na que se conoz como Guerra de les Arenes (ochobre de 1963). Ben Bella foi depuestu en 1965 pol so antiguu aliáu y ministru de defensa Houari Boumediene. El gobiernu, que yá demientres el gobiernu de Ben Bella diba tomando un calter cada vegada más socialista y autoritariu, siguió pel mesmu camín col nuevu gobernante. Esti, por embargu, sofitó'l so poder principalmente nes fuercies armaes, dexando'l partíu únicu ensin poder real. Colectivizó l'agricultura y punxo en marcha un importante procesu industrializador. Amás, nacionalizó les instalaciones d'estracción de petroleu, lo que foi perprovechosu pa les elites que gobernaben el país llueu de la crisis del petroleu de 1973.

Boumediene foi asocedíu nel poder, en 1979, por Chadli Bendjedid. Esti camudó la política económica del país, introduciendo delles midíes lliberalizadores, y promovió una política arabizadora de la sociedá y la vida pública del país. Maestros de llingua árabe, qu'aportaron d'otros países musulmanes, espardieron la ideoloxía islamista radical nes escueles, semando asina la simiente del islamismu políticu.

La economía arxelina fízose cada vuelta más dependiente del petroleu, lo que produció graves problemes cuando'l preciu d'esta materia prima amenorgó enforma na década de 1980[32]. La recesión económica provocó revueltas, y al final de la década Bendjedid viose obligáu a permitir la creación de nuevos partíos políticos. Ún d'ellos, formáu por una coalición de grupos islamistes, foi'l Frente Islámicu de Salvación (FIS).

La Guerra Civil y les sos repercusiones

editar

N'avientu de 1991 el FIS dominó les dos primeres vueltes de les eleiciones llexislatives. Por mieu a que se formara un gobiernu islamista les autoridaes intervinieron l'11 de xineru de 1992, anulando les eleiciones. Bendjedid dimitió, y formóse un Conseyu d'Estáu pa exercer la presidencia. Esti conseyu illegalizó el FIS, provocando al facelo l'españíu de los enfrentamientos ente'l brazu armáu del FIS, el Grupu Islámicu Armáu (GIA), y les fuercies armaes. La guerra, na qu'hebo más de 100.000 muertos, tuvo en dellos momentos gran repercusión internacional, especialmente dempués del secuestru del vuelu 8969 d'Air France por miembros del GIA. Esta organización declaró una tregua n'ochobre de 1997.

 
Abdelaziz Bouteflika

En 1999 hebo eleiciones, nes que ganó'l presidente Abdelaziz Bouteflika. El so principal enfotu nos primeros tiempos de gobiernu foi llevar la estabilidá política al país. Pa ello propunxo, y vio aprobáu en referendu, un programa de midíes destinaes a favorecer la reconciliación del país. Asina, lliberóse a prisioneros políticos y concedióse-yos a varios miles de miembros de los grupos armaos islamistes la posibilidá de nun ser xulgaos si dexaben les armes primero del 13 de xineru de 2000. Estes midíes ficieron baxar enforma'l nivel de violencia, magar qu'una escisión del GIA, el Groupe Salafiste pour la Prédication et le Combat (GSPC), entamó una campaña terrorista escontra'l gobiernu.

Bouteflika foi reelixíu n'abril de 2004, tres proponer na campaña el desendolcu d'un ampliu programa de reconciliación nacional. Esti incluyía reformes económiques, institucionales, polítiques y sociales empobinaes a modernizar el país y facer medrar el so nivel de vida; y tamién una segunda amnistía, aprobadada en referendu en setiembre de 2005, que perdonaba los delitos de los miembros de les guerrilles y de les fuercies de seguridá del estáu.

En payares de 2008 el parllamentu aprobó una enmienda constitucional que permitía al presidente tener más de dos mandatos consecutivos. Bouteflika, poro, pudo presentase a les eleiciones d'abril de 2009, nes que foi reelixíu. Na campaña prometió continuar col programa de reconciliación nacional, y poner en marcha un ambiciosu programa d'inversiones pa crear trés millones d'emplegos, construyir un millón de viviendes y continuar cola modernización de les infraestructures del país.

Nel contestu de les revueltes populares del Oriente Próximu y el norte d'África qu'españaron per esi tiempu, entamaron les protestes populares n'Arxelia'l 28 d'avientu de 2010. De resultes d'elles, el 24 de febreru de 2011 el gobiernu sacó al país del estáu d'emerxencia, nel que llevaba 19 años[33]. El gobiernu, d'alcuerdu colos partíos políticos, reformó delles lleis, incluyíes les que regulaben les eleiciones y la representación de la muyer en política[34]. N'abril de 2011 el presidente anunció nueves reformes polítiques y constitucionales.

Xeografía

editar

Arxelia tien una estensión de 2.381.741 km². Asítiase nel norte d'África, ente Marruecos y Túnez, y ye'l país más grande del continente. El so nome árabe, Al Jazair (les islles), derívase del nome de la so capital Arxel (Al Jazair n'árabe), asina nomada poles pequeñes islles qu'había nel so puertu. Tien cuasi 1.000 km de costes nel mar Mediterraneu, o por meyor dicir, nel mar d'Alborán, que ye'l nome que recibe l'estremu más occidental d'esi mar. La faza más septentrional del so territoriu, una tierra con montañes, valles y mesetes asitiada ente'l mar y el desiertu d'El Sáḥara, forma parte de la rexón norteafricana conocida como Magreb, qu'abarca, amás del territoriu septentrional d'Arxelia, Marruecos, Túnez y la fastera noroccidental de Libia, nomada históricamente Tripolitania. Al sur ta'l desiertu, qu'ocupa más de les 4/5 partes de la estensión del país.

Rexones xeográfiques

editar

Atlas Tellianu, Hauts Plateaux y Atlas Saḥarianu

editar
 
Mapa físicu d'Arxelia

L'Atlas Tellianu, que s'estiende dende la llende con Marruecos y inclúi la cordillera de Djebel Babor, ye la cadena montañosa más importante de la fastera noroccidental d'Arxelia. Al sur d'ella, separtándola del Atles Saḥarianu, estiéndense les mesetes conocíes como Hauts Plateaux (mesetes altes), llanaes ondulaes y con vexetación esteparia que formen una meseta de 600 km. El so altor va menguando, siendo d'ente 1.100 y 1.300 m na fastera más occidental, na llende con Marruecos, y namái de 400 nel este. El so clima ye perseco, tanto que delles veces se considera que son parte del desiertu d'El Sáḥara, y ta cubierta de materiales aluviales resultáu de la erosión de los montes.

La cordillera nomada Atles Saḥarianu, al sur de la formación anterior, ta formada por trés macizos: el de Ksour, cerca la llende con Marruecos; el d'Amour; y el d'Ouled-Naïl, al sur d'Arxel. Les montañes, que reciben más lluvia añalmente que la meseta asitiada al norte d'ella, tienen zones útiles pa la ganadería. Los ríos y regatos de la so fastera meridional desapaecen nel desiertu, pero valen pa enllenar munchos oasis (Biskra, Laghouat, Béchar...) de la faza más septentrional del desiertu.

El noreste d'Arxelia

editar

L'este d'Arxelia ye un área perirregular, con una socesión de montañes, llanures y cuenques fluviales, cola singularidá de que, al contrario de lo que pasa nel oeste del país, los cumales de más altor nun s'asitien paralelos a la costa. La parte más meridional d'esti sector ye peraccidentada: lo abegoso d'atravesar la cordillera d'Aurès tien influyíu enforma na historia d'esta parte del Magreb dende la dómina de los romanos. Más al norte, el ríu Soummam ye'l que separta la cordillera Grande Kabylie, la más oriental del Atles Tellianu, de la cordillera Petite Kabylie, que yá pertenez a esta rexón xeográfica.

Nesti territoriu los montes aporten a la costa, na qu'hai por embargu pequeñes llanaes na rodiada de les ciudaes portuaries de Béjaïa, Skikda y Annaba. Nel interior, pela so banda, hai grandes llanaes alredor de les ciudaes de Sétif y Constantine, que foron desarrollaes polos colonizadores franceses y son anguaño les principales zones de cultivu de cereal del país.

 
Detalle del relieve del norte d'Arxelia

El desiertu d'El Sáḥara

editar

La parte arxelina d'esti desiertu estiéndese al sur del Atlas Saḥarianu, a lo llargo de 1.500 km, hasta les llendes con Níxer y Malí. Ye un mundu aparte hasta pa los propios arxelinos, que malamente piensen nelli como una parte del so país. Pese a la imaxe prototípica d'elli, la so xeografía nun ye pa nada homoxénea. Hai, d'una banda, zones perestenses de dunes nomaes areg (en singular, erg), qu'ocupen un 25% de la zona desértica. La mayor d'elles ye'l Gran Erg Oriental, una socesión cuasi inacabable de dunes de dos a cinco metros d'altor espaciaes cada 40 m. Bona parte del restu del territoriu desérticu ocúpenlo plataformes rocoses nomadas humud (en singular, hamada), y na fastera más suroriental del mesmu alcontramos dos mesetes, les d'Ahaggar y Tassili n'Ajjer,con partes d'ellas a más de 2000 m d'altor sobro'l nivel de la mar. Arrodiando l'Ahaggar hai llanaes d'arena, cortaes por foces perprofundes peles que tiempu atrás pasaben los ríos de la zona, y más al oeste, hasta la llende con Mali, un desiertu de regodones.

Magar que too paez igual, na realidá pueden estremase un sector septentrional y otru meridional, asemeyaos n'estensión, na parte arxelina d'El Sáḥara. El septentrional, menos áridu, ye l'asientu de les poques persones que viven nel desiertu, y tamién de la mayoría de los oasis. Ye una zona con bayura de dunes de sable, magar que hai tamién, ente'l Gran Erg Oriental y el Gran Erg Occidental y estendiéndose haza'l norte hasta'l Atles Saḥarianu, una zona de mesetes qu'inclúi una zona rica en caliar, el M'zab, na que viven los bereberes m'zabites. La fastera meridional, pela so banda, ye totalmente árida, y namái viven nellos dellos tuareg nómades y, de poco p'acá, los trabayadores de los campos de petroleu.

Demografía

editar

Arxelia ye'l segundu mayor país d'África, pero bona parte del so territoriu ye desérticu. Poro, la densidá de población nun ye mui alta (15,4 hab/km²), y la mayoría de los sos 43 900 000 hab. (xineru 2020)[16] viven nes zones más averaes a la costa. No que cinca a la distribución por sexos, en 2005, el 50,46% de la so población son homes, y el 49,54% restante muyeres. La so población, nesi añu, tenía una tasa de población urbana del 60%, con xente mozo: el 61,8% de los sos habitantes teníen menos de 29 años, mientres que namái un 6,4% yeren mayores de 60 años.

No que fai a la composición étnica de la población, nel añu 2000 el 59,1% yeren árabes arxelinos. Había, tamién, un 26,2% de bereberes, de los qu'un 3% yeren bereberes arabizaos, y un 14,5% d'árabes beduinos. Cuasi tolos sos habitantes (99,7%) son de relixón musulmana, con un 99,1% de musulmanes sunnís y un 0,6% d'ibadís; el restante 0,3% de la población son cristianos.

Política

editar

Arxelia ye, nominalmente, una república presidencial multipartidista, na que'l presidente del país ye'l xefe del estáu y el primer ministru el xefe del gobiernu. El poder executivu ye exercíu pol gobiernu, que comparte coles dos cámares del parllamentu, nomaes Asamblea Nacional Popular y Conseyu de la Nación, el poder llexislativu. Sicasí, el poder real ye exercíu, según los politólogos, por un grupu de xente (décideurs, los que deciden) qu'inclúi a los altos cargos del exércitu y a un grupu de civiles que controlen los principales resortes económicos del país. Según los analistes de la política arxelina son eses persones, conocíes popularmente como le pouvoir (el poder), son los que tomen les principales decisiones polítiques del país y determinen quien ha ser el presidente.

La estructura política del país ríxese pela Constitución de 1976. Según ella el país ye un estáu multipartidista, nel que la creación d'un partíu políticu ha ser aprobada pol ministeriu del interior, que nun permite qu'haiga partíos de base relixosa, llingüística, racial, de xéneru o rexonal. Actualmente (2013) hai más de 40 partíos políticos reconocíos.

El xefe del estáu ye'l presidente de la República, elixíu por sufraxu universal pa cinco años. Hasta l'añu 2008, nel que foi enmendada la constitución, namái podía ser reelixíu una vez, mentantu qu'agora puede selo indefinidamente. A él correspuénde-y presidir el Conseyu de Ministros y el Conseyu de Seguridá Nacional, y proponer un candidatu pa xefe de gobiernu.

El poder llexislativu exércelu, conxuntamente col gobiernu, un parllamentu bicameral, formáu por: l'Asamblea Nacional Popular, con 389 miembros elixíos por sufraxu universal pa cinco años; y el Conseyu de la Nación, que tien 144 miembros, de los que 48 son designaos pol presidente y los otros 96 elixíos poles asamblees llocales y rexonales.

División alministrativa

editar
Artículu principal: Organización territorial d'Arxelia

Arxelia ta sodividida en 48 wilaya (provincies), 553 daïra (condaos) y 1.541 baladiyah (conceyos). El so nome ye'l de la so capital, que ye siempres la mayor de les poblaciones del territoriu d'una unidá alministrativa.

Acordies cola constitución arxelina una wilaya ye una coleutividá territorial qu'esfruta de llibertá económica y diplomática. Los sos asuntos son dirixíos pol parllamentu provincial, nomáu APW poles sigles del so nome en francés, (Assemblée Populaire Wilayale), que los sos miembros son elixíos por sufraxu universal. L'asamblea ta dirixida pol wali (gobernador), designáu pol presidente del país.

Los númberos de les 31 primeres provincies son los de les provincies que se crearon nel país, tres de la independencia, cola sodivisión de los quince departamentos nos que los colonizadores franceses teníen dividíu el territoriu, ordenaos n'orde alfabéticu n'árabe. En 1983 creáronse 17 provincies nueves, que foron ordenadas tamién por orde alfabéticu n'árabe pa da-yos un númberu del 32 al 48. Los nomes y números oficiales de les 48 provincies arxelines son los que vienen darréu:

 
Mapa de les provincies d'Arxelia numberaes según l'orde oficial
  1. Adrar
  2. Chlef
  3. Laghouat
  4. Oum El Bouaghi
  5. Batna
  6. Béjaia
  7. Biskra
  8. Béchar
  9. Blida
  10. Bouira
  11. Tamanrasset
  12. Tébessa
  13. Tlemcen
  14. Tiaret
  15. Tizi Ouzou
  16. Arxel
  17. Djelfa
  18. Jijel
  19. Sétif
  20. Saïda
  21. Skikda
  22. Sidi Bel Abbès
  23. Annaba
  24. Guelma
  25. Constantine
  26. Médéa
  27. Mostaganem
  28. Msila
  29. Mascara
  30. Ouargla
  31. Orán
  32. El Bayadh
  33. Illizi
  34. Bordj Bou Arreridj
  35. Boumerdès
  36. El Tarf
  37. Tinduf
  38. Tissemsilt
  39. El Oued
  40. Khenchela
  41. Souk Ahras
  42. Tipasa
  43. Mila
  44. Ain Defla
  45. Naâma
  46. Ain Temouchent
  47. Ghardaia
  48. Relizane

Defensa

editar

L' Armée nationale populaire ye l'exércitu de la República Democrática Popular d'Arxelia. Por esti nome, inspiráu nos de los países socialistes del este d'Europa, conócense dende la independencia del país les sos fuercies armaes, de bon tamañu y razonablemente bien equipaes. L'Armée inclúi fuercies de tierra (Forces Terrestres), mar (Marine de la Republique Algerienne) y aire (Al-Quwwat al-Jawwiya al-Jaza'eriya), y tamién un comandu de defensa aérea. L'Armée ye la socesora direuta de l' Armée de Libération Nationale, rama militar del FLN que lluchó escontra la ocupación colonial francesa na guerra d'Arxelia. El país tien tamién un cuerpu paramilitar, la Gendarmerie Nationale, que fai les veces de policía nes zones rurales.

 
Rexones militares d'Arxelia

El númberu de tropes estimábase, en 2011, en 127.000 soldaos activos. Había, amás, 150.000 reservistes (2010) y 187.000 miembros de la Gendarmerie (2008)[35]. N'Arxelia esiste'l serviciu militar obligatoriu; dura 18 meses, con seis d'instrucción militar y 12 de trabayu en proyeutos civiles. El gastu militar del país varía, según les fontes consultaes, ente'l 2,7% y el 3,3% del so PIB[36]. Concretamente, el so presupuestu militar pa 2012 foi de 8.170 millones de dólares[37].

Dende'l puntu de vista militar el país divídese en 6 rexones militares, caúna con un cuartel xeneral d'operaciones:

  • La primer rexón militar (Blida).
  • La segunda rexón militar (Orán).
  • La tercer rexón militar (Béchar).
  • La cuarta rexón militar (Ouargla).
  • La quinta rexón militar (Constantine).
  • La sesta rexón militar (Tamanghasset).

Economía

editar
Artículu principal: Economía d'Arxelia

Arxelia ye considerada pol Bancu Mundial como un país d'ingresos medios-altos[38]. La so economía sigue siendo firmemente dependiente del sector públicu como resultáu del modelu económicu socialista adoptáu pol país dempués de la so independencia. D'alcuerdu con elli, l'estáu tien paralizao nos últimos años la privatización de delles industries de propiedá estatal, y tien puesto restricciones al accesu de capitales foriatos a la economía del país[39].

El país intentó desarrollar industries al marxe de la de los hidrocarburos, pero l'altu coste y les inercies de la burocracia estatal ficieron que los resultaos nun foren mui bonos, y el gobiernu nun foi entá quién a atayar problemes endémicos del país como la escasez de vivienda o l'eleváu paru xuvenil. Amás d'esos, el país tien d'enfrentar abondos problemes nel cortu y mediu plazu, que precisen pa la so solución midíes como la diversificación de la economía, el desarrollu de reformes polítiques, económiques y financieres y la reducción de les desigualdaes ente les rexones[40].

 
Gráficu de les esportaciones arxelines por sectores, qu'amuesa la so dependencia de los hidrocarburos

La economía del país creció un 2,6% (4,8% si nun incluyimos nos datos el sector de los hidrocarburos) en 2011, principalmente gracies al gastu públicu n'infraestructures y a la creciente demanda interna. La medría esperada pa 2012 yera del 3,1%, y un 4,2% pal 2013. La tasa d'inflación foi del 3,9%, con un déficit presupuestariu del 3% del PIB. El superávit por cuenta corriente estímase nún 9,3% del PIB, y a finales de 2011 tenía unes reserves, según datos oficiales, de 182.200 millones de dólares[41]. La so deuda esterna, pa finar, ye namái d'un 2% del PIB.

Sicasí,la economía ye perdependiente de la evolución del preciu de los hidrocarburos, y pese a que les sos reserves bastaríen-y pa pagar demientres trés años toles importaciones del país, el crecimientu actual del gastu públicu dexen el presupuestu públicu del país espuestu al riesgu d'una baxada del preciu de los hidrocarburos[42]. Mentantu qu'eso ocurre, el gobiernu aprovecha los beneficios del comerciu d'hidrocarburos p'aumentar el gastu públicu n'ayuda alimentaria, creación d'emplegu, aumentu de los salarios públicos... midíes coles qu'intenta apaciguar el creciente descontentu de la población.

Esto ye importante porque la tasa de paru del país ye alta, especialmente pa dellos grupos. Magar que la tasa media de desemplegu yera del 10% en 2011, esta ye enforma mayor nel grupu d'edá de 15-24 años (21,5%) y nes muyeres. Pa lluchar escontra'l paru l'estáu reforzó en 2011 los programes d'axuda a los desemplegaos que busquen trabayu, nomaos DAIP (Dispositif d'Aide à l'Insertion Professionnelle) y entamaos en 1988[43].

Hidrocarburos

editar

Arxelia ye miembru de la OPEP dende 1969. La so producción de petroleu ye d'alredor de 1,1 millones de barriles al día, y ye tamién un gran productor y esportador de gas natural. Los hidrocarburos suponen aproximadamente'l 60% de los ingresos públicos del país, un 30% de su PIB y los responsables del 95% del valor y el 98% del volume de les esportaciones del país. No que cinca al gas natural, Arxelia ye'l sestu país del mundu que más gas esporta, y el décimu coles mayores reserves estimaes. Según la U.S. Energy Information Administration estes ascendíen, en 2005, a 4,5 billones de metros cúbicos. Ye, tamién, el decimosestu país del mundu con más reserves de petroleu[44].

La compañía petrolera nacional arxelina ye Sonatrach, que controla toles cuestiones referentes a los asuntos del gas y el petroleu del país. Ye obligáu pa les empreses foriates trabayar en comuña con ella, siendo lo avezao que se formen, pa la esplotación de determinaos xacimientos, empreses mistes nes que Sonatrach caltién la mayoría del accionariáu.

Turismu

editar

El turismu representa namái alredor del 1% del PIB d'Arxelia. El país ta perretrasáu nel desarrollu del sector turísticu con respeutu a los sos vecinos Marruecos y Túnez; malpenes recibía, en 2008, 200.000 turistes y visitantes al añu, principalmente ciudadanos franceses d'etnia arxelina y dalgunos tunecinos[45].

El sodesarrollu del sector turísticu arxelín puede atribuyise a la combinación de delles causes: la escasa infraestructura hotelera, l'amenaza terrorista y l'anticuáu sistema de concesión de visaos, d'estilu soviéticu, que dificulta la entrada del país. Sicasí, el gobiernu tien un plan, nomáu Horizon 2025, pa desarrollar les infraestructures hoteleres. Asina, dellos grupos hoteleros tienen planes pa construyir dellos hoteles, principalmente na fastera costera del país, y hai planes pa desarrollar el turismu d'aventura nel sur desérticu del país[46].

Infraestructures de tresporte

editar

No que cinca al tresporte per carretera, la rede de carreteres arxelines ye la mayor del continente. Tien una estensión aproximada de 180.000 km, asfaltaos nun 85%. Ente elles destaca l'Autopista Este-Oeste, entá en construcción, una autopista de trés carriles en cada sentíu que ha xunir, al traviés de los sos 1.216 km de llonxitú, la ciudá d'Annaba, na llende este del país, cola de Tlemcen, la más occidental del mesmu[47]. La so construcción, que forma parte del proyeutu pa xunir per autopista El Cairu (Exiptu) y Dakar (Senegal), tien asignáu un coste de 11.200 millones de dólares, entamó en 2007 y pese a que tenía que tar acabada en 2010 entá nun tien una fecha d'acabación. Otra carretera importante nel país ye la nomada Autopista Tressahariana, un proyeutu multinacional que tien l'oxetivu d'asfaltar la carretera que, xuniendo Arxel cola ciudá nixeriana de Lagos, sigue'l recorríu d'una de les rutes tradicionales del comerciu al traviés del desiertu d'El Sáḥara. El tramu de la mesma qu'atraviesa Arxelia de norte a sur yá ta completamente asfaltáu.

 
L'Autopista Este-Oeste

El ferrocarril, pela so parte, tien una estensión de 3.973 km, con dos anchos de vía distintos. La compañía estatal STNF (Société Nationale des Transports Ferroviaires) xestiona'l tresporte, y la recientemente creada Anesrif xestiona les infraestructures. Hai, tamién, una llinia de tranvía y otra de metro n'Arxel, y proyeutos pa construyir llinies de tranvía n'Orán y Constantine.

Tocántenes al tresporte aereu, el país tenía 137 aeropuertos y aeródromos y un helipuertu. 52 d'ellos teníen la pista asfaltada en 2005. El principal d'ellos ye l'aeropuertu internacional Houari Boumedienne, asitiáu a unos 20 km d'Arxel. Constantine, Annaba, Tilimsen y Orán tienen tamién aeropuertos preparaos pa recibir vuelos internacionales. La compañía de bandera del país ye Air Algérie.

El tresporte marítimu, pela so banda, cuenta con 16 puertos nel mar Mediterraneu[48]. Los mayores d'ellos son los d'Arxel y Bejaia. La flota de mercantes del país inclúi[49] 41 barcos de más de 1.000 TRB (tonelaes de rexistru brutu). D'ellos 20 son cargueros, 4 barcos mistos pa carga y pasaxeros y los demás barcos cisterna pal tresporte de petroleu, gas o productos químicos.

 
Puertu d'Arxel

Capítulu aparte merecen los oleoductos y gasoductos. El país tien, nel so territoriu, 456 km de tuberíes pal tresporte de crudu, 298 km pal tresporte de petroleu refináu y 2.948 km pal tresporte de gas natural. Amás, el país ta conectáu per aciu de cuatro gasoductos (dos en funcionamientu y dos en construcción) con Europa:

  • El gasoductu Magreb-Europa, de 1.620 km de llonxitú, que lleva'l gas dende'l centru de distribución d'hidrocarburos de Hassi R'mel, atravesando Marruecos y l'estrechu de Xibraltar, hasta la ciudá española de Córdoba.
  • El gasoductu Tresmediterraneu, de 2.475 km de llonxitú, que lleva'l gas dende Hassi R'mel, atravesando Túnez y el mar Mediterraneu, a Sicilia y el norte d'Italia, con un ramal que llega a Eslovenia.
  • El gasoductu Medgaz, de 757 km y entá en construcción, que ha xunir Hassi R'mel cola ciudá española d'Almería.
  • El gasocutu GALSI, de 1.505 km y entá en construcción, que ha coneutar Hassi R'mel, atravesando el mar Mediterraneu y Cerdeña, cola rede italiana de gasoductos na Toscana.

Hai, tamién, un proyeutu pa construyir un gasoductu Tressaharianu, de 4.128 km de llonxitú, que xuniría Hassi R'mel cola rexón nixeriana de Warri.

Cultura

editar

Arte

editar

Dellos pintores arxelinos, como Mohamed Racim o Baya, intenten revivir el prestixosu pasáu artísticu de l'Arxelia anterior a la colonización francesa, contribuyendo con ello a la conservación de los valores arxelinos tradicionales. Nesta llinia de trabayu Mohamed Temam o Abdelkhader Houamel retraten escenes de la historia del país, los vezos del pasáu y el paisaxe rural arxelín. Hai, sicasí, otres corrientes artístiques más allonxaes de la pintura figurativa clásica. Asina, Mohammed Khadda y M'hamed Issiakhem, ente más otros, siguen una llinia artística cola que busquen adaptar l'arte arxelín modernu a las nueves realidaes del país.

Lliteratura

editar

La lliteratura arxelina moderna ta fuertemente influyenciada pola reciente historia del país. Ente los poetes modernos rescamplen les figures de Moufdi Zakaria y Mohammed Al Aid, de mediaos del sieglu XX, y les d'Achour Fenni y Azrag Omar dende la década del 1980. Dellos novelistes famosos del sieglu XX inclúin a Mohammed Dib, Albert Camus, Kateb Yacine, Ahlam Mosteghanemi y Assia Djebar. Hai que citar tamién los nomes de Rachid Mimouni, qu'amás d'escritor foi vicepresidente d'Amnistía Internacional, y Tahar Djaout, que foi asesináu por un grupu islamista en 1993 poles sos idees secularistes. Nel campu de la filosofía y les humanidaes rescampla la figura de Jacques Derrida, pa de la deconstrucción, nacíu n'El Biar (Arxel). Otres figures contemporánees modernes son Malek Bennabi y Frantz Fanon, autores d'obres influyentes sobro los procesos de descolonización.

Tocántenes a la lliteratura de sieglos anteriores, Agustín d'Hipona nació en Tagaste (anguaño nomada Souk Ahras); y Ibn Jaldún, magar que nació en Túnez, escribió la so famosa obra Muqaddima cuando vivía n'Arxelia. Tamién nació n'Arxelia, concretamente en Madaurus (anguaño Mdaourouch), l'autor llatín Apuleyu.

Música

editar

Hai dellos estilos de música tradicional arxelina que ye bono conocer:

  • La música Chaâbi ye un xéneru musical típicu de la zona qu'arrodia Arxel, carauterizáu pola combinación de ritmos musicales preestablecíos y la presencia de lletres basaes en poemes populares, nomaos Qacidate, escritos nel dialeutu árabe del país. Ente los sos intérpretes rescampla la figura d'El Hadj M'Hamed El Anka.
  • La música Malouf ye típica de la rexón de Constantine. Ente los sos intérpretes rescampla Mohamed Tahar Fergani.
  • La música beduina, con canciones poétiques basaes en poemes llargos nomaos kacida.
  • La música de la Kabilia, que sonoriza poesíes y vieyos cuentos que pasaron oralmente de xeneración en xeneración.
  • La música Shawiya y Rahaba, propies de la rexón de los montes Aures, nel noreste del país.
  • La música Tergui, cantada en llingües tuaregs, cola banda Tinariwen como intérpretes más destacaos.
  • La música Staïfi, propia de la rexón de Sétif.

No que cinca a la música moderna, hai que nomar la música Raï, un estilu típicu del oeste del país; y tamién el rap, de reciente introducción nel país, que tien un ésitu creciente ente los más mozos.

Bibliografía

editar

Referencies

editar
  1. ↑ URL de la referencia: https://www.state.gov/reports/2020-report-on-international-religious-freedom/algeria/.
  2. ↑ URL de la referencia: https://www.interpol.int/Member-countries/World. Editorial: Interpol. Data de consulta: 7 avientu 2017.
  3. ↑ URL de la referencia: https://www.opcw.org/about-opcw/member-states/. Editorial: Organización pa la Prohibición d'Armes Químiques. Data de consulta: 7 avientu 2017.
  4. ↑ URL de la referencia: https://www.iho.int/srv1/index.php?option=com_wrapper&view=wrapper&Itemid=452&lang=en. Editorial: Organización Hidrográfica Internacional. Data de consulta: 8 avientu 2017.
  5. ↑ URL de la referencia: http://www.unesco.org/eri/cp/ListeMS_Indicators.asp.
  6. ↑ URL de la referencia: https://www.earthobservations.org/members.php.
  7. ↑ URL de la referencia: http://www.upu.int/en/the-upu/member-countries.html. Data de consulta: 4 mayu 2019.
  8. ↑ URL de la referencia: https://www.itu.int/online/mm/scripts/gensel8. Data de consulta: 4 mayu 2019.
  9. ↑ URL de la referencia: https://public.wmo.int/en/members/algeria. Data de consulta: 26 mayu 2020.
  10. ↑ URL de la referencia: https://www.who.int/choice/demography/by_country/en/. Data de consulta: 21 xunetu 2020.
  11. ↑ URL de la referencia: https://www.oic-oci.org/states/?lan=en. Data de consulta: 29 ochobre 2022.
  12. ↑ URL de la referencia: https://www.wcoomd.org/-/media/wco/public/global/pdf/about-us/wco-members/list-of-members-with-membership-date.pdf. Data de consulta: 16 marzu 2024. Páxina: 7. Supports qualifier: data de principiu.
  13. ↑ Aplícase a esta parte: masculín singular.
  14. ↑ Aplícase a esta parte: femenín singular.
  15. ↑ (2010) Cartafueyos Normativos. Nomes de los países del mundu y de les sos capitales y xentilicios. Uviéu: Academia de la Llingua Asturiana. ISBN 978-84-8168-500-8.
  16. ↑ 16,0 16,1 «عدد سكان الجزائر بلغ 43,9 مليون نسمة في يناير الماضي». Algeria Press Service.
  17. ↑ «Llistáu de los países del mundu ordenaos por población. CIA World Factbook». Archiváu dende l'orixinal, el 2011-09-27.
  18. ↑ «Poverty and Macroeconomic Development in Algeria: What is the contribution of Oil Revenues?. Ponencia de Mohamed Benbouziane y Abderrezak Benhabib na Octava Conferencia Internacional sobre la Economía y les Finances de los Países Islámicos.». Archiváu dende l'orixinal, el 2016-03-05.
  19. ↑ «Llistáu de los países del mundu ordenaos por estensión. CIA World Factbook». Archiváu dende l'orixinal, el 2020-05-22.
  20. ↑ «The Site of Ain Hanech Revisited: New Investigations at this Lower Pleistocene Site in Northern Algeria». Journal of Archaeological Science. Archiváu dende l'orixinal, el 2013-05-10. Consultáu'l 26 d'agostu de 2013.
  21. ↑ Brett, Michael; Fentress, Elizabeth. Berbers in Antiquity en The peoples of Africa. The Berbers. Wiley-Blackwell,1997.
  22. ↑ Cameron, Averil; Ward-Perkins, Bryan. Vandal Africa, 429-533 en The Cambridge Ancient History.Cambridge University Press, 2001
  23. ↑ Davis, Robert C. Christian Slaves, Muslim Masters: White Slavery in the Mediterranean, the Barbary Coast and Italy, 1500–1800. Palgrave McMillan, 2003
  24. ↑ «Los conteníos d'esti apartáu tán tomaos d'Ottoman Rule, capítulu del llibru sobro Arxelia espublizáu pola Federal Research Division de la biblioteca del Congresu de los Estaos Xuníos». Consultáu'l 7 de setiembre de 2013.
  25. ↑ «British slaves of the Barbary Coast, por Robert Davis». Consultáu'l 7 de setiembre de 2013.
  26. ↑ Mackie, Erin Skye. Welcome the Outlaw: Pirates, Maroons, and Caribbean Countercultures. Cultural Critique 59 (1): 24–62
  27. ↑ «Barbary Pirates. Artículu de la Enciclopedia Britannica de 1911». Consultáu'l 7 de setiembre de 2013.
  28. ↑ Littell, Eliakim. The Museum of foreign literature, science and art (1836). p. 231.
  29. ↑ Ruedy, John D. Modern Algeria: The Origins And Development of a Nation. Indiana University Press, 2005
  30. ↑ Alec G. Hargreaves, Alec G; Mark McKinney, M. Post-Colonial Cultures in France. Psychology Press, 1997
  31. ↑ ^"French 'Reparation' for Algerians". BBC News, 6 d'avientu de 2007.
  32. ↑ Prochasta, D., That was then, this is now: The battle of Algiers and after. Radical History Review, númberu 85, páx. 133-149
  33. ↑ Llevántase l'estáu d'emerxencia n'Arxelia. CNN.com
  34. ↑ «Información sobre Arxelia nel African Economic Outlook». Archiváu dende l'orixinal, el 2013-03-26.
  35. ↑ Datos sobro'l potencial militar d'Arxelia na web globalfirepower.com
  36. ↑ «Información sobre Arxelia nel CIA World Factbook». Archiváu dende l'orixinal, el 2016-11-10.
  37. ↑ Datos sobro'l potencial militar d'Arxelia na web globalfirepower.com
  38. ↑ «Llistáu cola calificación de les economíes de los países según el Bancu Mundial». World Bank (Xineru 2011). Consultáu'l 23 d'agostu de 2013.
  39. ↑ «Información sobre Arxelia nel CIA World Factbook». Archiváu dende l'orixinal, el 2016-11-10.
  40. ↑ «Información sobre Arxelia nel African Economic Outlook». Archiváu dende l'orixinal, el 2013-03-26.
  41. ↑ «Información sobre Arxelia nel African Economic Outlook». Archiváu dende l'orixinal, el 2013-03-26.
  42. ↑ Informe sobre Arxelia del Fondu Monetariu Internacional (2011)
  43. ↑ «Información sobre Arxelia nel African Economic Outlook». Archiváu dende l'orixinal, el 2013-03-26.
  44. ↑ «Información sobre Arxelia nel CIA World Factbook». Archiváu dende l'orixinal, el 2016-11-10.
  45. ↑ Perfil d'Arxelia na web de la Federal Research Division de la Biblioteca del Congresu de los Estaos Xuníos
  46. ↑ Perfil d'Arxelia na web de la Federal Research Division de la Biblioteca del Congresu de los Estaos Xuníos
  47. ↑ Detalle del proyeutu de l'Autopista Este-Oeste
  48. ↑ «Llocalización de los puertos arxelinos. Worldportsource.com». Archiváu dende l'orixinal, el 2013-11-19.
  49. ↑ «Información sobre Arxelia nel CIA World Factbook». Archiváu dende l'orixinal, el 2016-11-10.

Enllaces esternos

editar


África
Angola | Arxelia | Benín | Botsuana | Burkina Fasu | Burundi | Cabu Verde | Camerún | República Centroafricana | Chad | Comores | El Congu | República Democrática d'El Congu | Costa de Marfil | Eritrea | Etiopía | Exiptu | Gabón | Gambia | Ghana | Guinea | Guinea-Bisáu | Guinea Ecuatorial | Kenia | Lesothu | Liberia | Libia | Madagascar | Malaui | Malí | Marruecos | Mauriciu | Mauritania | Mozambique | Namibia | Níxer | Nixeria | Ruanda | Santu Tomé y Príncipe | Seixeles | Senegal | Sierra Lleona | Somalia | Suazilandia | Sudáfrica | Sudán | Sudán del Sur | Tanzania | Togu | Tunicia | Uganda | Xibuti | Zambia | Zimbabue

Dependencies: Islles Kerguelen | Mayotte | Reunión | El Sáḥara Occidental | Socotra | Tromelin

Organización pa la Cooperación Islámica
Afganistán | Albania | Arabia Saudita | Arxelia | Azerbaixán | Baḥréin | Bangladex | Benín | Brunéi | Burkina Fasu | Camerún | Chad | Comores | Costa de Marfil | El Líbanu | Emiratos Árabes Xuníos | Exiptu | Gabón | Gambia | Guinea | Guinea-Bisáu | Guyana | Indonesia | Irán | Iraq | Kazakstán | Kirguistán | Kuwait | Libia | Malasia | Maldives | Malí | Marruecos | Mauritania | Mozambique | Níxer | Nixeria | Omán | Paquistán | Palestina | Qatar | Senegal | Sierra Lleona | Siria | Somalia | Sudán | Surinam | Taxiquistán | Togu | Tunicia | Turkmenistán | Turquía | Uganda | Uzbequistán | Xibuti | Xordania | Yeme

Países observadores: Bosnia y Herzegovina | República Centroafricana | Rusia | Tailandia | República Turca de Xipre del Norte

  Organización de Países Esportadores de Petroleu (OPEP)
Arabia Saudita | Arxelia | Emiratos Árabes Xuníos | Gabón | Indonesia | Irán | Iraq | Kuwait | Libia | Nixeria | Qatar | Venezuela
Sacáu de «https://ast.wikipedia.org/w/index.php?title=Arxelia&oldid=4296161»