Escultura

La escultura ye l'arte que consiste en representar oxetos, figures en trés dimensiones con barru, con piedra, con bronce... Ye la rama de les artes visuales qu'opera en trés dimensiones, y una de les artes plástiques. Los primeros escultores que ficieron figures con intención de pervivencia usaron dos téuniques principales, la talla (quitando material de la pieza usada como base) y el modeláu (añadiéndo-y material, como arcilla), sobro una base xeneralmente de piedra, metal, cerámica o madera. Dende'l modernismu, sicasí, los movimientos artísticos tienen fecho escultura sobre cuasi cualesquier material de base y coles más estremaes téuniques. Anguaño materiales de toa triba (plásticu, fibra de vidriu...) son tallaos, soldaos, modelaos, moldeaos, fundíos...

Escultura
forma d'arte, género artístico (es) , forma artística (es) y afición
sculpture (en) y creación artística (es)

La escultura en piedra aguanta'l pasu del tiempu muncho meyor qu'otres obres artístiques feches en materiales más perecederos, lo que fai que, aparte de la cerámica, la mayoría los restos artísticos de les cultures antigües seyan escultures. Sicasí, ye imposible de saber si había o non una tradición nelles d'escultura en madera, que taría perdida por completu casu que la hubiera, y tamién perdiéronse les pintures que cubríen la mayoría de les escultures antigües, qu'aportaron a nós ensin adornos pictóricos.

La escultura xugó un papel fundamental na devoción relixosa de munches cultures, y hasta tiempos recientes les grandes escultures, imposibles de pagar por individuos a títulu personal, foron un símbolu de prestixu habitual de los rexímenes políticos y de les grandes organizaciones relixoses.

La escultura occidental nació na Antigua Grecia, que produció bien d'obres maestres de la escultura nel so periodu clásicu. Demientres la Edá Media, la escultura gótica centrose na representación de la pasión y l'agonía de Xesucristu, mentantu que la recuperación de los modelos clásicos nel Renacimientu produció escultures perfamoses como'l David de Michelangelo. La escultura modernista afuxó de los procesos tradicionales de creación d'escultura, y tamién del énfasis d'esta na representación del cuerpu humanu, abriendo la puerta a la escultura fabricada por adición d'oxetos sobre una base y inclusive a la presentación d'oxetos atopaos casualmente, na so forma orixinal, como obres d'arte.

Tipos d'escultura

La principal distinción ye la qu'estrema la escultura de bultu redondu, modelada en toa la so circunferencia y non xunida a denguna otra superficie (sacante, delles veces, una base o pedestal), y los relieves, xunidos polo menos en parte a otra superficie de fondu. El relieve aveza a soclasificarse, en función del so gráu de proyeición dende'l muru nel que se sofita, en baxurrelieve, alturrelieve y, delles veces, en mediurrelieve. El relieve ye la forma avezada de representación escultórica de grupos con delles figures o con una estructura narrativa, difíciles de consiguir na escultura exenta, y ye la téunica habitual de representación tanto de la escultura arquitectónica, la que se presenta como adornu n'edificios, como de la escultura decorativa de pequeñu tamañu (cerámica, xoyería, adornos de metal...). La escultura en relieve puede decorar tamién esteles, llábanes verticales xeneralmente de piedra que tamién inclúin munches veces inscripciones.

Otra distinción básica ye la qu'estrema les escultures feches con téuniques de talla, qu'estraen material del bloque de sustancia (madera, piedra) usáu como base, y les feches con téuniques de modeláu, que formen o constrúin la obra a partir del material de base. Delles téuniques como'l fundíu o la estampación usen una matriz intermedia que contién el diseñu col que se producirá la obra; munches d'eses téuniques permiten la producción de delles copies de la mesma obra.

El términu escultura aveza a usase principalmente pa describir pieces de gran tamañu, nomaes a veces escultures monumentales, seyan exentes o xuníes a un edificiu. Sicasí, na so definición estricta había aplicase tamién a munchos tipos de trabayos de pequeñu tamañu desarrollaos en trés dimensiones y creaos coles téuniques citaes, como medalles, monedes...

• 
  Estatua de bultu redondu:
  Apolo del Belvedere.
• 
  Baxurrelieve nel templu de Kom Ombo, n'Exiptu.
• 
  Bustu:
  Voltaire por Jean-Antoine Houdon.
• 
  Escultura cinética: Mòbil d'Alexander Calder (Stuttgart, Alemaña).

La construcción d'estatues pergrandes, nomaes colosales n'alcordanza del Colosu de Rodas, construyíu na islla griega homónima nel sieglu III e.C., atraxo a los gobernantes de toles dómines; la mayor anguaño esistente ye'l Buda del Templu de Primavera del condáu chinu de Lushan (provincia de Henan), que mide 128 m d'altor. Gustó-yos tamién muncho a los gobernantes, a lo llargo la historia y hasta tiempos recientes, la estatua ecuestre, que representa a un home a caballu. Otru tipu d'escultura n'honor d'un personaxe notable ye'l bustu, que representa el pechu y la cabeza d'una persona. Dellos tipos más pequeños d'escultures conmemoratives son les estatuines, estatues d'un tamañu inferior a 40 cm, y los relieves en plaquetes, medalles o monedes.

L'arte modernu y contemporaneu añadió munches formes non tradicionales d'escultura, incluyendo escultures sonores, escultures de lluz, arte cinéticu, arte ambiental, escultura ambiental, land art, arte in situ... que dan a la escultura un llugar importante como la forma predominante d'arte que puede atopase nos espacios públicos.

Propósitu y función de la escultura

Ún de los propósitos más habituales de la escultura ye la so asociación con imáxenes sagraes o dalgún otru tipu de significáu relixosu. La representación de personaxes sagraos yera avezada en munches cultures antigües. Delles veces les estatues yeren pergrandes, como asocedía na Grecia clásica, pero nun ye esta la única forma na que se presentaben. Les imáxenes sagraes qu'había nel interior de los templos exipcios persábese, magar que nun llegó denguna a nós, que teníen que ser muncho más pequeñes, inclusive nos templos de mayor tamañu. Tamién nel hinduismu la forma más frecuente d'escultura ye la representación anicónica en pequeñu tamañu (lingam) del dios Shivá. El budismu foi quien llevó la representación escultórica d'imáxenes relixoses al este d'Asia; ellí parez que nun había previamente esi vezu, magar que quiciás oxetos anicónicos como'l bi o'l cong tuvieran significancia relixosa.

Gran Esfinxe de Giza, exemplu tempranu d'arquiteutura monumental.

La tenencia de pequeñes escultures como posesiones o adornos personales remóntase al primer arte prehistóricu, mentantu que l'usu d'escultures de gran tamañu como arte públicu, cola intención principal d'impresionar al que la vía y poner de manifiestu el poder del gobernante, remóntase a lo menos hasta la Gran Esfinxe de Giza, hai unos 4.500 años. Pa los arqueólogos y los historiadores del arte l'apaición, y delles veces tamién la desapaición, del vezu de facer escultures monumentales ye un datu importante, magar que l'establecimientu del momentu nel que apaeció esa esi vezu ye difícil d'establecer, porque supónse que primero d'ellos habría escultures en madera (los tótem son exemplu d'ello) y otros materiales perecederos de les que nun quedó restu dengún. La posesión de la capacidá de organización de los recursos humanos y materiales necesaria pa crear escultures monumentales, que precisen del treslláu de materiales pesaos y de disponer de dineru pa pagar a los escultores, considérase un signu de la esistencia d'una cultura avanzada en términos d'organización social. El reciente ya inesperáu descubrimientu de figures de bronce de la China antigua en Sanxingdui, delles d'un altor de más de 4 m, camudó munches de les idees que se teníen sobre los primeros tiempos de la civilización china, una y bones nun s'atoparan nunca escultures d'esi tamañu pertenecientes a esa cultura. Por embargu, la construcción d'escultures de gran tamañu nun ye signu inequívocu de la posesión d'una cultura avanzada. Dalgunas que lo yeren ensin dubia, como la civilización del valle del Indo, parez que nun la desarrollaron, magar que producíen sellos y estatuines persofisticaes. La cultura del Mississippi parecía alcontrase en camín de progresar hacia la so construcción, construyendo yá pequeñes figures de piedra, cuando colapsó. Y dalgunes civilizaciones, como l'Antiguu Exiptu o la cultura de la Islla de Pascua, parecen tener dedicao gran cantidá de recursos a la construcción d'escultures monumentales pergrandes dende los sos primeros estadíos culturales.

Estatua femenina en terracota del sieglu IV e.C.. Muséu del Louvre, París.

El vezu de coleccionar escultura, contemporánea o de periodos antiguos, remóntase dos milenios en China, Grecia y América central, y munches coleiciones taben disponibles n'eshibición semipública muncho primero de que surdiera'l conceptu modernu de muséu. Nel sieglu XX la relativamente escasa cantidá de temes trataos na escultura de gran tamañu medró, y entamaron a facese escultures abstractes y otres que trataben temes, o taben feches con meteriales, de la realidá cotidiana. La mayoría les escultures, anguaño, fáense pa ser espuestes temporalmente en museos y galeríes, y problemes como'l coste del so tresporte y almacenaxe son cada vegada un factor más importante a tener en cuenta a la hora de construyiles. Amás, les pequeñes figures decoratives, especialmente feches en cerámica, son (pesie al so refugu polos artistes modernes y contemporáneos) tan populares anguaño como na dómina del Rococó, na Grecia antigua (na que la fabricación de estatuines de terracota yeren una importante industria na ciudá boecia de Tanagra) o na América precolombina.

La escultura de retratu entamó n'Exiptu, aú la paleta de Narmer (sieglu XXXII e.C.) amuesa una imaxe del rey Narmer. Consérvense también 18 estatues de Gudea, que foi rei de la ciudá iraquina de Lagash del 2144 al 2124 e.C.. Na Grecia antigua y en Roma la erección d'una estatua de retratu nún llugar públicu yera ún de los mayores honores que se podíen recibir, y les élites enfotábense en que-y la ficieran, o tamién en que na so imaxe apareciera grabada nuna moneda. Los Ptolomeos foron los qu'entamaron la tradición helenística d'incluyir la imaxe del gobernante nes monedes, y los romanos entamaron a incluyir nelles retratos de gobernantes muertos nel sieglu I e.C.. Xuliu César foi'l primeru qu'apaeció nelles en vida, y dempués fízose habitual la representación del emperador. Notres cultures (Exiptu, Oriente Próximu) les estatues públiques taben reservaes pal gobernante, mentantu que la figura de los otros poderosos namái podía ser representada nes sos tumbes. Na América precolombina yera vezu tamién que solo los reis (o gobernantes en xeneral) tuvieran escultures de retratu, entamando poles xigantesques cabeces llantaes polos olmeques fai 3.000 años. La escultura de retratu nel este d'Asia yera esclusivamente relixosa: los clérigos más importantes, especialmente si fundaran un monesteriu, yeren recordaos con estatues de so, pero nun les había de los gobernantes. La tradición mediterránea clásica recuperose, a lo primero namái con estatues nes tumbes y con imáxenes nes monedes, na Edá Media, y espardióse enforma nel Renacimientu, qu'inventó nueves formes escultóriques como les medalles conmemoratives cola efixie d'una persona.

Netsuke d'un tigre con dos cachorros (Xapón, sieglu XIX), de marfil con incrustaciones de concha.

Los animales foron, xunta cola figura humana, los primeros elementos representaos na escultura, y tienen sío populares de magar. Delles veces represéntense de forma realista, pero ye más habitual que seyan monstruos imaxinarios; dafechamente, en China los animales y los monstruos son cuasi los únicos elementos representaos, esculpíos en piedra, nel esterior de tumbas y templos. El mundu vexetal ye importante namái en xoyería y en relieves decorativos. Sicasí, estos caberos formen cuasi tol repertoriu decorativu del arte bizantín y del arte islámicu, y son tamién importantes en munches cultures euroasiátiques, nes que motivos como la palmeta o la vide lleven siendo representaos demientres más de dos milenios.

Una forma d'escultura presente en munches cultures prehistóriques de tol mundu son les répliques a gran tamañu, y en materiales preciosos, de ferramientes o armes, de les que se piensa que yeren pa un usu ceremonial o pa esponeles o quiciás como ofrendes relixoses. El xade foi usáu en China, el Méxicu olmeca y la Europa neolítica, mentantu qu'en Mesopotamia facíense cacíes de gran tamañu en piedra. N'Europa y China, finalmente, usábase'l bronce pa construyir grandes haches y espades.

Materiales y téuniques

Los materiales usaos n'escultura son variaos, y foron cambiando a lo llargo la historia. Los materiales clásicos, perduraderos, son los metales (principalmente'l bronce), la piedra y la cerámica, con alternatives más barates pero menos perdurables como la madera, el güesu y el cuernu. Úsense tamién materiales preciosos, como l'oru, la plata, el xade o'l marfil, pa pieces pequeñes y luxoses, y ocasionalmente en oxetos grandes como les crisoelefantines. Otros materiales, más fáciles d'atopar y más baratos, usáronse pa construyir pieces de consumu ampliu: madera duro (de carbayu, boxe o tilar), terracota y otros materiales cerámicos, cera y metales de fundición sencilla como'l zinc o l'estañu. Sicasí, permunchos otros materiales tienen formao parte d'esculturas, mesmo nes dómines antigües qu'anguaño.

Les escultures avecen a tar pintaes, magar que'l tiempu o les males restauraciones fagan desapaecer la so cubierta. Tienen usáose munches téuniques diferentes pa pintar sobro escultures: pintura al temple y al óleu, doráu, aerosol, esmalte...

Munchos escultores tienen andao a la gueta de nueves formes y nuevos materiales pa facer arte. Asina, les escultures más famoses de Pablo Picasso inclúin pieces de bicicleta, y Alexander Calder y otros modernistes usaron davezu l'aceru pintáu. Dende la década de 1960 los acrílicos y otros plásticos son ampliamente utilizaos, mentantu qu'artistes como Andy Goldsworthy constrúin escultures perecederes n'entornos naturales y a partir de materiales naturales. Hai, tamién, formes d'escultura, como la fecha en xelu, arena o con gas, feches aposta pa nun durar. Cristal vidriáu, ferramientes, maquinaria, oxetos de consumu... nos caberos tiempos aprovéchese cualesquier cosa pa facer escultura, inclusive oxetos atopaos casualmente.

Piedra

Petroglifu atopáu nel desiertu d'Atacama, en Chile.

La escultura en piedra ye una actividá perantigua. Dende bien ceo l'home avezó a dá-yos forma a les roques esculpiéndoles, esto ye, quitándo-yos fragmentos de forma controlada pa obtener la forma deseyada. Lo duradero del material pétreu permitionos alcontrar restos de dalguna forma de trabayu de la piedra inclusive nes sociedaes humanes más antigües. Nes fasteres del mundu con bayura de piedra bona pa esculpir (Exiptu, Grecia, India, la mayoría d'Europa) l'abondanza de restos ye enforma mayor. Los petroglifos, diseños simbólicos grabaos na roca fechos por desgaste de la so capa más superficial, son quiciás la forma más temprana d'escultura. Aveza a llamase, d'otra banda, escultura monumental a los trabayos en piedra de gran volume, y escultura arquitectónica a la que forma parte, estructural o como decoración, de los edificios. Hai tamién trabayos talles con intención artística de piedres semiprecioses (xade, ágata, ónix, cuarzu, sardu, cornalina), y en piedres llandies y fáciles de trabayar pa facer pequeñes pieces como l'alabastru o'l yesu.

La copia fiel d'un orixinal en piedra, perimportante pa que les estatues de la Grecia clásica aportaran a nos (cuasi toles que conocemos son copies) fízose al traviés de los tiempos por diversos métodos. El "punteáu" facíase construyendo una trama de cuadraos de cuerda suspendíos d'un marcu de madera alredor del orixinal. Tres de facelo midíase la posición de la trama de cuerda y la so distancia a una serie predeterminada de puntos de la estatua; dempués usábase esa información pa dir esculpiéndose la piedra na que se diba facer la copia. Esti métodu foi perfeccionándose col paso de los sieglos: los copistes de la Grecia clásica usaben munchos menos puntos-guía que los de sieglos posteriores, lo que fai que delles veces l'acabáu de les copies seya sensiblemente diferente. Anguaño la copia d'estatues faise con un esculpidor automáticu controláu por ordenador que permite reproducciones exactes del orixinal.

Metal

Cabeza de muyer en bronce (Benín).

El bronce (xunto con otres aleaciones del cobre) ye'l metal d'usu más antiguu y el más popular pa la fabricación d'escultures de metal fundíu. Les aleaciones de cobre tienen una propiedá poco habitual, y perútil pal so usu una escultura: la d'espandese una migayina xustu enantes de solidificase, lo que fai qu'ocupen hasta los requexos más pequeños del molde sobro'l que se vierte'l metal fundíu. D'otra banda la so resistencia y ductilidá ye una gran ventaxa a la hora de facer escultures que reflexen movimientu, especialmente en comparanza con otros materiales cerámicos o pétreos. Otros metales usaos na escultura son: l'oru, el metal más llandiu y preciosu, d'usu común en xoyería; y la plata, llandia bastante como pa que pueda, amás de fundise, ser trabayada con martiellos y otres ferramientes.

N'escultura llámase fundición a un grupu de procesos pelos cuales un material líquidu (bronce, cobre, cristal, aluminiu, fierro...) viértese nún molde que tien un güecu de la forma deseyada, y llueu déxase solidificar. La fundición sólida sepártase dempués del molde, y si ye necesario acábense los detalles de la pieza trabayándola yá en frío. Ye un métodu utilizáu principalmente pa facer escultures de formes complexes que seríen percomplicaes o percares de facer n'otros materiales. La pieza de fundición más antigua que se conserva ye una rana de cobre fecha en Mesopotamia alredor del añu 3200 e.C..

Cristal

Copa de Licurgu, del sieglu IV, fecha en vidriu dicroicu (Muséu Británicu (Londres).

El cristal, como materia prima pa facer escultures, puede trabayase de bien de formes estremaes, magar que'l so usu pa pieces de gran tamañu ye perreciente. Puede esculpise, magar qu'esto ye perdifícil; la Copa de Licurgu ye un pieza cuasi única. El modeláu en caliente puede consiguise vertiendo cristal fundíu en moldes creaos presionando la forma deseyada n'arena, grafitu esculpíu o moldes de yesu o sílice. El fundíu de cristal en fornu faise caleciendo cachos de cristal nún fornu hasta qu'esti tea líquidu, y llueu echando esti nún molde preparáu a la vera'l fornu. El cristal, finalmente, puede ser sopláu y/o esculpíu en caliente con delles ferramientes pa facer oxetos macizos o güecos.

Cerámica

La cerámica ye ún de los materiales emplegaos dende más antiguo pa esculpir. Munches veces, amás, l'arcilla ye'l material nel que munches estatues que van ser fundíes en metal son modelaes orixinalmente. Los escultores, seya cualu seya'l material definitivo que vaigan usar pa la so obra, avecen a facer bocetos en miniatura de les futures obras en materiales llandios y perecederos como'l yesu, la cera, l'arcilla ensin cocer o la plastilina. Munches cultures tienen producío pieces cerámiques que combinen la so funcionalidá como recipiente pa contener oxetos con una forma escultórica, y también tienen producío piecines decoratives pequeñes de cerámica con función esclusivamente ornamental. Por último, los sellos y los moldes foron usaos pola mayoría les antigües civilizaciones, dende la Roma antigua y Mesopotamia hasta China.

Madera

El talláu de la madera practicose perende a lo llargo de la historia, pero consérvense perpoques pieces pola so fraxilidá frente al empodrecimientu, l'ataque de los inseutos y el fueu. De resultes, ye anguaño un elementu escondíu y desconocíu pa nos na historia del arte de munches cultures. La escultura en madera albentestate nun resiste'l pasu del tiempu; poro, tenemos perpoca idea del desarrollu de la tradición totémica. Y esto ye importante pal estudiu del arte de munches partes del mundu: munches de les principales escultures de China y Xapón tán feches en madera, y tamién la gran mayoría de la escultura d'África y Oceanía.

La madera ye llixero, y poro perútil pa fabricar máscares y otres escultures que tienen que ser carretaes, y puede amás trabayase con gran detalle ensin muncha dificultá. Avezábase a pintar les pieces tres d'esculpiles, pero la pintura aguanta peor entá que la madera, y tien perdíose na mayoría de les pieces antigües de madera que se conserven. Pa ello, xeneralmente, aplicábase una capina de yesu sobro la madera, que sirvía de base sobre la que pintar.

L'estatus social de los escultores

Autorretratu del escultor alemán Adam Kraft, que representose a sigo mesmu na ilesia de San Llorienzu de Nuremberg na década de 1490.

Los escultores tienen sío xeneralmente, en toles cultures, artesanos y non artistes que nin siquiera firmaben el so trabayu. Por exemplu, en China, la escultura yera muncho menos prestixosa que la pintura caligráfica (sumi-e), y ocupaba un llugar secundariu dientru de les artes. Inclusive na Grecia clásica, donde había escultores famosos como Fidias, parez que'l so estatus social yera asemeyáu al d'otros artesanos, y quiciás nin siquiera, pese a firmar les sos obres, recibíen un bon pagu por elles. Na Edá Media, dellos artistes como Gislebertus (sieglu XII) firmaben les sos obres y, especialmente a partir del sieglu XIII n'Italia, yeren reclamaos por diferentes ciudaes pa que trabayaran nelles. Rescamplen, ente más otros, los nomes d'Arnolfo di Cambio y los Pisano, Nicola y el so fíu Giovanni. Nesa dómina los orfebres y xoyeros, que trabayaben l'oru y munches vegaes yeren banqueros al empar, pertenecíen a gremios poderosos y esfrutaben d'un nivel económicu altu y d'un gran reconocimientu social, que-yos permitía inclusive ocupar cargos n'alministración. Munchos escultores, amás, practicaben al tiempu otres disciplines artístiques: Andrea del Verrocchio yera tamién pintor, y Giovanni Pisano, Michelangelo y Jacopo Sansovino yeren arquiteutos.

Sicasí, entá na dómina del Renacimientu lo físico del trabayu del escultor facía que Leonardo da Vinci y otros tuvieran una idea de la escultura como daqué inferior al resto de les artes. Diba haber qu'esperar hasta que la gran reputación de Michelangelo ficiera cayer esta idea nel escaezu. L'altor estéticu del so trabayu, y el de otros como Leone Leoni y Giambologna, permitió-yos arriquecese y progresar socialmente, llegando dalgunos a ennoblecese y a entrar nos círculos principescos de les ciudaes italianes. La mayoría de la escultura decorativa destinada a adornar edificios siguió siendo considerada un trabayu artesanal, pero l'escultor que producía pieces individuales algamó el mesmu estatus y prestixu que'l pintor. Dende'l sieglu XVIII, o quiciás yá enantes, la escultura, magar que facer una escultura lleva más tiempu y ye más abegoso que pintar un cuadru, empezó a atraer l'atención d'estudiantes de clase media. L'apaición de muyeres escultores, sicasí, foi más tardía que la de les muyeres pintores, y malpenes hai dalguna aisllada primero del sieglu XX.

Historia de la escultura

Prehistoria

Los exemplos más antiguos d'escultura pertenecen a la cultura Auriñaciense, qu'ocupó xeográficamente Europa y el suroeste d'Asia al entamu del Paleolíticu Superior. Amás de producir dalgunes de les más antigües pintures rupestres, los auriñacienses construyeron ferramientes de piedra trabayaes mui fino, colgadielles, pulseres, abalorios de marfil, xiblates de güesu y pequeñes figures tridimensionales.

L'honor de ser la más antigua escultura fecha con intención artística dispútenselo la Venus de Schelklingen y la representación antropomórfica d'un home-lleón tallada nún colmillu de mamut atopada n'Alemaña. La figura, de 30 cm d'altor, datose alredor del 35.000-40.000 BP.

La mayoría del arte prehistóricu qu'aportó a nosotros confórmenlo pequeñes escultures tresportables, ente les que rescamplen un grupu de figures femenines nomaes les Venus paleolítiques alcontraes n'Europa central: la más famosa d'elles ye la Venus de Willendorf (24.000-26.000 BP). La escultura nomada Swimming Reindeer (Renos naladores, 13.000 BP) ye una de les meyores del grupu de talles en güesu o cuernu d'animales del Magdaleniense; más numberoses nesa dómina, por embargu, son los grabaos en piedra, consideraos escultures por dalgunos especialistes. Dos de los de mayor tamañu atópense na cueva francesa de Tuc d'Audobert. Ellí, fai 12.000-17.000 años, un escultor usó una ferramienta de piedra asemeyada a una espátula y los sos deos pa imprimir sobro una parede caliar un par de grandes bisontes n'arcilla.

Al entamu del Mesolíticu la escultura figurativa pierde importancia, y ye más raro atopala hasta la dómina del Imperiu romanu. Pese a la esistencia d'oxetos como'l calderu de Gundestrup, de la Edá del Fierro, o del carru solar de Trundholm, de la Edá del Bronce, son perpoques les escultures figuratives en comparanza coles que resultaron del vezu de facer decoraciones en relieve sobre oxetos con utilidá funcional

• 
  L'home-lleón de Hohlenstein-Stadel, la estatua antropomórfica qu'amiesta rasgos humanos y animales más antigua conocida. Auriñaciense superior, 35.000-40.000 BP (Ulmer Museum, Ulm, Alemaña).
• 
  Venus de Willendorf, 24.000-26.000 BP. Museu d'Historia Natural (Viena, Austria).
• 
  Hiena esguilando (12.000-17.000 BP). Fecha en colmillu de mamut, atopose na cueva de La Madeleine (Francia).
• 
  Swimming reindeer, representación d'un renu machu y otru fema nalando. Del Magdaleniense final (13.000 BP), atopose'n Montastruc, Francia.
• 
  Carru solar de Trundholm, atopáu en Dinamarca. Del Bronce final (1800–1500 e.C.), tien una cara dorada con pan d'oru (la visible) y la otra "oscura".
• 
  Venus de Laussel, otra de les Venus paleolítiques que se conserven. Dátase nel periodu Gravetiense (Paleolíticu Superior, 27.000 BP). Muséu de Burdeos (Burdeos, Francia).
• 
  Estatua del periodu Jōmon (Xapón), datada nel 1000-300 e.C.. Muséu Nacional de Tokiu.

Civilizaciones clásiques del Oriente Próximu

En Mesopotamia, nel periodu d'Uruk (4000-3100 e.C.), produciéronse sofisticaos trabayos escultóricos como'l vasu sagráu de Warca y dellos sellos cilíndricos de gran valir. La lleona Guennol ye una espectacular figurina en piedra caliar esculpida n'Elam en 3000-2800 e.C., que ye parte muyer y parte lleona. Un poco posteriores nel tiempu son una serie de figures de sacerdotes y devotos, fechos n'alabastru y de unos 30 cm de tamañu, con grandes güeyos. Les escultures de los imperios sumeriu y acadiu caracterícense por tener güeyos grandes con mirada penetrante y barbes llargues. Alcontráronse tamién pieces destacaes nel cementeriu real d'Ur, ente les que rescamplen les nomaes "Cabra pastiando nún matu" y "Toru de cobre", amás d'una cabeza de toru inserta núna de les arpes d'Ur, dataes alredor del 2500 e.C..

Dende esi momentu hasta l'ascensu del Imperiu neoasiriu nel sieglu X e.C. l'arte mesopotámicu sobrevive en varios formatos: sellos cilíndricos, escultures pequeñes de bultu redondu, y relieves de tamaños estremaos, incluyendo pieces corrientes de cerámica modelada d'usu domésticu, delles de calter relixosu y delles qu'aparentemente nun lo tienen. El relieve de Burney ye una placa de terracota (sieglos XIX-XVIII e.C.) con un relieve más trabayáu de lo que yera vezu y d'un tamañu relativamente grande (50 X 35 cm) na qu'apaece una diosa alada desnuda que los sos pies, con forma de garres d'aigla, descansen enriba de dos lleones, y que ta escoltada por dos curuxones. Esteles de piedra, ofrendes votives y otres estatues que celebren victories o festeyen les fiestes apaecen davezu nes ruines de los templos, magar que xeneralmente ensin inscripciones que mos ayuden a pescudar el so significáu. Rescamplen ente elles la nomada estela de les utres (2600-2400 e.C.), exemplu tempranu d'escultura fecha por impresión sobro una piedra, y l'obeliscu negru de Shalmaneser III (850 e.C.), de caliar prieto y con venti relieves grabaos nelli.

La conquista de toa Mesopotamia y munchu del territoriu que l'arrodia polos asirios crearon l'estáu más grande y ricu que conociera enxamás la rexón, que dedicó bien de recursos a llevantar grandes escultures nos palacios y nos llugares públicos, pa facer evidente'l so esllendor y tamién, de xuru, pa competir col brillu del arte del imperiu vecín, l'exipciu. Los asirios desarrollaron un estilu arquiteutónicu basáu na producción de baxorrelieves en piedra, pergrandes y nos que se representaben con gran detalle escenes de guerra o caza, pa decorar los palacios; puede vese una amplia coleición d'ellos nel Muséu Británicu. Por embargu, producieron perpoques escultures de bultu redondu, sacando les xigantescas figures guardianes nomaes lamassu. Estos yeren dioses con cuerpu de toru o lleón con cabeza humana que s'esculpíen n'alturrelieve peles dos cares d'un bloque de piedra rectangular. Hai que mencionar, pa finar, que continuaron, inclusive enantes d'algamar el cumal del so poder, la tradición de los sellos cilíndricos con diseños perdetallaos.

• 
  La lleona de Guennol, del III mileniu e.C..
• 
  Una de les 18 estatues de Gudea, un gobernante d'alredor del 2090 e.C..
• 
  Relieve de Burney (alredor del 1800 e.C.).
• 
  Relieve asiriu de Nimrud (728 e.C.).

Antiguu Exiptu

Bustu de Nefertiti esculpíu por Thutmose alredor del 1345 e.C. (Muséu Exipciu de Berlín).

Magar que les escultures monumentales del Antiguu Exiptu son conocíes perende nun podemos escaecer los abondantes exemplos d'escultura de pequeñu tamañu, d'un refinamientu y un valir artísticu perimportante, que produció esta cultura. Los exipcios usaron una téunica especial de relieve, el relieve fundíu, mui afayaízu pa los llugares nos que la lluz del Sol incide direutamente. Nelli la imaxe tállase nel bloque del material que fai de soporte, creando, pol desgaste del material qu'arrodia a la imaxe, que queda asina resaltada, un volume "interior". Les pieces así tallaes precisen situase en frente de la pieza pa poder observala. Les figures tallaes nos relieves aseméyense, na so estructura figurativa, a les qu'apaecen na pintura, coles piernes cortaes (si ye que la figura nun ta sentada) y la cabeza de llau calteniendo'l pechu de frente. Amás, hai un conxuntu estándar de proporciones pa formar les figures, usándose 18 "puños" pa dir dende'l suelu a la llinia del pelo na frente. Esti canon apaez bien ceo, pues utilízase yá na paleta de Narmer (Dinastía I), magar que nun se respeta en figures secundaries de la composición qu'apaecen realizando dalgún trabayu, como los prisioneros, o nos cadabres. Ye convención tamién que les estatues de sexu masculín seyan más escures que las de sexu femenín. Estatues-retratu de midíes y composición mui estandarizada apaecen bien ceo, na Dinastía II (enantes de 2780 edc). Amás, sacante nel nomáu periodu artísticu d'Amarna, nel reináu d'Akenatón y en momentos concretos como demientres reinó la Dinastía XII, les representaciones idealizaes de los gobernantes camudaron perpoco dende esti final del III Mileniu hasta dempués de la conquista griega.

Los faraones exipcios siempres teníen la consideración de dioses, y la representación d'otros dioses ye muncho menos frecuente n'estatues de gran tamañu, sacante cuando representen al faraón cola forma d'otru dios. Esos otros dioses, por embargu, represéntense a menudu en pintures y relieves. Una representación típica d'un faraón alcontrámoslo na filera de cuatro estatues colosales asitiaes a la vera'l templu d'Abu Simbel; toes elles representen a Ramsés II, y son singulares namái pol so gran tamañu, una y bones respuenden a un esquema típicu de representación de la figura del soberanu. Les representaciones de los dioses, o de les sos personificaciones animales, ye perfrecuente, y alcuéntrase inclusive n'oxetos cerámicos d'usu domésticu.

La mayoría de les escultures de bon tamañu que se conserven proceden de templos o tumbes. Pa la dómina de la Dinastía IV (2680-2565 e.C.) yá s'afitara la idea de la construcción de les nomaes estatues Ka. Estes figures colocábense nes tumbes pa sirvir como llugar de descansu eternu del "ka", l'alma del difuntu. Gracies a ello tenemos munches estatues, de diseñu menos estandarizáu que les de los faraones, de les que guardaben l'alma de los altos cargos de l'alministración y de les sos muyeres. Munches d'elles presenten la singularidá de que son de madera, una y bones Exiptu ye ún de los pocos llugares del mundu que'l clima de so permite que la madera nun pudra en miles d'años. Nes tumbes, amás d'esta estatua, había tamién pequeñes estatues que representaban los esclavos, animales, edificios y oxetos que'l difuntu había necesitar pa siguir cola so rutina vital nel más allá, y más sero les figurines nomaes ushebti.

• 
  Paleta de Narmer (3100 e.C.), exemplu pertempranu del canon figurativu exipciu (Muséu Exipcianu, El Cairu).
• 
  El faraón Menkaura y la reina (Dinastía IV, 2490–2472 e.C.). La solemnidá de la postura suavízala'l xestu de la reina arrodiando al maríu col brazu.
• 
  Escultures de madera nuna tumba (Dinastía XI) representando a un altu funcionariu recontando'l so ganáu.
• 
  Máscara de Tutankamón, de finales de la Dinastía XVIII.
• 
  Estatua ka del faraón Hor (Dinastía XIII, 1730 e.C.). Muséu Exipcianu d'El Cairu.
• 
  Osiris, sobro un pilar de lapislázuli, con Horus a la manzorga ya Isis a la mandrecha (Dinastía XXII). Muséu del Louvre
• 
  Ushebti nel Muséu Británicu.
• 
  Pa-Ankh-Ra, capitán de barcu, sosteniendo una estatua del dios Ptah. Periodu final del Antiguu Exiptu, 650-633 e.C..

Europa

Grecia

Grecia antigua

Detalle de la cabeza de l'Auriga de Delfos, estatua de bronce del sieglu V e.C..

El primer signu distintivu de la escultura de la Grecia antigua desarrollose nel periodu cicládicu, a entamos de la Edá del Bronce (III Mileniu e.C.), nel que se realizaben figures en mármole, xeneralmente femenines y de pequeñu tamañu, nún estilu xeométrico elegantemente simple. La figura más típica representa a una muyer de pie colos brazos cruciaos, pero hailes en diferentes poses, incluyendo una percomplicada de facer que representa una muyer tocando un arpa sentada nuna siella

Les siguientes civilizaciones, la minoica y la micénica, conocieron, pola influencia de la cultura siria y la exipcia, un mayor desarrollu de la escultura, magar que nun habría grandes avances hasta'l periodu arcaicu griegu, dende el 650 e.C. pa en delantre, cuando apaez y evoluciona la figura del kuros. Los kuroi (plural de kuros) son estatues de gran tamañu, alcontraes en templos y tumbes, que representaben homes xóvenes desnudos; el so equivalente femenín, con muyeres vistíes y peinaos percomplicaos, yeren los kore (plural korai). Dambos tipos d'estatua compartíen, na espresión del so rostru, lo que se conoz como sorrisa arcaica. Créyese que teníen funciones diverses: quiciás delles veces representaben a divinidaes, mentantu qu'otres facíen referencia a la persona enterrada nuna tumba. El so estilu ta nidiamente influyíu polos estilos siriu y egipciu, pero los escultores griegos yá teníen nesi momentu la téunica suficiente pa esperimentar pela so cuenta dientru d'esi estilu.

Demientres el sieglu VI e.C. la escultura griega desarrollose rápidamente. Volviose más naturalista, y entamaron a representarse munches poses distintes n'escenes narratives, magar qu'entá siguiendo siempre convenciones anatómiques idealizaes. Añadíeronse-y frontones a los templos. Los del Partenón, n'Atenes, d'alredor del 520 e.C., foron usaos, dempués del saquéu de la ciudá polos perses en 480 e.C., como rellenu pa construyir nuevos edificios, lo que permitió recuperalos, na década del 1880, sin que tuvieran sofrío los daños que tendríen de tener pasao 2.500 años albentestate. Otros restos escultóricos d'esta dómina vienen de Paestum (Italia), la islla de Corfú, Delfos y el templu d'Afaya (na islla d'Aegina).

• 
  Cabeza d'una figura de muyer (periodu cicládicu, 2700–2300 e.C.). 27 cm. Muséu del Louvre, París.
• 
  Figura femenina cicládica (2500–2400 e.C.). 41,5 cm. Walters Art Museum, Baltimore (EEXX).
• 
  Ritón de plata con cuernos d'oru y una roseta na frente. Micenes, 1600−1500 e.C.. Muséu Arqueolóxicu d'Atenes.
• 
  Estatua de mármol d'un kuros (590–580 e.C.). Metropolitan Museum of Art, New York.
• 
  La Esfinxe de Naxos, alcontrada en Delfos y datada ente'l 570–560 e.C.. 222 cm. Muséu Arqueolóxicu de Delfos.
• 
  Kore del Peplu, en mármole blanco y 117 cm d'altor. Fecha n'Atenes en 530 e.C.. Muséu de l'Acrópolis, Atenes.
• 
  Guerreru del periodu arcaicu tardíu que taba asitiáu nel frontón oriental del templu d'Afaya (c. 500 e.C.). Glyptothek, Munich.
• 
  El sarcófagu d'Amatunte, atopáu na ciudá homónima, en Xipre. Segundu cuartu del sieglu V e.C.. Metropolitan Museum of Art, New York.

Grecia clásica

Alturrelieve del altu clasicismu que pertenecía a los mármoles d'Elgin, que decoraben el Partenón, c. 447–433.

Hai perpocos restos orixinales de la primer etapa del periodu clásicu, qu'aveza a nomase estilu severu. Esti estendióse nel tiempu dende alredor del 500-480 e.C. hasta'l 450 e.C.. Ye vezu nelli la producción d'estatues de bultu redondo en bronce. Les poses relativamente ríxides del periodu anterior reláxense, y ye frecuente agora representar les figures aposta en posiciones asimétriques o en vistes oblicues. Esto combinose con un meyor entendimientu de l'anatomía y de lo que yeren les proporciones armóniques nes figures esculpíes pa buscar por primer vegada, como oxetivu, la representación naturalista de la figura humana. El mayor grupu de restos d'esta dómina alcontrose nes escavaciones entamaes en 1829 nel Templu de Zeus Olímpicu n'Olimpia; tán dataos alredor del 460 e.C., y consérvense nel Louvre.

El periodu del altu clasicismu estendióse namái per unes poques décades, del 450 al 400 e.C., pero tuvo una influencia perimportante nel arte y caltién un prestixu especial pese a les perpoques obres orixinales que se conserven de la dómina. Los trabayos más conocíos son los mármoles del Partenón, relizaos (dende'l gobiernu de Plutarcu) por un equipu d'escultores dirixíu pol más famosu de los escultores de la Grecia clásica, Fidias. Esti, que trabayó dende'l 465 al 425, cobró sonadía na so época pola construcción de: la estatua de Zeus n'Olimpia (c. 432, una de les siete maravíes del mundu antiguu; Atenea Partenos, la imaxe divina que s'asitiaba nel Partenón (438 e.C.); y Atenea Promacos, una imaxe colosal de la diosa fecha en bronce que s'allugaba a la vera'l Partenón. Toes eses figures, magar que se perdieran, son conocíes por munches reproducciones. Tamién se-y atribuín delles estatues de bronce a tamañu natural conocíes namái por copies posteriores, pero que la so identificación ye problemática; un exemplu d'elles ye'l Hermes Ludovisi.

El altu clasicismu continuó desarrollando'l realismu y la sofisticación na representación de la figura humana, y ameyoró la representación de la ropa, qu'usó p'añader impautu visual a les poses dinámiques (en movimientu). Les espresiones faciales, por embargu, yeren davezu, perconteníes, inclusive n'escenes de guerra. La composición de los grupos de figures nos relieves y nos frontones combinaba complexidá ya harmonía d'una forma qu'influyó pa siempres l'arte occidental. El relieve podía ser mui altu, lo que si bien-y daba a la escultura mayor vistosidá -y dificultá pa la so realización- facíala tamién más vulnerable a los daños. El clasicismu tardíu desarrolló la forma estatuaria que representaba, en bultu redondu, una muyer desnuda -piénsase qu'esto foi una innovación fecha por Praxiteles- y desarrolló poses cada vegada más complicaes y sutiles, y un mayor nivel d'espresión nos rostros. Dambes tendencies seríen desarrollaes con mayor fondura nel periodu helenísticu.

Periodu helenísticu

Altar de Pergamon (entamos del s. II e.C.), exemplu cimeru del estilu pergamín.

El periodu helenísticu aveza a considerase qu'entama, por convención, nel añu 323 e.C., añu de la muerte d'Alexandru Magnu, y que fina o bien na fecha de la conquista de Grecia pola república romana (146 e.C.) o cola derrota definitiva del caberu de los estaos qu'asocedieron al imperiu alexandrinu na batalla d'Actium (31 e.C.), que marca tamién el final de la etapa republicana na historia de Roma. Ye, poro, más estensu que los otros periodos, y estrémense nelli a lo menos dos etapes principales: un periodu inicial d'esperimentación, el nomáu estilu pergamín, con figures exuberantes que tienen cierta sentimentalidá y inclusive vulgaridá; y otru, nel sieglu II e.C., de vuelta al clasicismu, con fitures más austeres, simples ya elegantes. Sicasí, y pese a esta división teórica, hai que dicir que ye perdifícil datar les escultures d'esta época, especialmente cuando, como pasa cola mayoría de les conservaes, son copias d'un orixinal perdíu. L'estilu pergamín nun se rellaciona especialmente cola ciudá de Pergamon (na actual Turquía), de la que toma'l nome. Recíbelo porque dellos de los reis d'esti estáu, perricu na dómina, fueron dellos de les primeres persones que coleccionaron y encargaron copies d'escultures griegues clásiques. Encargaron, además, trabayos nuevos, ente los que rescamplen: l'altar de Pergamon, exemplificador del nuevu estilu, que los sos restos consérvense'n Berlín; el mausoléu d'Halicarnasu (otra de les siete maravíes del mundu antiguu); la escultura Laocoonte y los sos fíos, exemplu tardíu d'esti estilu; y la escultura orixinal, en bronce, de Gálata amorrentando, de la que sábese que yera parte d'un conxuntu d'escultures encargaes en Pergamon nel añu 228 e.C.. El grupu nomáu Toru Farnesiu, quiciás un orixinal en mármole del sieglu II e.C., ye otru exemplu, ún de los más grandes y complexos, de les escultures d'esti periodu.

La escultura helenística amplió enforma los temas que se representaben na escultura, en parte de resultes d'un arriquecimientu xeneral del mundu griegu, que permitió el surdimientu d'una clas social de xente perrica que teníen grandes cases decoraes con escultures, que yeren tamién abondantes nos templos y nos espacios públicos. Más barates, y d'usu perestendíu, foron les figurines de Tanagra y otres de pequeñu tamañu que se producíen tanto con temática relixosa (figures de dioses) como con otros temes seculares: animales, muyeres elegantemente vistíes... Los escultores diben siendo téunicamente más finos, y yeren capaces de representar fielmente bayura d'espresiones faciales de los distintos estaos d'ánimu, y tamién a distintes races y xente de toa edá. La escultura de la dómina, por últimu, ye un reflexu tamién de la relaxación moral de la dómina, que vía normal representar escenes bien alloñaes de los temes heroicos que se representaben nos sieglos anteriores. Exemplu d'ellu ye'l Faunu Barberini, que representa un sátiru tumbáu a la pámpana durmiendo, quiciás borrachu.

Tres de les conquistes d'Alexandru Magno la cultura helenística foi la dominante nes cortes reales de la mayoría de los estaos del Oriente Próximu y en dellos del Asia Central, y tamién foi teniendo cada vegada más adautación ente les élites europees, y especialmente n'Italia, aú les colonies griegues controlaben la mayoría del territoriu de la metá meridional de la península. L'arte helenísticu, y los sos artistes, espardieron la so fama bien lloñe y de forma bien intensa, y foi especialmente influyente na república remona y tamién nel arte del budismu, qu'entró en contautu con elli nel territoriu más oriental del conquistáu por Alexandru. El nomáu sarcófagu d'Alexandru, alcontráu en Sidón (El Líbanu), foi probablemente fecho ellí al entamu d'esti periodu por artistes griegos expatriaos por encargu d'un gobernador persa. Dicir, por últimu, que la riqueza del periodu favoreció'l desarrollu d'una producción masivu a gran escala d'escultures de luxu (xoyería d'oru o plata) de pequeñu tamañu.

• 
  Bronces de Riace, figurines de bronce recuperaes de la mar (c. 460–430).
• 
  Hermes y l'infante Dionisos, posiblemente obra de Praxiteles (sieglu IV e.C.).
• 
  Figurines de porzolana representando dos muyeres elegantemente vistíes (350–300 e.C.).
• 
  Estatuina de bronce d'un caballu (fines del sieglu II o sieglu I e.C.), anguaño visible nel Metropolitan Museum of Art.
• 
  La Victoria Alada de Samotracia, de alredor del 190 e.C. (Muséu del Louvre).
• 
  Venus de Milo, del 130-100 e.C. (Muséu del Louvre).
• 
  Laocoonte y los sos fíos, quiciás una copia en mármole blancu (200 e.C.-20) que se conserva nos Museos Vaticanos.
• 
  Apollo Belvedere, copia romana d'un orixinal griegu en bronce (c. 130–140) conservada nos Museos Vaticanos.

La escultura n'Europa tres de los griegos

Roma

Seición de la columna de Traxanu (113) con escenes de la guerra de la Dacia.

L'arte romanu tempranu recibió la influyencia del arte griegu y del de los etruscos, que taba a la so vez perinfluenciáu pol griegu, que-yos llegaba al traviés de los intercambios comerciales con esa cultura. Una de les figures más típiques del arte etruscu yeren les efixies de tamañu cuasi real, feches en terracota, que se colocaben enriba de los sarcófagos y que representaben al difuntu recostáu sobre un coldu na postura avezada na dómina pa xintar. De la que la puxante República romana entamó a conquistar territoriu griegu, a lo primero'l sur d'Italia y dempués tol mundu helenísticu sacante'l so estremu más oriental, l'imperiu partu, la escultura oficial y la encargada polos patricios convirtiéronse nuna estensión del estilu helenísticu. Los elementos específicamente romanos son malos d'esbillar, especialmente porque la mayoría les escultures griegues qu'aportaron a nós son en realidá copies romanes de los orixinales griegos. Pal sieglu II e.C. "la mayoría los escultores que trabayaben en Roma" yeren griegos, los más d'ellos esclavizaos tres de la conquista de ciudaes como Corintu (146 e.C.); pol so calter d'esclavos los sos nomes perdiéronse. Un gran númberu d'estatues griegues foron tamién trayíes a Roma mercaes o, munches vegaes, como botín de les conquistes, y los templos avezaron a decorase con elles

Puede rastrexase, sicasí, un estilu propiamente italianu. El retratu escultóricu ye una de les formes más importantes de la escultura romana. Yera vezu, nes tumbes de los romanos acomodaos, colocar bustos col retratu del difuntu. Amás, magar que nun se conserven restos de la tradición de carretar máscares col rostru de los antepasaos nos funerales de les families importantes, que dempués se guardaben na casa familiar, piénsase que munchos de los bustos que se conserven deben tener sío esi tipu d'estatua. La famosa cabeza de bronce de Lucius Junius Brutus nun tien una cronoloxía afitada, pero considérasela como un sobreviviente del estilu itálicu na dómina de la República. D'otra banda, nes monedes del final de la época republicana represéntense cabeces col semblante seriu y enérxicu, y na época imperial utilizose la escultura con una nidia función propagandística. Unviábense monedes y bustos a tolos requexos del Imperiu pa que los allugasen nes basíliques de les ciudaes como representación del poder imperial; inclusive Londinium (Londres) tenía una estatua cuasicolosal de Nerón, magar que abondo más pequeña que'l Colosu de Nerón, que tenía 30 m d'altor y taba en Roma.

Relieve d'estilu grecorromanu nel Ara Pacis (13 e.C.).

Los romanos nun avezaron a facer estatues de bultu redondu representando fazañes heroiques, históriques o mitolóxiques, perfrecuentes en Grecia. Dende mui ceo, por embargu, producieron relieves que recoyíen fechos históricos, con formes escultóriques qu'algamaron el so cumal na columna trunfal romana, qu'amosaba relieves narrativos continuos que la percorríen n'espiral. Consérvense entá en Roma la columna de Traxanu (113) y la columna de Marcu Aureliu (193), y tamién l'Ara Pacis (altar de la Paz, 13 e.C.), que representa l'estilu oficial grecorromanu na so forma más clásica y refinada. Otros exemplos son los relieves, más antiguos, reaprovechaos nel arcu de Constantinu y que formen la base de la columna d'Antoninu Píu (161).

Los relieves de Campana yeren versiones en terracota, más barates, de los relieves en mármole qu'amuesen el gustu de los romanos pol relieve. Un gustu estendíu tamién, dende la dómina imperial, a los sarcófagos. Toles formes d'escultura de luxu de pequeñu tamañu siguieron teniendo ésitu, con pieces de grandísima calidá, como la nomada copa Warren, en plata, la copa de Licurgu, fecha en cristal, y cameos de gran tamañu como'l caméu de Gonzaga, la Gemma Augustea y el nomáu gran caméu de Francia. P'aquellos que nun podíen permitise estes pieces, producíense en gran cantidá pequeñes figurines de cerámica de bona calidá pa qu'adornaran la so casa con elles .

Tres una fase "barroca", nel sieglu II, l'arte romanu, nel sieglu III, abandonó, o quiciás nun foi capaz yá de producir, escultures d'estilu clásicu. Les causes del cambiu entá son oxetu de discutiniu ente los especialistes, pero lo cierto ye qu'inclusive los más principales d'ente los monumentos imperiales tienen relieves achaplaos, con figures de grandes güeyos representaes de frente en composiciones simples que ponen l'enfotu nel poder ensin preocupase pola estética. El constraste puede vese claramente nel arcu de Constantinu (315), que combina seiciones esculpíes nel nuevu estilu con otres d'estilu clásicu reutilizaes, y nel nomáu retratu de los cuatro tetrarques (c. 305), que taba na nueva capital imperial, Constantinopla. Ernst Kitzinger observa en dambos monumentos les mesmes "proporciones rechonches, movimientos angulares, una ordenación de les partes al traviés de la simetría y la repetición, y una representación de los rasgos y les ropes mediante incisiones en cuenta de mediante'l modeláu... La marca distintiva del estilu, auquiera qu'apaezca, consiste nuna dureza, pesadez y angularidá feches aposta; esto ye, un rechazu cuasi completu de la tradición clásica".

Esta revolución nel estilu adelantose por pocu tiempu al periodu nel que l'estáu romanu, y bona parte de la so población, adoptaron el cristianismu como la so relixón, lo que supunxo'l final de la escultura dedicada a los dioses paganos. Les estatues de gran tamañu representaron, de magar, namái a los emperadores. Por embargu, los cristianos ricos siguieron encargando relieves pa los sos sarcófagos, y desarrollose una escultura de pequeñu tamañu en marfil que, siguiendo l'estilu del antiguu dípticu consular, representaba temes piadosos.

• 
  Sarcófagu etruscu del sieglu III e.C..
• 
  Cabeza en bronce de Lucius Junius Brutus (s. III e.C. - s. I e.C.).
• 
  Augustu de Prima Porta, estatua del emperador Augustu del sieglu I (Museos Vaticanos).
• 
  Escultures en relieve d'una tumba de la gens Decia (98-117).
• 
  Bustu del emperador Claudiu (c. 50), reelaboráu a partir d'ún dedicáu a Calígula. Alcontrose na basílica Otricoli (Lanuvium, Italia) y consérvase nos Museos Vaticanos.
• 
  Cómodu vistíu como Hércules (c. 191), estatua nel estilu "barrocu" del periodu baxuimperial.
• 
  Retratu de los cuatro tetrarques (c. 305), nel que ye visible'l nuevu estilu anticlásicu de la dómina.
• 
  Gran Caméu de Francia (c. 23), nel que se representa una alegoría del emperador Augustu y la so familia.

Escultura altumedieval y bizantina

Placa de marfil, probablemente de la cubierta d'un llibru (Reims, finales del sieglu IX), con dos escenes de la vida de Remixu de Reims y el bautismu de Clodovéu I.

Los primeros cristianos nun facíen escultures relixoses monumentales, pero continuaron les tradiciones romanes no que cinca a facer bustos con retratos y a decorar los sarcófagos con relieves. Tamién readaptaron la tradición de los dípticos consulares, pequeños oxetos en materiales valiosos qu'entamaron a decorase con escenes piadoses. Toa esta triba d'oxetos formen tamién el repertoriu arquiteutónicu de les civilizaciones bárbares qu'aportaron a Europa na dómina altomedieval, como demuestran los oxetos alcontraos nel tesoru funerariu de Sutton Hoo (sieglu VI), les xoyes del arte escita y les producciones escultóriques, qu'amiesten motivos cristianos con figures animales, qu'apaecen nel nomáu arte insular, el desarrolláu nes islles Britániques dempués de que los romanos colaran d'elles. Siguiendo la tradición bizantina l'arte carolinxu utilizó'l marfil pa facer paneles colos que facer les cubiertes de los sos manuscritos ilustraos, amás de remates de báculos y otres pieces pequeñes.

L'arte bizantín, magar que produció preciosos relieves en marfil y desarrolló enforma la escultura como elementu decorativu nos edificios, nun volvió a facer escultures monumentales, y parez que tampoco escultures exentes de ciertu tamañu. Por embargu, n'Europa occidental, nos periodos carolinxu y otonianu entamó otra vuelta la producción d'estatues monumentales p'adornar les cortes reales y les catedrales. Esta moda espardióse y asina, pa finales del sieglu X y nel XI tenemos rexistros escritos qu'indiquen la esistencia d'escultures de tamañu natural nes ilesies anglosaxones. Magar que denguna d'elles sobrevivió piénsase que seríen, como la Vírxe dorada d'Essen, pieces de madera recubiertes de llámines de metales preciosos. Como dicíemos, nun sobrevivió denguna, y los restos d'escultures de ciertu tamañu non venceyaes a estructures arquiteutóniques anteriores al añu 1000 son perescasos. La más destacada ye la Cruz de Gero (965-70), un exemplu de lo qu'había ser ensin dubia'l más común de los tipos d'escultures, el crucifixu. Les piedres rúniques del mundu escandinavu, les piedres pictes d'Escocia y les grandes cruces de la Gran Bretaña cristiana, d'otra banda, son muestres de les tradiciones esculturales de los países septentrionales d'Europa que pervivieron tres de la so cristianización.

• 
  Figura d'un arcánxel en marfil. Constantinopla, 525–550.
• 
  Trípticu de Harbaville, en marfil, obra bizantina de mediaos del sieglu X.
• 
  Detalle de la figura de Xesucristu na Cruz de Gero (Colonia, 965–970), que ye'l exemplu más antiguu conserváu de la recuperación de la tradición de la escultura de gran tamañu.
• 
  Virxe dorada d'Essen (c. 980), de madera recubierta de llámines de pan d'oru.
• 
  La Gran Febiella del tesoru de Sutton Hoo (s. VII), perdelicáu trabayu n'oru.
• 
  Piedres rúniques conocíes como Valleberga, que dan noticia de dos viquingos que morrieran en Londres.
• 
  Piedra de Hilton of Cadboll, piedra picta datada alredor del añu 800.
• 
  Cruz de Muiredach, del sieglu IX-X, considerada la más guapa de les cruces de piedra céltiques que se conserven anguaño.

Románicu

Lleón de Brunswick (1166), primera estatua de gran tamañu (1,78 m d'altor y 2,79 m de llargor) fecha en fundición hueca dende l'Antigüedá

De magar el añu 1000 hubo, de resultes de la medría de les actividaes productives y comerciales, que traxeron un crecimientu económicu xeneralizáu, un resurdimientu de la producción artística en tol continente, y el nuevu estilu románicu, el primeru en ser utilizáu en tola Europa occidental, habría de ser el vehículu espresivu d'esi nuevu arte. Les nueves catedrales ya ilesies de peregrinación decorábense cada vegada más con elementos arquiteutónicos qu'incluyíen relieves en piedra, y apaecieron decoraciones escultóriques en sitios nuevos, como los tímpanos, sobro les puertes de les ilesies, o los capiteles, qu'entamaron a decorase con elementos figurativos y narrativos. Dalgunos de los exemplos cimeros d'esta nueva decoración escultórica son les abadíes franceses de la Madeleine (en Vézelay) y de Moissac, o'l monesteriu español de Santu Domingu de Silos.

L'arte románicu caracterizábase por un estilu rotundu, mesmo na pintura que na escultura. Nun hai capiteles de mayor valir artísticu que los d'esta dómina, na que munches veces incluyíense nellos escenes completes con delles figures. Los grandes crucifixos de madera fueron una innovación apaecida n'Alemaña al entamu d'este periodu, y tamién les estatues exentes de la Virxe, pero l'elementu escultóricu que define a esti periodu ye l'alturrelieve. Les composiciones nun solíen tener gran fondura, y teníen de ser flexibles pa poder adautales a la forma de los capiteles y los tímpanos. De resultes, la tensión ente un marcu qu'imponía restricciones a les figures y estes, que delles veces escapaben d'elli, ye un tema recurrente nel arte románicu. Un arte nel que malpenes se trabayaba'l retratu, y nel que les figures avezaben a ser de tamañu diferente según la importancia de la persona representada.

Los oxetos en materiales preciosos, como'l marfil o'l metal, yeren, muncho más que les escultures monumentales, una señal d'estatus social, y ello fai que conozamos más nomes d'orfebres que de pintores o arquiteutos. El trabayu del metal, incluyíos los esmaltes, sofisticáronse enforma; consérvense varios relicarios espectaculares, como'l relicariu de los trés Reis Magos, el mayor del arte occidental, obra de Nicolás de Verdún conservada na catedral de Colonia. El candelabru de Gloucester y la pila bautismal de la ilesia de San Bartuelu (Liexa) son exemplos cimeros, perdiferentes n'estilu, del trabayu del metal. El primeru, fechu nún bronce con un conteníu en plata inusualmente altu, tien una complexa y enrevesada decoración na que s'axunten figures humanes, de monos y de besties fantástiques con motivos vexetales, mentanto que'l segundu ye la muestra más perfecha del arte mosanu más clásicu. Les puertes de bronce, una columna trunfal y otros adornos de la catedral de Hildesheim, les puertes de la catedral de Gniezno (Polonia), y les pueertes de la basílica de San Zeno, en Verona (Italia) son otros de los principales oxetos que se conserven. Los aguamaniles, pequeñes duernes nes que botar agua pa llavase, tienen apaecío n'Europa nel sieglu XI; solíen ser de llatón, y decorábense xeneralmente con figures zoomórfiques fantástiques. Consérvense tamién muches impresiones en cera de los sellos usaos en cartularios y documentos, y monedes, magar que les d'esta dómina nun tienen un gran interés estéticu.

La nomada Cloisters Cross ye un crucifixu de marfil d'un tamañu inusualmente grande que tien una complexa decoración qu'inclúi figures de profetes y que tien atribuyíose a ún de los perpocos artistes que'l so nome ye conocíu, el Maestru Hugo. N'orixe taba, como munches otres pieces, parcialmente colloreáu. Les figurines d'axedrez de Lewis (sieglu XII) son un exemplu perbién conserváu d'escultura de pequeñu tamañu en marfil, un material usáu na dómina pa facer plaques, cruces pectorales, báculos y otros oxetos similares.

• 
  Pila bautismal de la ilesia de San Bartuelu, na que se representa'l bautismu de Cristu (1107–1118).
• 
  Tímpanu de la portada de l'abadía de Vézelay (Borgoña, Francia), de la década de 1130.
• 
  Fachada de la catedral d'Ourense (1160).
• 
  Pórtico da Gloria de la catedral de Santiago de Compostela, sieglos XII-XIII.
• 
  San Adalbertu ye fechu obispu, escena de les puertes de bronce de la catedral de Gniezno (Polonia).
• 
  Candelabru de Gloucester (c. 1110).
• 
  Reis y reinas de marfil del conxuntu de figurines d'axedrez de Lewis, atopaes na islla escocesa homónima en 1831.
• 
  Cloisters Cross, cruz d'altar fecha en colmillu de morsa (sieglu XII).

Góticu

Virxe col Neñu, escultura francesa en marfil del sieglu XIII. El cuerpu de la Virxe cúrvase p'adautase a la forma del colmillu.

El periodu góticu defínese esencialmente pola arquiteutura gótica, que tien una cronoloxía estremada, tanto no que cinca al so entamu como al so final, col desarrollu escultóricu de la dómina. Les fachaes de les grandes ilesias, especialmente alredor de les puertes, siguieron teniendo grandes tímpanos, pero tamién fileres de figures esculpíes na so rodiada. Les estatues de la portada occidental (la Portada Real) de la catedral de Chartres (c. 1145) amuesen una elegante pero descomanada elongación columnar, mentantu que les de la portada del brazu meridional del cruceru, tamién de cronoloxía "gótica" magar qu'esculpíes ente 1215-1220, amuesen un estilu más naturalista, con una mayor separación del muru que va detrás d'elles y ciertes semeyances cola tradición clásica. Podemos siguir el rastru d'estes tendencies nel portal occidental de la catedral de Reims, un poco posteriores, con figures cuasimente exentes, y dempués nos edificios góticos de tol continente européu.

N'Italia los escultores Nicola y Giovanni Pisano (pa y fíu respeutivamente) desarrollaron un estilu qu'aveza a ser llamáu protorrenacentista, con influyencies evidentes de los sarcófagos romanos y composiciones sofisticaes y con munchos personaxes. Dalgunes obres destacaes de so son el púlpitu de la catedral de Siena (1265-68), la Fontana Maggiore (gran fonte) de Perugia y el púlpitu de la ilesia de San Andrés en Pistoia (1301). Tamién vemos una revisión del estilu clásicu nel nomáu góticu internacional, estilu siguíu por Claus Sluter y los sos discípulos en Borgoña (Francia) y Flandes alredor de 1400. La escultura gótica tardía prollongose nel tiempu entá más nel norte d'Europa, con retablos de madera de gran tamaño con un esculpíu cada vegada más perfectu y gran cantidá de figures de gran expresividá. La mayoría de los que sobrevivieron a les foles d'iconoclastia de la Edá Moderna consérvense n'Alemaña. L'estilu góticu, al que foron incorporándose gradualmente influyencies del Renacimientu italianu, pervivió na escultura hasta bien entráu'l sieglu XVI na obra d'escultores como Tilman Riemenschneider o Veit Stoss.

Les efixies a tamañu natural, en piedra o alabastru, pa poner nes tumbes ficiéronse populares ente los ricos y poderosos, qu'engrandecieron enforma les sos tumbes, de forma que dalgunes, como les de Scaliger en Verona, yeren tan grandes que tuvieron que ser sacaes fuera de la ilesia. Pal sieglu XV desarrollárase una industria d'esportación de relieves pa altares fechos en alabastru de Nottingham (Inglaterra). Paneles con varies figures esculpíes vendíense per buena parte d'Europa a les parroquies que nun yeren riques abondo como pa pagar un retablu de piedra. Púnxose de moda, tamién, l'adquisición, xeneralmente por el públicu femenín, de pequeñes escultures, les más d'elles de tema llaicu, lo que permitió'l desarrollu d'una próspera industria en París y otros llugares. Xoyeros, espeyos con caxa y peñes en marfil, amás de pequeños polípticos devocionales y figures de la Virxe, yeren regalos comunes nesta dómina na que los perricos coleccionaben xoyes extravagantemente decoraes y esmaltes, tantu de tema relixosu como llaicu, que fundíen pa viender el metal nel casu d'andar cortos de perres.

• 
  Portada occidental de la catedral de Chartres(c. 1145).
• 
  Portada meridional de la catedral de Chartres (c. 1215–20).
• 
  Portada occidental de la catedral de Reims, na que se representa L'Anunciación.
• 
  Natividá y Adoración de los Magos, figures del púlpitu del bautisteriu de Pisa, obra de Nicola Pisano.
• 
  Sitiu del Castiellu del Amor nun espexu con caxa fecho en 1350-70 (Muséu del Louvre).
• 
  Fragmentu d'un retablu n'alabastru (Inglaterra, 1450-90) con restos de policromía, nel qu'apaez la Resurrección de Cristu.
• 
  Base del Relicariu de la Espina Sagrada, qu'amuesa la Resurrección de los muertos n'oru, esmaltes y piedres precioses.
• 
  Detalle de la Última cena nel Altar de la Sangre Sagrada, obra de Tilman Riemenschneider (1501–05) conservada en Rothenburg ob der Tauber, Bavaria.

Renacimientu

Tumba del papa Xuliu II, de Michelangelo (c. 1545), con estatues de Raquel y Lea (les dos muyeres de Xacob) a la manzorga y la mandrecha de Moisés.

Aveza a considerase, como fecha d'iniciu de la escultura renacentista, el famosu concursu entamáu pa diseñar unes puertes pal bautisteriu de Florencia, en 1403. Dos de los diseños concursantes, el ganador unviáu por Lorenzo Ghiberti y otru de Filippo Brunelleschi entá se conserven. Les puertes de Ghiberti entá siguen nel so llugar, magar que'l so brillu artísticu foi eclipsáu pol segundu par diseñáu pol autor pa la otra entrada del bautisteriu, les nomaes Puertes del Paraísu. Estes, feches ente 1425 y 1452, son esllumantes composiciones de sabor clásicu con gran variedá de profundidaes nos sos relieves y un tratamientu perdetalláu de los fondos. Demientres estos años de la so construcción, un ayudante de Ghiberti, Donatello, entamó la so carrera escultórica propia realizando los sos primeros trabayos: el David en mármole (1408-09) y bronce (década de 1440), y la so estatua ecuestre de Gattamelata, amás de dellos relieves. Otra de les figures más destacaes de la dómina foi Andrea del Verrocchio, del que destaca la so estatua ecuestre de Bartolomeo Colleoni, anguaño en Venecia. El so discípulu Leonardo da Vinci diseñó en 1482 una estatua ecuestre p'asitiar na ciudá de Milán, que nun llegó a realizase porque'l so modelu n'arcilla foi destruyíu por soldaos franceses en 1499.

Nesti periodu cobró gran fuercia la costume d'encargar escultures. Los rícos facíanlo p'adornar les sos cases, y l'estáu pa colocales en llugares públicos. Especialmente n'Italia, au les escultures públiques constitúinse nún de los elementos de referencia nel paisaxe de los centros urbanos. La escultura relixosa, al tiempu, abandonó los llugares públicos pa instalase dientro les ilesies. La escultura de retratu, especialmente bustos, fízose perpopular n'Italia alredor de 1450; rescamplen nesti campu el napolitanu Francesco Laureana, especializáu en figures de muyeres xóvenes con pose reflesiva, y Antonio Rossellino y otros, dedicaos a facer bustos, de rasgos mui marcaos, de homes de negocios, pero tamién de nenos. La medaya con retratu, inventada por Pisanello, fízose mui popular ente les muyeres, y tamién desarrollose una nueva forma d'escultura en metal fundíu, les plaquettes con decoración en relieve.

Michelangelo foi un escultor activu ente 1500 y 1520, y autor de grandes obres maestres como'l David, la Pietá o'l Moisés. La influyencia d'estes y otres de les sos obres, como la tumba del papa Xuliu II y la capilla de los Médici, nos autores posteriores nun puede obviase. El so David tien una pose peculiar, el nomáu contrapposto, tomada direutamente de la escultura clásica, y diferénciase de les versiones previas d'esti tema en que representa al rei israelín primero de la so llucha con Goliat y non dempués d'ella. Asina, en vez d'apaecer con xestu victoriosu, como nos Davides de Donatello o Verrocchio, el de Michelangelo apaez tensu y concentráu, preparáu pa la batalla.

• 
  Panel del Sacrificiu d'Isaac de la puerta del bautisteriu de Florencia, obra de Lorenzo Ghiberti.
• 
  Neños tocando música, detalle de la decoración del Cantoria (galería de los cantantes) de la catedral de Florencia (Luca della Robbia, c. 1438).
• 
  El David de Donatello (c. 1440). Muséu Bargello, Florencia.
• 
  Judit y Holofernes, escultura de Donatello (c. 1460). Palazzo Vecchio, Florencia.
• 
  Bustu femenín (en metal fundíu), de Francesco Laurana.
• 
  La dubia de Santu Tomás, de Verrocchio (1467–83). Orsanmichele, Florencia.
• 
  David de Michelangelo (c. 1504). Galleria dell'Accademia, Florencia.
• 
  La Pietá de Michelangelo (c. 1513–1516). Basílica de San Pedro del Vaticanu, Roma.

Manierismu

Mercuriu y Psique, escultura en bronce fecha en 1593 pal emperador Rodolfu II por Adriaen de Vries.

Neto que na pintura, la escultura, nel manierismu italianu inicial, foi n'esencia un intentu d'atopar un estilu orixinal que sobrepasara los llogros del nomáu Altu Renacimientu (década de 1490-1527). Nel campu escultóricu esto yera, cenciellamente, ameyorar la obra de Michelangelo. Dafechamente, muncha de la evolución d'esti estilu producióse al traviés de proyeutos fechos pa enllenar güecos na Piazza della Signoria de Florencia, au taba'l David de Michelangelo. Baccio Bandinelli, autor de la obra Hércules y Caco, utilizó un proyeutu del propiu Michelangelo, al que-y encargaran una obra que complementase al David na decoración de la plaza. Pese a que l'autor definitivu nun ye anguaño mui popular, y que la estatua foi ridiculizadada por Benvenuto Cellini, que comparó al so musculosu Hércules con "un sacu de melones", la obra inclúi un elementu novedosu: la introducción de paneles con relieve nel pedestal de les estatues. No que cinca a Cellini, la so obra Perséu cola cabeza de Medusa ye, ensin dubia, una obra maestra, comparable a los Davides de Michelangelo y y Donatello. Taba diseñada con ocho ángulos de visión, dalgo que ye otra de les caracteríctiques de la escultura manierista. Primeru qu'escultor fora orfebre, y el so famosu Saliera (saleru), fechu n'oru parcialmente esmaltáu pal rei Franciscu I de Francia, foi la so primer escultura, que marca quiciás el cumal del so talentu. Los exemplos anteriores son una buena muestra de la estensión de los temes seculares, especialmente figures mitolóxiques, como motivos representaos nes estatues de gran tamañu; previemente esos temes apaecíen namái n'escultures de pequeñu tamañu.

Les figures pequeñes en bronce, qu'adornaben los gabinetes de la xente rica que tenía'l vezu de coleccionar obres d'arte, yeren otru tipu d'escultures popular na dómina del Renacimientu. Ente los autores d'estes estatues, xeneralmente de temática mitolóxica y con bayura de figures desnudes, destaca Giambologna, autor flamencu establecíu en Florencia que, amás d'estes obres, facía tamién escultures de tamañu natural. Dos d'elles axuntáronse a la coleición d'escultures de la Piazza della Signoria. Elli, y los sos seguidores, mos dexaron dellos exemplos de la nomada figura serpentinata, escultura na qu'apaecen dos figures entrellazaes que permite la so visión dende tolos ángulos.

• 
  Hercules y Caco, obra de Baccio Bandinelli (1525-1534).
• 
  Perséu cola cabeza de Medusa, de Benvenuto Cellini (1545–1554).
• 
  Sansón matando un filisteu, de Giambologna (c. 1562).
• 
  Saliera, de Benvenuto Cellini (1543).

Barrocu y Rococó

Na escultura barroca los grupos de figures asumen una nueva importancia, y trátase la figura humana con una concepción diferente del movimientu: les figures rodeen n'espiral un vórtex central vacíu, o muévense hacia fuera pa ocupar l'espaciu que las arrodia. La escultura barroca aveza a tener multiples puntos de visión ideales, y en xeneral sigue la tendencia, entamada nel Renacimientu, d'abandonar el relieve en favor de la escultura de bultu redondu diseñada pa ser colocada en metá d'un espaciu ampliu. Asina, les fontes esculturales como la Fontana dei Quiatro Fiumi, fecha en 1651 por Bernini en Roma, o les de los xardinos del Palaciu de Versalles son una especialidá barroca. La figura principal d'esti estilu escultóricu foi Gian Lorenzo Bernini, autor d'obres maestres como L'éxtasis de Santa Teresa (1647-52). Munches de les obres barroques, d'otra banda, añadíen elementos extraesculturales, como iluminación oculta o fontes d'agua, o fusionaben escultura y arquiteutura pa crear una esperiencia nueva al espectador. Los artistes considerábense a sigo mesmos como continuadores de la tradición clásica, magar qu'admiraben más la escultura romana tardía y la helenística que la que nosotros tenemos anguaño por clásica.

La Reforma protestante provocó la desapaición cuasi total de la escultura relixosa na mayoría de la Europa septentrional, y magar que la escultura de tema secular, especialmente bustos y monumentos funerarios continuó, el Sieglu d'oru neerlandés nun tien dengún elementu escultural significativu sacante nel campu de la orfebrería. Na Europa católica, por embargu, y en parte como reacción direuta escontra la Reforma, la escultura tuvo un papel tan destacáu como'l que tuviera a finales de la Edá Media. Les estatues de gobernantes y nobles foron cada vegada más populares. No que cinca al rococó, l'estilu yera más afayaízu pa los trabayos de pequeñu tamañu, y alcontró la so forma escultural ideal na porzolana, y tamién en figures pa decorar interiores, d'ilesies o cases particulares, en madera o yesu.

• 
  Apolo y Dafne, de Gian Lorenzo Bernini (1622-1625). Galleria Borghese.
• 
  Bustu de Lluis XIV de Francia d'Antoine Coysevox (1686).
• 
  Perséu y Andrómeda, de Pierre Paul Puget (1715). Muséu del Louvre.
• 
  Escultura rococó en porzolana, de Franz Anton Bustelli.

Neoclasicismu

L'estilu neoclásicu, que recuperó na segunda metá del sieglu XVIII la cultura clásica grecorromana, dio-y gran importancia a la escultura. Rescamplen les figures de Jean-Antoine Houdon, que demostró'l potencial de la escultura pal retratu, y Antonio Canova, que los sos desnudos exemplifiquen el carácter idealista d'esti movimientu artísticu. El periodu neoclásicu foi ún de los meyores momentos pa la escultura pública, magar que los prototipos "clásicos" que tomaben de modelu yeren en xeneral copies romanes d'escultures helenístiques. Amás de Canova o Houdon, podemos citar ente los autores neoclásicos europeos más importantes al inglés John Flaxman y al danés Bertel Thorvaldsen. Esti movimientu artísticu difundiose tamién a los Estaos Xuníos, au alcanzó'l so cumal unos años más tardes que n'Europa, y au destaca ente los demás artistes neoclásicos la figura de Hiram Powers.

• 
  Bustu de Benjamin Franklin, de Jean-Antoine Houdon (1778). Metropolitan Museum of Art.
• 
  Jasón y el velu doráu, de Bertel Thorvaldsen (1803).
• 
  Psique reanimada pol besu de Cupidu, d'Antonio Canova (1787).
• 
  La esclava griega, de Hiram Powers (1851). Yale University Art Gallery.

Asia

L'arte greco-budista

Una de les representaciones más antigües de Buda (sieglos I-II). Muséu Nacional de Tokyo.

L'arte greco-budista ye la manifestación artística del greco-budismu, un sincretismu cultural ente les cultures de la Grecia clásica y el budismu que se desarrolló, nel Asia central, nel periodu de cuasi un mileniu que trescurrió ente les conquistes d'Alexandru Magnu (sieglu IV e.C.) y l'avance del Islam nel sieglu VII. L'arte greco-budista caracterízase por presentar el fuerte realismu idealista del arte helenísticu. A elli pertenecen les primeres representaciones de Buda con forma humana, que definieron el canon artísticu (y especialmente l'escultural) de la representación d'esta divinidá nel arte budista nel continente asiáticu de magar. Pese a que la cronoloxía ye incierta, parez que los estilos artísticos helenísticos sobrevivieron nesta parte del mundu varios sieglos dempués d'haber desaniciaose na cuenca mediterránea. L'apropiación del arte helenísticu nesta zona, sicasí, nun foi integral, sinón que se tomaron dellos elementos d'elli y obviáronse otros. Los más imitaos foron la figura de pie, xeneralmente con una pose relaxada y una pierna flexonada, y los cupidos alaos o "victories", que se ficieron perpopulares en toa Asia como apsares (espíritus femeninos de les ñubes y les agües na mitoloxía budista ya hinduista). La decoración vexetal d'estilu griegu tamién foi perinfluyente, y esistieron versiones indies del capitel corintiu.

Los oríxenes del arte greco-budista hai que buscalos nel reinu helenísticu greco-bactrianu (250 e.C.-130 e.C.), allugáu no qu'anguaño ye Afganistán. Dende esi focu la culturar helenística irradió al socontinente indiu col establecimientu del pequeñu reinu indo-griegu (180 e.C.-10 e.C.). Embaxu'l gobiernu de los indo-griegos, y dempués de los kushan, la interacción ente les cultures griega y budista floreció na rexón de Gandhara (norte del actual Paquistán) pa después espardese a la India ya influenciar l'arte de la rexón de Mathura (nel actual estáu indiu d'Uttar Pradesh) y más tarde l'arte hinduista del imperiu gupta, dende'l que s'espardió pel restu d'Asia. La influyencia helenística tamién llegó al norte, al Asia Central, influyendo enforma nel arte de la cuenca del Tarim (rexón autónoma de Xinjiang, China) y de les cueves de Dunhuang (provincia de Gansu, China), y finalmente na representación escultórica de la figura humana en China, Corea y Xapón.

• 
  Frisu con devotos que carreten fueyes de plátanu, n'estilu helenísticu puru, d'una columna corintia de los sieglos I-II. Buner (Paquistán). Victoria and Albert Museum.
• 
  Fragmentu d'una imaxe de Boreas, dios de los vientos. Hadda (Afganistán).
• 
  Moneda cola efixie de Demetriu I de Bactria, que reinó nel 200-180 e.C. ya invadió el norte de la India.
• 
  Cabeza de Buda de los sieglos III-IV. Hadda (Afganistán).
• 
  Representación de los dioses budistes Pancika (izquierda) y Hariti (derecha). Gandhara, sieglu III.
• 
  Capitel indo-corintiu con Buda nel centru. Gandhara, sieglos III-IV.
• 
  Ún de los Budas de Bamiyan (c. 547) en 1963 y 2008. Foron dinamitaos en marzu de 2001 polos talibanes.
• 
  Cabeza de Buda. Imperiu gupta, sieglu VI.

China

Estatua de Guanyin en madera policromada. Dinastía Liao (907–1125).

Los vasos rituales de bronce de les dinastíes Shang y Zhou fabricáronse per demientres un mileniu, entamando alredor del 1500 e.C., y exercieron una influyencia continuada nel arte chinu de magar. Son vasos de bronce fundíos con una decoración complexa de tipu zoomórficu, na que s'evita l'usu de la figura humana. La única esceición son les grandes figures recientemente descubiertes en Sanxingdui. Esti espectacular exércitu de figures de terracota foi fechu pa la tumba de Qin Shi Huang, primer emperador de la China unificada (221-210 e.C.), como una versión a gran tamañu de les figures que se colocaben, de bien tiempu atrás, nes tumbes de los poderosos pa permití-yos esfrutar, nel más allá, del mesmu estilu de vida que teníen cuando vivíen. La colocación de pequeñes figures en cerámica o madera nes tumbes pervivió dellos sieglos más, alcanzando'l so cumal, no que cinca a la calidá de les pieces, nel tiempu de la dinastía Tang. Tamién persistió en China la tradición de facer estatues de cerámica de gran tamañu, mesmo coles figures de cerámica con decoración sancai que dempués con estatues de Buda, coles estatues de tamañu cuasi natural de luohans (los perfectos, xente que yá alcanzaron el Nirvana) en cerámica o figures de gran tamañu pa decorar templos y palacios.

La producción de pequeñes figures, o grupos d'elles, de temática budista algamó una gran calidá en diversos materiales, rescamplando los trabayos en relieve sobre metal o xade. Nos periodos más tempranos de la historia imperial ficiéronse munches escultures a partir de roca sacada de complexos de cueves que facíen les veces de canteres, y tamién practicose la escultura na propia roca, con figures xeneralmente pintaes. Los escultores de toa triba yeren consideraos artesanos y, poro, consérvense los nomes de perpocos d'ellos. Dende la dinastía Ming pa en delantre la producción d'estatuines de temática secular o relixosa en porzolana y otros materiales convirtióse nuna importante fonte d'ingresos pal país al traviés de la so esportación.

• 
  Vasu de bronce de finales de la dinastía Shang (sieglos XIII-X e.C.).
• 
  Guardián de tumba, figura colocada xeneralmente per dientro de les puertes d'esta pa protexer o guiar l'alma del difuntu (c. sieglu III e.C.).
• 
  Soldáu de caballería de tamañu natural del exércitu de guerreros de terracota. Dinastía Qin (c. sieglu III e.C.).
• 
  Neña baillando, figura d'una tumba de la dinastía Han (202 e.C.-220).
• 
  Figura de caballu y mozu de cuadra en cerámica con decoración sancai. Dinastía Tang (618-907).
• 
  Buda sentáu (dinastía Tang, c. 650).
• 
  Bodhisattva en madera (dinastía Song, 960–1279).
• 
  Lleón guardián a la entrada del templu Yonghe (Beijing). Dinastía Qing, c. 1694.

Xapón

El Gran Buda del templu Tōdai-ji (c. 752)

Haza'l final del periodu Jōmon, periodu de la prehistoria xaponesa qu'abarca ente'l 12.000 y el 300 e.C., aparecen yá delles figures que podemos calificar como escultures. Tenemos vasos de cerámica con decoración en forma de llama, y tamién figures dogū (representaciones d'humanoides y animales) en cerámica finamente trabayada que presenten los carauterísticos güeyos con forma de "gafes pa la nieve". Demientres el periodu Kofun (sieglos III-VI) colocábense figures haniwa, esquemátiques y con pocu detalle, d'homes y animales, feches en terracota, a la vera de les tumbes de persones importantes de la comunidá. La llegada del budismu al archipiélagu xaponés, nel sieglu VI, acompañose de la llegada d'un nuevu estilu escultóricu, refináu y sofisticáu, con formes y estilos chinos modificaos tres del so pasu pela península coreana. El templu de Hōryū-ji (sieglu VII) y los sos elementos interiores sobrevivieron al pasu del tiempu abondo meyor que cualesquier otru templu budista contemporaneu suyu, lo que mos permite contemplar una "Trinidá Shaka" en bronce del añu 623, una figura que representa al Buda "históricu" escoltáu por dos bodhisattvas y tamién los Reis Guardianes de les Cuatro Direiciones, los cuatro dioses budistes que se representen mirando pa los cuatro puntos cardinales.

La imaxe de madera (sieglu IX) de Shakyamuni, el Buda "históricu", entronizáu nún edificiu auxiliar del templu Murō-ji, ye un exemplu típicu de la escultura de los anicios del periodu Heian. Represéntase a un Buda corporientu, vistíu con una túnica gruesa con pliegues decoraos n'estilu hompa-shiki (los pliegues recuerden a les foles del mar) y con una espresión facial austera. La escuela Kei d'escultores, especialmente Unkei, crearon y desarrollaron más tarde un nuevu estilu, más realista, de representación de la figura humana na escultura.

Práuticamente toles grandes escultures de Xapón de magar foron budistes, con dalgunos equivalentes sintoístes, y la decayencia del budismu nel archipiélagu nel sieglu XV traxo apareyada la perda d'importancia de la escultura monumental, que quedó reducida a una función de decoración arquitectónica. Por embargu, los trabayos escultóricos de pequeñu tamañu desarrolláronse hasta algamar un nivel perimportante de sofisticación téunica y refinamientu n'oxetos como los inrō (pequeñes caxes pa guardar oxetos) y los netsuke (cierres del obi, cuerda de la que colgaba'l inrō dende'l cinturón del kimonu) y fundes en metal pa les espades. Nel sieglu XIX desarrollose una industria d'esportación de pequeñes figurines de bronce, marfil o porzolana de gran refinamientu y creciente complexidá téunica na so ellaboración.

• 
  Figurina dogū coles típiques "gafes pa la nieve" (1000-400 e.C.).
• 
  Figurina haniwa (sieglu VI).
• 
  Kongo Rishiki (divinidá guardiana) na puerta principal del templu Hōryū-ji (711).
• 
  Representación d'ún de los monxos, nomaos Ganjin o Jianzhen, qu'espardieron el budismu pel Xapón. Periodu Nara, sieglu VIII.
• 
  Tríada Amitabha del templu de Jodo-ji, obra del periodu Kamakura fecha pol escultor Kaikei (1095).
• 
  Tsuba (pieza de la funda d'una espada) en bronce, oru y plata representando a un "coneyu mirando pa la lluna de la seronda" (1670-1744).
• 
  Netsuke con forma de perru, obra d'Izumiya Tomotada de finales del sieglu XVIII.
• 
  Dios del vientu en fierru repuxáu, obra de Yamada Chōzaburō (1915).

India

La primer escultura conocida nel socontinente indiu débese a la civilización del valle del Indo (3000-1700 e.C.), y atopose nos enclaves arqueolóxicos de Mohenjo-daro y Harappa, nel Paquistán. Ente les figures que s'alcontraran rescampla la famosa estatuina de bronce que representa a una baillarina. Pese a ello, les figurines en bronce o piedra son escases, mentantu que son muncho más abondantes les figurines de cerámica y los sellos en piedra, munches veces con representaciones de animales o dioses ellaboraes con gran procuru. Tres de la desapaición d'esa cultura, pasen bien de sieglos con perpocos restos d'escultura, hasta la llegada de la era budista. La única esceición relevante son un garapiellu de figures de cobre dataes, magar que provisionalmente, nel 1500 e.C. y atopaes en Daimabad.

La gran tradición india d'escultura monumental en piedra aparez relativamente tarde con respeutu a otres grandes cultures, nún momentu nel que la civilización india yá tenía desarrolláose por bastante tiempu. Habrá ser nel reináu d'Ashoka (c. 268-232 e.C.) cuando se llevanten los pilares d'Ashoka, una serie de columnes (consérvense 19) repartíes per tol territoriu que controlaba, y qu'incluyía bona parte del socontinente, nes que se inscribíen los edictos d'esti rei. Les columnes teníen, nel so cumal, escultures d'animales, principalmente lleones; entá queden seis en pie anguaño. Consérvense tamién grandes cantidaes d'escultures figuratives, la mayoría d'elles en relieve, n'estupes de la dómina budista temprana; rescamplen, pola so importancia y monumentalidá, les de Sanchi. Piénsase qu'estes figures pudieran tener evolucionao a partir d'una tradición de figures asemeyaes en madera que compartieron el budismu y l'hinduísmu.

Les escultures (hinduistes, xainistes y budistes) de Mathura, de los sieglos I-III, amuesen un amiestu de rasgos de les tradiciones propies de la India y de les influyencies occidentales qu'aportaran al socontinente al traviés del arte grecobudista de Gandhara, y constitúin la base de la escultura relixosa india posterior. El so estilu difundiose per bona parte de la India na dómina del imperiu gupta (c. 320-550) y dempués nel que puede considerase como "periodu clásicu" de la escultura india, qu'abarca'l periodu que media ente les escultures d'Ellora y les d'Elephanta y quiciás un poco dempués, esto ye, ente los sieglos V-X. Les escultures posteriores de gran tamañu son de temática cuasi exclusivamente relixosa, y tán tallaes con un diseñu bastante conservador; los dioses represéntense a menudu en pose frontal, de pie... magar que los espíritus sirvientes como los apsaras y yakshi suelen esculpise en poses sensuales, curvilínees. La talla aveza a ser perdetallada, con relieves complexos per detrás de la figura principal, tallada n'alturrelieve. Los renomaos bronces de la dinastía Chola (c. 850-1250) del Sur de la India, diseñaos munchos d'ellos pa ser pasiaos en procesión, incluin les figures de Shiva y Nataraja. Anteriores a ellos nel tiempu son le talles en granitu de Mahabalipuram, dataes na dómina de la dinastía Pallava (275-897).

• 
  La baillarina de Mohenjo-daro, III mileniu e.C. (réplica)
• 
  Cumal d'un pilar d'Ashoka (c. 250 e.C.), Vaishali.
• 
  Entrada a una estupa en Sanchi (c. 100 e.C.).
• 
  Buda de Sarnath, sieglos V-VI.
• 
  El colosal trimurti de les cueves d'Elephanta.
• 
  Templos escavaos na roca n'Ellora
• 
  Típica estatua medieval que representa a Vishnu en bipedestación (950–1150).
• 
  Escultura en mármole d'una yakshi cola típica posición sinuosa. Rayastán, c. 1450.

Sureste asiáticu

La escultura d'esta rexón xeográfica caracterízase, en xeneral, por presentar abondante ornamentación, como puede vese nes grandes escultures, budistes ya hinduistes, de la escultura khmer (sieglos X-XIII) conservaes n'Angkor Wat, el xigantescu complexu budista de Borobudur, na islla de Xava (sieglu IX) o los monumentos hinduistes de Bali. Estos dos caberes inclúin munchos relieves amás de les figures de bultu redondu. Asina, en Borobudur hai 2.672 paneles decoraos en relieve amás de 504 estatues de Buda y munches otres de guardianes, y bien de figures formando parte d'estupes.

En Tailandia y Laos la escultura llimitose, en bona medida, a la representación d'imáxenes de Buda, a menudo bañaes n'oru, de gran tamañu en templos y monasterios y piquiñines pa guardar nes cases. D'otra banda, la escultura tradicional en Myanmar desarrollose anantes del nomáu periodu Bagan (849-1297). Ehí, como nos otros países de la rexón, la mayoría de les escultures de madera del periodu Bagan y del Ava perdiéronse.

En dómines posteriores percíbese la influyencia china na escultura en Vietnam, Laos y Camboya; consérvense abondos más exemplos d'escultures de madera en toa la rexón.

• 
  Escultura en relieve del templu de Borobudur (Indonesia), c. 760–830.
• 
  Buda Vairocana (Templu de Borobudur, c. 760–830).
• 
  Avalokiteshvara, torsu en bronce (Chaiya, Tailandia) del sieglu VIII.
• 
  Avalokiteshvara en bronce (Bidor, Perak, Malasia), sieglos VIII-IX.
• 
  Vishnu del arte khmer atopáu en Prasat Rup Arak, (Camboya), c. 800-875.
• 
  Baxurrelieve en piedra representando apsaras. Templu de Bayon (Camboya), c. 1200,
• 
  Gran imaxe de Buda. Sukhothai (Tailandia), sieglu XIV.

L'Islam

L'Islam ye anicónicu, esto ye, prohibe la representación de figures humanes ya animales, lo que fai que la so escultura seya mayoritariamente d'arabescos tallaos en relieve o calaos, con base en temes vexetales que delles veces tienden a la xeometrización abstracta. Sicasí, na escultura islámica más antigua conservada, la de la fachada de Mshatta (década del 740), entá aparecen animales, acompañaes d'una decoración tupida d'arabescos, n'alturrelieve. Alcuéntrense tamién figures humanes y animales, la mayoría en baxurrelieve y acompañaos de decoración n'arabescos, en munches pieces posteriores en materiales como cerámica, marfil o metal.

Les figures d'animales en bultu redondu admitíense tamién pa escultures destinaes al usu priváu siempre que l'oxetu tuviera una utilidá práutica clara. Asina, l'arte islámicu medieval incluyía munches figures con forma d'animal en metal utilizaes como aguamaniles, quemadores d'inciensu o como base de sofitu de fontes. Rescamplen ente ellos los famosos lleones de l'Alhambra de Granada y la que ye la mayor fitura animal conocida del arte islámicu medieval, el grifu de Pisa. Nel mesmu sen, tamién había representaciones de figures animales tallaes en piedres semiprecioses usaes como mangos de puñal o copes, especialmente nel conocíu como arte Mugal (sureste d'Asia, sieglos XVI-XIX). En xeneral, el gráu d'aceptación d'esta relaxación de les estrictes normes islámiques varió nel tiempu y nel espaciu, siendo la España islámica, Persia ya India los llugares onde más s'espardieron estes representaciones animales, especialmente na corte y el so entornu.

• 
  La fachada de Mshatta, perteneciente a un palaciu averáu a Damasco (década del 740).
• 
  El grifu de Pisa, de 107 cm d'altor, probablemente del sieglu XI.
• 
  Fragmentu d'un panel de cerámica, con caligrafía en blancu sobro un fondu d'arabescos n'azul (Samarcanda, sieglu XV).
• 
  Daga de la dómina del imperiu Mugal, con mangu de xade, oru, rubinos y esmeraldes. Fueya n'aceru con incrustaciones n'oru.

África

Máscara de Gabón

Históricamente, la mayoría de la escultura africana, sacante dalgunes escultures monumentales del Antiguu Exiptu, creóse en madera y otros materiales perecederos, lo que fai que namái se conserven figures de los caberos sieglos, munches d'elles en cerámica, en diverses zones del continente. Les máscares son elementos importantes nel arte de munchos pueblos, y tamién les figures humanes, xeneralmente perestilizaes. Hay bayura d'estilos nel continente, a menudu variando dientro del mesmu contestu d'orixe dependiendo del usu del oxetu. Sicasí, hai grandes tendencies rexonales evidentes; asina, l'apaición de la escultura ye más habitual entre "grupos de agricultores sedentarios de les cuenques fluviales de los ríos Níxer y Congo", nel oeste d'África.. Ye relativamente infrecuente que se represente nelles direutamente la imaxe d'un dios o diosa, pero la mayoría de les máscares yeren feches pa ser emplegaes en ceremonies relixoses. Anguaño, son feches pa los turistes; ye lo que dalgunos nomen arte d'aeropuertu. Les máscares africanes influyeron enforma nel arte modernista européu, qu'alcontró inspiración na so falta de preocupación pola representación naturalista de la realidá.

El reinu nubiu de Kush, nel actual Sudán, tenía contactos estrenchos, y delles veces violentos, con Exiptu, y produció escultures monumentales con estilos derivaos de los del so vecín septentrional. Nel oeste d'África les escultures más antigües conocíes pertenecen a la cultura Nok, que s'espardió ente'l 500 e.C. y el 500 per tierres de l'actual Nixeria; son figures d'arcilla que representen figures humanes con cuerpos allargaos y formes angulares. Les cultures de la zona posteriores a ella desarrollaron el modeláu en bronce pa facer relieves colos que decorar palacios, como los famosos bronces de Benín, y tamién escultures de cabeces de reis, d'estilu naturalista, como les que se conservan alredor de la ciudá yoruba d'Ife, feches en terracota y metal ente los sieglos XII-XIV. Los pesos d'Akan, fechos n'oru, son un tipu de pequeñes escultures de metal producíes ente 1400 y 1900; dalgunos aparentemente representen refranes, un elementu narrativu poco habitual nel arte africanu. Consérvense tamién dalgunes vistimientes reales qu'incluyíen espectaculares elementos esculpíos n'oru.

Munches figures producíes nel África occidental utilícense'n rituales relixosos, y a menudu tán cubiertos de vistíos que se-yos ofrenden. Los pueblos de fala mandé ellaboren pieces de madera con cuerpos planos y brazos y piernes en forma de cilindru. Nel África central, por embargu, les principales carauterístiques distintives inclúin caras con forma de corazón que se curven haza l'interior feches a partir de círculos y puntos.

Les poblaciones de la rexón de los Grandes Llagos nun tienen sonadía pola so escultura. Nostante, hai que mencionar les escultures feches sobro troncos finos, una especie de tótems tallaos con formes humanes y decoraos con formes xeométriques y remataes con figures d'animales, persones ya otros oxetos. Estes pértigues asítiense a la vera de les tumbes, y asóciense cola muerte y el mundu de los antepasaos. D'otra banda, nel xacimientu nomáu Gran Zimbabwe, qu'abarca los restos de la que fora la capital del reinu de Zimbabwe na Edá del Fierro final, mos dexó edificios imponentes y de mayor valir que les sos estatues, pero los sos ocho páxaros de Zimbabwe, fechos n'esteatita y montaos enriba de monolitos, parecen haber tenío una significación especial. Los escultores zimbabwanos de l'actualidá, heriedes de los autores d'aquellos, tienen algamao un reconocimiento internacional importante coles sos escultures n'esteatita. No que cinca a l'África del Sur, les figures más antigües conservaes, n'arcilla, son de los años 400-600, y son cabeces cilíndriques nes que s'amiesten rasgos humanos y animales.

• 
  Escultura en terracota de la cultura Nok (500 e.C.-500)
• 
  Cabeza de terracota de la ciudá d'Ife (sieglos XII-XIV)
• 
  Cabeza de bronce de la cultura yoruba. Ife, Nixeria, sieglu XII)
• 
  Escultura d'una Reina Madre. Benín, sieglu XVI
• 
  Máscara de marfil. Benín, sieglu XVI
• 
  Ún de los bronces de Benín. Nixeria, sieglos XVI-XVIII
• 
  Máscara. Burkina Fasu, sieglu XIX
• 
  Figura de la cultura Mambila (Nixeria)

América

L'América precolombina

La escultura n'América Llatina desarrollose en dos áreas separtaes y diferenciaes: Mesoamérica nel norte, y Perú nel sur. En dambes áreas la escultura foi, al principiu, en piedra, entamando a usase posteriormente, cuando les civilizaciones de la zona foron siendo teunolóxicamente más eficientes, en terracota y metal. La rexón mesoamericana produció más escultura monumental, con obres que van de los xigantesques figures feches con bloques de piedra de les cultures olmeca y tolteca a los esquisitos baxurrelieves que caractericen a les cultures maya y azteca. Na rexón andina, por el contrario, les escultures yeren piquiñines, pero tamién de gran calidá artística.

• 
  Figura de ñácaru. Cultura olmeca, 1200-900 e.C.
• 
  Máxcara de xade. Cultura olmeca, 1000–600 e.C.
• 
  Cabeza colosal númberu 2. Cultura olmeca, 1200–900 e.C.
• 
  Estela de La Mojarra. Cultura epi-olmeca, sieglu II
• 
  Chalchiuhtlicue. Xacimientu de Teotihuacán, 200–500
• 
  Máscara. Teotihuacán, 200–600
• 
  Detalle de la decoración del Templu de la Serpiente Emplumada. Teotihuacán, 200-250
• 
  Urna funeraria con forma de xaguar o murciélagu. Oaxaca, 300–650
• 
  Zapica de cerámica con forma de cabeza humana. Cultura moche, Perú, 100 e.C. - 700
• 
  K'inich Janaab Pakal I, ajaw de Palenque. Cultura maya, 603–683
• 
  Ahkal Mo' Naab III, ajaw de Palenque. Sieglu VIII
• 
  Upakal K'inich, ajaw de Palenque. Sieglu VIII
• 
  Figura del xacimientu de la islla de Jaina. Cultura maya, 650–800
• 
  Cara. Cultura de Veracruz, 600–900
• 
  Atlante del xacimientu de Tollan-Xicocotitlan
• 
  Serpiente con dos cabeces. Mosaicu sobre madera. Cultura azteca (probablemente mixteca), c. 1400–1521

N'América del Norte, pela so banda, usóse la madera pa esculpir tótems, máscares, cacía, canoes y bayura d'oxetos pa usos diferentes, con diferencies importantes nel so diseñu y decoración ente les diferentes cultures y rexones. L'estilu más desarrolláu ye'l de la rexón pacífica noroccidental, na que un grupu d'estilos formales ellaboraos y perestilizaos sentaron les bases d'una tradición escultórica que continúa anguaño. Amás de los famosos tótems, les fachaes de les cases incluíen talles de conteníu relixosu y mortuoriu. Ente los inuit, nel estremu más occidental del continente, la tradición de talla d'oxetos en marfil y esteatita entá continúa anguaño.

Realismu y modernismu tempranu (sieglu XIX y primer terciu del XX)

El pensador, d'Auguste Rodin (1902). Musée Rodin, París

Oviri (Xabaz), escultura (75 x 19 x 27 cm)de cerámica parcialmente vidriada de Paul Gauguin (1894). Musée d'Orsay, París.

• 
  Xuana d'Arcu, de François Rude (1852). Muséu del Louvre, París.
• 
  Ugolino y los sos fíos, de Jean-Baptiste Carpeaux(1857–1860). Metropolitan Museum of Art, Nueva York.
• 
  La pequeña baillarina de 14 años, d'Edgar Degas, fundida en bronce en 1922 a partir d'una escultura modelada alredor de 1880.
• 
  Los burgueses de Calais, d'Auguste Rodin (1889). Calais, Francia.
• 
  Eros, d'Alfred Gilbert (1893), la primer escultura del mundu fecha n'aluminiu. Piccadilly Circus, Londres.
• 
  Detalle de la tumba de Cyprian Kamil Norwid na catedral de Cracovia, obra de Czesław Dźwigaj.
• 
  Escultura n'honor de la Edá de los Descubrimientos y los navegantes portugueses. Lisboa, Portugal.
• 
  Día y nueche, escultura d'Antoine Bourdelle en mármol (1903). Musée Bourdelle, París.
• 
  Anantes del bañu, de Jan Štursa (1906). Galería Nacional, Praga.
• 
  Danae, d'Auguste Rodin (1885). Muséu de Bagnols-sur-Cèze (Gard, Francia).
• 
  Cabeza de muyer, d'Amedeo Modigliani (1911-12). Tate Gallery, Londres.
• 
  La nueche, d'Aristide Maillol (1920). Stuttgart.

La escultura clásica del sieglu XIX caracterizábase por un compromisu col naturalismu (Antoine-Louis Barye) o por una grandiosidá maxestuosa (Lord Leighton). Esta tradición clásica dixebróse en diferentes caminos cola llegada del sieglu XX, pelo l'estudiu de los modelos vivos y la tradición postrenacentista siguíen siendo parte fundamental de toes elles.

Auguste Rodin foi'l más famosu de los escultores europeos del entamu del sieglu XX. Ye avezao referise a él, y tamién a los sos discípulos, qu'incluyíen a Camille Claudel y Hugo Rheinhold, como escultores impresionistes, que buscaben modelar nes sos obres un momentu fugaz de la vida corriente.

El clasicismu modernu amosó menos interés pol naturalismu, y muncho más pola estilización formal. Los escultores enfotáronse más nos ritmos de los volúmenes y los espacios y a les cualidaes de les superficies, dexando de llau l'interés porque la escultura tuviera un conteníu narrativu o por tallar de forma fiel los detalles anatómicos o de vestuariu. Púnxose'l focu más en reflexar aspectos psicolóxicos que nel realismu físicu, y atropáronse pa les escultures influyencies d'estilos artísticos de tol mundu.

Ente los principales autores del clasicismu modernu podemos citar a Aristide Maillol, Alexander Matveyev, Joseph Bernard, Antoine Bourdelle, Georg Kolbe, Libero Andreotti, Gustav Vigeland, Jan Stursa o Constantin Brâncuși. Na década de 1930 el clasicismu modernu convirtióse nel estilu "nacional" de dos grandes rexímenes totalitarios, l'Alemaña nazi y la Unión de Repúbliques Socialistes Soviétiques, que s'apropiaron del trabayu d'escultores anteriores a la so aparición, como ye'l casu de Kolbe y Wilhelm Lehmbruck n'Alemaña o Matveyev en Rusia. Demientres los setenta años d'esistencia de la URSS, toles xeneraciones d'escultores foron aprendíos nel estilu distintivu del país, el nomáu realismu socialista, que supunxo una vuelta al énfasis decimonónicu nel melodrama y el naturalismu.

La enseñanza de los cánones clásicos desapaeció de la educación artística n'Europa occidental hacia 1970, y estes corrientes del clasicismu modernu foron marxinalizaes dientro ha historia del modernismu. Sicasí, el clasicismu siguió siendo la base de la educación artística nes academies soviétiques hasta 1990, poniendo los cimientos pa l'apaición d'un arte figurativu espresivu nel este d'Europa y en delles partes d'Oriente Mediu. Pal añu 2000, pese a que la tradición europea clásica entá atrae al públicu, sigue pendiente una revisión de los programes educativos que ponga en valor el so desarrollu contemporaneu.

Dalgunos de los clasicistes modernos adoptaron un estilu más decorativu, averáu al art decó (Paul Manship, Jose de Creeft, Carl Milles); otros optaron por un estilu más espresivu y con una mayor estilización abstracta (Anton Hanak, Wilhelm Lehmbruck, Ernst Barlach, Arturo Martini), y otros más tomaron como modelu la escultura del Renacimientu (Giacomo Manzù, Venanzo Crocetti).

Modernismu

Figura flotante, de Gaston Lachaise (1927), Escultura en bronce, númberu 5 d'una serie de 7, National Gallery of Australia

Los movimientos escultóricos del modernimsu inclúin, ente más otros, el cubismu, l'abstracción xeométrica, el movimientu De Stijl, el suprematismu, el constructivismu, el dadaísmu, el surrealismu, el futurismu, el formalismu, l'espresionismu abstractu, el Pop-Art, el minimalismu, el Land Art y l'Installation Art.

Figura recostada, de Henry Moore (1951). Fitzwilliam Museum, Cambridge.

CUBI VI, de David Smith (1963). Israel Museum, Xerusalén.

Al entamu del sieglu XX Pablo Picasso revolucionó l'arte de la escultura al entamar a crear les sos "construcciones", l'equivalente escultural del collage pictóricu, nes qu'amestaba diversos oxetos y materiales ensin rellación ente ellos nuna pieza escultórica única. La llegada del surrealismu fizo qu'entamaren a llamase "escultures" a coses que primero nun teníen consideración tala. Exemplu d'ello son les nomaes "escultures involuntaries", feches con diverses téuniques. Asina, el coulage consistía en facer escultures vertiendo dalgún material fundíu (cera, metal o inclusive chocolate) n'agua frío, dexando que ficiera figures caprichoses. Nos años siguientes Picasso fizo bien de trabayos en cerámica, provocando, cola so reinterpretación del arte cerámicu de diverses partes del mundu, un renacimientu de l'alfarería, con figures destacaes como George E. Ohr, Peter Voulkos, Kenneth Price y Robert Arneson. Marcel Duchamp creó l'estilu nomáu arte atopáu (del francés objet trouvé), nel que se trabaya sobre productos manufacturaos con intención artística, fabricando pieces como Fonte (1917).

De forma asemeyada, el trabayu de Constantin Brâncuși al entamu del sieglu abrió'l camín pal desarrollu posterior de la escultura abstracta. Rebelándose escontra'l naturalismu de Rodin y los sos contemporáneos, Brâncuși buscó espresar les esencies de los oxetos representaos, como puede vese nes elegantes y refinaes formes de la so serie d'escultures Páxaros nel espaciu (1924).

La influyencia de Brâncuși, colos sos conceptos de reducción y abstracción, puede rastrexase al traviés de les décades del 1930 y 1940 n'artistes como Gaston Lachaise, Jacob Epstein, Henry Moore, Alberto Giacometti, Joan Miró, Julio González, Pablo Serrano o Jacques Lipchitz. Na segunda d'eses décades la escultura abstracta recibió un nuevu emburrión de manes d'Alexander Calder, Len Lye, Jean Tinguely y Frederick Kiesler, pioneros del arte cinéticu.

L'espoxigue de la demanda d'arte públicu en forma d'escultures n'alcordanza de los desastres de les dos guerres mundiales y de los que morrieron nelles fizo que la escultura modernista paeciera desaparecer demientres unos años, pero a partir de la década del 1950 les comisiones encargaes de la construcción d'escultures públiques entamaron a aceptar el modernismu, qu'entamó a facese visible nos espacios urbanos. Asina, Picasso recibió l'encargu de facer una maqueta pa construyir una escultura pública de 15 m d'altor, la nomada Chicago Picasso (1967), que preside la plaza Daley d'esa ciudá estauxunidense. Nel so diseñu, ambiguu y controvertíu, ye difícil saber cuála ye la figura representada: una muyer, un caballu, un páxaru... o quiciás una figura totalmente abstracta.

Nos caberos años de la década del 1950, y na del 1960, los escultores abstractos entamaron a esperimentar con bayura de nuevos materiales pa crear el so trabayu, nel qu'adoptaron tamién enfoques novedosos de la creación escultórica. La imaxinería surrealista, l'abstracción antropomórfica, l'usu de nuevos materiales y la combinación de superficies y oxetos variaos nuna única pieza convirtiéronse no avezao na mayoría de la nueva escultura modernista. Tamién surdieron proyeutos de collaboración ente diseñadores, artistes y arquiteutos qu'integraron la escultura d'esteriores nel entornu arquiteutónicu. La obra d'autores como Isamu Noguchi, David Smith, Alexander Calder, Jean Tinguely, Richard Lippold, George Rickey, Louise Bourgeois y Louise Nevelson ye bona prueba d'ello.

La década del 1960 tuvo dominada pol espresionismu abstractu, l'abstracción xeométrica y el minimalismu, que reduz la escultura a les sos carauterístiques más esenciales y fundamentales. Rescamplen, ente les obres d'esti periodu, los Cubi de David Smith y los trabayos n'aceru, trabayáu mediante soldadura, d'Anthony Caro y otros munchos escultores, les escultures feches a partir de pieces de coches de desguace de John Chamberlain y les pieces de gran tamañu ellaboraes con diversos materiales de desechu, ensamblaos munches veces cola axuda d'una grúa, de Mark di Suvero. Ente los autores minimalistes podemos citar a Tony Smith, Donald Judd, Robert Morris, Anne Truitt, Giacomo Benevelli, Arnaldo Pomodoro, Richard Serra, Dan Flavin, Carl Andre y John Safer, qu'añadió movimientu y monumentalidá a la pureza de llinies que caracteriza a esi movimientu artísticu.

Demientres les décades del 1960 y 1970 la tradición d'escultura figurativa, fecha por artistes modernistes con formes estilizaes, ta representada por autores como Leonard Baskin, Ernest Trova, George Segal, Marisol Escobar o Paul Thek, con figures singulares como Robert Graham, autor de bien d'escultures de gran tamañu en bronce cola figura humana como base, o Fernando Botero, que treslladó les carauterístiques figures de persones con sobrepesu de la so pintura al mundu de la escultura monumental.

Galería d'escultura modernista

• 
  Violonchelista, d'Otto Gutfreund (1912–13).
• 
  Día y nueche, de Jacob Epstein, escultures esculpíes na fachada de les oficines centrales del metro de Londres.
• 
  Los pas aflixíos, de Käthe Kollwitz (1932), memorial de la Primer Guerra Mundial fechu n'alcordanza del so fíu Peter. Cementeriu de soldaos alemanes de Vladslo (Bélxica).
• 
  El nacimientu de les muses, de Jacques Lipchitz (1944–1950).
• 
  Monolith-Empyrean, de Barbara Hepworth (1953).
• 
  Three Piece Reclining figure No.1, de Henry Moore (1961). Yorkshire.
• 
  Fonte, de Marcel Duchamp (1917). Réplica en porzolana fecha en 1964 (con autorización del artista) por Arturo Schwarz a partir d'una fotografía d'Alfred Stieglitz. Tate Modern, Londres.
• 
  Escultura pública (conocida como Chicago Picasso), de Pablo Picasso (1967). Plaza Daley, Chicago (Estaos Xuníos).
• 
  Heimar, d'Isamu Noguchi (1968). Xardín d'escultures de Billy Rose, Israel Museum, Xerusalén.
• 
  Cuatro cuadraos en cuadratín, escultura cinética de George Rickey (1969). Terraza de la Galería Nacional de Berlín (Alemaña)
• 
  Cruxiente con discu bermeyu, d'Alexander Calder (1973). Schlossplatz, Stuttgart.
• 
  Atmosphere and Environment XII, de Louise Nevelson (1970–73). Philadelphia Museum of Art.
• 
  Black Cover Flat, escultura n'aceru d'Anthony Caro (1974). Tel Aviv Museum of Art, Tel Aviv.
• 
  Muyer y páxaru, de Joan Miró (1982). Barcelona.
• 
  Maman, de Louise Bourgeois (1999). Esteriores del Muséu Guggenheim de Bilbao.

Movimientos escultóricos contemporáneos

Christo y Jeanne-Claude, Umbrellas 1991, Xapón.

Delles tendencies que ficieron esplorar nuevos caminos na escultura abstracta, como l'arte in situ, creáu pa ser asitiáu nun llugar específicu, y l'arte ambiental, tán representaos por artistes como Andy Goldsworthy, Walter De Maria, Richard Long, Richard Serra, Robert Irwin George Rickey y Christo y Jeanne-Claude. La escultura ambiental, qu'altera l'entornu natural, ye nomada "arte de la tierra", y cunta ente los sos principales esponentes con artistes como Robert Smithson, Michael Heizer o James Turrell, creador del perfamosu Roden Crater. La escultura postminimalista, d'otra banda, foi aniciada y desarrollada, ente más otros, por Eva Hesse, Sol LeWitt, Jackie Winsor, Keith Sonnier y Bruce Nauman.

Simultáneamente con ellos, y tamién nes décades de 1960 y 1970, artistes d'obra tan diversa como Eduardo Paolozzi, Chryssa, Claes Oldenburg, George Segal, Edward Kienholz, Nam June Paik, Wolf Vostell, Duane Hanson o John DeAndrea esploraron l'abstracción, la imaxinería y la figuración de formas distintes a tolo anterior al traviés del videoarte, l'arte ambiental, la escultura con lluz y el nomáu installation art, ellaboráu con figures tridimensionales que buscan tresformar l'espaciu.

L'arte conceptual, pa finar, ye arte nel que se da más importancia a los conceptos o idees de la obra que a les tradicionales preocupaciones estétiques y materiales. Ente les obres más destacaes d'esta tendencia podemos citar One and three chairs (Joseph Kosuth, 1965) o An oak tree, de Michael Craig-Martin, amás de les obres de Joseph Beuys y James Turrell.

Minimalismu

• 
  Tony Smith, Free Ride, 1962. Museum of Modern Art, New York.
• 
  Larry Bell, Untitled, 1964. Hirshhorn Museum and Sculpture Garden.
• 
  Donald Judd, Untitled 1977. Münster, Alemaña.
• 
  Richard Serra, Fulcrum (1987), escultura n'aceru corten asitiada cerca la estación de tren de Liverpool Street, en Londres.

Postminimalismu

• 
  Richard Long, South Bank Circle,, 1991. Tate Liverpool.
• 
  Jean-Yves Lechevallier, Ala encadenada (Fettered wing), 1991.
• 
  Anish Kapoor, Turning the World Upside Down, 2010. Israel Museum.
• 
  Rachel Whiteread, Monumentu a l'holocaustu, 2000. Judenplatz, Viena.
• 
  Richard Wentworth, Siege (1983-1984). Tate Modern Gallery, Londres.
• 
  Guardianes del tiempu, escultura de lluz de Manfred Kielnhofer na bienal de light art, Austria, 2010.
• 
  Spire de Dublín, nomada oficialmente Monumentu a la lluz, n'aceru inoxidable. Ye, colos sos 121,2 m d'altor, la escultura más alta del mundu.

Conservación de les obres

Les escultures son sensibles a les condiciones ambientales como la temperatura, la humedá y la esposición a la luz y la radiación ultraviola. La lluvia ácida ye dañina tamién pa les escultures ellaboraes con determinaos materiales, asina como pa los monumentos históricos. El daño produzse cuando l'ácidu sulfúricu de la lluvia ácida reacciona químicamente col calciu que forma parte de la piedra caliar, l'arenisca, el mármole o'l granitu y forma yesu, qu'entama a escascarillar.

De siempres hebo munches escultures dispuestes n'espacios públicos. El so robu nunca foi un problema, pues les obres yeren inmediatamente reconocibles. Por embargu, al entamu del sieglu XXI el valor de los metales medró tanto qu'entamó a ser un problema'l robu d'escultures de bronce de gran tamañu pa fundir el metal y vendelu al pesu.

Bibliografía

• Boardman, John (ed.), The Oxford History of Classical Art. Oxford University Press, 1993. ISBN 0198143869.
• Boucher, Bruce, Italian Baroque Sculpture. 1998, Thames & Hudson (World of Art), ISBN 0500203075.
• Calkins, Robert G. Monuments of Medieval Art, Dutton, 1979, ISBN 0525475613.
• Cherry, John. The Holy Thorn Reliquary. 2010, British Museum Press (British Museum objects in focus), ISBN 0-7141-2820-1.
• Cook, R.M., Greek Art. Penguin, 1986 (reimpresión de la obra orixinal, de 1972), ISBN 0140218661.
• Frankfort, Henri, The Art and Architecture of the Ancient Orient, en Pelican History of Art, (4ª ed.). Penguin, 1970, ISBN 0140561072.
• Harle, J.C., The Art and Architecture of the Indian Subcontinent, (2ª ed.). 1994, Yale University Press (Pelican History of Art), ISBN 0300062176.
• Henderson, George. Gothic, 1967, Penguin, ISBN 0-14-020806-2.
• Henig, Martin (ed.), A Handbook of Roman Art, Phaidon, 1983, ISBN 0714822140.
• Honour, Hugh, and Fleming, John, A World History of Art, 1ª ed. Macmillan, Londres, 1982. ISBN 0333371852.
• Kitzinger, Ernst, Byzantine art in the making: main lines of stylistic development in Mediterranean art, 3rd–7th century, 1977, Faber & Faber, ISBN 0571111548.
• Olson, Roberta J.M., Italian Renaissance Sculpture. 1992, Thames & Hudson (World of Art), ISBN 978-0-500-20253-1.
• Paine, Robert Treat, en: Paine, R. T. & Soper A, The Art and Architecture of Japan, (3ª ed.). 1981, Yale University Press Pelican History of Art, ISBN 0140561080.
• Piotrovsky M.B. and Rogers, J.M. (ed.), Heaven on Earth: Art from Islamic Lands. 2004, Prestel, ISBN 3791330551
• Rawson, Jessica (ed.), The British Museum Book of Chinese Art (2ª ed.). 2007 , British Museum Press, ISBN 9780714124469.
• Robertson, Martin, A shorter history of Greek art. Cambridge University Press, 1981, ISBN 978-0-521-28084-6.
• Robinson, James, Masterpieces of Medieval Art, 2008, British Museum Press, ISBN 978-0-7141-2815-3.
• Sandars, Nancy K., Prehistoric Art in Europe, en Pelican History of Art. Penguin, 1968.
• Sickman, Laurence, en: Sickman L & Soper A, The Art and Architecture of China, Pelican History of Art, (3ª ed.). 1971, Penguin , LOC 70-125675.
• Smith, W. Stevenson, y Simpson, William Kelly. The Art and Architecture of Ancient Egypt, (3ª ed), 1998. Yale University Press (Penguin/Yale History of Art), ISBN 0300077475.
• Snyder, James. Northern Renaissance Art, 1985, Harry N. Abrams, ISBN 0136235964.
• Strong, Donald, et al., Roman Art, 1995 (2ª ed.), Yale University Press (Penguin/Yale History of Art), ISBN 0300052936.

Enllaces esternos

• Wikimedia Commons acueye conteníu multimedia sobre Escultura.

• Datos: Q11634
• Multimedia: Sculpturing
• Cites famoses: Escultura